Published:Updated:

கழுத்தைக் கொஞ்சம் கவனிப்போமா?

கழுத்தைக் கொஞ்சம் கவனிப்போமா?
பிரீமியம் ஸ்டோரி
கழுத்தைக் கொஞ்சம் கவனிப்போமா?

அகிலாண்டபாரதி, பொது மற்றும் கண் மருத்துவர்ஹெல்த்

கழுத்தைக் கொஞ்சம் கவனிப்போமா?

அகிலாண்டபாரதி, பொது மற்றும் கண் மருத்துவர்ஹெல்த்

Published:Updated:
கழுத்தைக் கொஞ்சம் கவனிப்போமா?
பிரீமியம் ஸ்டோரி
கழுத்தைக் கொஞ்சம் கவனிப்போமா?

ழுத்துப் பகுதியில் ஏற்படும் வீக்கத்தையும் கட்டியையும் சிலர் சாதாரணமாக நினைத்து, கவனிக்காமல் விட்டுவிடுகிறார்கள். உண்மையில் அவை, உடல் உறுப்புகளில் ஏற்பட்டிருக்கும் ஏதாவது ஒரு நோயின் வெளிப்பாடாக இருக்கலாம். உடலின் எந்தப் பகுதியில் கிருமித்தொற்று ஏற்பட்டாலும், அதனருகே இருக்கும் `லிம்ப் நோடு’ (Lymph Node) எனப்படும் நிணநீர்க்கட்டி வீங்கிவிடும். கழுத்தின் பின்பகுதியில் தலைமுடிக்குச் சற்றுக் கீழே சிறு கட்டிகள் காணப்படும். தலையில் பேன், பொடுகு, வேனல் கட்டி போன்றவற்றால் இவை ஏற்படலாம். இந்த வகைக் கட்டிகள் அரை சென்டிமீட்டர் முதல் ஒரு சென்டிமீட்டர் அகலம்வரை இருக்கும். லேசாக உருளும் தன்மையுடன், சற்று வலுவாக  இருக்கும். ஒன்றுடன் ஒன்று ஒட்டாது. தலையில் காணப்படும் பேன், பொடுகு போன்றவற்றை குணப்படுத்தினால், இவை தாமாக மறைந்துவிடும்.

கழுத்தைக் கொஞ்சம் கவனிப்போமா?

தலையின் பின் பகுதியிலோ, தாடை அல்லது கழுத்தின் முன் பகுதியிலோ, சற்று அளவில் பெரிதான, வலியுடன்கூடிய, ஒன்றுடன் ஒன்று ஒட்டிய நிலையிலிருக்கும் கட்டிகளும் தோன்றலாம். இவை காசநோய்க் கட்டிகளாக இருக்க வாய்ப்புகள் அதிகம். நெருங்கிய உறவினர்களில் யாருக்கேனும் நுரையீரல் காசநோய் இருந்திருக்கலாம். சில ரத்தப் பரிசோதனைகள் மற்றும் கட்டியிலிருந்து ஊசி மூலம் நீர் எடுத்து பரிசோதனை செய்து காசநோயை உறுதிப்படுத்தலாம். நுரையீரல் காசநோயைப்போலவே ஆறு முதல் எட்டு மாதங்கள்வரை கூட்டு மருந்து சிகிச்சை எடுத்தால், இதை முழுவதுமாக குணப்படுத்திவிடலாம்.

நடுத்தர மற்றும் வயது முதிர்ந்தவர்களுக்கு ஏற்படும் கழுத்துக் கட்டிகள் புற்றுநோயால் உருவானதாக இருக்கலாம். புற்றுநோயால் ஏற்பட்டிருந்தால், கனமான கட்டிகளாக (தொடும்போது எலும்பு போன்ற தோற்றத்தில்) அசைவற்றதாக இருக்கும். இதற்கு உடனடியாக முழு உடல் பரிசோதனை செய்யவேண்டியது அவசியம். நுரையீரல், மார்பகம், கல்லீரல், இரைப்பை, குடல், கர்ப்பப்பை உள்ளிட்ட எந்த உறுப்பிலாவது புற்றுநோய் பாதித்து அதன் ஆரம்ப அறிகுறியாக இந்தக் கட்டிகள் உருவாகலாம். குறிப்பாக, இடது புற காரை எலும்புக்கு மேல் காணப்படும் நிணநீர்க்கட்டி (Virchow’s Node) 100 சதவிகிதம் உள்ளேயிருக்கும் புற்றுநோயின் வெளிப்பாடே. தற்போது இளம் வயதினருக்கும்கூட புற்றுநோய் அதிகமாகக் காணப்படுவதால், இந்தக் கட்டிகளை அலட்சியம் செய்யக் கூடாது.

ஒட்டுமொத்த விகடனுக்கும் ஒரே ஷார்ட்கட்!

கழுத்தைக் கொஞ்சம் கவனிப்போமா?



கழுத்தில் பல இடங்களில் நிணநீர்க்கட்டிகள் இருந்தால், உடலின் மற்ற பகுதிகளில் (அக்குள், கைகள், இடுப்பு) சுய பரிசோதனை செய்ய வேண்டும். இப்படி ஒன்றுக்கும் மேற்பட்ட இடங்களில் காணப்படும் கட்டிகளுக்கு உடனடி மருத்துவ ஆலோசனை அவசியம். இது நிணநீர் அமைப்பை பாதிக்கும் புற்றுநோயாக (Lymphoma) இருக்கலாம். இவற்றை முழுமையாக குணப்படுத்த சிறந்த சிகிச்சைகள் வந்துவிட்டன. கழுத்துக் கட்டிகளுக்கு கை வைத்தியம் பார்ப்பது தவறு.

தாடையின் அடியில் உருவாகும் வலியுடன்கூடிய நிணநீர்க்கட்டிகள் தொண்டை, டான்சில் போன்ற உறுப்புகளில் ஏற்படும் தொற்றினால் உருவானவையாக இருக்கலாம். அவை உருவான இடத்தைக் கண்டுபிடித்து, உரிய சிகிச்சை அளிக்க வேண்டும். காதின் பின்புறமும், தாடையின் அடியிலும் ஏற்படும் வீக்கத்துக்கு, எச்சில் சுரப்பிகள் காரணமாக இருக்கலாம். குறிப்பாக, `அம்மைக்கட்டு’ என்பது ஒரு வைரஸ் கிருமியால் ஏற்படுவது. காதின் அருகே உள்ள பரோடிட் சுரப்பியை  (Parotid Gland) இது பாதிக்கும். இது, சாதாரண வைரஸ் காய்ச்சலைப்போல இருந்தாலும், ஒரு வாரத்தில் குணமாகிவிடும். இருமல், ஜலதோஷம் இருக்கும். இதற்கு  நிறைய தண்ணீர் குடிப்பதுடன் நன்றாக ஓய்வெடுக்க வேண்டும். மருத்துவரை அணுகினால், அறிகுறிகளுக்கேற்ப மருந்துகள் தருவார். 

கழுத்தைக் கொஞ்சம் கவனிப்போமா?

கிராமங்களில் இதை ‘பொன்னுக்கு வீங்கி’ என்பார்கள். `கழுத்தில் தங்க நகை அணிந்தால் இது குணமாகிவிடும்’ என்று ஒரு நம்பிக்கை உள்ளது. உண்மையில், இது தானாகவே சரியாகிவிடும். இதைத் தடுக்க `எம்.எம்.ஆர்’ (M.M.R - Measles, Mumps, Rubella) தடுப்பூசி போடப்படுகிறது. படுத்த படுக்கையாக இருக்கும் நோயாளிகளுக்கும், பேறுகாலம் மற்றும் பெரிய அறுவை சிகிச்சைகள் முடித்த நோயாளிகளுக்கும் சரியாக பல் துலக்காததால் வாயில் கிருமிகள் பெருகும். இவை பரோடிட் சுரப்பிக்குப் பரவி, வீக்கம் ஏற்படலாம். இதை ஆன்டிபயாடிக் மருந்துகள் கொடுத்து குணப்படுத்திவிடலாம்.

கழுத்துப் பகுதியிலுள்ள மற்றொரு முக்கியமான உறுப்பு தைராய்டு. இது கழுத்தின் முன் பகுதியில் சருமத்துக்குக் கீழே உள்ள ஒரு நாளமில்லாச் சுரப்பி. உடலின் அனைத்து செல்களும் சீராக இயங்க, தைராய்டிலிருந்து சுரக்கும் தைராக்சின் மிக அவசியம். உடலில் தைராக்சின் அளவு குறையும்போது அனைத்து உறுப்புகளும் தங்களின்  வேலையைச் சுருக்கிக்கொள்ளும். உடல், ஆற்றலைச் சேமிக்கத் தொடங்கும்; ஆங்காங்கே கொழுப்பு படியும். குரல் மாறும். உடல் அசதி, சருமம் வறண்டுபோதல், எடை அதிகரித்தல், மாதவிடாய்க் கோளாறுகள், ரத்தச்சோகை, மலச்சிக்கல் போன்ற அறிகுறிகள் தென்படும். காரணத்தைக் கண்டறிந்து சிகிச்சை அளித்தால் உடல் சமச்சீர்நிலைக்குத் திரும்பிவிடும்.

சிலருக்கு தைராக்சின் அதிகமாகச் சுரக்கும். அப்போது எடை இழப்பு, படபடப்பு, நடுக்கம், வயிற்றுப்போக்கு, அதிக வியர்வை, கண்கள் வெளியே தள்ளியது போன்ற உணர்வு ஏற்படும். அப்போது தைராக்சின் அளவைக் கட்டுப்படுத்த மாத்திரைகள் அளிக்கப்படும். தைராய்டில் கட்டிகள் தோன்றியிருந்தாலும் அவற்றின் தன்மையை அறிந்து, அதற்கேற்ற சிகிச்சை அளிக்கப்பட வேண்டும். தைராய்டில் வரும் கட்டியான ‘முன்கழுத்துக் கழலை’ (Goitre), அயோடின் சத்துக் குறைபாடு உள்ள நாடுகளில் அதிகம் காணப்படுகிறது. அயோடின் கலந்த உப்பைப் பயன்படுத்துவதால் இந்தப் பிரச்னையைத் தடுக்கலாம்.

கழுத்தின் இன்னொரு முக்கியமான பகுதி கழுத்தெலும்பு. இதன் வழியாகத்தான் ரத்தக்குழாய்கள் இதயத்திலிருந்து மூளைக்கும், மூளையிலிருந்து வரும் நரம்புகள் உடல் முழுக்கவும் செல்கின்றன. கழுத்தெலும்புத் தேய்மானத்தின்போதும், காயம் ஏற்படும்போதும் இந்த நரம்புகள் மற்றும் ரத்தக்குழாய்களில் அழுத்தம் ஏற்படும். இதனால்தான் தலைச்சுற்றல், கைகளில் வலி, மதமதப்பு போன்ற அறிகுறிகள் தோன்றும். கழுத்தில் காலர் அணிவது மற்றும் பயிற்சிகளின் மூலம் இவற்றைக் கட்டுப்படுத்தலாம். சிலருக்குக் கழுத்தில் அதிகப்படியாக ஓர் எலும்பு வளர்ந்திருக்கும் (Cervical Rib). முதல் விலா எலும்புக்கு மேலே இது அமைந்திருப்பதால், கை மதமதப்பு, வலி போன்றவை ஏற்படும்.

கழுத்தில் அதிகக் கொழுப்பு படிந்திருக்கும்போது ஏற்படும் ஒரு பிரச்னைதான் குறட்டை. குறட்டைவிடும் பழக்கம் உள்ளவர்களுக்கு இரவில் ஆழ்ந்த தூக்கம் இருக்காது; பகலில் அசதியாக இருக்கும். முறையான உடற்பயிற்சி மற்றும் உணவுப் பழக்கங்களால் கழுத்துத் தசைகளில் உள்ள கொழுப்பைக் குறைத்து, குறட்டையிலிருந்து விடுபடலாம். தீராத குறட்டைநோய்க்கு அறுவை சிகிச்சைகளும் இருக்கின்றன.

கழுத்தைக் கொஞ்சம் கவனிப்போமா?
கழுத்தைக் கொஞ்சம் கவனிப்போமா?

பின்னிரவு இரண்டு மணி, பிற்பகல் இரண்டு மணியின்போதுதான் உடல் சோர்வு அதிகம் ஏற்படும். இரவு, உறக்கத்தில் கழிந்துவிடும் என்பதால், வெளிப்படையாகத் தெரிவதில்லை. பகல் 2 மணி அளவில், பலரும் அசதியாக இருப்பது இதனால்தான்!

தொகுப்பு: ஜெ.நிவேதா    

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism