Published:Updated:

`` `கடல்புரத்தில்’ பிலோமி பெரும் துயரத்தில் ஆழ்த்தினாள்..!’’ - வண்ணநிலவன் #LetsRelieveStress

``பாளையங்கோட்டையில் பள்ளி நண்பர்கள் எனக்கு நிறைய பேர் உண்டு. என்னுடைய வேலை நிமித்தமாக மணப்பாடு அருகேயுள்ள குலசேகரன்பட்டினத்தில் சில மாதங்கள் தங்கியிருந்தேன். அப்போது மோட்டார் படகில் சென்று கடலில் மீன் பிடிப்பவர்களுக்கும் வல்லத்தில் சென்று மீன்பிடிப்பவர்களுக்கான பிரச்னைகளை அறியமுடிந்தது. அதை வைத்துதான் முழு நாவலையும் எழுதினேன்.’’

`` `கடல்புரத்தில்’ பிலோமி பெரும் துயரத்தில் ஆழ்த்தினாள்..!’’ - வண்ணநிலவன் #LetsRelieveStress
`` `கடல்புரத்தில்’ பிலோமி பெரும் துயரத்தில் ஆழ்த்தினாள்..!’’ - வண்ணநிலவன் #LetsRelieveStress

மிழ் சினிமாவின் அரிய முயற்சிகளில் ஒன்று `அவள் அப்படித்தான்’. ருத்ரைய்யா இயக்கிய இந்தப் படத்தின் வசனங்கள் இன்றளவும் பேசப்படுபவை. இப்படத்தின் வசனகர்த்தாக்களில் ஒருவராகப் பணியாற்றியவர் வண்ணநிலவன். `கடல்புரத்தில்’, `கம்பாநதி’, `ரெயினீஸ் ஐயர் தெரு’, `எம்.எல்’ உள்ளிட்ட நாவல்களும் ‘எஸ்தர்’, ‘பாம்பும் பிராடனும்’, தர்மம்’, `உள்ளும் புறமும்’, `தாமிரவருணிக் கதைகள்’, `வண்ணநிலவன் கதைகள்’, `கரையும் உருவங்கள்’ ஆகிய சிறுகதைத் தொகுதிகளும் வெளிவந்துள்ளன. கடலாடிகளின் வாழ்க்கை சித்திரமாக விளங்கும் `கடல்புரத்தில்’ நாவல் பெரும்பான்மையான வாசகர்களால் இப்போதும் வாசிக்கப்பட்டு, விவாதிக்கப்படுகிறது. இந்த நாவல், சென்னை தூர்தர்ஷனில் தொடராகவும் வெளிவந்தது. 

சென்னை கோடம்பாக்கத்தில் வசித்துவரும் எழுத்தாளர் வண்ணநிலவனை ஒரு மாலை வேளையில் சந்தித்தேன். தன்னுடைய வாழ்க்கையில் மனஅழுத்தம் தந்த தருணங்களையும் அதை எதிர்கொண்ட விதத்தையும் பகிர்ந்துகொண்டார். 

``மனஅழுத்தம் என்பது படைப்பாளிகளுக்கும் பத்திரிகையாளர்களுக்கும் அதிகமாகவே வரும். என்னுடைய முதல் நாவல் `கடல்புரத்தில்’. அந்த நாவல் வெளியாகி, சுமார் 40 ஆண்டுகளுக்குப் பிறகு பிரபல தொலைக்காட்சி ஒன்றில் நெடுந்தொடராக வெளியானது. நாவலில் பெரும்பாலும் மீனவ பாத்திரங்கள்தான். `எங்களுடைய வாழ்க்கை நெடுந்தொடராக வரக்கூடாது’ என்று  எதிர்த்தார்கள். தூத்துக்குடியைச் சேர்ந்த மீனவர்கள் சங்கத்தினர் சிலர், `அந்தத் தொடரின் காட்சிகளை எல்லாம் முழுவதுமாக நாங்கள் பார்த்த பிறகே தொடர் ஒளிபரப்பாக வேண்டும்’ என்று நெருக்கடி தந்தார்கள். மீனவர்களின் எதிர்ப்பு, தொடரின் தயாரிப்பாளருக்கும் இயக்குநருக்கும் பெரிய நெருக்கடியைத் தந்தது. பிறகு, மீனவர்களுக்குக் காட்சிகளை முழுவதும் காண்பித்து, அவர்களுடைய ஒப்புதலோடு வெளியானது. அந்தத் தொடரில் நான் நேரடியாகச் சம்பந்தப்படவில்லை. இருந்தாலும், அந்தச் சம்பவம் ஒரு படைப்பாளியாக என்னைப் பாதித்தது. 

`கடல்புரத்தில்’ நாவலில் வரும் பிலோமி என்கிற பாத்திரம் என் மனசுக்கு நெருக்கமானது. அந்தப் பாத்திரமே என் கையைப் பிடித்து, அழைத்துச் சென்று எழுத வைத்தது. அந்தப் பாத்திரத்தைப் பற்றி எழுதும்போது பெரும் துயரத்துக்கு ஆட்பட்டேன். அந்த நாவலில் வரும் பாத்திரங்கள் எல்லாமே அந்த இடத்தில் வாழ்ந்தவர்களில்லை. கற்பனை பாத்திரங்கள்தான். கிறிஸ்துவச்சூழலை மையமாக வைத்து எழுதப்பட்ட நாவல் அது. அந்த மாதிரியான சூழலில் நான் வாழ்ந்திருக்கிறேன். 

பாளையங்கோட்டையில் பள்ளி நண்பர்கள் எனக்கு நிறைய பேர் உண்டு. என்னுடைய வேலை நிமித்தமாக மணப்பாடு அருகேயுள்ள குலசேகரன்பட்டினத்தில் சில மாதங்கள் தங்கியிருந்தேன். அப்போது மோட்டார் படகில் சென்று கடலில் மீன் பிடிப்பவர்களுக்கும் வல்லத்தில் சென்று மீன்பிடிப்பவர்களுக்கான பிரச்னைகளை அறிய முடிந்தது. அதை வைத்துதான் முழு நாவலையும் எழுதினேன். நாவலின் முக்கியமான அம்சம், பைபிளின் உரைநடை. பைபிளை வாசிக்கும்போது அது எப்படியோ உள்ளே போய், நாவல் எழுதும்போது வெளியில் வந்திருக்கிறது. நீண்ட வருடங்களுக்குப் பிறகும் `கடல்புரத்தில்’ நாவல் பெரும்பாலானோருக்கு விருப்பமானதான இருப்பதற்குக் காரணமும் அதுதான்!

அதேபோல, ஆனந்த விகடனில் என்னுடைய `துன்பக்கேணி’ என்றொரு சிறுகதை வெளியானது. `அந்தச் சிறுகதை எங்கள் சாதியைப் பற்றியதாக இருக்கிறது’ என்று கூறி, குறிப்பிட்ட அந்த சாதி சங்கத்தைச் சேர்ந்தவர்கள் என்னைத் தேடி வந்துவிட்டார்கள். அப்போது அவர்களிடம், `எந்த எழுத்தாளர்களுக்கும் எந்த சாதியைப் பற்றியும் தவறான அபிப்ராயம் கிடையாது. சிறுகதையில் இடம்பெறும் பாத்திரப் படைப்புக்காக அந்த சாதி என்று சொல்லப்பட்டதே தவிர, மற்றபடி எனக்குத் தவறான அபிப்ராயங்கள் ஏதுமில்லை’ என்று தெளிவுபடுத்தினேன். பிறகே, அவர்கள் எல்லோரும் கலைந்து சென்றார்கள். இதுபோல, என்னுடைய படைப்புகளையொட்டி இரண்டு, மூன்று சம்பவங்கள் நிகழ்ந்திருக்கின்றன. 

நீண்டகாலமாக வாரப் பத்திரிகையொன்றில் பணியாற்றி வருகிறேன். அதனால் அந்தப் பத்திரிகை சார்ந்த மனஅழுத்தங்கள் இருக்கத்தான் செய்கிறது. ஒரு கட்டுரை எழுதும்போது, அதற்கான குறிப்புகளைத் தயார்செய்யும்போது, சம்பந்தப்பட்டவர்களை நேரில் சென்று பேட்டி காணும்போது மனஅழுத்தம் வரும். அந்த மாதிரியான நேரங்களில் பழைய சினிமாப் பாடல்களைக் கேட்பேன். சபாக்களில் நடக்கும் கச்சேரிகளுக்குப் போவேன். எழுத்தாளர்கள் தி.ஜானகிராமன், கிருத்திகா போன்றோரின் பழைய நாவல்களையெல்லாம் எடுத்து வாசிப்பேன். அப்படித்தான் மனஅழுத்தத்தை கடந்துபோவேன்! 

தற்போது நான் பணியாற்றிக்கொண்டிருக்கும் பத்திரிகையின் ஆரம்ப நாள்களில், நானும் இன்னொருவரும் நிருபர்களாக இருந்தோம். தமிழகத்தின் பல்வேறு இடங்களுக்குச் செல்வோம். வெள்ளப் பாதிப்பு, கலவரம் போன்றவற்றை நேரில் பார்வையிட்டு கட்டுரை எழுதுவோம். தர்மபுரி அருகே பாலக்கோடு என்ற ஊரில் ஒரு கலவரம் நடந்தது. போலீஸ் துப்பாக்கிச்சூடு நடத்தி, கலவரத்தைக் கட்டுக்குள் கொண்டுவந்திருந்தது. துப்பாக்கிச்சூடு சம்பவத்துக்கு அடுத்த நாள் நாங்கள் இருவரும் அந்த ஊருக்குள் போனோம். ஊரே வெறிச்சோடிக்கிடந்தது. எங்களுக்குப் பேட்டி தருவதற்கு இருதரப்பிலும் யாருமே முன்வரவில்லை. எல்லோரும் பயத்தில் உறைந்துபோயிருந்தார்கள். அந்தச் சமயத்தில் மிகுந்த நெருக்கடிக்கு உள்ளானேன்.   

பிறகு, அவர்களைச் சமாதானம் செய்து, மிகுந்த சிரமங்களுக்கிடையே செய்தி சேகரித்தோம். அதேபோல, தூத்துக்குடி அருகேயுள்ள டூவிபுரம் என்ற ஊரிலிருந்த டூரிங் டாக்கிஸில் படம் ஓடிக்கொண்டிருக்கும்போது தீப்பிடித்துவிட்டது. இந்தச் சம்பவத்தில் தியேட்டரில் படம் பார்த்துக்கொண்டிருந்த சுமார் 80-க்கும் மேற்பட்டோர் தீயில் கருகி உயிரிழந்துவிட்டனர். அந்தச் சம்பவத்தையும் செய்தியாகப் பதிவு செய்யும்போது மிகுந்த மன அழுத்தத்துக்கு உள்ளானேன். `நாங்களே எங்களுடைய உறவுகளைப் பலி கொடுத்துவிட்டு நிற்கிறோம். பத்திரிகைக்காரர்களாகிய நீங்கள் வந்து எங்களுக்கு என்ன செய்யப்போகிறீர்கள்?’ என்றெல்லாம் பேசினார்கள். இப்படியாகப் பல செய்திகளை மிகுந்த நெருக்கடிகளுக்கு மத்தியில் பதிவு செய்திருக்கிறேன். 

கடந்த வருடம் மே மாதத்தில் என்னுடைய `எம்.எல்’ என்கிற நாவல் வெளியானது. 1964 மற்றும் 1965-ம் ஆண்டுவாக்கில் `நக்சல்பாரி இயக்கம்’ என்பது மிகவும் தீவிரமாக இருந்தது. அதில் முக்கியத் தலைவராக சாரு மஜூம்தார் இருந்தார். அவரைப் பற்றியும் நக்சல்பாரி இயக்கம் குறித்தும் நாவலில் நிறைய சொல்லியிருக்கிறேன். இந்த நாவலுக்காக நிறைய புத்தகங்களை வாசித்தேன். அந்தக் காலகட்டத்தில் தமிழக அரசியலின் நிலைமை என்னவாக இருந்தது என்பது குறித்தும் வாசித்து, குறிப்புகளை எடுத்தேன். அப்போது ஏராளமான தகவல்கள் எனக்குக் கிடைத்தன. சாரு மஜும்தார் தமிழகம் வந்திருக்கிறார். கோயம்புத்தூர், சிதம்பரம் போன்ற பல இடங்களுக்குச் சென்று, நக்சல்பாரி இயக்கத்துக்கான வேலைகளைச் செய்திருக்கிறார் என்று அறிந்துகொண்டேன். அவர் சந்தித்த நபர்களை நான் சந்தித்துப் பேசி, நாவலாக எழுத முற்பட்டேன். அது எனக்குப் பெரிய சவாலாக இருந்தது. கால அவகாசம் நிறைய தேவைப்பட்டது. மிகுந்த சிரமங்களுக்கு இடையேதான் `எம்.எல்’ நாவலை எழுதி முடித்தேன்!’’ என்கிறார் வண்ணநிலவன்.