என்ன செய்தார் எம்.பி? - பார்த்திபன் (தேனி)

இத்தொடரின் மற்ற பாகங்கள்:
பன்னீருக்குத் தம்பியாக இருக்கிறார்... தொகுதிக்கு எம்.பி-யாக இல்லை!ஓவியம்: கார்த்திகேயன் மேடி

#EnnaSeitharMP
#MyMPsScore

2006 சட்டசபைத் தேர்தலில்  போடிநாயக்கனூர் தொகுதியில் குறைந்த வாக்கு வித்தியாசத்தில் தோற்றுப்போன பார்த்திபனுக்கு, 2014 நாடாளுமன்றத் தேர்தலில் மீண்டும் வாய்ப்பு கொடுத்தார் ஜெயலலிதா. நேர்காணலுக்குச் சென்ற பார்த்திபன், ‘‘கஷ்டத்தில் இருக்கிறேன். அம்மா வாய்ப்பு கொடுத்தாலும், டெபாசிட் கட்டக்கூட என்னிடம் பணம் இல்லை” என ஜெயலலிதாவிடம் சொல்லியிருக்கிறார். உடனே ஓ.பன்னீர்செல்வத்தை அழைத்த ஜெயலலிதா, ‘‘செலவுகளைப் பார்த்துக் கொள்ளுங்கள்’’ என உத்தரவிட்டார். டெபாசிட் கட்டுவது தொடங்கி வெற்றி வரை பன்னீர்செல்வம் கவனித்துக்கொண்டார். அதற்கு நன்றிகாட்டும் விதமாக இன்றுவரை பன்னீர் செல்வத்துக்கு விசுவாசமாக இருக்கும் பார்த்திபன், வாக்களித்த மக்களுக்கு என்ன விசுவாசம் காட்டினார்? 

தேனி சின்னமனூர் அருகே உள்ள கூழையனூர் கிராமத்தைச் சேர்ந்தவர் பார்த்திபன். அப்போது தேனி மாவட்டச் செயலாளராக இருந்த தங்க தமிழ்ச்செல்வன் தன்னிடம் தொடர்ந்து வம்பிழுத்துக் கொண்டிருந்ததால், கள்ளர் சமூகத்திலிருந்து ஒரு விசுவாசி தன் கட்டுப்பாட்டுக்குள் இருக்க வேண்டும் என முடிவுசெய்து, பார்த்திபன் ஜெயிப்பதற்கு அத்தனை உழைப்பையும் கொடுத்தார் பன்னீர். ‘‘ஜெயித்த பிறகு எம்.பி-யாக பார்த்திபன்  மாறினாரா என்பது தெரியாது. ஆனால், பன்னீருக்கு தம்பியாகவே மாறிப்போனார். தொகுதி மேம்பாட்டு நிதி முதல் நாடாளுமன்ற உரை வரையில் பன்னீரிடம் கேட்டுத்தான் செய்வார்’’ என்கிறார்கள் அ.தி.மு.க-வினர். 

விவசாயமும், தோட்டங்களும், பல தொழில்களும் நிறைந்து விளங்கிய தேனி மாவட்டத்தில், எல்லாமே நசிந்துபோனது சமீபத்தில்தான். ‘‘தேனியைச் சுற்றி முன்பு 11 பஞ்சாலைகள் இருந்தன. இப்போது இரண்டு மட்டுமே மூச்சைப் பிடித்துக்கொண்டிருக்கின்றன. பருப்பு மற்றும் எண்ணெய் மில்கள் பல மூடப்பட்டுவிட்டன. இதனால் ஆயிரக்கணக்கான மக்கள் பிழைப்பு தேடி சென்னை, திருப்பூர், கோவை என இடம்பெயர்ந்துள்ளனர். முல்லைப்பெரியாறும், வைகையும் இங்கிருந்து கிளம்பி மதுரை, திண்டுக்கல், சிவகங்கை, ராமநாதபுரம் வரை செல்கிறது. ஆனால், தேனி மாவட்டத்தில் பல இடங்களில் தண்ணீர்ப் பிரச்னை தீர்க்கப்படவில்லை’’ என்றார்கள் விவசாயிகள்.

Do you like the story?

Please Appreciate the Author by clapping!

Editor’s Pick