“கேன்சர், சிறுநீரகப் பாதிப்பால் சாக வேண்டுமா?” - ஆலைக்கு எதிராக கொதிக்கும் கிராம மக்கள்!

சிவகங்கை மாவட்டம் கோவிலூரில் உள்ள தமிழ்நாடு கெமிக்கல் தொழிற்சாலைக் கழிவுகளால் அந்தப் பகுதியில் வசிக்கும் மக்களுக்குப் புற்றுநோய், நுரையீரல் பாதிப்பு, இதயநோய் மற்றும் சிறுநீரகப் பாதிப்புகள் ஏற்படுகின்றன. உடல் குறைபாடுகளுடன் குழந்தைகள் பிறப்பதுடன், கர்ப்பிணிப் பெண்களுக்கு கருச்சிதைவும் ஏற்படுவதால், ஆலையை மூடவேண்டும் என்ற கோரிக்கை வலுத்துவருகிறது.

‘தமிழ்நாடு கெமிக்கல் புராடக்ட்ஸ் லிமிடெட் (டி.சி.பி.எல்)’ சல்பேட் கந்தகம் தயாரிக்கும் ஆலை, காரைக்குடி அருகே கோவிலூர் கிராமத்தில், 1972-ல் அப்போதைய தி.மு.க ஆட்சியில் திறக்கப்பட்டது. இப்போது ராஜசேகரன் என்பவர் குத்தகைக்கு எடுத்து ஆலையை நடத்துகிறார். ஆலையிலிருந்து வெளியேறும் கழிவுகள், நேரடியாக விவசாயக் கண்மாய்களில் விடப்படுகின்றன. கழிவுகளில் இருந்து வெளியாகும் நச்சுப்புகையால்தான் மேற்கண்ட பாதிப்புகள் ஏற்படுகின்றன என்கிறார்கள் மக்கள். இதனால், ஆலையை நிரந்தரமாக இழுத்து மூடுமாறு மக்கள் போராட்டத்தில் இறங்கியுள்ளனர். காரைக்குடி எம்.எல்.ஏ ராமசாமி, முன்னாள் எம்.எல்.ஏ பழ.கருப்பையா மற்றும் பல்வேறு அமைப்புகள் ஒன்று திரண்டு ஆலையை முற்றுகையிடும் போராட்டத்தை, சில மாதங்களுக்கு முன் நடத்தினர். போராட்டத்தில் ஈடுபட்ட மக்களுடன் அதிகாரிகள் நடத்திய பேச்சுவார்த்தையின்படி, டிசம்பர் 21-ம் தேதி, ஆலையைச் சுற்றிலும் 20 இடங்களிலிருந்து மண், தண்ணீர் பரிசோதனைக்காக எடுத்துச் செல்லப்பட்டுள்ளன.

Do you like the story?

Please Appreciate the Author by clapping!

Editor’s Pick