குத்துல இருக்கு குறியீடு!

காலம் காலமாக அயிட்டம் சாங்கை `ஆ...!'னு உட்கார்ந்து பார்க்கிற நாமெல்லாம் என்னைக்காவது அதில் நாட்டுக்குத் தேவையான நல்ல விஷயங்களை, அதாங்க... தத்துவங்களை எல்லாம் கவனிச்சிருக்கோமா மக்களே? சும்மா ஒரு சாம்பிள்தான் இது!

நாயகன் : `நாலு பேருக்கு நல்லதுனா எதுவுமே தப்பு இல்லை'னு கமல் சொன்னதை மட்டும் இப்போவரைக்கும் சொல்லிக்கிட்டு திரியற `நாயகன்' படத்தில் வரும், `நிலா அது வானத்து மேலே' பாட்டுல `பொண்ணுக்கும் பொன்னுக்கும் அடிதடிதான் மண்ணுக்குப் போகிற உலகத்திலே.... பசிக்குது பசிக்குது தினம்தினம்தான் தின்னா பசி அது தீர்ந்திடுதா'னு சொன்ன பொன்னான தத்துவத்தைக் கவனிச்சா இருப்பீங்க?

வசூல்ராஜா எம்.பி.பி.எஸ் : இந்தப் படத்தில் `சிரிச்சு சிரிச்சி வந்தா' பாட்டுக்கு ஆடின ரகசியாவை ஞாபகம் வெச்சிருப்பீங்கனு தெரியும். ஆனா, `ஓடும் தண்ணியில பாசி இல்லையே... உணர்ச்சியை கொட்டிப்புட்டா நோயும் இல்லையே...',  `உலகம் இன்பத்துக்கு ஏங்கிக்கிடக்கு... ஒழுக்கம் ஊருக்கு ஊர் மாறிக்கிடக்கு. தப்புகள் இல்லையென்றால் தத்துவம் இல்லையடா தத்துவம் பிறக்கட்டுமே தப்பு பண்ணேன்டா'னு சொன்ன அவ்வளவு பெரிய அரசியல் தத்துவத்தைலாம் ஞாபகத்துல வெச்சிருப்பீங்களாங்கிறது தான் இரண்டாயிரம் ரூபாய் கேள்வி.

பாணா காத்தாடி : அதர்வா முதன்முதலாக சினிமாவுக்குள் காத்தாடிவிட்ட இந்தப் படத்தோட அயிட்டம் சாங்கில் ஒரு பாட்டு இருக்கு ஜி. `உள்ளாரப் பூந்து பாரு' பாட்டுக்கு நடுவுல `ஆம்பளைக்கு பொண்ணு அது ஆண்டவன் சட்டம்... ஆளைத் தினம் மாத்து அது அவனவன் இஷ்டம்!'ங்கிற தடாலடி தத்துவத்தைச் சொல்லிட்டு அப்படியே அடுத்த சரணத்துல `ஏழு ஜென்மம் கேட்டு நீ ஏன் பொறக்கணும்... இருக்கிறதை முழுசா நீ அனுபவிக்கணும்!’னு கேட்டு வாங்கிப்போட்டு குத்தி இருக்காங்களே... இதையெல்லாம் நீங்க பார்க்கணும். கண்டிப்பாப் பார்க்கணும்!

- ஜெ.வி.பிரவீன்குமார்