தனுசு - Guru Peyarchi Palangal 2022 - 2023 (TAMIL)

ஒவ்வொரு ராசிக்காரருக்கும் குருப்பெயர்ச்சி வெவ்வேறு விதமான பலன்களை அளிக்கும். குருப்பெயர்ச்சியால் 2022-2023 ஆம் ஆண்டில் எந்த ராசிக்காரர்களுக்கு என்னென்ன பலன்கள் ஏற்படும்..? முழுமையான குருபெயர்ச்சி பலன்கள் இங்கே..!

தனுசு - குரு பெயர்ச்சிப் பலன்கள்

ல்லோருடனும் நட்பு கொண்டு அனைவரையும் உங்கள் பக்கம் ஈர்க்கும் திறமைசாலிகளான தனுசு ராசி அன்பர்களே! தற்போது குருபகவான் உங்கள் ராசிக்கு 4-ம் வீட்டில் வந்து அமரவுள்ளார். ஆகவே, 14.4.22 முதல் 22.4.23 வரை வேலைச்சுமை அதிகரிக்கும். குடும்பத்தில் சிறு சிறு சச்சரவுகள் வரும். வீண் சந்தேகத்தால் கணவன்-மனைவி பிரிய வேண்டி வரும். ஆகவே, எதிலும் உணர்ச்சி வசப்படாமல் அறிவுபூர்வமாக முடிவெடுக்கப்பாருங்கள்.

இயன்றவரையிலும் நெடுந்தூர, இரவுநேரப் பயணங்களைத் தவிர்க்கப் பாருங்கள். வாகன விபத்துகள் நிகழக்கூடும். தாயாரின் உடல்நலனில் கவனம் செலுத்துங்கள். மற்றவர்கள் விஷயத்தில் அத்துமீறி மூக்கை நுழைக்கவேண்டாம்; வீண் அபவாதங்கள் வருவதற்கு வாய்ப்பு உண்டு. மின்சார சாதனங்கள், நெருப்பு சம்பந்தப்பட்ட வேலைகளில் கவனமுடன் செயல்படுங்கள்.

குருபகவான் உங்கள் சுக ஸ்தானத்தில் ஆட்சிப்பெற்று அமர்வதால், அலைச்சல் இருந்தாலும் ஆதாயமும் உண்டு. பணத்தட்டுபாடு ஓரளவு குறையும். பூர்வீகச் சொத்துப் பிரச்னையில் சிக்கிக்கொள்ள வேண்டாம். பிள்ளைகளின் கல்யாண விஷயத்தில் அவசரப்படவேண்டாம். உயர் கல்வி- உத்தியோகத்தின் பொருட்டு பிள்ளைகள் உங்களை விட்டுப் பிரிவார்கள்.

எந்த சிக்கலாக இருந்தாலும் பெரியவர்களை வைத்துப் பேசி சுமுகமாக முடிக்கப்பாருங்கள். வெளிவட்டாரத்தில் எவரையும் விமர்சித்துப் பேச வேண்டாம். சில நேரங்களில் உங்களின் கோபதாபங்களை, கூடா பழக்க வழக்கங்களை வாழ்க்கைத் துணைவர் சுட்டிக்காட்டினால், தயங்காமல் ஏற்றுக்கொள்ளுங்கள். வெளி உணவுகளையும் எண்ணெய்ப் பதார்த்தங்களையும் தவிர்த்துவிடுங்கள். புதிய சொத்துகள் வாங்கும்போது ஆவணங்களையும் தாய்ப் பத்திரத்தையும் அலசி ஆராய்ந்து முடிவெடுங்கள். பெரும்பாலும் வீண் விமர்சனங்களைத் தவிர்த்துவிடுங்கள்.

குருபகவானின் நட்சத்திர சஞ்சாரம்...

14.4.22 முதல் 29.4.22 வரை

குருபகவான் பூரட்டாதி 4-ம் பாதத்தில் செல்கிறார். திடீர்ப் பயணங்கள், தாயாரின் உடல்நிலை பாதிப்பு, வீடு வாகனப் பாராமரிப்புச் செலவுகள் அதிகரித்தல், எதிலும் ஒரு நாட்டமில்லாத நிலை ஆகியவை வந்து நீங்கும்.

30.4.22 முதல் 24.2.23 வரை

சனி பகவானின் உத்திரட்டாதி நட்சத்திரத்தில் குருபகவான் செல்கிறார். முன்கோபம், வாக்குவாதம் வந்து நீங்கும். தோலில் அலர்ஜி வரக்கூடும். பணப்புழக்கம் அதிகரிக்கும். 8.8.22 முதல் 16.11.22 வரை உத்திரட்டாதி நட்சத்திரத்திலேயே குரு வக்ரத்தில் செல்வதால், கைமாற்றாகவும், கடனாகவும் வாங்கியிருந்த பணத்தைத் தந்து முடிப்பீர்கள். சிலர் வீடு மாற வேண்டிய நிர்ப்பந்தத்துக்கு ஆளாவீர்கள்.

24.2.23 முதல் 22.4.23 வரை

குருபகவான் புதனின் ரேவதி நட்சத்திரத்தில் செல்வதால், பிரிந்தவர்கள் ஒன்று சேர்வீர்கள். வாழ்க்கைத் துணைவர் வழி உறவினர்கள் உதவுவார்கள். சிலருக்குப் புது வேலை கிடைக்கும்.

வியாபாரத்தில்

எதிர்பாராதவிதமாக புது ஒப்பந்தங்கள் கூடிவரும். பற்று வரவு உயரும்; லாபமும் அதிகரிக்கும். அதேநேரம், எதிலும் அகலக்கால் வைக்க வேண்டாம். எக்காரணம் கொண்டும் எவரிடமும் தொழில் ரகசியங்களைப் பகிர வேண்டாம். புதுப் புது யுக்திகளைக் கையாளுங்கள். ரியல் எஸ்டேட், கெமிக்கல் வகைகளால் ஆதாயம் உண்டு. கூட்டுத்தொழிலில் பங்குதாரர்களிடம் கருத்து மோதல்கள் வரக்கூடும்; வளைந்துகொடுத்துப் போகவும்.

உத்தியோகத்தில்

வேலை அதிகரிக்கும். சிற்சில தருணங்களில் மற்றவர் வேலைகளையும் நீங்கள் செய்யவேண்டிய நிலை உருவாகும். அதிகாரிகளிடம் வீண் வாக்குவாதம் வேண்டாம். எவ்வளவு பணிகள் என்றாலும் அன்றாடம் முடித்துவிடுங்கள். அதேபோல் சிறு கவனக்குறைவும் பாதிப்புகளை உண்டுபண்ணும் என்பதால் அலட்சியத்தைத் தவிருங்கள். இப்படியான சிரமங்கள் உண்டு என்றாலும், குரு பகவான் உங்களின் 10-ம் வீட்டைப் பார்ப்பதால், அனைத்தையும் சமாளித்து முன்னேறுவீர்கள்.

மொத்தத்தில் இந்தக் குருப்பெயர்ச்சி, வருங்காலத்தில் சாதிப்பதற்கு ஏற்ப உங்களைத் தயார்படுத்துவதாக அமையும்.

முழுமையான குருப்பெயர்ச்சி பலன்கள் இங்கே..!