பதில் சொல்கிறார், சென்னையைச் சேர்ந்த, மகப்பேறு மற்றும் குழந்தையின்மை சிகிச்சை சிறப்பு மருத்துவர் ஜெயராணி.

``உங்களுக்கு என்னென்ன பரிசோதனைகள் செய்யப்பட்டன என்ற விவரம் இல்லை.

அடிப்படைப் பரிசோதனைகள் எல்லாம் நார்மல் என்று வந்தால் சிறப்புப் பரிசோதனைகளை மேற்கொள்ள வேண்டியிருக்கும். அதற்கேற்ப சிகிச்சை எடுத்துக்கொள்ள வேண்டியிருக்கும். உங்களுக்குப் பரிசோதனை செய்யும்போது முக்கியமாகக் கவனிக்க வேண்டிய விஷயங்கள்....

1. கர்ப்பப்பையின் உள்பக்கமும் வெளிப்பக்கமும் ஆரோக்கியமாக இருக்கின்றனவா எனப் பார்க்க வேண்டும். உள்புறம் கட்டியோ, சதை வளர்ச்சியோ இருக்கக் கூடாது. கர்ப்பப்பை சரியான நீள, அகலத்துடன் இருக்க வேண்டும்.

2. கரு இணைக்குழாய் ஆரோக்கியமாகவும், அடைப்பின்றியும் இருக்க வேண்டும்.

3. கரு முட்டைப்பை மாதம் ஒரு கருமுட்டையை சுழற்சி முறையில் வெளியேற்ற வேண்டும்.

4. கரு முட்டை உற்பத்திக்கான ஹார்மோன்களான எஃப்.எஸ்.ஹெச், எல்.ஹெச், டி.ஆர்.எல், தைராய்டு போன்றவை சரியான விகிதத்தில் இருக்க வேண்டும்.

கருத்தரிக்காததன் காரணத்தை 90 சதவிகித தம்பதியருக்கு மிகச் சரியாக ஒரு மாத ஆய்வில் கண்டுபிடித்துச் சொல்லிவிட முடியும். உங்கள் மருத்துவர் உங்கள் இருவரையும் பரிசோதித்து, தேவையென்றால் கீழ்க் குறிப்பிட்டுள்ள டெஸ்ட்டுகளை எடுக்கச் சொல்வார்.

* மாதவிடாயான இரண்டாவது நாளில் ஹார்மோன் சோதனையும், பெல்விக் ஸ்கேன் சோதனையும் செய்து பாருங்கள்.

* மாதவிடாயான ஏழாவது நாளில் ஹெச்.எஸ்.ஜி மற்றும் எக்ஸ்ரே செய்ய வேண்டியிருக்கும்.

* மாதவிடாயான 21வது நாளில் எஸ்.பி.4 எனப்படுகிற சீரம் புரொஜெஸ்ட்ரோன் சோதனையும், மாதவிடாயான 7வது நாள் தொடங்கி, கருமுட்டையின் சரியான வளர்ச்சியை ஸ்கேன் மூலம் தெரிந்துகொள்ளும் ஃபாலிகுலர் ஸ்டடியும் மேற்கொள்ள வேண்டும்.