Published:Updated:

சர்ஜிக்கல் மெனோபாஸ் மீள்வது எப்படி?

சர்ஜிக்கல் மெனோபாஸ் மீள்வது எப்படி?
பிரீமியம் ஸ்டோரி
சர்ஜிக்கல் மெனோபாஸ் மீள்வது எப்படி?

சித்ரா மகப்பேறு மற்றும் குழந்தையின்மை சிகிச்சை மருத்துவர்ஹெல்த்

சர்ஜிக்கல் மெனோபாஸ் மீள்வது எப்படி?

சித்ரா மகப்பேறு மற்றும் குழந்தையின்மை சிகிச்சை மருத்துவர்ஹெல்த்

Published:Updated:
சர்ஜிக்கல் மெனோபாஸ் மீள்வது எப்படி?
பிரீமியம் ஸ்டோரி
சர்ஜிக்கல் மெனோபாஸ் மீள்வது எப்படி?
சர்ஜிக்கல் மெனோபாஸ் மீள்வது எப்படி?

மெனோபாஸ் தெரியும்... `சர்ஜிக்கல் மெனோபாஸ்’ தெரியுமா? பெண்ணின் உடலிலும் மனதிலும் பல பிரச்னைகளை ஏற்படுத்தும் சர்ஜிக்கல் மெனோபாஸ் குறித்த ஏ டு இஸட் தகவல்களைப் பகிர்ந்துகொள்கிறார் மகப்பேறு மற்றும் குழந்தையின்மை சிகிச்சை மருத்துவர் சித்ரா.

சர்ஜிக்கல் மெனோபாஸ்

சர்ஜிக்கல் மெனோபாஸ் மீள்வது எப்படி?

ஒட்டுமொத்த விகடனுக்கும் ஒரே ஷார்ட்கட்!

மாதவிலக்கு முற்றிலுமாக நின்றுபோகும் நிலையை `மெனோபாஸ்’ என்கிறோம். 40 முதல் 50 வயதுவரை எப்போது வேண்டுமானாலும் ஒரு பெண்ணுக்கு மெனோபாஸ் ஏற்படலாம். ஆனால், ஒரு பெண் மெனோபாஸ் நிலையை அடைவதற்கு மூன்று முதல் நான்கு வருடங்களுக்கு முன்னரே அதற்கான அறிகுறிகள் உடலில் தெரிய ஆரம்பித்துவிடும். இதை `பெரிமெனோபாஸ்’ (Perimenopause) என்கிறோம். இந்த மாற்றங்களை உடல் கொஞ்சம் கொஞ்சமாக, ஓரளவு ஏற்றுக்கொள்ள ஆரம்பித்துவிடும். இதனால், சிரமமாகவே இருந்தாலும், மெனோபாஸ் நிலையை பெண்கள் ஓரளவு சமாளித்துக் கடந்துவிடுவார்கள். ஆனால், திடீரென்று சினைப்பைகளில் புற்றுநோய் அல்லது கட்டி ஏற்பட்டு அவை முறுக்கிக்கொள்ளும்போது இரண்டு சினைப்பைகளையும் அறுவை சிகிச்சை மூலம் அகற்றவேண்டிய சூழ்நிலை உண்டாகிவிடும். இரண்டு சினைப்பைகளையும் எடுத்த பிறகு மாதவிலக்கு வருவது திடீரென முற்றிலுமாக நின்றுவிடும். இந்தநிலைதான் `சர்ஜிக்கல் மெனோபாஸ்.’

சர்ஜிக்கல் மெனோபாஸைக் கடப்பது சவால்!

இதற்குக் காரணம் என்ன தெரியுமா? ஆபரேஷன் தியேட்டருக்குள் செல்லும்வரை இரண்டு சினைப்பைகளுடன் மிகவும் நார்மலாக இருக்கும் உடம்பு, உள்ளே சென்று இரண்டு சினைப்பைகளையும் எடுத்துவிட்ட பிறகு திடீரென்று நடந்த அந்த மாற்றத்தை எதிர்கொள்ள முடியாமல், என்ன ஏது என்று புரியாமல் தடுமாறும்.

நம் உடலில் பிட்யூட்டரி என்கிற ஒரு சுரப்பி இருக்கிறது. இந்தச் சுரப்பி எல்.ஹெச் (Luteinizing Hormone (LH), எஃப்.எஸ்.ஹெச் (Follicle Stimulating Hormone (FSH)) ஆகிய இரண்டு ஹார்மோன்களைச் சுரக்கும். இந்த இரண்டு ஹார்மோன்களும் சினைப்பைகளின் மேல் வேலை செய்யக்கூடிய ஹார்மோன்கள். இந்த ஹார்மோன்களின் சுரப்பு காரணமாக சினைப்பைகள் தூண்டப்பட்டு, ஒவ்வொரு மாதமும் மாதவிலக்கு உண்டாகும். இதுதான் ஒவ்வொரு மாதமும் நடக்கும் வழக்கமான செயல்பாடு. ஆனால், சர்ஜிக்கல் மெனோபாஸின்போது இரண்டு சினைப்பைகள் இருக்காது இல்லையா? இதை அறியாத பிட்யூட்டரி, எல்.ஹெச்., எஃப்.எஸ்.ஹெச் இரண்டு ஹார்மோன்களையும் அதிகமாகச் சுரக்க வைக்கும்.

சர்ஜிக்கல் மெனோபாஸ் மீள்வது எப்படி?



`என்னடா இது, இன்னும் சினைப்பைகள் தங்கள் வேலையை ஆரம்பிக்கவில்லை. எப்படியாவது வேலை செய்ய வைக்க வேண்டுமே...’ என்று நினைத்து இன்னும் அதிகமாக எஃப்.எஸ்.ஹெச்., எல்.ஹெச் ஹார்மோன்களைச் சுரக்க ஆரம்பித்துவிடும். இது போன்ற சூழ்நிலையை எதிர்கொள்ள முடியாமல் உடம்பு தடுமாறும். இந்தத் தடுமாற்றத்திலிருந்து வெளியே வர சில வாரங்கள் அல்லது மாதங்கள்கூட ஆகலாம்.

அறிகுறிகள் என்னென்ன?

ஹாட் ஃபிளஷ் (Hot Flush). அதாவது படபடப்பு ஏற்படும்; வியர்த்துக்கொட்டும். எந்த நேரத்தில் இப்படி ஏற்படும் என்றே சொல்ல முடியாது. தூங்கும்போது இதுபோல ஏற்பட்டு எழுப்பிவிட்டுவிடும். நார்மல் மெனோபாஸில் இதுபோன்ற நிலை அவர்களது பெரிமெனோபாஸ் நிலையிலேயே ஏற்பட்டுவிடும் என்பதால், பெண்கள் கொஞ்சம் கொஞ்சமாக அதை எதிர்கொள்ள ஆரம்பித்துவிடுவார்கள். ஆனால், சர்ஜிக்கல் மெனோபாஸில் இந்த அறிகுறி திடீரென்று தோன்றுவதால் அவர்களால் அதை எதிர்கொள்ள முடியாது. ஹாட் ஃபிளஷ்ஷின் தீவிரமும் அதிகமாக இருக்கும் என்பதால், அவர்கள் இதை மிகவும் கடினமாக உணர்வார்கள்.

அடுத்தது `மூட் ஸ்விங்’ என்று சொல்லப்படும் மனநிலை மாற்றம். ஒரு நேரம் மகிழ்ச்சியாக இருப்பார்கள். மறு நிமிடம் மிகவும் வருத்தமாக உணர்வார்கள். அழுகை, கோபம், இயலாமை என உணர்வுக் கலவைகளால் சிக்கித் திணறுவார்கள். குறிப்பாக, இவர்களுக்குத் தூக்கம் சரியாக இருக்காது. அடுத்து பிறப்புறுப்பின் வஜைனல் பகுதி மிகவும் வறண்டு போய்விடும். ஏனென்றால், சினைப்பையில் சுரக்கிற `ஈஸ்ட்ரடயால்’ (Estradiol) என்கிற ஹார்மோன்தான் வஜைனல் பகுதிக்கு வழவழப்புத் தன்மையைக் கொடுக்கிறது. சினைப்பைகளே இல்லாத காரணத்தால், சர்ஜிக்கல் மெனோபாஸுக்குப் பிறகு ஈஸ்ட்ரடயால் ஹார்மோன் சுரக்காது. இதனால் வறட்சி தவிர்க்க முடியாத ஒன்றாகிவிடும்.

ஈஸ்ட்ரடயால் ஹார்மோன்தான் எலும்புகளின் உறுதிக்கும் உதவுகிறது. சர்ஜிக்கல் மெனோபாஸுக்குப் பிறகு நாளாக நாளாக எலும்புகளின் வலிமை குறைந்து ஆஸ்டியோபொரோசிஸ் பிரச்னை ஏற்படுவதும், இந்த  ஈஸ்ட்ரடயால் இல்லாமல் போவதால்தான். நார்மல் மெனோபாஸ் காலத்தில் சற்று வயது தாமதமாக உண்டாகும் ஆஸ்டியோபொரோசிஸ் பிரச்னை, சர்ஜிக்கல் மெனோபாஸ் வந்தவர்களுக்கு சீக்கிரமே வந்துவிடவும் வாய்ப்பிருக்கிறது.

ஹாட் ஃபிளஷ்... தீர்வு என்ன?

ஹாட் ஃபிளஷ் பிரச்னைதான் சர்ஜிக்கல் மெனோபாஸ் நிலையில் இருப்பவர்களை அதிகம் வாட்டும் ஒன்று. இதை எதிர்கொள்ள கவுன்சலிங் உதவும். அதுவும் உதவவில்லை என்றால், அதற்கான மருந்துகளை மருத்துவரின் ஆலோசனையோடு உட்கொள்ள வேண்டும்.

சர்ஜிக்கல் மெனோபாஸ் மீள்வது எப்படி?

`என்னால் சர்ஜிக்கல் மெனோபாஸ் அறிகுறிகளைத் தாங்க முடியவில்லை’ என்பவர்களுக்கு ஹெச்.ஆர்.டி (HRT) என்று சொல்லப்படும் ஹார்மோன் ரீப்ளேஸ்மென்ட் தெரபி (Hormone Replacement  Therapy) கொடுக்கப்படும். இதன் மூலம் ஈஸ்ட்ரடயால் ஹார்மோன் உடலுக்குள் மருந்து வடிவில் செல்லும். ஆனால், இந்த ஹெச்.ஆர்.டி சிகிச்சையைத் தொடர்ந்து சில ஆண்டுகளுக்குச் செய்துகொண்டால் அவர்களுக்கு மார்பகப் புற்றுநோய், கர்ப்பப்பைப் புற்றுநோய் ஏற்பட வாய்ப்பிருக்கிறது. இளம் வயதிலேயே சர்ஜிக்கல் மெனோபாஸ் நிலையை அடைந்த பெண்களுக்கு மேற்சொன்ன புற்றுநோய் ஆபத்துகள் ஏற்படுவதற்கான வாய்ப்புகள் சற்று  குறைவுதான். ஆனாலும் இந்த ஹெச்.ஆர்.டி தெரபியை நீண்ட நாள்களுக்குச் செய்துகொள்ளக் கூடாது.

தவிர்க்க முடியாத சூழ்நிலைகளில் ஹெச்.ஆர்.டி சிகிச்சையைச் செய்துகொள்பவர்கள் தங்களின் மார்பகங்கள், கர்ப்பப்பை போன்றவை எப்படி இருக்கின்றன என்பதை அவ்வப்போது பரிசோதித்துக்கொள்ள வேண்டும்.

வறட்சியைப் போக்க இது உதவும்!

சர்ஜிக்கல் மெனோபாஸ் நிலையில் இருப்பவர்களுக்கு வஜைனல் பகுதி மிகவும் வறண்டிருக்கும் என்பதால், தாம்பத்ய உறவில் கடும் அசௌகர்யத்தை உணர்வார்கள். எனவே, வஜைனல் பகுதியில் வழவழப்புத் தன்மையை ஏற்படுத்த `ஜெல்’ வகைகள் பரிந்துரைக்கப்படும்.

சர்ஜிக்கல் மெனோபாஸுக்குப் பிறகு என்னென்ன சாப்பிடலாம்?

* ஆளி விதை, கொண்டைக்கடலை போன்ற ஈஸ்ட்ரோஜென் நிறைந்த உணவுகள்.

* அதிகப் புரதம் நிறைந்த உணவுகள்.

* பழங்கள், காய்கறிகள், வைட்டமின், ஆன்டிஆக்ஸிடன்ட் நிறைந்த உணவுகள்.

* கால்சியம் நிறைந்த உணவுகள். கால்சியத்தை நமது உடல் கிரகிக்க வைட்டமின் டி தேவை. எனவே, தினமும் காலை நேரத்தில் இளம் வெயிலில் 15 நிமிடங்கள் நிற்பது நல்லது.

ஃபிட்னெஸ் முக்கியம்!

நீச்சல், நடனம் போன்ற உங்களுக்குப் பிடித்த பயிற்சிகளில் ஏதாவது ஒன்றைத் தொடர்ந்து செய்துவரலாம். இதன் மூலம் உடலும் மனமும் புத்துணர்வோடு இருக்கும். பெண்களின் சினைப்பையில் சுரக்கிற ஈஸ்ட்ரடயால் ஹார்மோன்தான் அவர்களின் இதயத்தைப் பாதுகாக்கிறது. அதனால் சர்ஜிக்கல் மெனோபாஸுக்குப் பிறகு மாரடைப்பு போன்ற பிரச்னைகள் வராமல் தடுக்க இதயத்தை வலுவாக்கும் உடற்பயிற்சிகள், யோகப் பயிற்சிகள் போன்றவற்றை மருத்துவர் மற்றும் உடற்பயிற்சி நிபுணரின் ஆலோசனையோடு மேற்கொள்ளலாம்.

இந்த ஈஸ்ட்ரடயால் குறைந்தால், ஞாபகமறதிப் பிரச்னையும் ஏற்பட வாய்ப்பிருப்பதால், முடிந்தவரை உடலையும் மனதையும் ஃபிட்டாக வைத்துக்கொண்டு நினைவாற்றலை மேம்படுத்திக்கொள்ள வேண்டியதும் அவசியம்.

- சு.கவிதா

கணவரே கண்கண்ட மருந்து!

சா
தாரண மெனோபாஸ் நிலையில் இருப்பவர்களுக்கே கடுமையான மன அழுத்தம் இருக்கும்; சர்ஜிக்கல் மெனோபாஸ் நிலையில் இருப்பவர்களின் உடல், மன வேதனைகள் சொல்லி மாளாது. `இத்தனை சிறிய வயதில் நமக்கு இப்படி ஒரு நிலை ஏற்பட்டுவிட்டதே?’ என்று எண்ணி எண்ணி அவர்கள் மாய்ந்துபோவார்கள். இது தவிர உடல், மன மாற்றங்கள் வேறு அவர்களைப் பாடாகப்படுத்தும். தாம்பத்ய உறவில் நாட்டம் இருக்காது. மொத்தத்தில் பித்துப் பிடித்ததுபோல இருப்பார்கள்.

இந்தச் சூழ்நிலையில் இருக்கும் இவர்களை மீட்டெடுப்பது அவர்களின் கணவர்களின் கையில்தான் இருக்கிறது. அன்பும் காதலுமாக இருந்த மனைவி கோபமும் சிடுசிடுப்பும் அழுகையுமாக மாறுவதற்குக் காரணம் அவளல்ல; அவளின் உடலில் அறுவை சிகிச்சைக்குப் பிறகு ஏற்பட்ட மாற்றம்தான் என்பதைக் கணவர்கள் புரிந்துகொள்ள வேண்டும். ஆறுதலான அணைப்பால், அன்பான, நம்பிக்கையான வார்த்தைகளால் அவர்களைத் தேற்ற வேண்டும். 

சர்ஜிக்கல் மெனோபாஸ் மீள்வது எப்படி?

`வா... காலார நடக்கலாம்...’ என்று அவர்களை வெளியே அழைத்துச் செல்லலாம். ஏதேனும் ஓர் ஏரோபிக்ஸ் பயிற்சியைக் கற்றுக்கொள்ளும்படி அவர்களை உத்வேகப்படுதலாம். யோகப் பயிற்சிகளின் மூலம் மனதை அமைதியாக்கும்படி அறிவுறுத்தலாம். கணவனுக்கு மிஞ்சிய பலம் ஒரு மனைவிக்கு வேறேது? இந்த பலம் மட்டும் கிடைத்துவிட்டால், ஒரு பெண் சர்ஜிக்கல் மெனோபாஸைச் சுலபமாகக் கடந்துவிடலாம்.

அறுவை சிகிச்சைக்குப் பிறகான இந்த சர்ஜிக்கல் மெனோபாஸ் நிலை அப்படியே தொடராது. இரண்டு, மூன்று வருடங்களில் இவர்களும் நார்மல் நிலைக்கு வந்துவிடுவார்கள். என்ன ஒன்று... உடம்பு இந்த மாற்றத்தை ஏற்றுக்கொள்ளக் கொஞ்சம் கூடுதலாகக் கால அவகாசம் எடுத்துக்கொள்ளும். அவ்வளவுதான்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism