குறிப்பிட்ட இந்த ஆய்வில், மெட்ஃபார்மின் எடுத்துக்கொண்ட அப்பாக்களுக்குப் பிறந்த ஆண் குழந்தைகளுக்கு பிறவிக்குறைபாடுகள் இருந்ததாகச் சொல்லப்பட்டிருக்கிறது. 1.1 மில்லியன் ஆட்களில் அது 5.5 சதவிகிதம் பேரிடம் கண்டுபிடிக்கப்பட்டதாகச் சொல்லியிருக்கிறார்கள். சல்ஃபனிலூரியாஸ் மருந்து எடுத்தவர்களைப் பற்றி தெளிவாக எதையும் குறிப்பிடவில்லை. இன்சுலின் எடுத்த ஆண்களுக்கு இந்தப் பிரச்னைகள் பெரும்பாலும் இல்லாமல் இருந்திருக்கின்றன. அவர்களுக்குப் பிறந்த குழந்தைகளிடம் பெரிய பாதிப்புகள் கண்டுபிடிக்கப்படவில்லை.

மெட்ஃபார்மின் குறித்த தகவலிலும் அவர்கள், இது இறுதியான ஆய்வில்லை, மேலும் பல ஆய்வுகள் செய்யப்பட வேண்டியிருக்கின்றன என்றே சொல்லியிருக்கிறார்கள். மெட்ஃபார்மின் எடுத்த அப்பாக்கள் தங்கள் சர்க்கரை அளவை எப்படி வைத்திருந்தார்கள், அதில் ஏற்ற இறக்கங்கள் இருந்தனவா என்ற புள்ளிவிவரங்கள் இல்லை. அதனால் இந்தப் பிரச்னைக்கு மெட்ஃபார்மின் மட்டுமே காரணம் என்று சொல்ல முடியாது. ஆனாலும் மெட்ஃபார்மின் எடுத்தவர்களுக்குப் பிறந்த குழந்தைகளுக்கு இந்தப் பிரச்னை வந்ததைக் குறிப்பிட்டுள்ளார்கள்.

சர்க்கரைநோய் உறுதிசெய்யப்பட்ட நிலையில் முதல் முறை மருத்துவரைச் சந்திக்க வரும் நபர்கள், `மாத்திரையில் இதைக் கட்டுப்படுத்த முடியுமா' என்றுதான் கேட்பார்கள். இன்சுலின் மிகச் சிறந்த மருந்து. ஆனாலும் ஊசியின் மீதுள்ள பயத்தினாலும், அதன் விலை, ஊசியால் வரும் வலி, தினமும் தவறாமல் போட வேண்டிய அவதி போன்ற பிரச்னைகளால் அதை வேண்டாம் என்று சொல்பவர்களே அதிகம்.

அதே நேரம் மெட்ஃபார்மின் என்பது சர்க்கரைநோய்க்கு முந்தைய ப்ரீடயாபட்டிஸ் நிலை உள்ளவர்களுக்கும், பிசிஓடி பிரச்னை உள்ள பெண்களுக்கும் பரிந்துரைக்கப்படுகிற பிரதான மருந்து. சர்க்கரைநோய் தவிர்த்து வேறு பிரச்னைகளுக்கும் அது உதவுவதால், இந்த ஆய்வு குறிப்பிடும் ஒரு காரணத்துக்காக அதை அறவே ஒதுக்க முடியாது. இன்றைய சூழலில் மெட்ஃபார்மின் மிக முக்கியமான, தவிர்க்க முடியாத ஒரு மருந்து. இந்த ஓர் ஆய்வை வைத்து எந்த முடிவுக்கும் வந்துவிடாமல் காத்திருந்து, பலகட்ட ஆய்வுகளுக்குப் பிறகுதான் இது குறித்து எதையும் உறுதியாகச் சொல்ல முடியும்."