Published:Updated:

டாக்டர் 360: விஷம் அறிந்ததும் அறியாததும்

டாக்டர் 360: விஷம் அறிந்ததும் அறியாததும்
பிரீமியம் ஸ்டோரி
டாக்டர் 360: விஷம் அறிந்ததும் அறியாததும்

பி.பரந்தாமன், நச்சுயியல் சிகிச்சை நிபுணர்ஹெல்த்

டாக்டர் 360: விஷம் அறிந்ததும் அறியாததும்

பி.பரந்தாமன், நச்சுயியல் சிகிச்சை நிபுணர்ஹெல்த்

Published:Updated:
டாக்டர் 360: விஷம் அறிந்ததும் அறியாததும்
பிரீமியம் ஸ்டோரி
டாக்டர் 360: விஷம் அறிந்ததும் அறியாததும்

ரசு மருத்துவக் கல்லூரியில் எம்.பி.பி.எஸ் மூன்றாமாண்டு படிக்கும் மாணவர் அவர். முந்தைய ஆண்டுகளில் படிப்பில் சிறந்து விளங்கியதற்காக ஐந்து தங்கப் பதக்கங்களை வாங்கியவர். ஏதோ குடும்பப் பிரச்னை காரணமாக மன அழுத்தத்தில் இருந்தவர், வீட்டிலிருந்த ஹேர் டையைக் கரைத்துக் குடித்துவிட்டார். விஷம் உள்ளே இறங்க ஆரம்பித்தபோது, தான் செய்தது தவறு என்பது புரிந்திருக்கிறது. உயிரைக் காப்பாற்றிக் கொள்ள மருத்துவமனைக்கு ஓடினார். அவரின் வேகத்தைவிட விஷத்தின் வேகம் அதிகமாக இருந்ததால், திறமையான  எதிர்கால மருத்துவர் ஒருவரின் உயிர் பறிபோனது.

டாக்டர் 360: விஷம் அறிந்ததும் அறியாததும்

இது போன்ற பல நிகழ்வுகளை அன்றாட வாழ்வில் கேள்விப்பட்டிருப்போம். ஒரு கணத்தில் எடுத்த முடிவு, விலை மதிப்பில்லாத உயிரை பலிவாங்கிவிடுகிறது. எதிர்பாராத நிகழ்வுகளைத் தவிர்க்க முடியாது. ஆனால், தற்கொலை எண்ணம் மற்றும் முயற்சிகளை 100 சதவிகிதம் தவிர்க்க முடியும். எந்தப் பிரச்னைக்கும் தற்கொலை தீர்வு அல்ல. விஷங்களின் தீவிரம், உயிரைக் காப்பாற்றுவதற்கு இருக்கும் சிகிச்சை வாய்ப்புகள் பற்றிய விழிப்புஉணர்வை ஏற்படுத்துவதே இந்தக் கட்டுரையின் நோக்கம்.

விஷத்தால் உயிரிழப்புகள் ஏற்படுவது ஏன், அவற்றைத் தடுப்பதற்கான சிகிச்சை முறைகள் குறித்து தீவிர சிகிச்சை மற்றும் நச்சுயியல் சிகிச்சை நிபுணர் பி.பரந்தாமன் விளக்குகிறார்.

ஒட்டுமொத்த விகடனுக்கும் ஒரே ஷார்ட்கட்!

டாக்டர் 360: விஷம் அறிந்ததும் அறியாததும்



`அளவுக்கு மிஞ்சினால் அமுதமும் நஞ்சு’ என்பதை அறிவோம். `நஞ்சும் அளவுக்கு அதிகமாக இருந்தால், உயிரைக் காப்பாற்றுவதற்கான வாய்ப்புகள் குறைவு’ என்கிறார்கள் மருத்துவர்கள். விஷம் ஒருவரைத் தாக்கும் வேகம் பல காரணங்களால் வேறுபடும். நல்ல பாம்பு விஷத்தில் சிறிய மூலக்கூறுகள் (Molecules) இருப்பதால், எளிதில் உடலுக்குள் சென்றுவிடும். அதிக அளவில் விஷம் உள்ளே இறங்கினால், அரை மணி நேரத்தில் உயிரிழக்க நேரிடும். சுருட்டைப் பாம்பின் விஷத்தில் பெரிய அளவு மூலக்கூறுகள் இருக்கும். அதனால் விஷம் மெதுவாக உள்ளே இறங்கும். ஆனால், பாதிப்பு வேகமாக இருக்கும். நல்ல பாம்பின் பற்கள் கூர்மையாக இருக்கும் என்பதால், கடித்த இடத்தில் பற்களின் தடம் தெரியும். கட்டுவிரியன், சுருட்டைப் பாம்புகளுக்கு பற்கள் மழுங்கியிருக்கும் என்பதால் கடித்த தடமே தெரியாது. 

டாக்டர் 360: விஷம் அறிந்ததும் அறியாததும்

நல்ல பாம்பு, கட்டுவிரியன் பாம்புகள் கடித்தால்,  விஷம் நரம்பு வழியாகச் சென்று அதன் செயல்பாடுகளை பாதிக்கும். சுருட்டைப் பாம்பின் விஷம் நேரடியாக ரத்தத்தில் கலக்கும். கடல் பாம்புகள் கடித்தால், அவற்றின் விஷம் தசைகளின் வழியாகப் பரவும். ரத்தத்தில் கலக்கும் விஷங்கள் அதன் உறையும் தன்மையை பாதிக்கும். இதனால் கடிபட்ட இடத்தில் ரத்தம் கொட்டிக்கொண்டேயிருக்கும். பாம்பின் விஷம் ரத்தத்தில் கலந்திருக்கிறதா என்பதைக் கண்டறிய, ரத்த மாதிரி சேகரிக்கப்பட்டு, 20 நிமிடங்கள் கண்காணிக்கப்படும்.

ரத்தம் உறைந்துவிட்டால், விஷம் பரவவில்லை என்று அர்த்தம். களைக்கொல்லி, பூச்சிக்கொல்லி மருந்துகளைக் குடித்தவுடனே வியர்த்துக்கொட்டத் தொடங்கும். வாயில் எச்சில் சுரந்துகொண்டேயிருக்கும். கண்ணின் கருவிழி சுருங்கிவிடும். நுரையீரலிலும் திரவச் சுரப்பு ஏற்பட்டு, வெளியே கேட்கும் அளவுக்கு மூச்சிரைப்பு அதிகமாக இருக்கும். உடல் குளிர்ந்து,  ரத்த அழுத்தம் குறைந்து, நரம்பு மண்டலம் பாதிக்கப்பட்டு, உடலை அசைக்க முடியாமல் போய்விடும். தாமதித்தால் உயிரிழப்பு ஏற்படும்.

 “விஷம் அருந்தியவர்கள் மருத்துவமனைக்குச் சென்றதும், மூக்கில் குழாய் செருகப்பட்டு, வயிற்றிலிருக்கும் உணவு உள்ளிட்ட அனைத்துப் பொருள்களும் வெளியே எடுக்கப்படும். அதற்குப் பிறகு, `சலைன்’ எனப்படும் உப்பு நீர் மூலம் வயிறு சுத்தப்படுத்தப்படும். மூக்கில் சொருகியுள்ள குழாய் வழியாகவே மீண்டும் வயிற்றுக்குள் செலுத்தப்பட்ட நீர் வெளியேற்றப்படும். விஷம் அருந்தி ஒரு மணி நேரத்துக்குள் மருத்துவமனைக்குச் சென்றுவிட்டால், அந்த விஷம் வயிற்றிலிருந்து சிறுகுடலுக்குச் செல்வதற்கு முன்பாக வயிற்றைச் சுத்தப்படுத்தி விஷத்தை எடுத்துவிடலாம். ஒருவர் குறைவான அளவு விஷத்தை அருந்தி, ஒரு மணி நேரத்துக்குள் மருத்துவமனைக்குச் சென்றுவிட்டால், இந்தச் சிகிச்சையிலேயே உயிரைக் காப்பாற்றிவிட முடியும்.

எந்த விஷம் வயிற்றுக்குள் சென்றிருக்கிறது என்பது தெரிந்துவிட்டால், அதற்கான சிகிச்சையை உடனே தொடங்க முடியும். நோயாளி சுயநினைவின்றி இருக்கும்போது, உடன் வந்தவர்களுக்கும் என்ன விஷம் என்பது தெரியவில்லை என்றால், நோயாளியிடமிருந்து வெளிப்படும் மூச்சிலிருக்கும் வாசனையைக் கொண்டு கண்டறிய முடியும். விஷத்தின் வாசனை மூச்சில் கலந்திருக்கும். சில மருந்துகள் வாசனையை வெளிப்படுத்தாது. அந்த நேரத்தில் வயிற்றைச் சுத்தம் செய்த பிறகு வெளியேற்றப்படும் நீரில் கலந்திருக்கும் விஷத்தின் நிறத்தைவைத்துக் கண்டறிய முடியும்.

டாக்டர் 360: விஷம் அறிந்ததும் அறியாததும்

விஷமருந்தி ஒரு மணி நேரத்துக்கு மேல் ஆகிவிட்டது என்றால், வயிற்றை முதலில் சுத்தப்படுத்திவிட்டு, ‘ஆக்டிவேட்டட் சார்கோல்’ (Activated Charcoal) எனப்படும் கரி, வேறு மருந்துகள் சேர்த்து வயிற்றுக்குள் செலுத்தப்படும். உடல் எடையில் ஒரு கிலோவுக்கு ஒரு கிராம் என்ற அளவில் செலுத்தப்படும். நோயாளி 60 கிலோ எடையிருந்தால், 60 கிராம் செலுத்தப்படும். இந்தக் கரி வயிற்றுக்குள் சென்று, வயிற்றில் மீதமிருக்கும் விஷத்தை உறிஞ்சி எடுத்து, மலம் வழியாக வெளியேற்றிவிடும். சில விஷங்கள் வயிற்றிலிருந்து சிறுகுடல், கல்லீரலுக்குச் சென்று மீண்டும் சிறுகுடலுக்கே வரும். அந்த மாதிரியான நோயாளிகளுக்கும் இதே சிகிச்சையை ஒவ்வோர் இரண்டு மணி நேரத்துக்கும் எனத் தொடர்ந்து  ஆறு மணி நேரத்துக்குக் கொடுக்க வேண்டும்.

டாக்டர் 360: விஷம் அறிந்ததும் அறியாததும்



விஷம் எப்போது அருந்தினார்கள் என்பது தெரியாமலேயே மருத்துவமனைக்கு நோயாளியைக் கொண்டு வரும்போது, விஷம் சிறுகுடலுக்குள் இறங்கிவிட்டிருக்கும். அப்போது ‘கத்தார்டிக்ஸ்’ (Cathartics) எனப்படும் சிகிச்சை முறையைப் பயன்படுத்தி மருந்துகளைச் செலுத்தி, வாயிலிருந்து மலத்துவாரம்வரை இருக்கும் எட்டு மீட்டர் தூரப் பாதையிலுள்ள விஷத்தை வெளியேற்ற முடியும். அதிலும் வெளியேறாத விஷங்களை வெளியேற்ற, பாலிஎத்திலின் க்ளைகால் (Polyethylele Glycol) , எலெக்ட்ரோலைட்ஸ் ஆகிய மருந்துகளை ஒரு மணி நேரத்துக்கு இரண்டு லிட்டர் என்ற விகிதத்தில் தொடர்ச்சியாகக் கொடுக்க வேண்டும். இந்த மருந்துகள் வாயிலிருந்து மலத்துவாரம் வரையுள்ள  எட்டு மீட்டர் தூரத்தில் இருக்கும் விஷங்களை வெளியேற்றிவிடும். இது முழுக் குடல் சுத்தப்படுத்துதல் சிகிச்சை.

ஒருவர் அருந்திய விஷம் அல்லது பாம்பு கடித்ததின் மூலம் பரவிய விஷம் ரத்தத்தில் கலந்துவிட்டது என்றால், அது சிறுநீரகத்தையும் பாதிக்கும். அது போன்ற நேரத்தில், ஹீமோ டயாலிசிஸ் (Hemodialysis) என்ற ரத்தச்சுத்திகரிப்பு செய்யப்படும். அதற்கான கருவியில் நோயாளியைப் பொருத்தி, விஷம் கலந்த ரத்தம் அந்தக் கருவி வழியாகச் சென்று சுத்திகரிக்கப்பட்டு, விஷம் நீக்கப்பட்டு மீண்டும் உடலுக்குள் செலுத்தப்படும். அப்போதும் விஷம் வெளியேறவில்லை என்றால், எக்மோ (ECMO) என்ற இதய, நுரையீரல் செயல்பாட்டுக்கு உதவும் கருவியில் நோயாளி இணைக்கப்படுவார். விஷம், ரத்தத்தில் உள்ள பிளாஸ்மா என்ற கூற்றில்தான் கலந்திருக்கும். எக்மோ கருவியில் இணைக்கப்படும் நோயாளியின் ரத்தம் கருவிக்குள் சென்றதும், அதிலிக்கும் பிளாஸ்மா நீக்கப்பட்டு, மீண்டும் அவரது உடலுக்குள் செலுத்தப்படும். நீக்கப்பட்ட பிளாஸ்மா, வெளிப்புறத்திலிருந்து ரத்தம் செலுத்துவது போன்று உடலுக்குள் செலுத்தப்படும்.

இந்தச் சிகிச்சை முறையும் கை கொடுக்கவில்லை என்றால், இறுதியாக முழு ரத்தப் பரிமாற்றம் செய்யப்படும். விஷம் கலந்த ரத்தம் உடலிலிருந்து முழுவதுமாக நீக்கப்பட்டு, அதற்கு பதில், வேறு ரத்தம் உடலுக்குள் செலுத்தப்படும். பொதுவாக ஒருவரது உடலில் ஐந்து லிட்டர் ரத்தம் இருக்கும். ரத்தப் பரிமாற்றத்தின்போது இரண்டு அல்லது மூன்று லிட்டர் மாற்று ரத்தம் செலுத்தப்படும். தேவைப்படும் மீதமுள்ள ரத்தத்தை உடலே உற்பத்தி செய்துகொள்ளும். விஷத்தால் ஒருவருக்குச் சிறுநீரகம் பாதிக்கப்பட்டால்,  ரத்தச் சுத்திகரிப்பு சிகிச்சைகள் உதவும். ஆனால் கல்லீரல் பாதிக்கப்பட்டுவிட்டால், கல்லீரல் மாற்றம் செய்வதைத் தவிர வேறு வழியில்லை.

டாக்டர் 360: விஷம் அறிந்ததும் அறியாததும்

ஆபத்தான ஆசிட்

ஆசிட் அருந்தினால், அது உணவுக்குழாயிலிருந்து வயிற்றுக்குள் செல்லும் வழியெல்லாம் அரித்து, பொத்தல்களை ஏற்படுத்தும். அதனால் குழாய் சொருகி வயிற்றுக்குள் மருந்துகளைச் செலுத்தினால், அது நுரையீரல் உள்ளிட்ட பிற உறுப்புகளுக்குள் சென்று, வேறு பாதிப்புகளை ஏற்படுத்தும். அதிக அளவில் ஆசிட் குடித்து வயிற்றில் புண்கள் ஏற்பட்டிருந்தால், வாயிலும் புண்கள் தோன்றும். வாயில் புண் இல்லையென்றால், உள்ளேயும் பாதிப்பின் அளவு குறைவாகவே இருக்கும். அதிக அளவு பாதிப்பு இருந்தால், உடலின் உள் உறுப்புகளில் ரத்தக்கசிவு ஏற்பட்டு, உயிரிழப்பு ஏற்படும். ஆசிட் வயிற்றுக்குள் செல்லும்போது உணவுக்குழாய் பொசுங்கி, ஒட்டிக்கொள்ளும். அதனால் எச்சில்கூட விழுங்க முடியாது. அது போன்ற நேரத்தில் வயிற்றின் வெளிப்புறத்தில் துளையிட்டு, குழாய் பொருத்தி, அதன் வழியாகத்தான் ஆகாரம் செலுத்தப்படும். வயிற்றிலுள்ள காயங்கள் ஆறிய பிறகு குடலின் ஒரு பகுதியை வெட்டியெடுத்து, உணவுக்குழாயாக மாற்றிப் பொருத்தும் அறுவை சிகிச்சை செய்ய வேண்டும்.”

சிகிச்சைகள் குறித்துப் படிக்கும்போதே, அவற்றின் தீவிரத்தை உணர முடியும். ஒரு நிமிட மனப் பிறழ்வால், எத்தனை சிரமங்களுக்கு ஆளாகவேண்டியிருக்கும் என்பது புரிந்திருக்கும். தற்கொலை செய்யத் தூண்டும் பிரச்னை அல்லது அந்த மனவலி, நிரந்தரமானதல்ல. காலமே அந்த வலிக்குச் சிறந்த மருந்து.  அமெரிக்கப்பாடகி ஜூலியட் லூயிஸ், “என் வாழ்க்கையை முடித்துக்கொள்ள முடிவெடுத்தத் தருணங்களைக் கடந்து, இன்றும் வாழ்ந்துகொண்டிருப்பதுதான் வாழ்நாளில் நான் செய்த துணிச்சலான காரியம்”  என்கிறார்.

வாழ்வதற்கான வழிகளை மட்டுமே தேடுவோம்.

- ஜெனி ஃப்ரீடா

முதலுதவி!

வா
ய்வழியாக அருந்தும் விஷத்துக்கு முதலுதவி என்பது விஷம் அருந்துபவர்களை சுயமாக வாந்தி எடுக்கவைப்பதுதான். அதன் பின்னர் எவ்வளவு சீக்கிரம் மருத்துவமனைக்குச் செல்ல முடியுமோ, சென்றுவிட வேண்டும். புளி, உப்பு கரைத்து குடிக்கக் கொடுத்து வாந்தி எடுக்கவைப்பது ஆபத்தானது. அந்தக் கரைசல் நுரையீரலுக்குள் சென்றுவிட்டால் நிமோனியா தாக்கி, வேறு பாதிப்புகள் ஏற்படும். பாம்பு கடித்தவர்களை உடனடியாகக் கீழே படுக்கவைக்க வேண்டும். பாம்பு கடித்தவுடன் மருத்துவமனைக்குச் சீக்கிரம் செல்ல வேண்டும் என்று ஓடிவரக் கூடாது. இதனால் விஷம் வேகமாக உடல் முழுவதும் பரவி, உயிரிழப்பு நேரிடும். பிறகு எந்த இடத்தில் கடிபட்டுள்ளதோ, அந்த இடத்தில் அசைவு ஏற்படாத வகையில் ஒரு கம்பைவைத்து முட்டுக் கொடுத்து, துணியைவைத்துச் சுற்ற வேண்டும். உடனடியாக மருத்துவமனைக்குக் கொண்டு செல்ல வேண்டும். பாம்பு கடித்த இடத்தில் கடித்து உறிஞ்சி விஷத்தை எடுப்பது, கத்தியால் கீறி விஷத்தை எடுப்பது போன்ற வேறு எந்த முதலுதவியையும் செய்யக் கூடாது. கடிபட்ட இடத்துக்கு மேல் கயிற்றைக் கொண்டு இறுக்கிக் கட்டவும் கூடாது. இறுக்கிக் கட்டினால், அந்தப் பகுதிக்கு ரத்த ஓட்டம் நிரந்தமாகத் தடைபடும். பின்னர் அந்தப் பகுதியை வெட்டி அகற்ற வேண்டும். பாம்புக் கடியைவிட அதன் பயத்தால் இறப்பவர்கள்தான் அதிகம். எனவே, மன தைரியத்துடன் இருக்க வேண்டும்.

விஷமே மருந்தாகுமா?

பா
ம்புக்கடி சிகிச்சைக்கான மருந்து, பாம்பின் விஷத்திலிருந்துதான் தயாரிக்கப்படுகிறது. பாம்பிலிருந்து அதன் விஷத்தைச் சேகரித்து, வேறு கரைசல்கள் சேர்க்கப்பட்டு, குதிரையின் உடலுக்குள் செலுத்தப்படும். குதிரையின் உடலிலுள்ள நோய் எதிர்ப்பு அமைப்பு, விஷத்தை முறிப்பதற்கான நோய் எதிர்ப்பு சக்தியை (ஆன்டிபாடி) உருவாக்கும். விஷத்தைச் செலுத்திய குறிப்பிட்ட நாள்களுக்குப் பின்னர், குதிரையின் ரத்தத்தைச் சேகரித்து, அதில் இருந்து விஷ முறிவு மருந்து பிரித்தெடுக்கப்படுகிறது. சில பூச்சிக்கொல்லிகளுக்கான விஷ முறிவு மருந்து ஊமத்தம் கொட்டையிலிருந்து தயாரிக்கப்படுகிறது. அதேபோல ஒடுவன்தழையிலிருந்து எடுக்கப்படும் மருந்தும் பூச்சிக்கொல்லிகளுக்கான விஷ முறிவுக்கு பயன்படுகிறது. அரளிக்கொட்டையிலிருந்து தயாரிக்கப்படும் மருந்து, இதயச் செயலிழப்பு  சிகிச்சையில் பயன்படுத்தப்படுகிறது.

டாக்டர் 360: விஷம் அறிந்ததும் அறியாததும்
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism