Published:Updated:

செல்லப்பிராணிகளுக்கு இவையெல்லாம் ஆகாது!

செல்லப்பிராணிகளுக்கு இவையெல்லாம் ஆகாது!
பிரீமியம் ஸ்டோரி
News
செல்லப்பிராணிகளுக்கு இவையெல்லாம் ஆகாது!

குடும்பம்

ம்மில் பலர் நம்  வீடுகளில் வளர்க்கும் செல்லப் பிராணிகளைக் குடும்ப ரேஷன் அட்டையில் இணைத்துக்கொள்ளும் அளவிற்குப் பாசத்துடன் நினைக்கிறோம். அவற்றிற்குத் தேவையான உணவுப் பொருள்கள், மருந்துகள் என அனைத்தையும்  பார்த்துப் பார்த்துச் செய்கிறோம். அவற்றின் தேவையை அறிந்து வைத்திருக்கும் நாம், நமது வீட்டில் அன்றாடம் பயன்படுத்தும் பொருள்களில், எவையெல்லாம் அவற்றிற்குத் தீங்கு விளைவிக்கும் என்பதையும் தெரிந்து வைத்துக்கொள்ள வேண்டும்.  அவசியம் அறிந்துகொள்ள வேண்டிய  அத்தகைய தகவல்கள் பகிர்கிறார் செல்லப்பிரரணிகள் நல மருத்துவர் கதிரவன். 

செல்லப்பிராணிகளுக்கு இவையெல்லாம் ஆகாது!

“நம் வீட்டு செல்லப் பிராணிகள், நம் வீட்டுக் குழந்தைகள்போலத்தான். அவற்றின் ஆரோக்கியத்துக்கு எது  நல்லது, எது கெட்டது என அறியாமல் பார்ப்பதை எல்லாம் அவை உண்ண எண்ணும். சத்தான உணவை முறையான வழியில் அளித்துவந்தால், அது மற்ற பொருள்களை உண்ண நினைக்காது. ஒரு பிராணிக்கு உணவு எவ்வளவு முக்கியமோ, அதே அளவு முக்கியம் தடுப்பூசி போடுவதும். செல்லப் பிராணி பிறந்த 40-45 நாள்களில் முதல் தடுப்பூசி போடப்பட வேண்டும். இதை பிரைமரி வேசினேஷன் (Primary vaccination) என்போம். முதல் ஊசி போடப்பட்ட 21 நாள்களுக்குப் பின் இரண்டாம் தடுப்பூசி (செகண்டரி வேசினேஷன் - Secondary vaccination) போடப்பட வேண்டும். பிறந்த 84-வது நாளுக்குப்பின் வெறிநாய்க்கடி நோய் தடுப்பூசி (Anti-Rabies) போடவேண்டும்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
செல்லப்பிராணிகளுக்கு இவையெல்லாம் ஆகாது!



முடிந்த அளவிற்கு அதிக அளவில் முடி உள்ள ‘ஜெர்மன் ஷெப்பர்டு’, `லேப்ரடார்’ போன்ற நாய்களை வீட்டில் வளர்ப்பதைத் தவிர்க்க வேண்டும். இந்த நாய்களில் இருந்து உதிரும் முடிகளால் வீட்டிலுள்ள ஆஸ்துமா நோயாளிகளுக்கும் பிற நோயாளிகளுக்கும் அதிக பாதிப்பு ஏற்படும். எனவே முடி குறைவாக உள்ள நாய் வகைகளை வளர்ப்பது நல்லது. காய்ச்சல், தலைவலி போன்ற பிரச்னைகளுக்கு நாம் பயன்படுத்தும் ‘பாராசிட்டமால்’ போன்ற மாத்திரைகள் நமக்கு நிவாரணத்தை அளித்தாலும் பிராணிகளுக்கு ஆபத்தை விளைவிக்கும். எனவே, மருந்துகளை விலங்குகள் எட்டாத தொலைவில் வைக்க வேண்டும்.

செல்லப்பிராணிகளுக்கு இவையெல்லாம் ஆகாது!

நம் வீட்டில் வைக்கப்படும் எலிக்கொல்லி மருந்து, கரப்பான் கொல்லி மருந்து உள்ளிட்டவை கொடிய விஷத்தன்மை உடையவை. எனவே, அவற்றைப் பிராணிகள் அண்டாதவாறு தொலைவில் வைப்பது நல்லது. அதேபோல், புதிதாக எலெக்ட்ரானிக் சாதனங்களோ அல்லது லெதர் பொருள்களோ வாங்கினால் அதில் வெள்ளை நிறத்தில் ஒரு பாக்கெட் இருக்கும். அதில் சிறு மணிகள் போன்ற வடிவில் ஈரம் உறிஞ்சும் வேதிப்பொருள் இருக்கும். அது சிலிக்கா ஜெல். சுற்றுப்புறத்தில் உள்ள ஈரப்பதத்தை உறிஞ்ச, பெட்டிகளில் சிலிக்கா ஜெல் வைக்கப்படும். இது விஷமற்றது என்றாலும் பிராணிகள் உட்கொண்டால் அவற்றிற்கு ஜீரணக் கோளாறை ஏற்படுத்தும். செடிகளுக்கு உரங்களை இட்டபின், மீதமுள்ள உரங்களைச் செல்லப் பிராணிகளின் அருகில் வைப்பதைத் தவிர்க்க வேண்டும். செல்லப்பிராணிகள் அவற்றை உட்கொண்டால் உயிருக்கே ஆபத்து ஏற்படும். மனிதர்கள் உட்கொள்ளும் உணவுகளில் பச்சை முட்டை, வெங்காயம், சாக்லேட், செயற்கை இனிப்புப் பொருள்கள் உள்ளிட்டவை விலங்குகளுக்கு உகந்தவையல்ல. இவை உட்கொள்ளப்பட்டால் பெரும் ஆபத்து ஏற்படும். நாய் மற்றும் பூனைகளுக்குத் தொல்லையாக இருப்பது உண்ணிப்பூச்சி. நாய்களிடம் இருந்து இவற்றை அகற்றப் பயன்படுத்தும் மருந்து, பூனைகளுக்கு எமனாக மாறிவிடும். அடுத்த முறை இம்மருந்தை வாங்கும்போது செல்லப்பிராணிகள் நல மருத்துவரின் ஆலோசனையைப் பெற்று, இரண்டு விலங்குகளுக்கும் ஏதுவாக உள்ள மருந்தை வாங்கிப் பயன்படுத்துங்கள்.

- ச.அ.ராஜ்குமார்