உலகம் முழுக்க பெரும்பாலானோருக்கு தடுப்பூசிகள் போடப்பட்டுவிட்டன. அதன் விளைவாக அவர்களில் பலரின் நடவடிக்கைகளிலும் மாற்றங்களைப் பார்க்கிறோம். `தடுப்பூசிதான் போட்டாச்சே... இனிமே எங்கே வேணா போகலாம், மாஸ்க் இல்லாம இருப்போமே...' என்று அவர்கள் அலட்சியமாக இருக்கக்கூடும். அந்த நிலையில் ஒருவேளை ஒமைக்ரான் பரவத் தொடங்கினால் அதன் வேகம் இன்னும் அதிகமாக இருக்கும். அதைத் தடுக்க வேண்டும் என்றால் எப்போதும்போல கொரோனா பாதுகாப்பு நடவடிக்கைகளான மாஸ்க் அணிவது, தனிமனித இடைவெளியைக் கடைப்பிடிப்பது, தடுப்பூசி போட்டுக்கொள்வது போன்றவற்றைக் கட்டாயம் பின்பற்ற வேண்டும்.

உருமாற்றமடைந்த ஒமைக்ரான் வைரஸ் பரவினால், அதன் விளைவாகத் தீவிரமான நோய்கள் பாதிக்குமா என்பதே பலரின் கேள்வியும். கொரோனாவின் முந்தைய அலைகளில் காய்ச்சல், இருமல் உள்ளிட்ட அறிகுறிகளையும், இணைநோய் உள்ளவர்களுக்கு அந்தப் பாதிப்புகள் சற்றுத் தீவிரமாக இருந்ததையும் பார்த்திருக்கிறோம்.

நுரையீரல் பாதிக்கப்பட்டு, கோவிட் நிமோனியா பாதித்து ஐசியூ வரை சென்றவர்களையும் பார்த்தோம். ஒமைக்ரானும் அதே மாதிரியான பாதிப்புகளை ஏற்படுத்துமா என்று பலரும் கேட்கிறார்கள். இன்றுவரை தினமும் கோவிட் பாதித்தவர்களைப் பார்த்துக்கொண்டுதான் இருக்கிறோம். ஆனால், அவர்களில் யாரும் தீவிர பாதிப்புக்குள்ளாவதில்லை. காரணம் தடுப்பூசி. தடுப்பூசி போடப்பட்டதால் அவர்களது உடலில் ஆன்டிபாடி உருவாகியிருக்கிறது. அது தரும் பாதுகாப்பால் நோய் தீவிரமாவது தடுக்கப்படுகிறது. அதே ஆன்டிபாடி, ஒமைக்ரான் தொற்றிலிருந்தும் பாதுகாக்குமா என்பது குறித்த தகவல்கள் நம்மிடம் இல்லை. இந்த உருமாற்றம் கண்டுபிடிக்கப்பட்டு வெகு சில நாள்களே ஆவதால் இன்னும் 2 - 3 வாரங்களுக்குப் பிறகு, சரியான தகவல்கள் நமக்குக் கிடைக்கும்.

தடுப்பூசி போட்டவர்களுக்கும் ஒமைக்ரான் பாதிப்பு தீவிர பாதிப்பை ஏற்படுத்தினால் அப்போது ஒமைக்ரான் வீரியமானது என்று புரிந்துகொள்ளலாம். தடுப்பூசி போடாதவர்களுக்குத் தீவிர பாதிப்பைக் கொடுத்தால் அதை வேறு மாதிரியாகப் புரிந்துகொள்ள வேண்டும். ஏற்கெனவே முந்தைய அலைகளில் தடுப்பூசி போட்டுக்கொள்ளாதவர்களுக்கே தீவிர பாதிப்புகள் ஏற்படுவதைப் பார்த்தோம். இதுவரை நாம் கேள்விப்பட்டவரை ஒமைக்ரான் பாதித்தவர்களுக்கு அதன் வீரியம் அதிகமாக இல்லை. தென் ஆப்பிரிக்காவில் தீவிர பாதிப்புக்குள்ளான இருவர் தடுப்பூசி போடாதவர்கள்.

ஒமைக்ரான் தொற்று வந்தால் அவர்களை ஏன் தனியே வைத்து சிகிச்சை அளிக்க வேண்டும் என்ற உங்கள் கேள்விக்கு வருவோம். இதற்கு முன் டெல்டா வைரஸ் வந்தபோதும் உலகம் முழுவதும் அப்படித்தான் தனித்து வைத்துச் சிகிச்சை கொடுத்தோம்.

அது அந்த வைரஸ் உருமாற்றத்தைப் பற்றிய தெளிவு கிடைக்கும்வரைதான். அந்தத் தெளிவு வந்துவிட்டால் இப்படித் தனியே வைத்துச் சிகிச்சை கொடுக்க மாட்டார்கள். அதுவரை அந்தத் தொற்று மற்றவர்களுக்குப் பரவிவிடாமலிருக்கவே இந்த ஏற்பாடு.

`தடுப்பூசி போட்டவர்களுக்கும் ஒமைக்ரான் தொற்று வரலாம் என்கிறீர்களே... பிறகு, எதற்கு தடுப்பூசி' என்று சிலர் கேட்கலாம். இதற்கு முன் பரவிய டெல்டா வைரஸும் அப்படி தடுப்பூசி போட்டவர்களுக்கும் வந்திருக்கிறது. ஆனால், யாரும் தீவிர நோய் பாதிப்புக்கு ஆளாகவில்லை. அதே மாதிரிதான் ஒமைக்ரான் தொற்றிலும் நடக்கும் என்று எதிர்பார்க்கப்படுகிறது.

தடுப்பூசியின் நோக்கம் என்பது வைரஸையே தடுப்பதல்ல... அதனால் ஏற்படும் தீவிர நோய் நிலையையும் மருத்துவமனையில் அனுமதிக்கப்படுவதையும் தவிர்ப்பதே."