Published:Updated:

நம்பிக்கையூட்டும் மினி தொடர் 6 - மீண்டும் மீள்வோம்!

கொள்ளை நோய்களை வென்ற வரலாறு

பிரீமியம் ஸ்டோரி
உலகுக்கே இன்று மாஸ்க் மாட்டிவிட்டுள்ளது கோவிட்-19. இதன் பாட்டன், முப்பாட்டன் வைரஸ்களும், மற்ற வைரஸ்களும் இந்த 21-ம் நூற்றாண்டில் மனித இனத்துக்கு ஏற்படுத்திய அச்சுறுத்தல்களையும், மருத்துவ உலகால் அவை கட்டுப்பாட்டுக்குள் கொண்டுவரப்பட்டதையும் பார்ப்போம்.

‘சார்ஸ்’ ஆட்டம்!

2002-ம் ஆண்டு சீனாவின் தென்பகுதியில் உள்ள குவாங்டாங் எனும் மாகாணத்திலிருந்து, திடீரென மூச்சுத்திணறலை உருவாக்கி அதிக மரணங்களை ஏற்படுத்தும் தொற்று கண்டறியப்பட்டது. 2002-2003 காலகட்டத்தில் சீனா, கனடா, ஹாங்காங், சிங்கப்பூர், சீன தைபை நகரம், வியட்நாமின் ஹனோய் நகரம் ஆகியவற்றுக்குப் பரவி சுமார் 8,096 பேரைத் தொற்றுக்குள்ளாக்கியது. அதில் 774 பேர் மரணமடைந்தனர். இதை உண்டாக்கிய வைரஸ், கொரோனா வைரஸ் குடும்பத்தைச் சேர்ந்தது என்று கண்டறியப்பட்டது. அது உண்டாக்கிய நோய்க்கு ‘சார்ஸ்(SARS - Severe Acute Respiratory Syndrome)’ என்று பெயரிடப்பட்டது. குறுகிய காலத்தில் தீவிரமான மூச்சுத்திணறலை ஏற்படுத்தும் நோய் என்பது பொருள். அந்த வைரஸுக்கு ‘சார்ஸ் கொரோனா வைரஸ்(SARS CoV)’ என்று பெயரிடப்பட்டது.

நம்பிக்கையூட்டும் மினி தொடர் 6 - மீண்டும் மீள்வோம்!

தற்போது பெருந்தொற்றாகப் பரவிவரும் கோவிட்-19 கொரோனா வைரஸுக்கு முப்பாட்டன்தான், சார்ஸ் கொரோனா வைரஸ். அது வௌவால்களிடமிருந்து மனிதனுக்குப் பரவியதாகக் கூறப்படுகிறது. 2003 ஜூலை மாதத்துக்குப் பிறகு உலகில் எங்கும் அந்தத் தொற்று கண்டறியப்படவில்லை.

ஒட்டகத்திலிருந்து மனிதனுக்குப் பரவிய ‘மெர்ஸ்!’

உலகம் இரண்டாவது முறையாக கொரோனா வைரஸ் தொற்றுத் தாக்குதலுக்கு உள்ளானது, 2014-ம் ஆண்டு. தாக்குதலுக்கு உள்ளான நாடு, சவுதி அரேபிய மன்னராட்சி நாடு. இம்முறை ஒட்டகத்திலிருந்து மனிதனுக்கு இந்த வைரஸ் பரவியது. ஏப்ரல் 2014-ல் தொற்று கண்டறியப்பட்டது முதல் தற்போது வரை 2,519 நோயாளிகள் கண்டறியப்பட்டுள்ளனர். அவர்களுள் 866 பேர் உயிரிழந்துள்ளனர். நோய் தாக்கியவர்களில் 35% மரணங்களை ஏற்படுத்திய அந்நோய்க்கு ‘MERS (Middle East Respiratory Syndrome) என்று பெயரிடப்பட்டது. மத்திய கிழக்கு நாடுகளில் மட்டும் சூழ்கொண்டு தாக்கியதால் இந்தப் பெயர். அந்த வைரஸுக்கு மெர்ஸ் கொரோனா வைரஸ் என்று பெயரிடப்பட்டது.

 கொள்ளை நோய்
கொள்ளை நோய்

மேற்சொன்ன இரண்டு கொரோனா வைரஸ்களும் சுவாசப்பாதையில் தொற்று ஏற்படுத்தி, பாதிக்கப்பட்டவர் இருமும்போதும் தும்மும்போதும் பரவின. அந்தக் கிருமித்தொற்றுள்ள பொருள்களை மற்றவர்கள் தொடுவதன் மூலமும் பரவின. இதேபோன்றுதான், இந்த வைரஸ்களின் வழித்தோன்றலான கோவிட்-19 வைரஸும் பரவிவருகிறது. தனது மூதாதைய வைரஸ்களுடன் தற்போதைய கோவிட்-19 வைரஸ் 80% ஒத்துப்போவது கண்டறியப் பட்டுள்ளது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

 (Ebola) வைரஸ் நோய்.
(Ebola) வைரஸ் நோய்.

கடுமையான உதிரப்போக்கை ஏற்படுத்தும் ‘எபோலா!’

அதே 2014-ம் ஆண்டு ஆப்பிரிக்க நாடுகளான காங்கோ, கினியா, லிபீரியா, சியரா லியோன் ஆகிய நாடுகளில் ஒரு வைரஸ் தொற்று பரவி 28,637 பேரைத் தொற்றுக்குள்ளாக்கி, 11,315 உயிரிழப்புகளை ஏற்படுத்தியது. 39% மரணவிகிதத்துடன் இந்த நூற்றாண்டின் அதிக மரணவிகிதம் கொண்ட வைரஸ் கொள்ளைநோயாக அறியப்பட்ட அந்த நோய்... எபோலா (Ebola) வைரஸ் நோய்.

 (Ebola) வைரஸ் நோய்.
(Ebola) வைரஸ் நோய்.

எபோலா... ஏன் இந்தப் பெயர்? இந்த வைரஸ் தோன்றிய இடம், காங்கோ நாட்டின் எபோலா எனும் நதிக்கரையில் அமைந்ததால் அந்தப் பெயர் இடப்பட்டது. 1976-ல் அடையாளம் காணப்பட்டு, அண்டைப் பகுதிகளில் மக்களுக்குப் பரவி மரணத்தை உண்டாக்கி வந்தது. சிம்பன்ஸி, மனிதக்குரங்கு, கொரில்லா போன்ற இனங்களில் இருந்த இந்த வைரஸ், அவற்றை மாமிசமாக உண்ட மக்களுக்குப் பரவியது. வைரஸ் தொற்று பெற்ற ஒருவரிடமிருந்து மற்றவருக்கு அவரது உடல் திரவங்களான ரத்தம், வியர்வை, எச்சில், விந்து போன்றவற்றிலிருந்து பரவும் தன்மையைக் கொண்டிருக்கிறது இது. இந்த நோய் தாக்கியவர்கள் கடுமையான உதிரப்போக்கு ஏற்பட்டு மடிவார்கள்.

ஆப்பிரிக்க நாடுகள் சிலவற்றில் மட்டும் அவ்வப்போது தென்பட்டு மறையும் இந்த எபோலா வைரஸ், உலகின் மற்ற பகுதிகளுக்கு அச்சுறுத்தலை ஏற்படுத்தாததால் பெருந்தொற்றாக அறிவிக்கப்படவில்லை. டிசம்பர் 19, 2019-ல், இந்த நோயை உருவாக்கும் வைரஸுக்கு எதிரான தடுப்பூசி கண்டறியப்பட்டது. இதன் விளைவாக இந்த நோய் கட்டுக்குள் வரும் என்று எதிர்பார்க்கப்படுகிறது.

நம்பிக்கையூட்டும் மினி தொடர் 6 - மீண்டும் மீள்வோம்!

தடுக்கப்பட்ட ஸிகா வைரஸ்!

2015-ம் ஆண்டு தென் மற்றும் மத்திய அமெரிக்க நாடுகளி லிருந்து ஸிகா(Zika) எனும் புதிய வைரஸ் உருவெடுத்தது. இந்த வைரஸானது டெங்குவைப் போன்றே, ஏடிஸ்(Aedes) வகை கொசுக்கள் மூலம் பரவக் கூடியது. உடலுறவு மூலமும் பரவும் தன்மை கொண்டது. பாதிக்கப்பட்ட கர்ப்பிணிகள் பெற்றெடுக்கும் குழந்தைகளிடம் பிறவி வளர்ச்சிக் குறைபாட்டை ஏற்படுத்தக்கூடியது. காய்ச்சல், உடல் முழுவதும் படை, உடல் வலி போன்ற சாதாரண அறிகுறிகளுடன் தோன்றும் இந்த நோய்த்தொற்றுக்கு எதிரான கண்காணிப்பு, தற்போதைய சூழலில் உலகம் முழுவதும் தீவிரமாக்கப்பட்டுள்ளதால் இதன் பரவலைத் தடுக்கமுடிந்திருக்கிறது.

90% மரணவிகிதம்... நிபா!

19 மே 2018... கேரள மாநிலத்தில் கோழிக்கோடு மாவட்டத்தில் கண்டறியப்பட்டது நிபா (Nipah) வைரஸ் தொற்று. மலேசியாவின் நிபா எனும் கிராமத்தில் 1998-ம் ஆண்டு இந்த வைரஸ் நோய் கண்டறியப்பட்டதால் இப்பெயர் பெற்றது. சாதாரண சளி, இருமல் முதல் மூளைக்காய்ச்சல்வரை உருவாக்கும் தன்மை கொண்ட இந்த நிபா வைரஸ், 19 மே முதல் 10 ஜூன் வரை கோழிக்கோட்டில் பரவியது.

நம்பிக்கையூட்டும் மினி தொடர் 6 - மீண்டும் மீள்வோம்!

பாதிக்கப்பட்ட 19 பேரில் 17 பேர் உயிரிழந்தனர். அந்தக் கொள்ளைநோய்த் தொற்று நோயாளிகளுக்கு சிகிச்சை அளிக்கும் பணியிலிருந்த 31 வயது செவிலியர் லினியும் உயிரிழக்க நேரிட்டது. கிட்டத்தட்ட 90% மரண விகிதம்!

இத்தகைய அதிகபட்ச ஆபத்துடன் பரவ இருந்த ஒரு கொள்ளைநோயை, கேரள அரசு மற்றும் மக்கள் தங்களின் துரிதமான செயல்பாட்டால் வேறு மாநிலங்களுக்குப் பரவாமல் தடுத்து நிறுத்தினர். இந்தியாவுக்கு நேரவிருந்த பெரிய ஆபத்து, கேரளாவின் பொது சுகாதார நோய்த் தடுப்பு நடவடிக்கைகளால் தடுக்கப்பட்டது. வௌவால்களின் எச்சத்தால் அசுத்தமான பனைமரக்கள் பருகியதால் நிபா வைரஸ் தொற்று கோழிக்கோட்டில் பரவியதாக அறியப்பட்டது.

 கொள்ளை நோய்
கொள்ளை நோய்

இதுவரை கொள்ளை நோய்களைப் பற்றிப் பார்த்துவந்தோம். வெல்லப்படாத நோய்கள் எதுவும் இல்லை எனும் வகையில் மருத்துவ உலகம் கண்டறிந்த, மனித குலத்தைக் காத்த அதிமுக்கியக் கண்டுபிடிப்புகள் பற்றி இனி பார்ப்போம்.

- நம்பிக்கை தொடரும்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு