ரிஷபம் - Guru Peyarchi Palangal 2022 - 2023 (TAMIL)

ஒவ்வொரு ராசிக்காரருக்கும் குருப்பெயர்ச்சி வெவ்வேறு விதமான பலன்களை அளிக்கும். குருப்பெயர்ச்சியால் 2022-2023 ஆம் ஆண்டில் எந்த ராசிக்காரர்களுக்கு என்னென்ன பலன்கள் ஏற்படும்..? முழுமையான குருபெயர்ச்சி பலன்கள் இங்கே..!

ரிஷபம் - குரு பெயர்ச்சிப் பலன்கள்

ண்ணுவதை சிந்தனையை எழுத்தில் வடிப்பதில் வல்லவரான ரிஷப ராசி அன்பர்களே! இதுவரையிலும் 10-ம் இடத்தில் அமர்ந்து பலன் தந்தார் குரு பகவான். எதிலும் தீர்க்கமானதொரு முடிவு எடுக்க முடியாமல் தவிக்க வைத்தார். 14.4.22 முதல் 22.4.23 வரை, லாப வீட்டில் வந்து அமர்ந்து பலன் தரப்போகிறார்.

நீங்கள் என்னென்ன வேலைகளை எல்லாம் திட்டமிட்டிருந்தீர்களோ, அவை மிகச் சிறப்பாக நடந்தேறும். பணப்பற்றாக்குறையால் தவித்த நிலை மாறும். தேவைக்கேற்ப பணம் வந்து சேரும். கடன் தொகையில் ஒரு பகுதியைப் பைசல் செய்வீர்கள். தம்பதிக்கு இடையே அந்நியோன்யம் பிறக்கும். குடும்பத்தில் சலசலப்புகள் நீங்கி நிம்மதி பிறக்கும். திருமணம், சீமந்தம், கிரகப் பிரவேசம் போன்ற சுப நிகழ்ச்சிகளால் வீடு களை கட்டும். அதிகாரப் பதவியில் இருப்பவர்கள் அறிமுகம் ஆவார்கள்.

குடும்பத்துடன் சென்று உங்களின் குலதெய்வ வழிபாடுகளைச் சிறப்பாகச் செய்துமுடிப்பீர்கள். உங்களை வாட்டிவதைத்த பிரச்னைகளுக்கு நல்லதொரு தீர்வு கிடைக்கும்; புதிய அணுகுமுறையில் பிரச்னைகளைச் சந்தித்து தீர்வு காண்பீர்கள். வி.ஐ.பிகளின் நட்பும் உதவியும் வாய்க்கும். தக்க தருணத்தில் வங்கிக் கடனுதவி கிடைக்கும். வீடு கட்டும் பணியை மீண்டும் தொடங்குவீர்கள். தடைகள் நீங்கி திருமணம் கைகூடும். புது வேலைக்கான முயற்சிகளில் நல்ல தகவல் வந்து சேரும். புதிய பதவி மற்றும் பொறுப்புகளுக்குத் தேர்வு செய்யப் படுவீர்கள்.

குரு பகவானின் நட்சத்திர சஞ்சார பலன்கள்

14.4.22 முதல் 29.4.22 வரை

இந்த காலகட்டத்தில், உங்களுக்கு அஷ்டம லாபாதிபதியான குருபகவான், தன் நட்சத்திரத்திரமான பூரட்டாதி 4-ம் பாதத்தில் செல்கிறார். இந்த காலகட்டத்தில் திடீர் பயணங்கள் ஏற்படலாம். அதேபோல் செலவுகளும் சகோதரருடன் மனத்தாங்கலும் ஏற்பட வாய்ப்பு உண்டு. அரசாங்கம் தொடர்பான காரியங்களில் அலட்சியம் காட்டாதீர்கள்.

30.4.22 முதல் 24.2.23 வரை

இந்த காலக்கட்டங்களில் உங்களின் பாக்கிய ஜீவனாதிபதியான சனி பகவானின் உத்திரட்டாதி நட்சத்திரத்தில் செல்கிறார் குரு. தேக ஆரோக்கியம் மேம்படும்; பண வரவு உண்டு. வேலை கிடைக்கும். வழக்குகள் சாதகமாகும். சொந்த வீடு அமையும். புதுத் தொழில் தொடங்குவீர்கள். 8.8.22 முதல் 16.11.22 வரை உத்திரட்டாதி நட்சத்திரத்திலேயே குருபகவான் வக்ரத்தில் செல்வதால், எதிர்பார்த்த பணம் கைக்கு வந்தாலும் செலவுகள் கூடும். உடல் ஆரோக்யத்தை பார்த்துக் கொள்ளுங்கள்.

24.2.23 முதல் 22.4.23 வரை

உங்கள் தன, பூர்வ புண்ணியாதி பதியான புதனின் ரேவதி நட்சத்திரத்தில் குருபகவான் செல்வதால் திடீர் யோகம் உண்டாகும். குடும்பத்தில் நிம்மதி கிடைக்கும். தீடீர் பணவரவு உண்டு. சாதுர்யமாகப் பேசி சாதிப்பீர்கள்.

வியாபாரத்தில்:

புதிய மாற்றங்கள், புதிய முதலீடுகளுக்குத் தயார் ஆவீர்கள். இரும்பு, எலெக்ட்ரானிக்ஸ், ஏற்றுமதி - இறக்குமதி வகைகளால் ஆதாயம் அடைவீர்கள். கூட்டுத்தொழிலில் பிரச்னை தந்த பங்குதாரர்கள் மாற வாய்ப்பு உண்டு. வாடிக்கையாளர்களைக் கவர புது சலுகைகளை அறிவிப்பீர்கள். டிசம்பர், ஜனவரி, பிப்ரவரி, மார்ச் மாதங்களில் புது ஒப்பந்தங்கள் கையெழுத்தாகும்.

உத்தியோகத்தில்:

உங்களுக்கு எதிராக நடந்த மேலதிகாரி வேறு இடத்துக்கு மாற்றம் ஆவார். புதிய அதிகாரி உங்களுக்கு ஆதரவாக நடந்துகொள்வார். முக்கிய பொறுப்புகள் வந்து சேரும். நீங்கள் எதிர்பார்த்த பதவி உயர்வு, சம்பள உயர்வு எல்லாம் கிடைக்கும். பிப்ரவரி, மார்ச் மாதங்களில் வேறு நிறுவனங் களிலிருந்து அதிக சம்பளத்துடன் கூடிய வாய்ப்பு வரும்; ஏற்றுக் கொள்ளலாம்.

மொத்தத்தில் இந்தக் குருப்பெயர்ச்சி எதிர்பாராத திடீர் முன்னேற்றத்தையும் அதிரடி வளர்ச்சியையும் அள்ளித் தருவதாக அமையும்.

முழுமையான குருப்பெயர்ச்சி பலன்கள் இங்கே..!