Published:Updated:

விழித்துக்கொண்டு இருக்கும்போதே அறுவைசிகிச்சை!

விழித்துக்கொண்டு இருக்கும்போதே அறுவைசிகிச்சை!

பிரீமியம் ஸ்டோரி
##~##

'எண்சாண் உடலுக்கு சிரசே பிரதானம்’ என்பார்கள். நம்முடைய ஒவ்வொரு செயலையும் கட்டுப்படுத்துவது மூளைதான். அங்கிருந்து பிறப்பிக்கப்படும் ஒவ்வொரு கட்டளைக்கும் நம்முடைய கண், காது, வாய், கை, கால் என அனைத்து உறுப்புக்களும் கட்டுப்படுகின்றன. யாராவது நம்மைத் தொட்டால், காயம் ஏற்பட்டால், அதை நமக்குத் தெரிவிப்பது மூளைதான். அந்த மூளையில் பிரச்னை என்றால், இந்த இயக்கச் செயல்கள் பாதிக்கப்படுகின்றன.

 குறிப்பாகப் பார்வை, பேச்சு, கை, கால் இயக்கம் போன்றவற்றைக் கட்டுப்படுத்தும் மூளையின் பகுதிகளில் கட்டி ஏற்படும்போது அறுவைசிகிச்சை செய்வது மிகவும் நுட்பமானது. அறுவைசிகிச்சை செய்யும்போது ஏதேனும் சிறிய தவறு ஏற்பட்டாலும் கை, கால் இயக்கம், பேச்சு போன்ற செயல்பாடுகளில் பிரச்னை ஏற்படலாம். தற்போது நவீனத் தொழில்நுட்பம், மயக்கம் மற்றும் தூக்க மருந்துகளில் ஏற்பட்டுள்ள முன்னேற்றம், மூளையின் செயல்பாட்டைக் கண்காணிக்க உள்ள சிறப்புக் கருவிகள் போன்றவற்றால், இந்த அதிக எச்சரிக்கையான பகுதிகளில் அறுவைசிகிச்சை செய்வது என்பதும் சாத்தியமே. இயக்கச் செயல்பாடுகள் பாதிக்கப்படாமல் இருக்க விழிப்பு நிலையிலேயே அறுவைசிகிச்சை செய்யப்படுவது இதில் சிறப்பம்சம்.

விழித்துக்கொண்டு இருக்கும்போதே அறுவைசிகிச்சை!

இந்த நவீன அறுவைசிகிச்சை குறித்து சென்னை குளோபல் மருத்துவமனையின் மூளை நரம்பியல் துறைத் தலைவரும் மூத்த அறுவைசிகிச்சை நிபுணருமான கே.ஸ்ரீதரிடம் பேசினோம். ''மூளையில் ஏற்படும் கட்டிகளை அகற்றுவது வாடிக்கையான விஷயம்தான். ஆனால், உடலின் இயக்க செயல்பாட்டைக் கட்டுப்படுத்தும் மூளையின் குறிப்பிட்ட பகுதிகளில் இந்த அறுவைசிகிச்சை செய்வது என்பது சிக்கலானது. கை, கால் செயல் இழப்புகூட ஏற்படும் என்பதால், இந்தப் பகுதிகளில் அறுவைசிகிச்சை செய்வதை மருத்துவர்கள் தவிர்த்து வந்தனர். நாங்கள் படிக்கும் காலங்களில் மூளையின் இந்தப் பகுதியில் கட்டிகள் வந்தால் அதை அறுவைசிகிச்சை செய்யக்கூடாது என்று சொல்லிக்கொடுத்தார்கள். ஆனால், இன்று நிலைமை மாறிவிட்டது.

விழித்துக்கொண்டு இருக்கும்போதே அறுவைசிகிச்சை!

தூக்கம்-விழிப்பு-தூக்கம் என்ற அடிப்படையில் மூளையில் கட்டி உள்ளவர்களுக்கு அறுவைசிகிச்சை செய்யும் முறையை இங்கே அறிமுகப்படுத்தி இருக்கிறோம்.  

மூளையின் இயக்கத்தை ஃபங்ஷனல் எம்.ஆர்.ஐ. ஸ்கேன் மூலம் கண்டறியலாம். ஆனால், அறுவைசிகிச்சையின்போது மூளையின் செயல்பாட்டைக் கண்டறிவது இயலாதது. ஒருவருக்கு கை இயக்கத்திற்குப் பொறுப்பான பகுதியில் அறுவைசிகிச்சை செய்யும்போது, அவருக்கு முதலில் மயக்க மற்றும் தூக்க மருந்து கொடுத்து அறுவைசிகிச்சையைத் தொடங்குவோம். எந்த இடத்தில் கட்டி உள்ளதோ அந்த இடத்தில் அறுவைசிகிச்சை தொடங்கும்போது, அவரைத் தூக்கத்தில் இருந்து எழுப்புவோம். அதாவது, தூக்க மருந்தின் அளவைக் குறைத்து தூக்கத்தில் இருந்து எழுப்பும் செயலை மயக்க மருந்தியல் நிபுணர் செயல்படுத்துவார்.

தூக்கத்தில் இருந்து விழித்தவரிடம் கேள்விகள் கேட்டு, கை கால்களை அசைக்கச் சொல்லி, அவருடைய மூளையின் இயக்கச் செயல்பாட்டில் ஏதேனும் மாற்றம் ஏற்பட்டுள்ளதா எனப் பரிசோதிப்போம். அனைத்தும் சரியாக உள்ளன என்பதை உறுதிப்படுத்திக்கொள்வோம். அதன் பிறகுதான் அந்தக் கட்டியை அகற்றுவோம். ஒருவேளை அவருக்கு மூளை இயக்கச் செயல்பாட்டில் பாதிப்பு ஏற்பட்டுவிட்டால், கட்டியை அகற்ற வேறு வகையான தொழில்நுட்பத்தைப் பயன்படுத்த வேண்டும். இந்தப் புதிய அறுவைசிகிச்சையால் அந்த நோயாளியின் எந்த ஒரு இயக்கச் செயல்பாடும் பாதிக்கப்படாது' என்றார் நம்பிக்கையுடன்.

''மூளையில் விழிப்பு உணர்வில் அறுவைசிகிச்சை செய்யும்போது மூளையில் வலி ஏற்படாதா?'' என்று கேட்டோம். 'நம்முடைய உடலின் வலியை உணருவதற்கு மூளை காரணமாக இருந்தாலும்கூட, மூளைக்கு வலியை உணரும் தன்மை கிடையாது. தலையைச் சுற்றி உள்ள தோல், எலும்பு, மூளை மேல் உறை போன்றவற்றுக்குத்தான் வலியை உணரும் தன்மை உள்ளது. மருந்து கொடுத்து அந்த வலிகளையும் உணராதபடி செய்துவிடுவோம். அதன் பிறகுதான் அறுவைசிகிச்சை நடக்கும். அது முடிந்ததும், மயக்கம் மற்றும் தூக்க மருந்து அளவை மயக்க மருந்தியல் நிபுணர் அதிகரிக்கச் செய்து அவரை மீண்டும் தூக்க நிலைக்குக் கொண்டுசெல்வார். இதைத் தொடர்ந்து அவருக்குத் தையல்போடுவது போன்றவை மேற்கொள்ளப்படும்.    

இதய அறுவைசிகிச்சைகள் பற்றி மக்கள் மத்தியில் விழிப்பு உணர்வு உள்ளது. ஆனால், மூளையில் செய்யப்படும் அறுவைசிகிச்சைகள் பற்றிய விழிப்பு உணர்வு இல்லை. இதனால் மூளையில் கட்டியை அகற்ற முடியாது என்ற எண்ணத்தில் உரிய சிகிச்சை மேற்கொள்ளாமல் பல நோயாளிகள் உயிரை இழக்கின்றனர். மருத்துவர்கள் மத்தியிலும் இது தொடர்பான விழிப்பு உணர்வு குறைவாகவே இருக்கிறது'' என்றார் ஆதங்கத்தோடு.

அப்ப, இனி ஆபரேஷன் தியேட்டரிலும் படம் பார்க்கலாம்!

-பா.பிரவீன்குமார்

 மூளைக்கட்டி

மூளையில் ஏன், எதனால் கட்டி ஏற்படுகிறது என்பது இதுவரை கண்டறியப்படவில்லை. இருப்பினும் நம்முடைய வழக்கமான செயல்பாட்டில் அதாவது பேசுதல், எழுதுதல், சொற்தொடர்களை அமைத்தல் போன்றவற்றில் ஏதேனும் மாற்றம் ஏற்பட்டால், உடனடியாக மூளை நரம்பியல் மருத்துவரை அணுகி பரிசோதனை செய்துகொள்ள வேண்டும். ஆரம்பத்திலேயே பிரச்னையைக் கண்டறியும்போது, மருந்து மாத்திரைகள் மூலமே இதைச் சரிப்படுத்திவிட முடியும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு