விருச்சிகம் - Guru Peyarchi Palangal 2022 - 2023 (TAMIL)

ஒவ்வொரு ராசிக்காரருக்கும் குருப்பெயர்ச்சி வெவ்வேறு விதமான பலன்களை அளிக்கும். குருப்பெயர்ச்சியால் 2022-2023 ஆம் ஆண்டில் எந்த ராசிக்காரர்களுக்கு என்னென்ன பலன்கள் ஏற்படும்..? முழுமையான குருபெயர்ச்சி பலன்கள் இங்கே..!

விருச்சிகம் - குரு பெயர்ச்சிப் பலன்கள்

வாக்கு சாதுர்யமும் செயல்திட்டங்களும் நிறைந்த விருச்சிக ராசி அன்பர்களே! இதுவரையிலும் 4-ல் அமர்ந்திருந்த குரு, வீண் விரயத்தையும், ஏமாற்றங்களையும் தந்துகொண்டிருந்தார். தற்போது 14.4.22 முதல் 22.4.23 வரை ராசிக்கு 5-ல் அமர்கிறார். அதையொட்டி வாழ்வில் அதிரடி மாற்றங்களை உண்டாக்கப் போகிறார்.

மனதில் இருந்துவந்த குழப்பங்கள் எல்லாம் நீங்கும்; எதிலும் தெளிவாக முடிவெடுத்துச் செயல்படுவீர்கள். வீட்டிலும் உறவுகள் மத்தியிலும் கலகம் ஏற்படுத்திய அன்பர்களின் உறவை முறித்துக்கொள்வீர்கள். வாரிசு இல்லாத தம்பதிக்குக் குழந்தைப் பேறு வாய்க்கும். நீங்கள் எதிர்பார்த்தபடி, பூர்வீகச் சொத்தில் உங்களுக்கான பங்கு தேடி வரும். வீட்டில் சுபகாரியங்களுக்கான சூழல் உருவாகும். கணவன்-மனைவிக்குள் இனி அந்நியோன்யம் பிறக்கும். மகளின் திருமணத்தைக் கோலாகலமாக நடத்துவீர்கள். மகனுக்கு அயல்நாடு செல்லும் வாய்ப்பு வரும்.

உங்களில் சிலர் சொந்த வீடு வாங்கி குடிபெயர்வீர்கள். வழக்குகள் ஏதேனும் இருப்பின், உங்களுக்குச் சாதகமாகவே முடியும். பழைய கடன்களில் ஒரு பகுதியை அடைத்து நிம்மதி அடைவீர்கள். கடந்த கால தவறுகள் மீண்டும் நிகழ்ந்துவிடக்கூடாது என்பதில் உறுதியாக இருப்பீர்கள். குலதெய்வக் கோயிலுக்குச் செய்ய வேண்டிய நேர்த்திக்கடனை நிறைவேற்றுவீர்கள். சிலருக்கு, பெரிய நோய் இருப்பது போன்ற பிரம்மை விலகும். வேலைக்கு விண்ணப்பித்துக் காத்திருந்தவர்களுக்கு நல்ல நிறுவனத்திலிருந்து அழைப்பு வரும்.

குருபகவானின் நட்சத்திர சஞ்சார பலன்கள்

14.4.22 முதல் 29.4.22 வரை

உங்களின் தன பூர்வப் புண்யாதிபதியான குரு பூரட்டாதி 4-ம் பாதத்தில் செல்கிறார். எதிர்பார்த்த பணம் கைக்கு வரும். தள்ளிப்போன திருமணம் கூடி வரும். வீடு, மனை வாங்குவீர்கள். பேச்சில் தடுமாற்றம் நீங்கும். ஷேர் மூலம் பணம் வரும். அரசுக் காரியங்கள் விரைந்து முடியும்.

30.4.22 முதல் 24.2.23 வரை

சனிபகவானின் உத்திரட்டாதி நட்சத்திரத்தில் குரு செல்வதால் பழுதான வாகனத்தை மாற்றி புதுசு வாங்குவீர்கள். வீடு கட்ட வங்கிக் கடன் கிடைக்கும். இளைய சகோதர வகையில் மனத்தாங்கல் நீங்கும். பழைய கடனில் ஒரு பகுதியை பைசல் செய்ய வழி கிடைக்கும். திடீர்ப் பயணங்கள் அதிகரிக்கும். ஆலயத்தைப் புதுப்பிக்க உதவுவீர்கள். 8.8.22 முதல் 16.11.22 வரை உத்திரட்டாதி நட்சத்திரத்திலேயே குருபகவான் வக்ரத்தில் செல்வதால், வேலைச்சுமையும் அதனால் பதற்றமும் அதிகரிக்கும்.

24.2.23 முதல் 22.4.23 வரை

குருபகவான் புதனின் ரேவதி நட்சத்திரத்தில் செல்கிறார். அலைச்சல் இருக்கும். ஒரு சொத்தைக் காப்பாற்ற மற்றொரு சொத்தை விற்க வேண்டி வரும். சகோதரர் உதவுவார். யாருக்கும் ஜாமீன் கையெழுத்திட வேண்டாம்.

வியாபாரத்தில்

உங்களின் புதிய அணுகுமுறை போட்டியாளர்களைத் திணறடிக்கும். வெகு காலமாக வராமல் இருந்த பழைய வாடிக்கையாளர்கள் தேடி வருவார்கள். வருமானம் உயரும். அரிசி, எண்ணெய், மருந்து, ரசாயன வகைகள், ஏற்றுமதி-இறக்குமதி வகைகளால் லாபம் அடைவீர்கள். கூட்டுத்தொழிலில், பங்குதாரர்களுடனான கருத்து வேறுபாடுகள் மறையும்.

உத்தியோகத்தில்

இதுவரையிலு இருந்துவந்த வேலைப்பளு குறையும். சக ஊழியர்கள் வலிய வந்து உதவி செய்வார்கள். உங்கள் தகுதிக்கு ஏற்றபடி பதவி உயர்வு வாய்க்கும். சம்பள உயர்வும் உங்களைச் சந்தோஷப்படுத்தும். உங்கள் பணிகளில் குறை கண்டுகொண்டிருந்த உயரதிகாரி, உங்களைப் புரிந்துகொள்வார்.

மொத்தத்தில் இந்தக் குருப்பெயர்ச்சி ஏமாற்றங்களில் இருந்து உங்களை விடுபட வைப்பதுடன், நினைத்ததை நிறைவேற்றும் வல்லமையைத் தருவதாக அமையும்.

முழுமையான குருப்பெயர்ச்சி பலன்கள் இங்கே..!