கும்பம் - Guru Peyarchi Palangal 2022 - 2023 (TAMIL)

ஒவ்வொரு ராசிக்காரருக்கும் குருப்பெயர்ச்சி வெவ்வேறு விதமான பலன்களை அளிக்கும். குருப்பெயர்ச்சியால் 2022-2023 ஆம் ஆண்டில் எந்த ராசிக்காரர்களுக்கு என்னென்ன பலன்கள் ஏற்படும்..? முழுமையான குருபெயர்ச்சி பலன்கள் இங்கே..!

கும்பம் - குரு பெயர்ச்சிப் பலன்கள்

சூழலுக்கு ஏற்ப காய் நகர்த்தி காரியத்தைக் கச்சிதமாக முடிக்கும் திறமைசாலிகள் நீங்கள். இதுவரை ஜன்ம குருவாக அமர்ந்து நல்லதையும், கெட்டதையும் கலந்து கொடுத்த குருபகவான் 14.04.2022 முதல் 22.04.2023 வரை 2-ம் வீட்டில் அமர்கிறார். உங்கள் குடும்பத்தில் உங்கள் பேச்சுக்கு மதிப்பு கூடும். எதிலும் பிடிப்பில்லாமல் இருந்த நிலை மாறும். வாழ்க்கைத் துணைவர் உங்களுக்குப் பக்கபலமாக இருப்பார்.

குடும்ப ஸ்தானத்தில் குரு அமர்வதால் வீட்டில் மகிழ்ச்சி பொங்கும். செலவுகளைக் கட்டுப்படுத்தமுடியாமல் விழிபிதுங்கி நின்றீர்களே, இனி எதையும் சமாளிக்கும் வகையில் பணபலம் கூடும். தள்ளிப்போன சுபநிகழ்ச்சிகள் நடக்கும். விலகிச் சென்ற உறவினர்கள் தேடி வருவார்கள். வங்கியில் அடமானமாக வைத்திருந்த வீட்டுப் பத்திரத்தை மீட்பீர்கள். பேச்சால் பழைய நட்பை துளிர்க்கச் செய்வீர்கள். செரிமானக் கோளாறு, தூக்கமின்மை, கை கால் வலி நீங்கும்.

குருபகவானின் நட்சத்திர சஞ்சாரம்

14.4.22 முதல் 29.4.22 வரை

குருபகவான் பூரட்டாதி நட்சத்திரத்தின் 4-ம் பாதத்தில் செல்வதால் பணவரவு அதிகரிக்கும். குடும்பத்தில் அமைதி நிலவும். வழக்கில் நல்ல தீர்ப்பு கிடைக்கும். பிள்ளைகளின் பிடிவாதம் குறையும். மூத்த சகோதரர் உதவுவார். இங்கிதமாகப் பேசி பழையப் பிரச்னைகளைத் தீர்ப்பீர்கள்.

30.4.22 முதல் 24.2.23 வரை

சனிபகவானின் உத்திரட்டாதி நட்சத்திரத்தில் குருபகவான் செல்வதால் பழுதான மின்னணு, மின்சார சாதனங்களை மாற்றுவீர்கள். தேகநலனில் அக்கறை தெவை. உடம்பில் ரத்த அழுத்தம், சர்க்கரையின் அளவைச் சரிப்பார்த்துக்கொள்வது நல்லது. நடைபயிற்சி மேற்கொள்ளுங்கள். சகோதர வகையில் அலைச்சல், செலவுகள் உண்டு. 8.8.22 முதல் 16.11.22 வரை உத்திரட்டாதி நட்சத்திரத்திலேயே குருபகவான் வக்ரத்தில் செல்வதால் திடீர் செல்வாக்கு, யோகம், பணவரவு உண்டாகும். வேற்றுமொழியினர், மாநிலத்தவரால் ஆதாயம் அடைவீர்கள்.

24.2.23 முதல் 22.4.23 வரை

குருபகவான் புதனின் ரேவதி நட்சத்திரத்தில் செல்வதால், மகளுக்கு நல்ல வரன் அமையும். பூர்வீகச் சொத்துப் பிரச்னைகள் சுமுகமாக முடியும். மகனுக்கு வேலை கிடைக்கும். ஆயினும் திடீர்ப் பயணங்களால் சேமிப்புகள் கரையும்.

வியாபாரத்தில்

இதுவரையிலும் இருந்த தடுமாற்றங்கள் நீங்கும். வியாபார ஸ்தலத்தை உங்கள் ரசனைக்கு ஏற்ப மாற்றுவீர்கள். விளம்பர யுக்திகளாலும் அதிரடிச் சலுகைகளாலும் வாடிக்கையாளர்களை அதிகரிப்பீர்கள். பாக்கிகள் எளிதாக வசூலாகும். அனுபவம்சாலிகள் வேலைக்கு வந்துசேருவார்கள். மருந்து, கமிஷன், மர வகைகளால் லாபம் அடைவீர்கள். டிசம்பர், ஜனவரி, ஏப்ரல் மாதங்களில் லாபம் அதிகரிக்கும். புது ஒப்பத்தங்கள் கையெழுத்தாகும்.

உத்தியோகத்தில்

மேலதிகாரி உங்களைக் குறை கூறுவதைக் கைவிடுவார்; உங்களுக்கு ஆதரவாக மாறுவார். உங்களின் சம்பளம் உயரும். சகஊழியர்கள் உங்களின் ஆலோசனைகளை ஏற்பார்கள். இதுவரை இருந்து வந்த போராட்டம் நீங்கும். டிசம்பர், ஜனவரி, ஏப்ரல் மாதங்களில் வேறு வாய்ப்புகள் தேடி வரும். சம்பளம் கூடும்.

மொத்தத்தில் இந்தக் குருப்பெயர்ச்சி உங்களின் எதிர்பார்ப்புகளைப் பூர்த்தி செய்வதுடன், புதிய முயற்சிகளில் வெற்றி தருவதாக அமையும்.

முழுமையான குருப்பெயர்ச்சி பலன்கள் இங்கே..!