தன்னம்பிக்கை
லைஃப்ஸ்டைல்
Published:Updated:

மூலிகை சூப் தயாரிப்பு - பாக்யலட்சுமி

மூலிகை சூப் தயாரிப்பு - பாக்யலட்சுமி
பிரீமியம் ஸ்டோரி
News
மூலிகை சூப் தயாரிப்பு - பாக்யலட்சுமி

நீங்களும் செய்யலாம்

காபி, டீ உடலுக்குக் கெடுதல் என்கிற நினைப்பில் பலரும் அவற்றுக்கு மாற்றாக அருந்துவது சூப். இது ஆரோக்கியமான உணவு. ஆனால், செயற்கையான கலவையில் விற்கப்படுகிற சூப்புகளை அருந்துவோருக்கு ஆரோக்கியமே கேள்விக்குறியாகும் என்பதே உண்மை.

மூலிகை சூப் தயாரிப்பு - பாக்யலட்சுமி

‘`கடைகளிலும் ஹோட்டல்களிலும் விற்கப்படுகிற சூப்புகள் பெரும்பாலும் சோள மாவு மற்றும் செயற்கை நிறமிகள், மணமூட்டிகளின் கலவையே.  அவற்றைத் தவிர்த்து நாமே வீட்டிலேயே ஆரோக்கியமான முறையில் சூப் தயாரித்து அருந்தலாம். ஆர்வமுள்ளோர் அதையே சிறிய அளவிலான பிசினஸாகவும் செய்யலாம்’’ என்கிறார் சென்னையைச் சேர்ந்த பாக்யலட்சுமி. திடீரென படுத்த படுக்கையான தன் மாமியாருக்கு மருத்துவரின் பரிந்துரையின் பேரில் தினமும் சூப்  கொடுக்க ஆரம்பித்திருக்கிறார்.

மூலிகை சூப் தயாரிப்பு - பாக்யலட்சுமி

கடைகளில் வாங்கும் சூப் செயற்கையானது என்பதைப் புரிந்துகொண்ட பிறகு, முறைப்படி சூப் தயாரிப்பு வகுப்புக்குச் சென்று இயற்கையான முறையில் மூலிகைகளைக்கொண்டு சூப் தயாரிக்கக் கற்றுக்கொண்டிருக்கிறார். மாமியாருக்காகச் செய்த சூப் வீட்டிலிருப்போரையும் ஈர்க்க, அதன் தொடர்ச்சியாக அக்கம் பக்கத்தாருக்கும் பிடித்துப்போக, இன்று சூப் தயாரிப்பதைச் சிறிய அளவிலான தொழிலாகவே செய்து வருகிறார்.

இன்ஸ்டன்ட் சூப் பவுடர் மற்றும் உடனே தயாரித்து அப்போதே குடித்துவிடுகிற மாதிரியான சூப் தயாரிப்பு என இரண்டிலும் அசத்துகிற பாக்யலட்சுமி, மற்றவர்களுக்கும் வழிகளைக் காட்டுகிறார்.

என்னென்ன தேவை? முதலீடு?

முடக்கத்தான், வல்லாரை, தூதுவளை, புதினா, கொத்தமல்லி, பிரண்டை என எல்லா மூலிகைக் கீரைகளிலும் சூப் தயாரிக்கலாம். மிளகு, திப்பிலி உள்ளிட்ட மருந்துப்பொருள்கள் தேவை. இஞ்சி, பூண்டு தேவை. சீசனில் கிடைக்கும் கீரைகளை வாங்கிப் பதப்படுத்தி, பத்திரப்படுத்தலாம். சத்துகள் குறையாமல் பதப்படுத்துவதுதான் இதில் ஹைலைட்.

250 முதல் 300 ரூபாய் முதலீட்டில் ஒரு கிலோ சூப் பவுடர் தயாரிக்கலாம். சிறிய அளவில் செய்கிறவர்கள் மிக்ஸியில் அரைத்துக்கொள்ளலாம். அதிக அளவுக்குத் தான் மாவு மெஷினில் கொடுத்து அரைத்து வாங்க வேண்டியிருக்கும்.

சூப் தயாரிக்க பாத்திரங்கள், அடுப்பு, பவுடராக விற்பதாக இருந்தால் அதற்கேற்ற பேக்கிங் மெட்டீரியல்கள், எடை மெஷின், சூப்பாக விற்பதென்றால் ஃப்ளாஸ்க் அல்லது சூடு தாங்கும் பாத்திரங்கள், கப்புகள், ஸ்பூன்கள் போன்றவை தேவை.

மூலிகை சூப் தயாரிப்பு - பாக்யலட்சுமி

என்ன சிறப்பு?

ஒவ்வொரு கீரைக்கும் பிரத்யேக மருத்துவக் குணங்கள் உண்டு. தினம் ஒரு சூப் என்று குடித்துவந்தாலே நோய் எதிர்ப்பு சக்தி அதிகரிக்கும். மூட்டுவலி, சளி, இருமல் பிரச்னைகள் சரியாகும். செரிமானம் சீராகும். எடை கட்டுப்பாட்டில் இருக்கும்.  குழந்தைகள் முதல் முதியோர் வரை எல்லா வயதினரும் குடிக்கலாம். கெமிக்கல்களோ, நிறமிகளோ இல்லை என்பதால் ஆரோக்கியத்துக்கு உத்தரவாதம். சாதாரணமாகக் கீரை சாப்பிட அடம்பிடிக்கிற குழந்தைகள்கூட இவற்றை விரும்பிக் குடிப்பார்கள்.

விற்பனை வாய்ப்பு? லாபம்?

இதை இரண்டுவிதமான பிசினஸாகச் செய்யலாம். சூப் பவுடராகத் தயாரித்து பாக்கெட் செய்து விற்கலாம். கடைகளுக்கு சப்ளை செய்யலாம்.

சூப்பாகவே தயாரித்தும் விற்கலாம். வீட்டு வாசலில் டேபிள் போட்டு மாலை நேரத்தில் மட்டும் விற்றாலே ஓரளவு லாபம் கிடைக்கும். ஆள்பலம் இருப்பவர்கள் ஃப்ளாஸ்க் அல்லது சின்ன டிரம்களில் நிரப்பிக்கொடுத்து விற்று விட்டு வரச் சொல்லலாம். டிபார்ட் மென்ட்டல் கடைகள், சூப்பர் மார்க்கெட் போன்றவற்றின் வாசல்களில் கடை போடலாம்.

பெரிய கடைகளில் சூப் பவுடர் கிலோ 1,000 ரூபாய்க்கு விற்கிறார்கள். சூப்பாக விற்கிறவர்களும் சின்ன கப் 30 ரூபாய்க்கு விற்கிறார்கள். நாம் பாதி விலையில் விற்றால்கூட லாபம் பார்க்கலாம்.

பயிற்சி?

ஒரே நாள் பயிற்சியில் சூப் பவுடரும் ஃப்ரெஷ் கீரைகளை வைத்துச் செய்கிற சூப் செய்முறையும் கற்றுக்கொள்ளலாம். 750 ரூபாய் கட்டணம்.

- சாஹா 

படங்கள் : சொ.பாலசுப்ரமணியம்