Published:Updated:

அதிகாலை தூக்கம் கலைந்தாலும், படுக்கையை விட்டு எழ சோம்பலா?! `டிசேனியா'வாக இருக்கலாம்! #Dysania

`டிசேனியா' பாதிப்பு ஒருவருக்கு அளவுக்கு மீறிய, தேவைக்கு மீறிய தூக்கத்தைக் கொடுப்பதுடன், அன்றாட வாழ்க்கையைச் சீராகச் செயல்பட விடாமல் தடுக்கவும் செய்யும். 

அதிகாலை தூக்கம் கலைந்தாலும், படுக்கையை விட்டு எழ சோம்பலா?! `டிசேனியா'வாக இருக்கலாம்! #Dysania
அதிகாலை தூக்கம் கலைந்தாலும், படுக்கையை விட்டு எழ சோம்பலா?! `டிசேனியா'வாக இருக்கலாம்! #Dysania

ரவில் படுக்கைக்குச் சென்றும் தூக்கம் வராமல் தவித்தால், அது `இன்சோம்னியா. (Insomnia) அதேபோன்று அதிகாலையில் படுக்கையிலிருந்து எழ முடியாமல் தவிப்பது `டிசேனியா' (Dysania). `இன்சோம்னியா' பற்றி, நாம் அதிகம் அறிந்திருப்போம். ஆனால், `டிசேனியா' பற்றித் தெரிந்திருக்க வாய்ப்பில்லை. `காலையில நேரத்துக்கு முழிப்பு வந்துடுது, ஆனா இன்னும் கொஞ்சநேரம் தூங்கினா நல்லாயிருக்கும்னு தோணுது. கண் முழிச்சிட்டிருந்தாலும், படுக்கையைவிட்டு எழுந்திருக்க மாட்டேங்கிறேன்... ' என்பார்கள் சிலர். அதுதான், `டிசேனியா' பாதிப்பு. 

`டிசேனியா' பாதிப்பை, `படுக்கைக்கு அடிமையாக இருப்பது' என்கின்றனர் தூக்கவியலாளர்கள். `டிசேனியா'வுக்கு மற்றொரு பெயர், `கிளினோமேனியா' (Clinomania). கிரேக்க மொழியில், `கிளினோ' (Clino) என்றால் `படுக்கை' என்றும் `மேனியா' (Mania) என்றால் `அடிமைப்பட்டுக்கிடப்பது' என்றும் பொருள்.  உடலியக்கத்தில் பசி, தூக்கம், விழிப்பு போன்ற அடிப்படைச் செய்கைகள் அனைத்தும் குறிப்பிட்ட நேரத்தில் நடக்கவேண்டும். ஆரோக்கியமான உடலுக்கு அதுதான் அடிப்படை. இதில், மிகமுக்கியமானவை பசி மற்றும் தூக்கத்துக்கான நேர வழிமுறைகளாகும். தூக்கத்தைப் பொறுத்தவரை படுக்கைக்குச் சென்ற 15-வது நிமிடத்தில் ஆழ்நிலை உறக்கம் ஏற்படவேண்டும். அதேபோல, கண்விழித்த சில நிமிடங்களில் படுக்கையை விட்டு எழுந்திருக்கவேண்டும். `இந்த நேரத்துக்குப் படுக்கைக்குச் செல்ல வேண்டும்' என்பதுபோல, `இந்த நேரத்தில் படுக்கையிலிருந்து எழுந்துவிட வேண்டும்' என்பதும் தூக்க வரைமுறைக்குள் இருக்கிறது. 

ஒருவேளை, காலையில் படுக்கையிலிருந்து நேரத்துக்கு எழ முடியாமல் போனால், அது `டிசேனியா'. இந்தப் பாதிப்பு, உடலுக்குப் போதுமான தூக்கம் கிடைத்தபிறகும்கூட காலைவேளையில் படுக்கையிலிருந்து எழுந்திருக்க மனமின்றி இருப்பதாகும். `Psych2go' என்ற தனியார் நிறுவனம், `டிசேனியா' பிரச்னை உள்ள பெரும்பாலானோருக்கு மனஅழுத்தம் மற்றும் பதற்றம் இருப்பதைக் கண்டறிந்துள்ளது. கூடவே, நீண்டநாள்களாகச் சோர்வாக உணர்பவர்களுக்கும் இந்தப் பிரச்னை இருப்பது தெரியவந்துள்ளது. 

`ரைஸ் அண்ட் ஷைன்' (Rise and Shine) என்ற மற்றொரு தனியார் நிறுவனம், `டிசேனியா' பாதிப்பை எப்படிக் கண்டறிவது எனக் கூறியுள்ளது. அதில், `காலையில் தூக்கம் கலையும்போது மிகவும் அலுப்பாகவும், எரிச்சலாகவும் உணர்ந்தால் அது சோம்பேறித்தனம்; `டிசேனியா' பாதிப்பு இல்லை. மாறாகத் தூங்கி எழும்போது மிகுந்த பதற்றமாகவோ, மனஅழுத்தத்துடனோ, தீவிரமான சோர்வுடனோ (Chronic Fatigue Syndrome) எழுந்தால் அது `டிசேனியா' பாதிப்பாக இருக்கக்கூடும்' எனக் கூறப்பட்டுள்ளது. `டிசேனியா' பாதிப்பு ஒருவருக்கு அளவுக்கு மீறிய, தேவைக்கு மீறிய தூக்கத்தைக் கொடுப்பதுடன், அன்றாட வாழ்க்கையைச் சீராகச் செயல்பட விடாமல் தடுக்கவும் செய்யும்.

அலுவலகம் மற்றும் தனிப்பட்ட வாழ்க்கையில் தீவிர மனஅழுத்தத்துக்கு உள்ளானவர்களே `டிசேனியா' பாதிப்புக்கு உள்ளாகின்றனர் என்கின்றனர் தூக்கவியலாளர்கள். உடலியக்கம் சீராக இருப்பவர்கள், அதிகாலையில் நேரத்துடன் எழுபவர்கள் மத்தியில், தூக்கம் தொடர்பான குறைபாடுகள் மிகவும் குறைவாகவே காணப்படுகிறது. 

`டிசேனியா' வகை பாதிப்புக்கான சிகிச்சையின்போது பெரும்பாலும் `செரடோனின்' என்ற ரசாயனத்தின் அளவை அதிகரிக்கச் செய்வார்கள். இந்த ரசாயனம்தான் மகிழ்ச்சி மற்றும் உற்சாகத்தை அதிகரிக்கச் செய்யும். வழக்கமாக உடற்பயிற்சிகள் செய்வது, மன அழுத்தம் போக்கும் வழிமுறைகள், முறையான மற்றும் நிம்மதியான தூக்கத்துக்கான வழிமுறைகளை முறையாகச் செய்தாலே `செரடோனின்' ரசாயன மாற்றம் நம் உடலில் தானாகவே நடக்கும்.  

நிம்மதியான தூக்கத்தைப் பெற நாம் பின்பற்றவேண்டிய வழிமுறைகள் பற்றித் தூக்கவியல் நிபுணர் ராமகிருஷ்ணனிடம் கேட்டோம்.

"* தூங்கச் செல்வதற்கான நேரத்தையும், மீண்டும் எழுவதற்கான நேரத்தையும் முறைப்படுத்திக் கொள்ளவேண்டும்.

* ஒவ்வொரு நாள் காலையிலும், உடல் தனது இயக்கத்தை மீண்டும் முதலிலிருந்து புத்துணர்வுடன் தொடங்க வேண்டியிருக்கும். எனவே, இரவு தூங்கச் செல்லும்போது தேவையில்லாத குழப்பங்களை மனதில் போட்டுக்கொண்டு, இறுக்கமான சூழலை ஏற்படுத்திக் கொள்ளவேண்டாம்.

* படுக்கையறை சற்று குளிர்ச்சியான வெப்பநிலையில் இருட்டாகவும், அமைதியாகவும் இருக்கும்படி பார்த்துக்கொள்ளவும்.

* படுக்கையில் மொபைல் பார்ப்பது, லேப்டாப் பயன்படுத்துவது போன்ற வேறு எந்தச் செய்கையையும் செய்யவேண்டாம். 

* இரவு படுக்கைக்குச் செல்வதற்கு இரண்டுமணி நேரம் முன்னதாகச் சாப்பிடவேண்டும். இரவு ஹெவி ஃபுட்டாக இல்லாமல், எளிதாகச் செரிக்கும் உணவாக இருக்குமாறு பார்த்துக்கொள்ளவும்.

* கஃபைன் சத்து உடலில் அதிகம் சேர்ந்தால் தூக்கமின்மை அல்லது தேவையான தூக்கம் வராமல் போகலாம். எனவே முடிந்தளவு காபி, டீ அருந்துவதைத் தவிர்க்கவும்.

* அதிகாலை சூரிய ஒளி உடலில் படர்வது, உடல் ஆரோக்கியத்துக்கு மிகவும் நல்லது. எனவே, முடிந்தவரைக் காலையில் சீக்கிரம் எழுவதைப் பழக்கப்படுத்திக் கொள்ளவும்.

* குறட்டை என்பது, தூக்கத்தில் மூச்சுத் திணறல் ஏற்படுவதால் வரக்கூடியது. இது தொடர்ந்தால், `ஸ்லீப் ஆப்னியா' என்ற நோய் பாதிப்பு ஏற்படலாம். எனவே குறட்டை விடுபவர்கள், முறையான மருத்துவப் பரிந்துரை பெற்று சிகிச்சை மேற்கொள்வது நல்லது. 

தூக்கத்தை நெறிப்படுத்திக்கொள்வதன் மூலம், ஒருவரது உடலில் ஏற்படும் பல்வேறு பிரச்னைகளைச் சரிசெய்யலாம். வார நாள்கள் முழுவதும் சரியாகத் தூங்காமல், வார இறுதி நாள்களில் தூங்கும் சிலர் இருக்கின்றனர். இப்படிப்பட்டவர்கள், தூக்க நேரத்தைச் சரிசெய்வதாகக் கூறிக்கொண்டு இப்படிச் செய்கின்றனர். உணவை எப்படிச் சேர்த்துவைத்து சாப்பிடக்கூடாதோ, அப்படித்தான் மொத்தமாக தூங்கவும் கூடாது. தூக்க வழிமுறைகளைப் பின்பற்றி, அன்றாடம் முழு ஓய்வு பெற வேண்டியது அவசியம்" என்கிறார் ராமகிருஷ்ணன்.