அப்பா கொடுக்கலாம்... நான் கொடுத்தா தப்பா?! 'லிப் லாக்' ஸ்ருதி கமல்

அழகாக... அளவாக... மிக மிக இளமையாக... ஸ்ருதிஹாசன்!

ஏ.ஆர்.முருகதாஸ் இயக்க, சூர்யா ஜோடியாக நடிக்கும் 'ஏழாம் அறிவு' திரைப்படம், ஒரு ஹீரோயினாக ஸ்ருதிக்குத் தமிழில் நிச்சயம் பம்பர் அறிமுகம். இந்தியில் மதூர் பண்டார்கர் இயக்கும் படம், தெலுங்கில் சித்தார்த்துடன் ஒரு படம் என ஸ்ருதி இப்போ 'மோஸ்ட் வான்டட்'!

"என்ன பளபளன்னு சேலையில் ஒரு திடீர் தரிசனம்?"

"சும்மா... ஐஸ்ட் லைக் தட்! இந்தி, தெலுங்குன்னு பறந்துட்டே இருக்கிறதால், தமிழ்நாட்டுக்கு ஒரு ஸ்வீட் ஷாக் தரணுமே... அதான்!"

" 'ஏழாம் அறிவு' படத்தில் உங்க கேரக்டர் என்ன... அதுக்காக எப்படி ஹோம் வொர்க் பண்ணியிருக்கீங்க?"

"சூர்யாவும் நானும் சேர்ந்து நடிக்கிற படத்தின் பேர் 'ஏழாம் அறிவு'. இதுக்கு மேல் படத்தைப்பத்தி நான் ஒரு வார்த்தை பேசினாலும், முருகதாஸ் சாரிடம் மாட்டிப்பேன். கமல் சார் பொண்ணுன்னு எந்த விஷயத்திலும் எங்கேயும் எனக்கு சாஃப்ட் கார்னர் கிடையாது. இதில் என் கேரக்டர் பேர் என்னன்னு சொன்னாக்கூட... நான் காலி. இந்த கொஸ்டீனுக்கு பாஸ்...பாஸ்!"

"பவர்ஃபுல் பெர்ஃபார்மர் சூர்யா. தமிழில் ஹீரோயினாக முதல் படத்திலேயே அவருடன் நடிக்கிறீர்கள்..."

"லோக்கல் ரன்னிங் ரேஸில் முதல் ஆளா வர்றதைவிட, ஒலிம்பிக் போட்டியில் இரண்டாவது ஆளா வர்றது பெட்டர்தானே!

முதல் படத்திலேயே சூர்யாவுடன் நடிச்சா... நிறைய விஷயங்கள் கத்துக்கலாம். தவிர, சினிமாவில் ஸ்க்ரீன் ஸ்பேஸ் என்பது எல்லோருக்கும் ஸ்கோப் தர்ற ஒண்ணு. ரெண்டு நிமிஷமே வர்ற கேரக்டரோ, ரெண்டு மணி நேர லீட் ரோலோ நம்ம கேரக்டரை எப்படி பிரசன்ட் பண்றோம்கிறதுதான் விஷயம். சூர்யா நிறையவே டிப்ஸ் கொடுத்திருக்கார். அந்த விதத்தில் நான் லக்கி!"

"பின்னணிப் பாடகியாக சினிமாவில் அறிமுகம் ஆனீங்க. பிறகு, மியூஸிக் பண்ணீங்க. இப்ப டக்குனு ஏகப்பட்ட அழகு அப்லோட் பண்ணிட்டு நடிக்க வந்துட்டீங்க... கேரியர் ஃபிக்ஸ் பண்றதில் எதுவும் குழப்பமா?"

"நான் வளர்ந்த சூழல் அப்படி. அப்பா எந்த ஒரு விஷயத்திலும் செட்டில் ஆகாம, ஏதாவது புதுசா டிரை பண்ணிட்டே இருப்பார். டான்ஸரா இருந்தார், நடிச்சார், எழுதினார், கேமரா கத்துக்கிட்டார், பாட்டுப் பாடினார், சினிமா டைரக்ட் பண்ணார்.... இப்போ வரை எதையாவது தேடி ஓடிட்டே இருக்கார். அப்படி ஒருத்தர் பக்கத்துல இருக்கும்போது, நான் எப்படி சும்மா இருக்க முடியும்? சினிமாதான் என் கேரியர்னு முடிவு பண்ண பிறகு, ஏற்கெனவே எனக்குத் தெரிஞ்ச மியூஸிக் பண்ணேன். இப்ப, நடிக்கலாம்னு ஆசை வந்துச்சு. நடிக்க ஆரம்பிச்சுட்டேன். பக்கா என்டர்டெயினர் ஆக இருக்கணும். அது மட்டும்தான் என் ஆசை!"

"அப்பாவும் ரஜினியும் நல்ல ஃப்ரெண்ட்ஸ்... நீங்க நடிக்க ஆரம்பிச்ச பிறகு, ரஜினி எதுவும் உங்களுக்கு டிப்ஸ் அல்லது அட்வைஸ் சொன்னாரா?"

" 'உன்னைப் போல் ஒருவன்' ப்ரிவியூ ஷோவில்தான் கடைசியா நான் ரஜினி அங்கிளைப் பார்த்தேன். 'மியூஸிக் பென்டாஸ்டிக். சூப்பர் சூப்பர்'னு பாராட்டினார். அதுக்கு அப்புறம் நான் அவரைப் பார்க்கலை. நான் நடிச்ச படம் ப்ரிவியூ ஷோ பார்த்துட்டும் அவர் 'பென்டாஸ்டிக்... சூப்பர் சூப்பர்'னு சொல்லணும்!"

"கமல்னு சொன்னாலே தேசிய விருது ஞாபகம் வராதவங்களுக்குக்கூட லிப் கிஸ் ஞாபகம் வரும். கமல் பொண்ணுகிட்டயும் லிப் கிஸ் எதிர்பார்ப்பாங்களே. என்ன பதில் வெச்சிருக்கீங்க?"

"ரோட்ல ரெண்டு பேர் சண்டை போட்டா, ஒருத்தர் இன்னொருத்தர் முகத்துல ஓங்கிக் குத்துவாங்க. அப்படித்தானே சண்டைக் காட்சிகளின்போது ஹீரோ வில்லன் முகத்துல பஞ்ச் பண்றார். 'அது எப்படி ஹீரோ என்னை அடிக்கிற மாதிரி நடிக்க முடியும்?'னு வில்லன்கள் யாராவது இதுவரை குரல் கொடுத்திருக்காங்களா? அப்புறம் ஏன் ஹீரோயின்கள்கிட்ட மட்டும் லிப் கிஸ் பத்தி இப்படிக் கேள்வி வருதுன்னு எனக்குப் புரியலை. இல்லை, ரியல் லைஃப்ல யாரும் யாருக்கும் கிஸ் கொடுக்காம இருக்காங்களா? ஆக்ஷனுக்கு ஸ்டன்ட், சென்ட்டிமென்ட்டுக்குக் கண்ணீர் மாதிரி ரொமான்ஸுக்கு கிஸ் ஒரு எலிமென்ட். அதைப் பார்த்து ஏதோ பூதம் மாதிரி பயப்படுற ஆள் நான் இல்லை. அந்த சிச்சுவேஷனுக்குத் தேவைப்பட்டா, எந்த லெவலுக்கும் போகலாம். ஆனா, சும்மா ஹீரோ கனவு கண்டார்னு லிப் லாக் பண்ண முடியாது. இன்னொரு விஷயம், அப்பா எப்பவுமே தேவை இல்லாம படத்துல கிஸ் ஸீன் வெச்சிருக்க மாட்டார். 'மகாநதி' படத்தில் அந்த லிப் கிஸ் உறுத்துதுன்னு ஒருத்தராவது சொல்ல முடியுமா?"

"இப்படி எல்லாம் பேச அப்பாகிட்ட தினமும் டியூஷன் எடுத்துக்குவீங்களா?"

"நான் அப்பாவைப் பார்த்தே முழுசா ரெண்டு வாரம் ஆச்சுங்க. ரெண்டு பேரும் ஷூட்டிங்... ஷூட்டிங்னு ஓடிட்டே இருக்கோம். நான் பெரும்பாலும் மும்பையில்தான்

இருப்பேன். என் தங்கச்சி அக்ஷராவும் அங்கேதான் அசிஸ்டென்ட் டைரக்டர் பயிற்சி எடுத்துட்டு இருக்கா. நாங்க மூணு பேரும் ஒண்ணா சந்திச்சாலே, அது கிட்டத்தட்ட சரித்திர முக்கியத்துவம் வாய்ந்த நிகழ்வுதான். எஸ்.எம்.எஸ், சாட்னுதான் அப்பா கூட டச்ல இருப்பேன்!"

"டிஸ்கொதெ, பார்ட்டிக்குப் போற ஹீரோயின்ஸ்லாம் திகிலடிச்சு இருக்காங்க. நீங்க எப்படி?"

"எனக்கு எப்பவுமே பார்ட்டி பிடிக்காது. அப்படியே நான் போக வேண்டி இருந்தாலும், க்ளோஸ் ஃப்ரெண்ட்ஸ்கூட போய், ஓரமா உட்கார்ந்து அரட்டை அடிச்சுட்டு வந்துருவேன். அதுவும், இப்போ சென்னை, மும்பை, ஹைதராபாத்னு பறந்துட்டே இருப்பதால், காபி, டீ குடிக்கக்கூட நேரம் இல்லை. இதில் எங்கே பார்ட்டீ!" - கண் சிமிட்டிச் சிரிக்கிறார் ஸ்ருதி!