உணவு நன்கு செரிமானமாகி இரைப்பையிலிருந்து சிறுகுடலுக்கு சரியான நேரத்தில் சென்றுவிட்டால் விக்கல் வராது. இரைப்பைக்குள் நீண்ட நேரம் உணவு தங்கியிருக்க நேர்ந்தால், Diaphragm-ஐ உறுத்தி விக்கலைத் தூண்டிவிட வாய்ப்பிருக்கிறது.

உணவுக்குழாய்க்குள் உணவு செல்லும்போது Diaphragm spasm என்கிற அடைப்பு ஏற்படுவதால் விக்கல் உண்டாகிறது. தண்ணீர் குடித்ததும் அது சரியாகி விக்கல் நின்றுவிடும்.

இது இயல்பாக நடப்பது. ஆனால், சிலருக்கு தண்ணீர் குடித்தாலும் விக்கல் நிற்காது. தொடர்ச்சியாக விக்கல் இருந்துகொண்டே இருக்கும். அவர்களுக்கு Diaphragm spasm-ஐ குறைக்கும் மருந்துகள் மற்றும் உணவை முன்னுக்குத்தள்ளும் மருந்துகள் கொடுத்தால் விக்கல் பிரச்னையிலிருந்து விடுபடுவார்கள்.

மிக அரிதாகச் சிலருக்கு கட்டுப்படுத்த முடியாத விக்கல் ஏற்படுவதுண்டு. அவர்கள் ஒரு நாள் முழுவதும் கூட தொடர்ச்சியாக விக்கிக்கொண்டே இருப்பார்கள். எவ்வளவு தண்ணீர் குடித்தாலும் விக்கல் நிற்காது. அவர்கள் உடனடியாக மருத்துவமனையில் அனுமதியாக வேண்டும். அவர்களுக்கு எண்டோஸ்கோபி எடுத்து வயிற்றில் என்ன பிரச்னை இருக்கிறது என்பதைப் பார்த்து அதற்கேற்ற சிகிச்சை வழங்கப்படும்.

விக்கல் ஏற்படாதவாறு தற்காத்துக்கொள்ள வேண்டுமெனில் எந்த பரபரப்பும் இல்லாமல் உணவை நிதானமாக மென்று சாப்பிட வேண்டும். `நொறுங்கத் தின்றால் நூறு ஆயுசு’ என்று பழமொழி கூட இருக்கிறது.

உணவை நன்றாக மென்று, அரைத்து, உமிழ்நீரோடு கலந்து விழுங்கினால் அது சீராக உணவுப்பாதை வழியே இரைப்பையைச் சென்றடையும். அதைத் தொடர்ந்து இரைப்பையில் சுரக்கும் அமிலத்தால் உணவு மேலும் செரிக்கப்பட்டு சிறுகுடலைச் சென்றடையும். என்ன சாப்பிடுகிறோம் என்பது எவ்வளவு முக்கியமோ அது போல் எப்படிச் சாப்பிடுகிறோம் என்பதும் முக்கியம். அவசரமாக அள்ளித் திணிக்காமல் நிதானமாகச் சாப்பிட வேண்டியது முக்கியம்” என்றார்.