Published:Updated:

தீயினால் சுட்டபுண் - சந்தேகங்கள்... சிகிச்சைகள்

தீயினால் சுட்டபுண் - சந்தேகங்கள்... சிகிச்சைகள்
பிரீமியம் ஸ்டோரி
தீயினால் சுட்டபுண் - சந்தேகங்கள்... சிகிச்சைகள்

ஜெ.ஜெகன்மோகன், ஒட்டுறுப்பு அறுவை சிகிச்சை மருத்துவர்ஹெல்த்

தீயினால் சுட்டபுண் - சந்தேகங்கள்... சிகிச்சைகள்

ஜெ.ஜெகன்மோகன், ஒட்டுறுப்பு அறுவை சிகிச்சை மருத்துவர்ஹெல்த்

Published:Updated:
தீயினால் சுட்டபுண் - சந்தேகங்கள்... சிகிச்சைகள்
பிரீமியம் ஸ்டோரி
தீயினால் சுட்டபுண் - சந்தேகங்கள்... சிகிச்சைகள்

2004-ம் ஆண்டு கும்பகோணம் பள்ளியில் நடைபெற்ற தீ விபத்தை யாரும் மறக்க முடியாது. தீயில் கருகிய பிஞ்சுகளை எப்போது நினைத்தாலும் மனது கலங்கும். ஒரு தீ விபத்துக்குப் பின்னர் பாதிக்கப்பட்டவர்கள் படும்பாடு சொல்லி மாளாது. உடலாலும் மனதாலும், வீட்டிலும் சமூகத்திலும் பல துன்பங்களை அவர்கள் சந்திக்க நேரிடும்.

தீயினால் சுட்டபுண் - சந்தேகங்கள்... சிகிச்சைகள்

நேரடித் தீயால் ஏற்படும் காயங்களில், ஆசிட் தீக்காயங்கள், மின்சார தீக்காயங்கள் எனப் பல வகைகள் இருக்கின்றன. அவற்றில், காஸ் அடுப்பு வெடிப்பதால் ஏற்படும் தீக்காயங்கள், எரிபொருள்களை ஊற்றி தற்கொலைக்கு முயலும் தீ விபத்துகள் ஆகியவைதாம் அதிக அளவில் நடக்கின்றன. இவற்றில் காஸ் ஸ்டவ் வெடிப்பதால் முகம், நெஞ்சுப் பகுதியில் தீக்காயங்கள் ஏற்படும். ஆனால், தற்கொலைக்கு முயலும் சம்பவங்களில் தலை முதல் கால்வரை தீக்காயங்கள் ஏற்படும்.

தொழிற்சாலைகள், ஆய்வுக்கூடங்களில் ரசாயனங்கள் உடலில்படுவதாலும், ஆசிட் வீச்சு  சம்பவங்களாலும்கூடத் தீக்காயங்கள் ஏற்படும். எதிர்பாராமல் ரசாயனங்கள் உடம்பில்படுவதால் பெரும்பாலும் அதிக அளவில் காயங்கள் ஏற்படாது. காரணம் ரசாயனமோ, அமிலமோ உடலில்பட்டவுடன் எரிச்சல் தாளாமல் அந்த இடத்திலிருந்து நகர்ந்துவிடுவார்கள். ஆனால், அமில வீச்சு சம்பவங்களில் பெரிய அளவிலான பாதிப்பு ஏற்படும். முகம், கழுத்து, கை, நெஞ்சுப் பகுதிவரை பாதிக்கப்படும். ஆசிட் உடலில்பட்டால் தோலை அரித்துவிடும். அது உடலுக்குள் செல்லச் செல்ல அரிப்பு ஏற்பட்டுக்கொண்டேயிருக்கும். ஆசிட் உடையில் பட்டால் அதுவும் உடலில் ஒட்டிக்கொண்டு, பாதிப்பை அதிகப்படுத்தும். அதனால் ஆசிட்பட்டவுடன், உடைகளை உடனே களைந்துவிட வேண்டும். ஆசிட் கண்ணில்பட்டால் பார்வை இழப்பு ஏற்படும் அபாயமும் இருக்கிறது.

மின்சார தீக்காயங்கள்

வீட்டிலுள்ள சுவிட்ச் பாக்ஸிலோ, அயர்ன் பாக்ஸிலோ கைவைப்பதால் ஏற்படும் தீக்காயம் சிறிய அளவிலிருக்கும். ஆனால், சாலையிலுள்ள மின்சாரப் பெட்டி, ட்ரான்ஸ்ஃபார்மர்கள் மூலம் ஏற்படும் மின்சார விபத்து, மின்சார ரயில்களின் மேல்புறத்தில் பயணம் செய்யும்போது ஏற்படும் விபத்து, மின்னல் தாக்குதல் போன்ற சம்பவங்களில் அதிக வோல்டேஜ் மின்சாரம் உடலில் இறங்கும். பிற தீக்காயங்கள் வெளியில் பாதிப்பை ஏற்படுத்திவிட்டு உள்ளே செல்லும். ஆனால், அதிக வோல்டேஜ் மின்சாரம் நேரடியாக உடலின் உள்ளே சென்று பாதிப்பை ஏற்படுத்திவிடும்.

ஒட்டுமொத்த விகடனுக்கும் ஒரே ஷார்ட்கட்!

தீயினால் சுட்டபுண் - சந்தேகங்கள்... சிகிச்சைகள்

மின்னலைப் பொறுத்தவரை பெரிய கட்டடங்களில், ‘இடிதாங்கி கம்பி’ பொருத்தியிருந்தால், அதன் வழியாக பூமிக்குள் சென்றுவிடும். அதேபோல, திறந்தவெளியில் ஒரு மரம் மட்டுமே இருக்கிறது என்றால், அதைக் கருவியாகப் பயன்படுத்தி, அதன் வழியாக பூமிக்குள் செல்லும். அப்போது மரத்தின் அடியில் நாம் நின்றுகொண்டிருந்தால் தாக்கிவிடும். எனவே, இடி, மின்னல்  ஏற்படும்போது கட்டடங்களின் உள்ளே சென்றுவிட வேண்டும். திறந்த மைதானத்தில் நின்றுகொண்டிருந்தால், தரையில் படுத்துவிட வேண்டும். காரணம் செங்குத்து நிலையில் நின்றால் எளிதில் மின்னல் தாக்கிவிடும்.

பட்டாசு விபத்துகள்

தீபாவளி நேரத்தில் நிறையப் பட்டாசுத் தீக்காயங்கள் ஏற்பட வாய்ப்பிருக்கிறது. பட்டாசு விபத்தால் கை, முகங்களில் தீக்காயம் ஏற்படும். சிலர் கால்சட்டையில் வெடிகளை மொத்தமாக வைத்துக்கொண்டு வெடிப்பார்கள். அது சில நேரங்களில் தீப்பற்றி, விபத்தை ஏற்படுத்தும். பெரும்பாலும் பட்டாசு விபத்தால் ஏற்படும் தீக்காயங்களில் உயிரிழப்புகள் குறைவாகவே இருக்கும்.

தீயினால் சுட்டபுண் - சந்தேகங்கள்... சிகிச்சைகள்



தீக்காயம் உடலில் எவ்வளவு இடத்தை பாதித்திருக்கிறது என்ற பரப்பளவை சதவிகிதத்தின் மூலமும், ஆழத்தை டிகிரி மூலமும் கணக்கிடுவார்கள். நமது சருமம் மேல் அடுக்கு ‘எபிடெர்மிஸ்’, அடி அடுக்கு ‘டெர்மிஸ்’, கொழுப்பு மற்றும் இணைப்புத் திசுவால் உருவாகியிருக்கும் அடுக்கு ‘சப்க்யூடேனியஸ்’ மூன்று அடுக்குகளைக்கொண்டிருக்கும். 

சருமத்தின் மேற்புறத்தை மட்டும் பாதிப்பது முதல் டிகிரி தீக்காயம். இதனால் பெரிய பாதிப்பு ஏற்படாது. காரணம், மேல்புற அடுக்கில் ரத்த ஓட்டம் அதிகமிருக்காது. மேற்புறத்தை பாதித்து, அடியிலிருக்கும் சருமத்தையும் பாதிப்பது இரண்டாவது டிகிரி தீக்காயம். அடி அடுக்கில்தான் மயிர்க்கால்கள், வியர்வைச் சுரப்பிகள் இருக்கின்றன. மூன்றாவது டிகிரி என்பது, சருமத்தின் அடிப்புறம்வரை பாதிக்கப்படுவது. இரண்டாம் டிகிரி, மூன்றாம் டிகிரி பாதிப்புகள் சற்று கவலையளிக்கக் கூடியவை. அவற்றுக்கு முறையான சிகிச்சையளிக்க வேண்டும்.

தீக்காயம் ஆழமாக ஏற்படும்போது உடலிலிருக்கும் ரத்த ஓட்டம் பாதிக்கப்படும். ரத்தக்குழாய்கள் சேதமடைவதால், ரத்தத்திலுள்ள நீர்ச்சத்துகள் பிரிந்து  தசைகள் உட்பட பல்வேறு இடங்களுக்குச் செல்லும். ரத்தத்திலிருந்து நீர் பிரிவதால் ரத்தம் அடர்த்தியாகும். இதனால் சிறுநீரகம், இதயம், மூளை போன்ற உறுப்புகளுக்குச் செல்லும் ரத்த ஓட்டம் பாதிக்கப்பட்டு, பல உடலுறுப்புகள் செயலிழக்கத் தொடங்கும். வெளிப்புறத்தில் தீக்காயங்களில் தொற்று ஏற்படும். இதனால் உயிரிழப்பு ஏற்படும். தீக்காயத்தைப் பொறுத்தவரை நோய்த்தொற்றினால்தான் அதிகம் பேர் உயிரிழக்கின்றனர்.

தீக்காயங்களில் கொப்புளங்கள் ஏற்பட்டால் சற்று நிம்மதியடையலாம். காரணம், சருமத்தின் மேற்புறத்தில் ஏற்படும் கொப்புளங்கள் சருமத்தின் அடிப்புறத்தைச் சுத்தமானதாக வைத்திருப்பதோடு, நோய்த்தொற்றிலிருந்து பாதுகாத்து, எளிதில் காயம் குணமாக வழிவகுக்கும். புதிய சருமம் உருவாகவும் உதவி புரியும். சிலர் கொப்புளங்களை குத்தி, அதிலிருக்கும் நீரை வெளியேற்றுவார்கள். அது நோய்த்தொற்றை ஏற்படுத்தும். மருத்துவர்கள் கொப்புளங்களை தொற்று நீக்கம் செய்யப்பட்ட கருவிகளின் மூலம் உடைத்து, அதிலிருக்கும் நீரை வெளியேற்றி சிகிச்சையளிப்பார்கள்.

தீயினால் சுட்டபுண் - சந்தேகங்கள்... சிகிச்சைகள்

தீக்காயங்கள் ஏற்பட்டிருக்கும் பரப்பளவு, அதன் ஆழம் ஆகியவற்றைக் கணக்கிட்டே சிகிச்சையளிக்க முடியும். 20 சதவிகிதம் தீக்காயங்கள் இருந்தால், நோயாளியை மருத்துவமனையில் அனுமதித்தே சிகிச்சையளிக்க வேண்டும். சிறுவர்களாக இருந்தால், 10 சதவிகிதம் தீக்காயம் இருந்தாலே மருத்துவமனையில் அனுமதித்துவிட வேண்டும். குழந்தைகளுக்கு ஐந்து சதவிகிதம் தீக்காயம் இருந்தாலே மருத்துவமனையில் அனுமதித்து சிகிச்சையளிக்க வேண்டும்.

100 சதவிகிதம் தீக்காயம் ஏற்பட்டவர்கள் நடந்தே மருத்துவமனைக்கு வர முடியும். நன்றாகப் பேச முடியும். பொதுவாகப் பிற நோய்களுக்குச் சிகிச்சை அளிக்க அளிக்க முன்னேற்றம் ஏற்படும். ஆனால், தீக்காயங்கள் நாள் ஆக ஆக உள்ளே பாதிப்புகளை அதிகமாக்கிக்கொண்டேயிருக்கும். இதைப் பார்க்கும் நோயாளிகளின் உறவினர்கள், ‘ஆஸ்பத்திரிக்கு வரும்போதுகூட நல்லாத்தானே இருந்தான். இப்போ உடம்பு மோசமாகிடுச்சே’ என்று மருத்துவர்கள் மீது நம்பிக்கையிழந்து, கோபப்படும் சம்பவங்களும் நிகழும்.

சிகிச்சையில் முன்னேற்றம் என்பது நபருக்கு நபர் வேறுபடும். சிலருக்குக் குறைவான தீக்காயங்கள் இருந்தாலும், உயிரிழப்பு நேரிடலாம். அதிக தீக்காயங்களுடன் உள்ளவர் பிழைத்துக்கொள்ளலாம். அதற்கு பல்வேறு காரணங்கள் இருக்கின்றன. தீக்காயங்களுடன் சர்க்கரைநோய் போன்ற வேறு நோய் பாதிப்புகள் இருந்தாலும், குணமடைவதில் பிரச்னையும் தாமதமும் ஏற்படும்.

கூடவே கூடாது!

தீக்காயத்தின் மீது தண்ணீரைத் தவிர வேறு எதையும் ஊற்றக் கூடாது. தண்ணீர் அருகில் இல்லையென்றால், தீப்பிடித்தவர்களை ஒரு கம்பளியில் சுற்றிக் கீழே உருட்ட வேண்டும். அப்படிச் செய்யும்போது மூடிய பகுதிக்குள் ஆக்சிஜன் செல்ல முடியாமல், தீ அணைந்துவிடும். தீக்காயத்தின் மீது மாவு, பற்பசை, பேனா மை, மணல் போன்ற பொருள்களைப் போடவே கூடாது. அவை தீக்காயத்தின் தீவிரத்தை அதிகப்படுத்தும்.

- ஜெனி ஃப்ரீடா

முதலுதவி தண்ணீர் மட்டுமே!

தீ
க்காயத்துக்கு முதலுதவி என்பது தண்ணீர் மட்டுமே. தீக்காயம், பட்டாசு விபத்து, ஆசிட் விபத்தில் சிக்கியவர்கள் மீது முதலில் தண்ணீரை மட்டுமே ஊற்ற வேண்டும். காரணம், முதலில் உடலிலுள்ள வெப்பத்தைத் தணிக்க வேண்டும். அதற்காக ஐஸ் தண்ணீரையும் ஊற்றக் கூடாது. உடலிலுள்ள வெப்பத்தைப் படிப்படியாகக் குறைக்க வேண்டும். எனவே, தண்ணீர்தான் சரியான தேர்வு. அதன் பிறகு அந்தக் காயத்தின் மீது சுத்தமான காட்டன் துணியைச் சுற்றி மருத்துவமனைக்கு உடனடியாகக் கொண்டு செல்ல வேண்டும். வேறு எந்தவித சுய மருத்துவத்திலும் ஈடுபடக் கூடாது. ஆனால், மின்சார தீ விபத்தில் சிக்கியவர்கள் மீது தண்ணீர் ஊற்றக் கூடாது. மின்சாரத்தின் தொடர்பிலிருந்து அவர்களை விலக்கிவிட்டு, மருத்துவமனைக்குக் கொண்டு செல்ல வேண்டும். ரசாயனப்பொடிகள் மேலேபட்டால் தண்ணீர் ஊற்றக் கூடாது. அவற்றை உடலிலிருந்து தட்டிவிட வேண்டும். தண்ணீர் ஊற்றினால், ரசாயனப்பொடிகளில் தண்ணீர் சேர்ந்து, ரசாயன எதிர்வினை உருவாகும்.

ஏன் பேனா மை?

தீ
க்காயங்களில் பேனா மையை ஊற்றிவிடும் தவறான செயலில் இன்றும் பலர் ஈடுபடுகிறார்கள். சருமத்திலுள்ள பூஞ்சைத் தொற்றுகளுக்கும் சிறிய காயங்களுக்கும் பல ஆண்டுகளுக்கு முன்னர் ‘ஜென்ஷியன் வயலெட்’ (Gentian Violet) என்ற ஆன்டிசெப்டிக் திரவம் பயன்படுத்தப்பட்டது. அந்தத் திரவம் பார்ப்பதற்கு, பேனாவில் ஊற்றும் நீல நிற மைபோலவே இருக்கும். அதனால் `பேனா மைதான் அந்த மருந்து’ என்று நினைத்து, இன்றும் பலர் தீக்காயங்களில் மையை ஊற்றுகிறார்கள். இது முற்றிலும் தவறு. தீக்காயங்களில் பேனா மையை ஊற்றினால், காயத்தின் ஆழத்தை மருத்துவர்கள் கண்டறிவதில் சிரமம் ஏற்படும். அது சிகிச்சையையும் பாதிக்கும்.

தீக்காயத்தை அளவிடும் முறை

மு
தல்கட்ட சிகிச்சையைத் தொடங்குவதற்காக, `வாலஸ் விதிகள் 9’ (Wallace rule of nines) என்ற முறையில் தீக்காயங்களின் அளவு அளவிடப்படுகிறது. அதன்படி, மனித உடல் 12 பாகங்களாகப் பிரிக்கப்படும். பிறப்புறுப்பு தவிர மீதமுள்ள 11 பாகங்களுக்கும் தனித்தனியாக 9 மதிப்பெண்கள் வழங்கப்படும். அதன் மொத்த கூட்டுத்தொகை 99, பிறப்புறுப்புக்கு 1 மதிப்பெண் என மொத்தம் 100 சதவிகிதம். உதாரணமாக, ஒருவருக்கு இரண்டு கால்களும் முழுவதுமாக பாதிக்கப்பட்டிருந்தால், ஒரு காலின் முன்பக்கம் மற்றும் பின்பக்கம் சேர்த்த கூட்டுத்தொகை 18%. இரண்டு கால்கள் என்றால், 18% x 2 = 36% என்று கணக்கிடப்படும்.

தீயினால் சுட்டபுண் - சந்தேகங்கள்... சிகிச்சைகள்
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism