பதில் சொல்கிறார், சென்னையைச் சேர்ந்த மகப்பேறியல் புற்றுநோய் மருத்துவர் டெல்பின் சுப்ரியா.

``மெனோபாஸ் நிலையை அடைவதற்கு முன் பீரியட்ஸ் முறைதவறிப் போவது இயல்பானதுதான். ஆனால், முறையற்ற அந்தச் சுழற்சி எப்படி இருக்கிறது என்பதைக் கவனிக்க வேண்டும். பீரியட்ஸ் நாள் தள்ளித்தள்ளிப் போனாலோ, ப்ளீடிங் குறைந்துகொண்டே வந்தாலோ அது நார்மலானது. அதுவே, அடிக்கடி பீரியட்ஸ் வருகிறது, முன்பு இருந்ததைவிடவும் ப்ளீடிங் அதிகமாக இருக்கிறது, கட்டிக்கட்டியாக வெளியேறுகிறது என்றால் அது அசாதாரண நிலை. இந்த அசாதாரண நிலை இருந்தால் மகப்பேறு மருத்துவரைச் சந்தித்து காரணங்களைத் தெரிந்து சிகிச்சை எடுக்க வேண்டியது அவசியம்.

பீரியட்ஸ் நிற்கத் தொடங்கும்போது அல்லது நின்றவுடன் ஹார்மோன் டெஸ்ட் செய்து பார்த்து அது மெனோபாஸ்தானா என்பதை ஓரளவுக்கு உறுதிப்படுத்த முடியும். அந்த ஹார்மோனின் பெயர் எஃப்.எஸ்.ஹெச் ( FSH ). ஆனால், அந்த ஹார்மோன் டெஸ்ட், மெனோபாஸ் நிற்கப்போவதை அல்லது நின்றுவிட்டதை 100 சதவிகிதம் துல்லியமாகவெல்லாம் சொல்லாது. அந்த அளவுக்கு அது நம்பகமானதும் இல்லை.

எஃப்.எஸ்.ஹெச் ஹார்மோனின் அளவு அதிகமாக இருந்து, அதன்பிறகும் பீரியட்ஸ் தொடர்வதாகச் சொல்பவர்களும் இருக்கிறார்கள். அதே போல அது அளவில் மாறாமல் அப்படியே இருந்தும் மெனோபாஸ் கட்டத்தை அடைந்தவர்களும் இருக்கிறார்கள். பீரியட்ஸ் நின்றதும் அடுத்த ஒரு வருடத்துக்கு பீரியட்ஸ் வராமலிருந்தால் மட்டும்தான் அதை நாம் மெனோபாஸ் என்று சொல்ல முடியும். எனவே, டெஸ்ட்டுகளை 100 சதவிகிதம் நம்பி எந்த முடிவுக்கும் வர வேண்டாம்.