'எந்திரன்' உணர்த்திய பாடம்!

"நான் குஜராத்தி. பிறந்து வளர்ந்தது சென்னை. 'நீரவ் ஷா' என்று என் பெயரை

இரண்டு வார்த்தைகளாகப் பிரித்து எழுத வேண்டும். அதற்கு சம்ஸ்கிருதத்தில் 'அமைதி' என்று அர்த்தம். உங்கள் சந்தேகம் தீர்ந்ததா?"- பெரிய மீசைக்குள் சின்ன சிரிப்பு ஒளித்துப் பேசுகிறார் நீரவ் ஷா. இந்திய சினிமாவின் மோஸ்ட் வான்டட் ஒளிப்பதிவாளர். வீட்டின் பிரமாண்ட ஜன்னல் வழியே பளபளக்கிறது மெரினா பீச்! 'அறிந்தும் அறியாமலும்', 'பில்லா', 'மதராசபட்டினம்' என்று அடுத்தடுத்த படங் களில் உச்சம் தொடுபவர்.

"உங்களை மாதிரி ஒளிப்பதிவாளர் ஆக என்ன பண்ணணும்?"

"இந்தக் கேள்விக்குத்தாங்க நானும் பதில் தேடிட்டே இருக்கேன்.

எகனாமிக்ஸ் படிக்க ஆசை. வீட்ல காமர்ஸ் சேர்த்துவிட்டாங்க. படிக்கப் பிடிக்கலை. சினிமா பத்தி எதுவுமே தெரியாது. ஆனா, சினிமா ஆசை மட்டும் உண்டு. கிளம்பி பி.சி.ஸ்ரீராம் சார்கிட்ட வந்து நின்னேன். 'ஒளிப்பதிவு பத்தி ஒண்ணும் தெரியாது. இதுவரை ஒரு ஸ்டில் போட்டோகூட எடுத்தது இல்லை. உங்ககிட்டே அசிஸ்டென்ட்டா வொர்க் பண்ணணும் சார்'னு கேட் டேன். என்ன மூடுல இருந்தாரோ, என்னைச் சேர்த்துக்கிட்டார். அது ஏன்னு இப்ப வரை தெரியலை. 'எதுவுமே தெரியாதவனை ஈஸியா மோல்டு பண்ணிடலாம்'னு அவர் நினைச்சிருக்கலாம். நானும் ஒரு ஒளிப்பதிவாளர் ஆகிட்டேன்!"

"ஒரு படத்தை ஒப்புக்கொள்ள ஏதாவது அளவுகோல் வெச்சிருக்கீங்களா?"

"சினிமா ஒரு கூட்டு முயற்சி. காலையில் 10 மணிக்குப் போய் சாயங்காலம் 6 மணிக்குத் திரும்புகிற ரெகுலர் வேலை கிடையாது. மனசும் உடம்பும் லயிச்சு இயங்கணும். பணத்துக்காக வேலை செஞ்சா சோர்வுதான் மிஞ்சும். படத்தின் இயக்குநர் நமக்கு செட் ஆகணும். கதை சுமாரா இருந்தாலும், திரைக்கதை கச்சிதமா செட் ஆகணும். இந்த ரெண்டு விஷயம் பக்காவா இருந்தா, வேற யோசனை இல்லாம படத்தில் கமிட் ஆகிடுவேன். இந்த வேவ்லெங்த்தான் என்னையும் இயக் குநர் விஜய்யையும் 'மதராசபட்டினம்' பண்ணவெச்சது. படம் இவ்வளவு பிரமாண்ட பாராட்டுக்கள் குவிக்கும்னு நாங்களே எதிர்பார்க்கலை. அந்தப் படத்துக்காக 25 தடவைக்கு மேல் மும்பைக்குப் பயணம் செஞ்சோம். விளையாட்டுபோல ஆரம்பிச்சது பெரிய விருட்சமா தழைச்சு நிக்குது. இந்த திருப்திதான் அடுத்த பயணங் களுக்கான எரிபொருள்!"

"விஷ்ணுவர்தன், ஆர்யா கூடவே அடுத்தடுத்து படம் பண்றீங்களே?"

"அப்படி ஒரு நட்பு! 'அறிந்தும் அறியாமலும்' படத்துக்கு முதல் நாள் ஒய்.எம்.சி.ஏ-வில் ஷூட்டிங். மழை பெய்ஞ்சுட்டு இருக்கு. 'நீரவ்... இந்த லென்ஸை ட்ரை பண்ணேன்'னு விஷ்ணு சொன்னார். நான் நினைச்சதைவிட அந்த ஷாட் பிரமாதமா வந்தது. படம் முழுக்க விஷ்ணு சொன்ன மாதிரியே பண்ணேன். என் ஒளிப்பதிவில் ஸ்டைலிஷ் சேர்த்ததில் விஷ்ணு வுக்குப் பெரிய பங்கு உண்டு. அதனால்தான், அடுத்தடுத்த படங்களிலும் அவரோடு பயணிக்கிறேன். ஆர்யா கூட தொடர்ந்து படங்கள் அமைவது எப்படின்னு எனக்கும் ஆச்சர்யம்தான். லிங்குசாமி இயக்கும் 'வேட்டை' படத்தில் முதலில் சிம்பு ஹீரோ. என்னை கமிட் பண்ணியிருந்தாங்க. கொஞ்ச நாள் கழிச்சு, 'ஹலோ, நான்தாங்க

ஹீரோ'ன்னு ஆர்யா சிரிக்கிறார். சுவாரஸ்யமான மேஜிக்தான்!"

"இந்தி-தமிழ்ப் படங்களை எப்படி வித்தியாசப் படுத்துறீங்க?"

"தமிழைவிட இந்திப் படங்களின் ரீச் அதிகம். ஆனால், அதை இப்போ 'எந்திரன்' அடிச்சு உடைச்சிருச்சு. எந்த பட்ஜெட்டில், எந்த மொழியில் படம் எடுத்தாலும் பெருசா வியாபாரம் பண்ண முடியும்னு 'எந்திரன்' நிரூபிச்சிருச்சு.அதனால, அடுத்த சில மாதங்களில் இந்தக் கேள்வியே காணாமல் போனாலும் போகலாம். பாலிவுட்டில் மெகா ஹிட் படத்தைக்கூட மூணே மாசத்துல டி.வி.டி-யாக ரிலீஸ் பண்ணிரு வாங்க. அது சினிமாவுக்கு வரவேண் டிய வருமானம், வேறு வழிகளில் வீணாவதைத் தடுக்கும். அந்த மாதிரியான சில மார்க்கெட்டிங் டெக்னிக்குகளை நாம அவங்ககிட்ட இருந்து கத்துக்கலாம்!"