Published:Updated:

ஸ்பூன் தியரி - இது ஆற்றலின் அளவுகோல்!

ஸ்பூன் தியரி - இது ஆற்றலின் அளவுகோல்!
பிரீமியம் ஸ்டோரி
News
ஸ்பூன் தியரி - இது ஆற்றலின் அளவுகோல்!

ஹெல்த்

“என் வலி உனக்கெல்லாம் புரியாது” என்று சிலர் விரக்தியில் சொல்வதைக் கேட்டிருப்பீர்கள். ஒருவர் மனதின் வலியை மற்றவரால் உணர முடியாது. அப்படித்தான் நாள்பட்ட நோயால் பாதிக்கப்பட்டு, தங்கள் அன்றாடச் செயல்பாடுகளைக்கூடச் செய்ய முடியாத நோயுற்றவர்களின் உணர்வுகளையும் நம்மால் புரிந்துகொள்ள முடியாது.  ‘அவங்களை எப்போ கேட்டாலும், `முடியலை... முடியலை’னுதான் சொல்றாங்க. ஊரு உலகத்துல யாருக்கும் இல்லாத நோயா வந்திருச்சு...’ என்று கடின வார்த்தைகளை உதிர்த்துவிட்டு, கடந்து சென்றுவிடுவோம். 

ஸ்பூன் தியரி - இது ஆற்றலின் அளவுகோல்!

கொடிய நோய்களால் பாதிக்கப்பட்டவர்களின் உணர்வுகளை, இயலாமையை, இயக்கத்திறனை மருத்துவர்களும் குடும்பத்தினரும் புரிந்துகொள்ள ‘ஸ்பூன் தியரி’ (Spoon Theory) உதவும். அதென்ன ஸ்பூன் தியரி... விளக்குகிறார் நரம்பியல் மருத்துவர் பிரபாஷ்.

“நாள்பட்ட நோய்களால் பாதிக்கப்பட்டவர்களுக்கு அன்றாட வேலைகளைச் செய்வதே மிகவும் சிரமமாக இருக்கும். உதாரணமாக, பல் தேய்ப்பது, குளிப்பது, உடை மாற்றுவது, நடைப்பயிற்சி போன்ற சிறிய விஷயங்களைச் செய்யக்கூட சிரமப்படுவார்கள். நோயின் தாக்கம், அது தரும் வலி, மருந்துகள் எனப் பல காரணங்களால், ஆற்றல் குறைந்து பலவீனமாக இருப்பார்கள். அவர்களிடமிருக்கும் ஆற்றலை சமயோசிதமாகப் பயன்படுத்தி, இயங்கவைப்பதற்கு ஸ்பூன் தியரி உதவும்.

எப்படி வேலை செய்கிறது?

நாள்பட்ட நோய்களால் பாதிக்கப்பட்டு, பிறரைப்போல் இயல்பாக இயங்க முடியாதநிலையில் ஒருவர் இருக்கிறார் என்று வைத்துக்கொள்வோம். அந்தநிலையில் ஒரு நாளைக்கு அவரால் என்னென்ன காரியங்களைச் செய்ய முடியும் என்பதைக் கணக்கிட்டு, அவருக்கு ஸ்பூன்கள் வழங்கப்படும். உதாரணமாக, குளிக்கும் செயலைச் செய்வதற்கு ஒரு ஸ்பூன்,  சாப்பிடுவதற்கு ஒன்று, உடை மாற்றுவதற்கு ஒன்று... என ஒரு நாளைக்கு பத்து ஸ்பூன்களை வழங்கலாம்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

பத்துதான் கொடுக்க வேண்டும் என்பதில்லை. ஒவ்வொருவருக்கும் ஏற்றாற்போல், அவர்களால் எத்தனை செயல்களைச் செய்ய முடியும் என்ற அடிப்படையில் ஸ்பூன்களின் எண்ணிக்கையை அதிகரிக்கவோ, குறைக்கவோ செய்யலாம். அந்த எண்ணிக்கை, நோயால் பாதிக்கப்பட்டவரின் ஒட்டுமொத்த ஆற்றலை உருவகப்படுத்துகிறது. அவர் ஒரு நாளில் தன்னால் செய்ய முடிந்த வேலைகளைச் செய்யும்போது,  அதாவது அவராகவே தன் ஆற்றலைச் செலவழித்துக் குளிக்கிறார் என்றால், பத்து ஸ்பூன்களில் ஒன்று பயன்படுத்தப்பட்டுவிட்டது என்று பொருள். ஒரு நாள் காலையிலிருந்து இரவு நிறைவடைவதற்குள் அவர் செய்யும் ஒவ்வொரு வேலைக்கும் ஒரு ஸ்பூன் பயன்படுத்தப்பட்டுவிட்டதாக எடுத்துக்கொள்ள வேண்டும்.

ஸ்பூன் தியரி - இது ஆற்றலின் அளவுகோல்!

இந்தப் பயன்பாடு எல்லா நாள்களிலும் ஒரே மாதிரி இருக்காது. சில நாள்களில் அந்த நோயாளியால் அதிக வேலைகளைச் செய்ய முடியாது. அன்றைய தினம் ஆறு ஸ்பூன்கள் மட்டுமே பயன்படுத்தப்பட்டிருக்கும். சில நாள்களில் அதிகம் வேலை செய்ததால், மதிய வேளையிலேயே  10 ஸ்பூன்களின் பயன்பாடும் நிறைவடைந்திருக்கும். அப்படியென்றால், ‘அவர்கள் அதிகமாக வேலை செய்துவிட்டார்கள், சிறிது ஓய்வெடுக்க வேண்டும்’ என்று உணர வேண்டும். சிறிது ஓய்வெடுத்துவிட்டு இரவு ஏதோ ஒரு வேலையைச் செய்கிறார் என்றால், அந்தச் செயலுக்கான ஸ்பூனை அடுத்த நாளைக்கான ஒதுக்கீட்டிலிருந்து கடன் பெற்றிருக்கிறார்கள் என்று எடுத்துக்கொள்ள வேண்டும். அடுத்த நாளைக்கான ஒன்றைச் செலவழித்துவிட்டதால், அடுத்த நாள் தங்கள் ஆற்றலை எப்படிச் செலவழிப்பது என்று திட்டமிட்டுச் செலவழிக்க வேண்டும்.

நாள்பட்ட நோய்களால் பாதிக்கப்பட்டவர்களுக்கு இந்தக் கோட்பாட்டைப் பயன்படுத்தும்போது, அவர்களால் மேலும் சில விஷயங்களைச் செய்ய முடியும். ஒருவேளை எல்லா ஸ்பூன்களும் ஒரு நாளில் மதியமே நிறைவடைந்துவிட்டதென்றால், ‘என்னிடமிருக்கும் ஆற்றல் தீர்ந்துவிட்டது. இதற்குமேல் வேலை செய்யும்போது அது அதிக அழுத்தத்தை ஏற்படுத்தும். எனவே, நான் ஓய்வெடுக்க வேண்டும்’ என்பதை நோயாளி உணர்ந்துகொள்ள முடியும்.

இந்தக் கோட்பாட்டைப் பயன்படுத்தும்போது, நாள்பட்ட நோயால் பாதிக்கப்பட்ட  ஒருவரிடம் எவ்வளவு ஆற்றல் இருக்கிறது, அவர் பலவீனமாக இருக்கிறாரா, ஆரோக்கியமாக இருக்கிறாரா என்பன போன்ற விஷயங்களை மருத்துவராலும் குடும்பத்தினராலும் எளிதில் உணர்ந்துகொள்ள முடியும். நாள்பட்ட நோய்களால் பாதிக்கப்பட்டவர்கள் தங்களின் ஆற்றலைப் பற்றி அவர்களே உணர்ந்துகொள்ளவும், இருக்கும் ஆற்றலைப் பயன்படுத்தி அன்றாட வாழ்க்கையை எப்படி வாழ்வது எனத் திட்டமிடவும் உளவியல்ரீதியாக இந்தக் கோட்பாடு உதவும்” என்கிறார் டாக்டர் பிரபாஷ்.

என்னென்ன நோய்களுக்குப் பலனளிக்கும்?

நரம்பியல் நோய்களான பார்க்கின்சன்ஸ், தண்டுவட மரப்பு நோய் (Multiple Sclerosis), தசைக் களைப்பு (Myasthenia Gravis) பக்கவாதத்தால் ஏற்பட்ட பாதிப்பு, புற்றுநோய், முடக்குவாதம், ஆட்டிசம், ரத்தப் புற்றுநோய், தீராத தசைவலி (Fibromyalgia), கர்ப்பப்பையை பாதிக்கும் எண்டோமெட்ரியோசிஸ் (Endometriosis), விபத்துக்குப் பின்னர் ஏற்படும் மன அழுத்தம், நோய் எதிர்ப்பு செல்கள் உடலின் உள்ளுறுப்புகளுக்கு எதிராகச் செயல்படுவதால் ஏற்படும் லூபஸ் (Lupus) உள்ளிட்ட நாள்பட்ட நோய்களால் பாதிக்கப்பட்டவர்களுக்கு ஸ்பூன் தியரி உதவும்.

- ஜெனி ஃப்ரீடா

 *நாள்பட்ட நோய்களால் பாதிக்கப்பட்டோருக்கு....

ஸ்பூன் தியரி - இது ஆற்றலின் அளவுகோல்!


*நாள்பட்ட நோயால் பாதிக்கப்பட்டவர்கள் குளியல், சமையல் போன்ற நின்றுகொண்டே செய்யும் வேலைகளை உட்கார்ந்துகொண்டு செய்தால், ஆற்றலைச் சிறிது சேமிக்க முடியும்.

*ஸ்பூன்கள் குறைவாக இருக்கும் தினத்தில் இரண்டு அல்லது மூன்று வேளைகளுக்கும் சேர்த்துச் சமைத்துவிடலாம். ஸ்பூன்கள் அதிகமாக இருந்தால், ஒவ்வொரு வேளையும்கூட சமைக்கலாம்.

*வாரத்தின் ஒருநாளை விடுமுறை தினமாகக் கருதி, அன்றைய தினம் ஸ்பூன்களைக் குறைவாகப் பயன்படுத்தலாம். இது பிற நாள்களில் அதிக ஆற்றலோடு செயல்பட உதவும்.

*நாள்பட்ட நோயாளிகளால் செய்ய இயலாத ஒரு காரியத்தை யாராவது செய்யச் சொன்னால்,  `முடியாது’ என்று மறுத்துவிட வேண்டும்.

*ஆற்றல் மிகவும் குறைவாக இருக்கும் தினத்தில் படுக்கையினருகே உணவை வைத்துக்கொள்வது, அதிக தூரம் நடக்காமல் இருப்பது, வேலைகளைக் குறைத்துக்கொள்வது போன்ற செயல்களின் மூலம் ஆற்றலைச் சேமிக்கலாம்.

*வேலை அதிகமில்லாத நாள்களில் சேமித்துவைக்கக்கூடிய தொக்கு, குழம்பு தயாரித்தல், மாவு அரைத்தல் போன்ற வேலைகளைச் செய்துவிடலாம். இதனால் ஸ்பூன்கள் குறைவாக இருக்கும் தினத்தில் இது போன்ற வேலைகளுக்கு ஆற்றலை இழக்க நேரிடாது.

*அடுத்த நாள் என்ன உடை உடுத்த வேண்டும், என்ன சமையல் செய்ய வேண்டும் என்பன போன்ற காரியங்களை முந்தைய நாளே திட்டமிட்டுவிட்டால், அடுத்த நாள் பதற்றம், அழுத்தமில்லாமல் செயல்பட முடியும். இது ஆற்றலையும் சேமிக்கும்.

எப்படி உருவானது ஸ்பூன் தியரி?

மெரிக்காவைச் சேர்ந்த கிறிஸ்டின் மிசராண்டினோ (Christine Miserandino) என்ற பெண்ணால் உருவாக்கப்பட்டதுதான் ஸ்பூன் தியரி. கிறிஸ்டின், ‘லூபஸ்’ என்ற கொடியநோயால் பாதிக்கப்பட்டிருந்தார். 2003-ம் ஆண்டு, தன் தோழி ஒருவருடன் ஹோட்டலுக்குச் சென்றார். ‘லூபஸ்’ நோயைப் பற்றி அதிகம் அறிந்திராத அந்தத் தோழி, கிறிஸ்டினிடம் அந்த நோய் குறித்து விசாரித்திருக்கிறார்.

உடனே, அருகிலிருந்த மேசைகளிலிருந்து 12 ஸ்பூன்களைச் சேகரித்து வந்திருக்கிறார் கிறிஸ்டின். அதைத் தோழியிடம் கொடுத்து, தன் தோழி ஒரு நாள் தொடங்கியதிலிருந்து நிறைவடையும்வரை என்னென்ன வேலைகளையெல்லாம் செய்வார் என்பதைப் பட்டியலிடச் சொன்னார். தோழியும் காலையில் எழுவது, குளிப்பது, உடை மாற்றுவது என்று ஒவ்வொரு செயலாகச் சொல்லச் சொல்ல, தோழியின் கைகளிலிருந்து ஒவ்வொரு ஸ்பூனாக வாங்கத் தொடங்கினார் கிறிஸ்டின். ‘அந்த ஸ்பூன்கள் அனைத்தும் ஆற்றலைப் போன்றவை. அவற்றின் எண்ணிக்கை குறையும்போது ஆற்றலும் குறைந்துவிட்டதாகப் பொருள்’ என்றார் கிறிஸ்டின்.

‘லூபஸ்’ நோயால் கிறிஸ்டின் எந்தளவுக்கு  பாதிக்கப்பட்டிருக்கிறார் என்பதைத் தோழி உணர்ந்துகொண்டார். தன்னால் எளிதாகச் செய்யக்கூடிய சிறிய வேலைகளைக்கூட நோயால் பாதிக்கப்பட்ட தன் தோழி செய்வதற்கு எத்தனை சிரமப்படுகிறார் என்பதையும் யோசித்துப் பார்த்தார். அவரால் பிறரைப்போல் செயல்பட முடியாது என்பதையும் புரிந்துகொண்டார். ஸ்பூன்களின் உதவியுடன் மிகவும் உணர்வுபூர்வமாக கிறிஸ்டினின் நிலையை அறிந்துகொண்டார். அப்படித் தோன்றியதுதான் ஸ்பூன் தியரி. இதை உருவாக்கிய கிறிஸ்டின், ஓர் எழுத்தாளர்; மேடைப் பேச்சாளரும்கூட. ‘லூபஸ்’ நோய் குறித்த விழிப்புணர்விலும் ஈடுபட்டிருக்கிறார். இவர், `தி ஸ்பூன் தியரி’ என்ற புத்தகம் ஒன்றும் எழுதியுள்ளார்.