Published:Updated:

இருக்கும் இடத்தில் இருந்துகொண்டால் எல்லாம் சௌக்கியமே!

கர்ப்பப்பை
பிரீமியம் ஸ்டோரி
கர்ப்பப்பை

கர்ப்பப்பை இறக்கம்... காரணங்கள், தீர்வுகள்

இருக்கும் இடத்தில் இருந்துகொண்டால் எல்லாம் சௌக்கியமே!

கர்ப்பப்பை இறக்கம்... காரணங்கள், தீர்வுகள்

Published:Updated:
கர்ப்பப்பை
பிரீமியம் ஸ்டோரி
கர்ப்பப்பை

*பரமசிவன் கழுத்திலிருந்து பாம்பு கேட்டது...

கருடா சௌக்கியமா?

யாரும் இருக்கும் இடத்தில் இருந்துகொண்டால்

எல்லாம் சௌக்கியமே...

கருடன் சொன்னது, அதில் அர்த்தம் உள்ளது.

கண்ணதாசனின் மிகப்பெரிய இந்த வாழ்க்கைத் தத்துவம் இன்னொரு விஷயத் துக்கும் பொருந்துகிறது.

கர்ப்பப்பை... இருக்கும் இடத்தில் இருக்கும் வரை பிரச்னை இல்லை. இடம் பெயரும்போது எல்லாமே பிரச்னையாகிறது.

கர்ப்பப்பை இறக்கம் என்பது என்ன, அதன் அறிகுறிகள், சிகிச்சைகள், தவிர்க்கும் முறைகள் என எல்லாவற்றையும் விளக்குகிறார் மகப்பேறு மருத்துவர் மனுலட்சுமி.

 மனுலட்சுமி
மனுலட்சுமி

அதென்ன கர்ப்பப்பை இறக்கம்?

கர்ப்பப்பையானது இடுப்புப் பகுதிக்குள் தசைகள், திசுக்கள் மற்றும் தசைநார்களுடன் இணைந்து இருக்கும். கர்ப்பப்பை அது இருக்க வேண்டிய இடத்திலிருந்து இறங்கி, வெஜைனல் பாதைக்கு வரும் நிலையைத்தான் கர்ப்பப்பை இறக்கம் அல்லது மடி இறக்கம் என்று சொல்கிறோம். ஆங்கிலத்தில் இதற்கு யூட்ரோவெஜைனல் புரோலாப்ஸ் (Uterovaginal prolapse) என்று பெயர்.

ஏன் இறங்குகிறது?

* கர்ப்பப்பையை சப்போர்ட் செய்கிற தசைகள், திசுக்கள் மற்றும் தசைநார்கள் பலமிழப்பதால்.

* முதுமை, உடல் பருமன் காரணமாக.

* மெனோபாஸ் காலத்தில் ஏற்படும் திசுக்களின் இழப்பு மற்றும் ஈஸ்ட்ரோஜென் ஹார்மோன் சுரப்பு குறைவதால்.

* ஆஸ்துமா உள்ளிட்ட சுவாச பாதிப்பு களால் ஏற்படும் தொடர் இருமல் மற்றும் தொடர் மலச்சிக்கலால்.

அறிகுறிகள்

கர்ப்பப்பை இறங்கிவருவதால், அடிப்பகுதி யில் இழுப்பது போன்ற உணர்விருப்பதாகச் சிலர் சொல்வதுண்டு.

மிக முக்கியமாக பீரியட்ஸ் பாதையின் வழியே ஏதோ துருத்திக்கொண்டு வெளியே வர இருப்பதுபோல உணர்வதாகச் சொல்வார்கள். குட்டி பந்தின் மேல் அமர்ந்திருப்பது போன்ற உணர்வு இருக்கும்.

கர்ப்பப்பை கீழே இறங்குவதால் சிறுநீர்ப் பையும் மலப்பையும்கூட சேர்ந்து கீழே இறங்கும். இதனால் சிறுநீரைக் கட்டுப்படுத்த முடியாத உணர்வும், முழுமையாக சிறுநீர் கழிக்காதது போன்ற உணர்வும், இருமி னாலோ, தும்மினாலோ சிறுநீர் கசிவது, மலம் கழிப்பதில் அசௌகர்யம் போன்ற வற்றையும் உணரலாம். அடி முதுகில் வலி இருக்கலாம்.

சில நேரம் தாம்பத்திய உறவில் அசௌகர்யம் இருப்பதாக மருத்துவரைப் பார்க்க வருவார்கள். அப்போதுதான் கர்ப்பப்பை இறக்கம் இருப்பதே தெரியவரும்.

எந்த வயதில்?

கர்ப்பப்பை இறக்கம் எந்த வயதிலும் வரலாம். பெரும் பாலும் சுகப்பிரசவத்தில் குழந்தை பெறுவோருக்கு பிறப்புறுப்புப் பாதையி லுள்ள தசைகளும் திசுக்களும் பாதிக்கப்படும். 20, 30 வயதில் அந்த பாதிப்பின் விளைவு தெரியாது. மெனோபாஸ் நெருங்கும்போதுதான் தெரியவரும். வயதாக ஆக ஈஸ்ட்ரோஜென் ஹார்மோன் சுரப்பு குறைந்து, தசைகளின் சப்போர்ட் தளரும். அந்த நிலையில் அறிகுறிகளை அதிகம் உணர்வார்கள்.

இருக்கும் இடத்தில் இருந்துகொண்டால் எல்லாம் சௌக்கியமே!

இறங்கினால் என்ன பிரச்னை?

கர்ப்பப்பை கீழே இறங்கி வந்து பக்கவாட்டில் உரசி, புண்ணாகி, ரத்தம் கசியலாம்.

கர்ப்பப்பையோடு சேர்த்து சிறுநீர்ப்பையும் இறங்கி, சிறுநீர் தேக்கத்தால் கிட்னி இன்ஃபெக்‌ஷனும், சிறுநீர்ப் பை இன்ஃபெக்‌ஷனும் வர லாம். மலம் கழிக்க முடியாத தாலும் சில பிரச்னைகள் வரலாம்.

எப்போது மருத்துவரை சந்திக்க வேண்டும்?

* கர்ப்பப்பை கீழே இறங்கி பக்கவாட்டில் உரசி, ரத்தப் போக்கு ஏற்படும்போதும், நடப்பதோ, உட்கார்வதோ கூட சிரமமாக மாறும் போதும்.

* சிறுநீர், மலம் கழிப்பதில் பிரச்னை இருந்தால்...

* அடி முதுகு வலி அதிகரித்தால்...

எப்படிக் கண்டுபிடிக்கப்படுகிறது?

மருத்துவப் பரிசோதனையில் கர்ப்பப்பை கீழே இறங்கியிருப்பதை மருத்துவர்களால் உறுதிசெய்ய முடியும். ஸ்கேன் தேவையில்லை.

பயிற்சிகள் உதவலாம்

சுகப்பிரசவத்தில் குழந்தை பெற்றவர்களுக்கு பிறப்புறுப்புத் தசைகள் மற்றும் இடுப்பெலும்புப் பகுதியைச் சுற்றியுள்ள தசைகளை டைட்டாக்க சில பயிற்சிகள் உள்ளன. இந்தப் பயிற்சிகளை ‘பெல்விக் ஃப்ளோர் எக்சர்சைஸ்’ அல்லது ‘கெகல் எக்சர்சைஸ்’ என்கிறோம். பிரசவத்துக்குப் பிறகு, மருத்துவரின் ஆலோசனையின் பேரில் இந்தப் பயிற்சிகளைச் செய்யத் தொடங் கினால், பின்னாளில் கர்ப்பப்பை கீழே இறங்குவதைத் தவிர்க்கலாம். ஏற்கெனவே கீழிறங்கிய கர்ப்பப்பையை இந்தப் பயிற்சிகளின் மூலம் மேலும் தீவிரமாகாமல் தடுக்கலாமே தவிர, கீழே இறங்கியதை பழைய நிலைக்கு மாற்ற முடியாது.

சிறுநீர் கழிக்கும்போது அதை நிறுத்த முனைய அந்தப் பகுதியை டைட் ஆக்குவது போன்ற பயிற்சிதான் இது. மருத்துவரிடம் முறையாகக் கேட்டுத் தெரிந்துகொண்டதும் வீட்டில், பணியிடத்தில் என எப்போது வேண்டு மானாலும் இதைச் செய்யலாம்.

என்னதான் தீர்வு?

கர்ப்பப்பை இறக்கத்தை சரிசெய்யவென மருந்துகள் ஏதும் கிடையாது. இறங்கிய கர்ப்பப்பை தொந்தரவு கொடுக்கும்போது அறுவை சிகிச்சைதான் செய்ய வேண்டியிருக்கும். கீழே இறங்கிய கர்ப்பப்பையை மேலே உயர்த்தி வைத்துத் தைக்க வேண்டும். இறக்கத்தின் நிலை மற்றும் தீவிரத்தைப் பொறுத்து அறுவைசிகிச்சை தேவையா என்பது முடிவு செய்யப்படும்.

`ரிங் பெசரி' (Ring Pessary) என்ற வளையத்தைப் பொருத்துவதன் மூலமும் பிரச்னை தீவிரமடையாமல் தடுக்கலாம். அதை மருத்துவரிடம்தான் பொருத்திக் கொள்ள வேண்டும். மூன்று மாதங்களுக்கொரு முறை எடுத்து இன்ஃபெக்‌ஷன் இருக்கிறதா என்று பார்த்து மறுபடி பொருத்திக்கொள்ள வேண்டும். அறுவை சிகிச்சை வேண்டாம் என்றால் இது ஒரு ஆப்ஷன்.

இருக்கும் இடத்தில் இருந்துகொண்டால் எல்லாம் சௌக்கியமே!

தடுக்க முடியுமா?

பிரசவமானதும் இடுப்புப் பகுதியைப் பலப்படுத்தும் பயிற்சிகளைச் செய்வதன் மூலம் கர்ப்பப்பையைச் சுற்றியுள்ள தசைகளை வலுவாக்கலாம்.

நிறைய தண்ணீர் குடிப்பது. நார்ச்சத்து நிறைந்த உணவுகளை உண்பது, மலமிளக்கிகள் பயன்படுத்துவது போன்றவை மூலம் மலச்சிக்கல் பாதிப்பிலிருந்து மீள்வதோடு, கர்ப்பப்பை இறக்கத்தையும் தவிர்க்கலாம்.

தீவிர இருமல் பிரச்னைக்கு முறையான சிகிச்சைகள் மேற்கொள்ள வேண்டும். எடையைக் கட்டுப்பாட்டுக்குள் வைக்க வேண்டும்.

தண்ணீர் பக்கெட் போன்ற எடை அதிகமான பொருள்களைத் தூக்குபவர்களுக்கு பிரச்னை தீவிரமாகலாம். எடை தூக்குவதைத் தவிர்க்கவே முடியாது என்பவர்கள், முன்பக்கம் குனிந்து தூக்காமல், உட்கார்ந்தபடி உடலை வைத்து பிறகு, எடையைத் தூக்குவதுதான் சரியான முறை.

சிறுநீர்ப்பை இறக்கம் தெரியுமா?

சிறுநீர்ப்பை அதன் இடத்திலிருந்து நகர்ந்து வந்தால் அதை ‘சிஸ்டோசியெல்’ (Cystocele) அதாவது சிறுநீர்ப்பை இறக்கம் என்கிறோம். சுகப்பிரசவத்துக்குப் பிறகு, சிறுநீர்ப்பை இறக்கம் இருக்கும். சிறுநீர் கழிப்பதில் சிரமம், சிறுநீர் முழுவதுமாக வெளியேறாத உணர்வு, இருமினால், தும்மினால் ஏற்படும் சிறுநீர்க் கசிவு போன்றவை இதன் அறிகுறிகள். கர்ப்பப்பை அதன் இடத்திலேயே இருந்து, சிறுநீர்ப்பை மட்டும் இறங்கி யிருந்தால் அதை மட்டும் தனியே அறுவைசிகிச்சையில் சரிசெய்ய முடியும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism