முகத்துக்கு சோப் உபயோகிப்பதைவிட, ஃபேஷியல் க்ளென்சர் அல்லது ஃபேஸ் வாஷ் உபயோகிப்பதுதான் சரி. சோப் கடினத்தன்மை உடையது. சோப்பின் பி.ஹெச் அளவும் சருமத்தின் பி.ஹெச் அளவும் வேறுவேறு. சோப் உபயோகிப்பதால் சருமத்தின் இயற்கையான எண்ணெய்ப் பசை நீங்கி, சருமம் வறண்டுவிடும். அதனால் சருமப் பிரச்னைகள் அதிகரிக்குமே தவிர, குறையாது.

பருக்கள் இருந்தால் அதற்கேற்ற க்ளென்சர் உபயோகிக்க வேண்டும். உதாரணத்துக்கு சாலிசிலிக் ஆசிட் சேர்த்த க்ளென்சர்... உங்கள் முகம் எண்ணெய்ப்பசையாக இருக்கும்போது நீங்கள் க்ரீம் உபயோகித்தால் அது சரும துவாரங்களை மேலும் அடைக்கும். அதனாலும் பருக்கள் அதிகரிக்கும். எனவே ஜெல் வடிவ, திரவ வடிவ லைட் மாய்ஸ்ச்சரைசிங் க்ரீம்களை உபயோகிக்க வேண்டும்.

உடலில் வரும் பருக்களுக்கும் இதுதான் காரணம். உடல் சருமத்திலுள்ள எண்ணெய்ச் சுரப்பு அதிகரிக்கும்போது முதுகு, கழுத்து உள்ளிட்ட பல பகுதிகளிலும் பருக்கள் வரலாம். ஸ்ட்ரெஸ் அதிகரிக்கும்போது, எண்ணெய்ப் பண்டங்களை அதிகம் சாப்பிடும்போது, தூக்கமில்லாதபோது, சர்க்கரை சேர்த்த உணவுகளை உண்ணும்போதெல்லாம்கூட பருக்கள் அதிகரிக்கும்.

இறுக்கமான உடை அணிவதைத் தவிர்க்கவும். வியர்வையை உறிஞ்சும்படியான தளர்வான, காட்டன் உடைகளை அணிவது சிறந்தது. தலைக்கு அதிக எண்ணெய் அல்லது கண்டிஷனர் உபயோகித்தாலும், அதன் காரணமாக முதுகுப் பகுதியில் பருக்கள் அதிகம் வரலாம்.

முதல் வேலையாகத் தரமான காஸ்மெடிக்ஸ் உபயோகித்து, பருக்கள் குறைகின்றனவா என்று பார்க்கலாம். அப்படியும் குறையவில்லை என்றால் மருத்துவரை அணுகி, பிசிஓடி உள்ளிட்ட பிரச்னை இருக்கிறதா எனக் கண்டறிந்து, சிகிச்சை எடுக்க வேண்டும்."