Published:Updated:

மருத்துவர்களையும் மனிதர்களாகப் பாருங்கள்!

ஒட்டுமொத்த விகடனுக்கும் ஒரே ஷார்ட்கட்

Use App
மருத்துவர்களையும் மனிதர்களாகப் பாருங்கள்!
மருத்துவர்களையும் மனிதர்களாகப் பாருங்கள்!

ஹெல்த்

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

பிரீமியம் ஸ்டோரி

மேற்குவங்கத் தலைநகர் கொல்கத்தாவிலுள்ள என்.ஆர்.எஸ் மருத்துவமனையில் சிகிச்சை பெற்ற நோயாளி ஒருவர் இறந்துவிட்டார். ‘மருத்துவர் முறையான சிகிச்சை அளிக்கவில்லை’ எனக் கூறி, இரண்டு டிராக்டர்களில் வந்த 200-க்கும் மேற்பட்டோர் மருத்துவமனைக்குள் புகுந்து பணியிலிருந்த மருத்துவர்கள் மற்றும் பிற பணியாளர்களைத் தாக்கியிருக்கிறார்கள். இதனால் பரிபாஹா முகர்ஜி என்ற பயிற்சி மருத்துவரின் மண்டையில் பலத்த காயம் ஏற்பட்டது.

மருத்துவர்களையும் மனிதர்களாகப் பாருங்கள்!

இந்தச் சம்பவம் மருத்துவர்கள் மத்தியில் கடும் அச்சத்தை ஏற்படுத்தியிருக்கிறது. தங்களைக் காக்க, வலிமையான சட்டங்கள் இயற்றப்பட வேண்டும் என்று மருத்துவர்கள் சார்பில் நாடு முழுவதும் போராட்டங்கள், பேரணிகள் மற்றும் ஒருநாள் வேலைநிறுத்தம் நடைபெற்றன. கொல்கத்தா சம்பவத்திலிருந்து மீள்வதற்குள், இமாசலப்பிரதேசத்திலுள்ள ஆரம்ப சுகாதார நிலையத்தில், பணியிலிருந்த பெண் மருத்துவரிடம் அடையாளம் தெரியாத நபர் ஒருவர் தவறாக நடக்க முயன்றதுடன், அவரைத் தாக்கியதாகவும் செய்திகள் வெளியாகியிருக்கின்றன.

மருத்துவர்களைக் கடவுளாக நினைத்து கைகூப்பும் மக்கள், தங்கள் உறவுகள் இறக்க நேர்ந்தால், அந்த இறப்புக்கும் மருத்துவர்களே காரணம் என்று நினைத்து அவர்களைத் தாக்குகிறார்கள். இப்படிப்பட்ட சம்பவங்களை அடிக்கடி கேள்விப்படுகிறோம். என்னதான் நடக்கிறது... மருத்துவர்களுக்கும் நோயாளிகளுக்குமிடையிலான உறவை மேம்படுத்த என்ன செய்ய வேண்டும்?

நாங்கள் கடவுள் இல்லை!

‘‘மருத்துவர்களைக் கடவுளாகப் பார்க்க வேண்டாம், சக மனிதனாகப் பார்த்தால் போதும். அதீத எதிர்பார்ப்புதான், அதிக கோபத்தை உண்டாக்கி, இத்தகைய விரும்பத்தகாத சம்பவங்களுக்கு வழிவகுக்கிறது” என்கிறார் பொது மருத்துவர் தேவராஜன்.

மருத்துவர்களையும் மனிதர்களாகப் பாருங்கள்!

‘‘வெளிப்படைத் தன்மை இல்லாததுதான் மருத்துவர்களை மக்கள் சந்தேகத்துடன் பார்ப்பதற்குக் காரணம். நோயாளிக்கு என்ன சிகிச்சை கொடுக்கிறோம், என்ன மருந்து கொடுக்கிறோம், நோயாளி இயல்புநிலைக்குத் திரும்ப எந்த அளவுக்கு வாய்ப்புகள் இருக்கின்றன போன்ற தகவல்களை மருத்துவமனை நிர்வாகம் நோயாளிகளின் குடும்பத்தினரிடம் தெரிவிக்க வேண்டும். சிகிச்சைகளுக்கு எவ்வளவு செலவாகும் என்பதை மிகத் தெளிவாகச் சொல்ல வேண்டும். வேறு மருத்துவமனைக்குச் சென்று சிகிச்சை பெற விரும்பினால் அனுமதிக்க வேண்டும். அப்போதுதான் மருத்துவமனை நிர்வாகத்தின் மீது நம்பிக்கை ஏற்படும். சிகிச்சையளிக்கும் இடங்களில் சி.சி.டி.வி கேமரா இருக்க வேண்டும். மருத்துவர்கள் நோயாளிகளிடம் இரக்கத்துடனும் அன்புடனும் நடந்துகொள்ள வேண்டும். சிகிச்சைக்கான கட்டணத்தை நியாயமாக வசூலிக்க வேண்டும். தான் சிகிச்சையளிக்கும் நோயாளி குணமடைய வேண்டும் என்பதுதான் மருத்துவர்களின் விருப்பமாக இருக்கும். மாறாக, நோயாளியின் உடல்நிலை மோசமடைய வேண்டும் என எந்த மருத்துவரும் விரும்புவதில்லை. அதை மக்கள் புரிந்துகொள்ள வேண்டும். மருத்துவர்களைச் சந்தேகக் கண்கொண்டு பார்க்கக் கூடாது, முழுமையாக நம்ப வேண்டும். எந்தச் சந்தேகம் இருந்தாலும் கேட்டுத் தெரிந்துகொள்ள வேண்டும்.

சிகிச்சைக்கு வரும் அனைவரையுமே காப்பாற்ற மருத்துவர்கள் கடவுள் அல்லர். எங்களால் முடிந்த அளவுக்குச் சிகிச்சையளிக்கிறோம். அதையும் மீறி சில மரணங்கள் நிகழ்கின்றன. அப்போது உணர்ச்சிவசப்படாமல், மருத்துவர்களைப் புரிந்துகொள்ள வேண்டும். `மருத்துவர்கள் சரியாகச் சிகிச்சையளிக்கவில்லை, அதனால்தான் உயிரிழப்பு ஏற்பட்டுவிட்டது’ என்று நினைப்பதைக் கைவிட வேண்டும். உணர்ச்சிவசப்பட்டு மருத்துவரைத் திட்டுவது, தாக்குவது, மருத்துவமனையைச் சூறையாடுவது போன்ற செயல்களில் ஈடுபடக் கூடாது. மருத்துவர், நோயாளி மற்றும் நோயாளியின் குடும்பத்தாரிடம் முக்கோண வடிவிலான ஆரோக்கியமான நட்புணர்வு இருக்க வேண்டும். அப்படியிருந்தாலே அசம்பாவிதங்களைத் தவிர்த்துவிடலாம்’’ என்கிறார் தேவராஜன்.

மருத்துவர்களையும் மனிதர்களாகப் பாருங்கள்!

அரசு மருத்துவமனைகளில் மாற்றங்கள் வேண்டும்!

``மருத்துவர்களுக்கும் நோயாளிகளுக்கும் இடையிலான நல்லுறவில் மருத்துவமனை நிர்வாகத்துக்கும் முக்கியப் பங்குண்டு’’ என்கிறார் சமூக சமத்துவ மருத்துவர்கள் சங்க பொதுச் செயலாளர் மருத்துவர் ரவீந்திரநாத்.

‘‘அரசு மருத்துவமனைகளில் மருத்துவர்களின் எண்ணிக்கையை அதிகரிக்க வேண்டும். தொழில்நுட்ப வசதிகளை மேம்படுத்த வேண்டும். தரமான சிகிச்சைக்கு உத்தரவாதம் அளிக்க வேண்டும். நோயாளிகளுக்கும் மருத்துவர்களுக்கும் இடையே கவுன்சலர்களை நியமிக்க வேண்டும். அனைத்து நோயாளிகளிடமும் நோயின் தன்மை மற்றும் சிகிச்சைமுறை பற்றி மருத்துவர்களால் விவரிக்க முடியாது. அந்தப் பணியைக் கவுன்சலர்கள்தான் செய்ய வேண்டும். மக்களுக்கு, அரசு மருத்துவமனைகளின் மீதான நம்பகத் தன்மையை அதிகரிக்கும் முயற்சிகளை மேற்கொள்ள வேண்டும். தனியார் மருத்துவமனைகள் வணிகமயமாவதைத் தடுக்க வேண்டும்’’ என்கிறார் ரவீந்திரநாத். 

- இரா.செந்தில் குமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு