Published:Updated:

நம்பிக்கையூட்டும் மினி தொடர் 1 - மீண்டும் மீள்வோம்!

கொள்ளை நோய்கள்
பிரீமியம் ஸ்டோரி
கொள்ளை நோய்கள்

கொள்ளை நோய்களை வென்ற வரலாறு

நம்பிக்கையூட்டும் மினி தொடர் 1 - மீண்டும் மீள்வோம்!

கொள்ளை நோய்களை வென்ற வரலாறு

Published:Updated:
கொள்ளை நோய்கள்
பிரீமியம் ஸ்டோரி
கொள்ளை நோய்கள்
உலகமே தற்போது கோவிட்-19 எனும் புதிய கொரோனா வைரஸால் பாதிக்கப்பட்டு மிகப்பெரும் அச்சுறுத்தலுக்கு உள்ளாகியிருக்கிறது.

இப்படி உலகம் முழுவதும் முழுவீச்சுடன் பரவி மக்களுக்குப் பரவும் வீரியமுள்ள தொற்றுநோய்க்கு ‘பேண்டெமிக்(Pandemic)’ என்று பெயரிடப்படும். கோவிட்-19 நாம் பார்க்கும் முதல் பேண்டெமிக்கா அல்லது இதுதான் நாம் சந்திக்கும் கடைசி பேண்டெமிக்கா? இல்லவே இல்லை.

நம்பிக்கையூட்டும் மினி தொடர் 1 - மீண்டும் மீள்வோம்!

ஒட்டுமொத்த விகடனுக்கும் ஒரே ஷார்ட்கட்!

வரலாறு முழுக்க பல தொற்றுநோய்களையும் பேண்டெமிக்குகளையும் மனித சமுதாயம் கடந்தே பயணித்து வந்திருக்கிறது. ஒவ்வொரு தொற்றும் பெரும் கொள்ளைநோயாக உருவெடுத்தபோது, பல உயிர்களைப் பெரும் விலையாகக் கொடுத்துப் பல பாடங்களைக் கற்று, செயல்படுத்தி, அந்தக் கொள்ளைநோய்கள் தந்த சவால்களை முறியடித்து, வென்று வாகை சூடியது நம் மனித இனம். நம் மூதாதையர்கள் அந்தக் கொள்ளைநோய்களைக் கட்டுக்குள் வைக்க எடுத்த நடவடிக்கைகள், அவற்றிலிருந்து கற்ற பாடங்கள், சந்தித்த சவால்களை காலத்தாவல் செய்து பார்த்தால், காணும் பக்கங்கள் எங்கும் நேர்மறை எண்ணங்கள் கொட்டிக்கிடக்கின்றன. இந்தத் தொடரில், கொள்ளைநோய்களுக்கு எதிரான மனிதகுலப் போராட்டத்தின் வரலாற்றுப்பரிமாணங்களைப் பார்ப்போம்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

பெரியம்மை... அந்தத் தழும்புகளின் வரலாறு!

கடந்த 12,000 ஆண்டுகளாக மிகப்பெரும் அச்சுறுத்தலாக இருந்துவந்த ஒரு கொள்ளைநோயிலிருந்து முதல் அத்தியாயத்தை ஆரம்பிப்போம்.

பெரியம்மை... இதுதான் அந்தப் பெரும் கொள்ளைநோய். அனைவரும் பார்த்திருப்போம், 1950 - 70 காலகட்டத்தில் பிறந்தவர்களுக்கு, பெரியம்மை தடுப்பூசி போட்ட தழும்பு இடப்பக்கத் தோளில் இருக்கும். அந்தத் தழும்புகளுக்குப் பின் பெரிய வரலாறு இருக்கிறது.

கொள்ளை நோய்கள்
கொள்ளை நோய்கள்

பெரியம்மை என்பது கி.மு-விலிருந்தே மனித இனத்தை அச்சுறுத்தும் கொள்ளைநோய். கி.மு 300-ம் ஆண்டு எகிப்தை ஆட்சிசெய்த பாரோ மன்னனுக்குப் பெரியம்மை இருந்தது என்பதை, அவனது பதப்படுத்தப்பட்ட மம்மியிலிருந்த அம்மைத்தழும்புகள் உறுதிசெய்தன. இந்நோய் ஆரம்பக்கால வணிகப் பயணங்களினூடே ஒவ்வொரு நூற்றாண்டாக, பல கண்டங்களையும், நாடுகளையும் தாண்டி உலகம் முழுக்கப் பரவியது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

உலகின் முதல் நோய்த்தடுப்பு மருந்து!

கோவிட்-19 இருமுவது, தும்முவது மூலம் பரவுவதுபோல, பெரியம்மையும் எளிதில் பரவும் நோயாக இருந்தது. இந்நோய் தாக்கிய 10 பேரில் மூன்று பேர் உயிரிழந்தனர். குழந்தைகளைத் தாக்கினால் உயிரிழப்புக்கு 80% வாய்ப்பு உண்டு. தப்பிப் பிழைத்தவர்களுக்கு வாழ்நாள் முழுக்க சுமக்கும் தழும்புகளைத் தந்துசெல்லும் கொடிய நோய் இது. உலகின் முதல் நோய்த்தடுப்பு வைத்தியம், பெரியம்மையைத் தடுக்க உருவாக்கப்பட்ட ‘வேரியோலேஷன்(Variolation)’ முறைதான் என்பது குறிப்பிடத்தக்கது.

வேரியோலேஷன் முறையில், பெரியம்மை வந்து குணமடைந்தவரின் உடலில் ஏற்பட்ட புண் காய்ந்த பின்னர், அந்தச் சருகை(Scabs) எடுத்து மூலிகையுடன் சேர்த்து இடித்துப் பொடியாக்கிவிடுவார்கள். அந்தப் பொடியை தோளில் புண் உண்டாக்கி அதில் தேய்ப்பது, அல்லது சுவாசக்காற்று மூலம் உள்ளே இழுத்துக்கொள்வது என்ற முறையில் மக்களுக்குக் கொடுத்து வந்தனர். இப்படி வேரியோலேஷன் செய்யப்பட்ட மக்களுக்குச் சில நாள்களுக்குப் பிறகு காய்ச்சல், உடல் முழுவதும் படை எனப் பெரியம்மையை ஒத்த அறிகுறிகள் மிதமாகத் தோன்றி, அதற்கான எதிர்ப்புத் திறனை உடலில் ஏற்படுத்தி, பிறகு மறையும். பெரியம்மை தாக்கும்போது மற்றவர்களைவிட வேரியோலேஷன் செய்யப்பட்ட மக்களின் மரணம் குறைவாகவே இருந்தது. பெரியம்மை வந்து 30% பேர் இறந்தார்கள் என்றால், வேரியோலேஷன் செய்யப்பட்டவர்களின் இறப்பு விகிதம் 2% என்று குறைந்தது.

இவ்வாறு, உலகின் முதல் தொற்றுநோய்த் தடுப்பு மருந்தை ஆசியாவில் கடைப்பிடித்து வந்தனர். இந்த வேரியோலேஷன் முறை, பிறகு அருகில் இருக்கும் கண்டங்களுக்கும் பரவியது. ஐரோப்பாவுக்கு 18-ம் நூற்றாண்டு இந்த முறை சென்றடைந்தது; பல கோடி மக்கள் இறப்பிலிருந்து காக்கப்பட்டனர். இவ்வாறாக இங்கிலாந்து அரச குடும்பத்தின் அங்கீகாரத்துடன் ஐரோப்பா முழுவதும் பரவலாக வேரியோலேஷன் முறை கடைப்பிடிக்கப்பட்டு வந்த சூழலில், இம்முறை பலருக்கும் ஒரே நேரத்தில் செய்யப்பட்டபோது, அது தீவிரமான பெரியம்மைக் கொள்ளைநோயை உருவாக்க, பலர் இறந்தனர். இதனால், அதுவரை இந்த முறையை ஆதரித்துவந்த இங்கிலாந்து, 1772-ம் ஆண்டு வேரியோலேஷன் முறையை மனிதத்தன்மையற்றது என்று தடை செய்தது.

பால்பண்ணையும் முதல் தடுப்பூசியும்!

அடுத்தகட்ட முயற்சியாக 1796-ம் ஆண்டு இங்கிலாந்து மருத்துவரான எட்வர்டு ஜென்னர்(1749-1823), பெரியம்மை நோய்க்கு எதிரான தடுப்பூசியைக் கண்டறியும் ஆயத்தப்பணிகளில் இறங்கினார். அவரைப் பெரியம்மைக்குத் தடுப்பூசி கண்டுபிடிக்க உந்திய நிகழ்வு, பின்னர் மருத்துவ வரலாற்றின் பக்கங்களில் எழுதப்படும் என்று அப்போது அவர் அறிந்திருக்கவில்லை. தனது பண்ணையில் பால் கறக்கும் பெண்களுள், பசுக்களுக்கு வரும் அம்மை நோயால்(Cowpox) பாதிக்கப்பட்டவர்களுக்கு, வேரியோலேஷன் செய்தாலும் காய்ச்சல்/படைகள் உருவாக வில்லை. இதை முதல் புள்ளியாக வைத்துத் தனது ஆராய்ச்சியைத் தொடங்கினார் எட்வர்டு

பால் கறக்கும் பெண்ணான சாரா நெல்ம்ஸ் மற்றும் தன் தோட்டப்பணியாளரின் ஒன்பது வயது மகனான ஜேம்ஸ் ஃபிப்ஸ் இருவரையும் தனது ஆராய்ச்சிக்குத் தேர்ந்தெடுத்தார் எட்வர்டு. நெல்ம்ஸ்க்கு வந்திருந்த பசு அம்மைப் புண்ணிலிருந்து சலத்தை எடுத்து சிறுவனான ஃபிப்ஸின் தோளில் செலுத்தினார். சில நாள்களுக்குப் பிறகு, ஃபிப்ஸை பெரியம்மை நோய் வந்தவர் களுடன் பலமுறை நெருங்கி இருக்கச் செய்தார்.

ஒருமுறைகூட ஃபிப்ஸ்க்கு பெரியம்மை நோய் தாக்கவில்லை. இந்த ஆராய்ச்சியை முறைப்படுத்தி 1801-ம் ஆண்டு தனது அறிவியல் ஆய்வை வெளியிட்டார் எட்வர்டு. உலகின் முதல் தடுப்பூசி கண்டறியப்பட்டது. கண்டறியப் பட்ட தடுப்பூசி முறை, பழைய வேரியோலேஷன் முறையைப் பின்னுக்குத் தள்ளி, உலகம் முழுவதும் கொஞ்சம் கொஞ்சமாக ஏற்றுக்கொள்ளப்பட்டது.

எட்வர்டு ஜென்னர்
எட்வர்டு ஜென்னர்

உலக சுகாதார நிறுவனத்தின் சபதம்!

சுமார் 12,000 ஆண்டுகள் மனித சமுதாயத்துக்கு மிகப்பெரும் அச்சுறுத்தலாக இருந்துவந்த பெரியம்மை, 1952 மற்றும் 1953-ம் ஆண்டுகளில் முறையே அமெரிக்கா மற்றும் ஐரோப்பாவில் ஒழிக்கப்பட்டது. என்னதான் வளர்ந்த நாடுகளில் ஒழிக்கப் பட்டாலும் வளரும் நாடுகள் இருக்கும் ஆசியாவிலும் ஆப்பிரிக்காவிலும் தொடர்ந்து பெரியம்மை நிலைத்துவந்தது. வளர்ந்த நாடுகளில் கிடைத்த நம்பிக்கையான முடிவுகளை யொட்டி, பெரியம்மை நோயை உலகை விட்டு ஒழிக்க சபதம் எடுத்து உலக சுகாதார நிறுவனம் (World health organisation) 1959-ம் ஆண்டு பெரியம்மை ஒழிப்பு இயக்கத்தை ஆரம்பித்தது.

தொடக்கத்தில் பெரிய அளவில் ஆதரவும் இல்லாமல், நிதி ஒதுக்கீடும் இல்லாமல் தோல்வி முகத்தில் இருந்த பெரியம்மை ஒழிப்பு இயக்கம், 1974-ம் ஆண்டு இந்தியாவின் பீகார், ஒடிசா மற்றும் மேற்கு வங்காள மாநிலங்களில் ஏற்பட்ட பெரியம்மைக் கொள்ளைநோய்க்குப் பிறகு தீவிரமடைந்தது.இதற்குக் காரணம், அந்தக் கொள்ளைநோயில் மட்டும் இந்தியாவில் 15,000 பேர் மரணமடைந்தனர் என்பதே. எனவே, இந்தக் கொள்ளைநோய் பரவாமல் தடுக்க உலக சுகாதார நிறுவனமும் இந்திய அரசும் இணைந்து 1975 ஜனவரியில், ‘இலக்கு பூஜ்யம்(TARGET ZERO)’ என்ற இயக்கத்தை ஆரம்பித்து, இந்திய மக்கள் அனைவருக்கும் பெரியம்மைத் தடுப்பூசியைப் போட ஆரம்பித்தனர்.

கொள்ளை நோய்கள்
கொள்ளை நோய்கள்

உலகத்திடமிருந்து விடைபெற்றது பெரியம்மை!

கொள்ளைநோய் பீதியிலிருந்த இந்திய மக்கள், பெரியம்மைத் தடுப்பூசிகளைத் தேடித்தேடிப் போட்டுக்கொண்டனர் என்கிறது வரலாறு. இதன் விளைவாக 1975-ம் ஆண்டு மே மாதம் 24-ம் தேதி பெரியம்மை நோய் இந்தியாவிலிருந்து ஒழிக்கப்பட்டது. ஆசியாவின் கடைசி பெரியம்மை நோயாளியாக 1975-ம் ஆண்டில் பங்களாதேஷைச் சேர்ந்த ரஹிமா பானு என்ற மூன்று வயதுக் குழந்தை அமைந்தாள். 1977-ம் ஆண்டு ஆப்பிரிக்கக் கண்டத்திலிருந்து பெரியம்மை விடைபெற்றது. அடுத்த மூன்று ஆண்டுகளில் உலகில் வேறெங்கும் பெரியம்மை நோயாளிகள் கண்டறியப்படவில்லை. உலக சுகாதார நிறுவனம், 1980-ம் ஆண்டு தன் வரலாற்றுச் சிறப்புமிக்க நிகழ்வில், பல நூற்றாண்டுகளாக மனித இனத்தை அச்சுறுத்திச் சேதப்படுத்தி வந்த பெரியம்மை நோய் உலகை விட்டு ஒழிக்கப்பட்டுவிட்டது என்று மகிழ்ச்சியுடனும் நிம்மதியுடனும் அறிவித்தது.

பெரியம்மை நோய்க்கு எதிரான மனித சமுதாயத்தின் போராட்டத்தில் நினைவுகூரத்தக்க சாதனையாளர், டாக்டர். எட்வர்டு ஜென்னர். அவரது அந்த ஆராய்ச்சிக்குப் பிறகுதான் தடுப்பூசி குறித்த விஞ்ஞானம் வளர்ந்தது. பெரியம்மையை உருவாக்கும் காரணியான வேரியோலா வைரஸை எலெக்ட்ரான் நுண்ணோக்கியில் பார்க்கும் வசதிகள் இல்லாத 18-ம் நூற்றாண்டிலேயே, அதற்குத் தடுப்பூசியைக் கண்டுபிடித்த சாதனைக்கு, மனித சமுதாயம் எட்வர்டுக்கு நன்றிக்கடன்பட்டுள்ளது.

20-ம் நூற்றாண்டில் மட்டும் 50 கோடி மக்களின் உயிரைக் கொன்றொழித்த பெரியம்மை எனும் பேரழிவுச் சக்திக்கு அதே நூற்றாண்டின் இறுதியில் இறுதிச்சடங்கு நடத்தப்பட்ட வெற்றிக் கதைகளைச் சொல்கிறது நம் முன்னோர்கள் வரலாறு. இப்போது, உங்களின் வீட்டிலிருக்கும், 1980க்கு முன்பு பிறந்தவர்களின் இடது தோளில் இருக்கும் பெரியம்மைத் தடுப்பூசித் தழும்பை ஒருமுறை தொட்டுப்பாருங்கள்... அறிவியல் பாதையில் பயணித்தால் எவ்வளவு பெரிய அச்சுறுத்தலிலிருந்தும் வெற்றி பெற முடியும் என்ற நம்பிக்கை ஏற்படும். எனவே கொரோனா அண்டாமல் பாதுகாப்பாக இருங்கள்; பயம் வேண்டாம். நாளை நாம் கொரோனாவை ஒழித்த வரலாற்றையும் அடுத்த தலைமுறை படிக்கத்தான் போகிறது. அதற்கு முன் எலிகள் மூலம் பரவிய கறுப்பு மரணங்கள்... அதை நாம் வென்ற வரலாறு... அடுத்த இதழில்!

- நம்பிக்கை தொடரும்...

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism