தாமிரபரணி... நதிநீர் இணைப்பில் ₹100 கோடி ஊழல்!

முதன்முதலாகத் தமிழகத்தில் தொடங்கப்பட்ட நதிநீர் இணைப்புத் திட்டம், தாமிரபரணி - கருமேனியாறு - நம்பியாறு இணைப்புத் திட்டம். இதில் பல கோடி ரூபாய் அளவுக்கு முறைகேடு நடந்திருப் பதாக அதிர்ச்சித் தகவல் வெளியாகியுள்ளது.

தமிழ்நாட்டில் உற்பத்தியாகித் தமிழக எல்லைக்குள் ஓடி கடலில் கலப்பதால், அண்டை மாநிலங்களுடன் தண்ணீர்ப் பிரச்னை ஏதுமில்லாத ஆறாகத் தாமிரபரணி விளங்குகிறது. தாமிரபரணியில் ஒவ்வொரு வருடமும் மழைக்காலத்தில் சராசரியாக 15 டி.எம்.சி தண்ணீர் வீணாகக் கடலில் கலக்கிறது. வீணாகும் தண்ணீரைத் தேரிக்காடுகள் பகுதிக்குத் திருப்பிவிட வெள்ளநீர் வடிகால்வாய் வெட்டப்பட்டு, தாமிரபரணி - கருமேனியாறு - நம்பியாறு இணைப்புத் திட்டத்தைச் செயல்படுத்த முடிவு செய்யப்பட்டது. இதன்படி, தாமிரபரணி ஆற்றின் கிளையான கன்னடியன் கால்வாயிருந்து புதிதாகக் கால்வாய் அமைத்து, திசையன்விளை அருகே எம்.எல்.தேரி எனும் கிராமம் வரை, 73 கி.மீ தூரம் நீரைத் தேக்கத் திட்டமிடப்பட்டது. இந்த வெள்ளநீர்க் கால்வாயுடன், மேற்குத் தொடர்ச்சி மலையிலிருந்து உருவாகி நெல்லை, தூத்துக்குடி மாவட்டங்கள் வழியே வரும் நம்பியாறு, கருமேனியாறு, எலுமிச்சையாறு, கோரையாறு, பச்சையாறு உள்ளிட்ட காட்டாறுகளை இணைக்கவும் முடிவு செய்யப்பட்டது.

வெள்ளங்குழி முதல் எம்.எல்.தேரி வரை 3,000 கன அடி தண்ணீர் கொண்டுசெல்லும் அளவுக்கு, கால்வாய் வெட்டும் பணிகளுக்கான திட்ட மதிப்பீடு தயார் செய்யப்பட்டது. இதற்காக, 319 கோடி ரூபாய் ஒதுக்கீடு செய்யப்பட்டு, 2009 பிப்ரவரி 29-ம் தேதி அப்போதைய முதல்வரான கருணாநிதி, திட்டத்தைத் தொடங்கிவைத்தார். இந்தப் பணிகள் நான்கு கட்டங்களாகப் பிரிக்கப்பட்டன. வெள்ளங்குழி - திடியூர் மற்றும் திடியூர் - மூலக்கரைப்பட்டி என்ற இருகட்டப் பணிகள் 39 கி.மீ தூரத்துக்கு முடிக்கப்பட்டன. 2011-ல் ஆட்சி மாற்றம் ஏற்பட்டதும், இந்தப் பணிகளைத் தமிழக அரசு கிடப்பில் போட்டது. இந்தப் பணிகள் நிறைவேறினால் ராதாபுரம், நாங்குநேரி, திருச்செந்தூர் மற்றும் சாத்தான்குளம் வட்டங்களைச் சேர்ந்த விவசாயிகள் பயனடைவார்கள் என்பதால், முன்னாள் எம்.எல்.ஏ-வான அப்பாவு நீதிமன்றத்துக்குச் சென்று போராடி இந்தத் திட்டத்தை மீண்டும் கொண்டுவந்தார். இந்தத் திட்டத்தில் கோடிக்கணக்கில் முறைகேடு நடப்பதாக, இப்போது புகார் கிளம்பியிருக்கிறது.

Do you like the story?

Please Appreciate the Author by clapping!

Editor’s Pick

மாதத்திற்கு 7 எக்ஸ்க்ளுசிவ் கட்டுரைகள் படிக்க லாகின் செய்யுங்கள்அனைத்து எக்ஸ்க்ளுசிவ் கட்டுரைகளையும் படிக்க சந்தா செய்யுங்கள்