நோபல் 2020

கொரோனவால் மொத்த உலகமும் முடங்கிக்கிடக்கும் இந்தச் சூழலில் மருத்துவத்துறையில் எந்த ஆய்வுக்கு நோபல் வழங்கப்படப்போகிறது என்ற கேள்வி பலரிடத்திலும் இருந்தது. இந்நிலையில் ‘ஹெப்படைட்டிஸ் சி’ வைரஸைக் கண்டறிந்ததற்காக அமெரிக்காவைச் சேர்ந்த ஆராய்ச்சியாளர்கள் ஹார்வீ ஜெ.ஆல்டர், சார்லஸ் எம்.ரைஸ் மற்றும் பிரிட்டிஷைச் சேர்ந்த ஆராய்ச்சியாளர் மைக்கேல் ஹாட்டன் ஆகியோருக்கு உடலியல் அல்லது மருத்துவப் பிரிவில் இந்த ஆண்டுக்கான நோபல் விருது அறிவிக்கப்பட்டுள்ளது.

இந்த ஒரு கண்டுபிடிப்பு மட்டும் பல லட்சம் உயிர்களைக் காப்பாற்றியிருப்பதாக நோபல் கமிட்டி இவர்களைப் பாராட்டியிருக்கிறது. சிரோசிஸ் மற்றும் கல்லீரல் புற்றுநோயை ஏற்படுத்தும் இந்த வைரஸைக் கண்டறிவதற்கு முன் ஹெப்படைட்டிஸ் ஏ, ஹெப்படைட்டிஸ் பி மட்டுமே கண்டறியப்பட்டிருந்தன. இதனால் ஹெப்படைட்டிஸ் நோயாளிகளில் பலருக்கும் ஏற்பட்ட மாறுபட்ட பாதிப்புகளுக்கு விடை தெரியாமல் மருத்துவர்கள் தவித்தனர். ‘ஹெப்படைட்டிஸ் சி’ என வேறு குணம் கொண்ட ஹெப்படைட்டிஸ் வைரஸ் ஒன்று கண்டுபிடிக்கப்பட்டதால்தான் அவை உருவாக்கும் நோய்களைக் கண்டறிவதற்கான ரத்தப் பரிசோதனை, புதிய மருந்துகள் கண்டுபிடிப்பதற்கான சாத்தியக்கூறுகள் உருவாகின.

இயற்பியலுக்கான இந்த வருட நோபல் பரிசு கருந்துளைகள் (black holes) பற்றிய ஆராய்ச்சியை மேற்கொண்ட மூன்று ஆராய்ச்சியாளர்களுக்கு அறிவிக்கப்பட்டிருக்கிறது. பரிசின் ஒரு பாதி ஆராய்ச்சியாளர் ரோஜர் பென்ரோஸுக்கும் மற்றொரு பாதி ரெய்ன்ஹார்டு கென்ஸல், ஆன்ட்ரியா கெஸ் ஆகிய ஆராய்ச்சியாளர்களுக்கும் அறிவிக்கப்பட்டிருக்கிறது. இதில் ரோஜர் பென்ரோஸ், ஆல்பர்ட் ஐன்ஸ்டீனின் பொதுச் சார்பியல் கோட்பாட்டின் (General Theory of Relativity) அடிப்படையில் கருந்துளைகள் உருவாகும் விதம் குறித்த ஆராய்ச்சியை முன்னெடுத்தவர். இவர் ஸ்டீபன் ஹாக்கிங்ஸுடன் இணைந்து கருந்துளைகள் பற்றிய ஆய்வுகளையும் மேற்கொண்டவர்.

ரெய்ன்ஹார்டு கென்ஸல் மற்றும் ஆன்ட்ரியா கெஸ் இருவரும் தங்கள் குழுக்கள் மூலமாக நமது பால்வீதி மண்டலத்தின் (Milky Way) மையப்பகுதி குறித்த ஆராய்ச்சியை மேற்கொண்டனர். இந்த ஆராய்ச்சியின் முடிவில் நமது பால்வீதி மண்டலத்தின் நடுவே பெரும் கருந்துளை ஒன்றுதான் இருக்கிறது என்பது உறுதிசெய்யப்பட்டது.

ஆல்பர்ட் ஐன்ஸ்டீன், நோபல் விருதை வென்ற நூற்றாண்டு நெருங்கும் இந்த நேரத்தில் அவரின் ‘பொதுச் சார்பியல் கோட்பாடு’ குறித்த ஆய்வுகள் இந்த ஆண்டு விருதை வென்றுள்ளன. ஆனாலும் ஐன்ஸ்டீனுக்குக் கருந்துளை இருப்பதற்கான சாத்தியக்கூறுகள் குறித்து சந்தேகங்கள் இருந்தன. ‘ஐன்ஸ்டீன் சரிதான்!’ என மீண்டும் ஒரு முறை நிரூபித்த ஆராய்ச்சிகள் இவை.

வேதியியல் நோபல் பரிசு மரபணு மாற்றம் தொடர்பான ஆய்வுகளை மேற்கொண்ட இம்மானுவேல் சார்பென்டிர் மற்றும் ஜெனிஃபர் ஏ.டூட்னா ஆகிய இருவருக்கும் இந்த ஆண்டு விருது பகிர்ந்து வழங்கப்பட்டுள்ளது.

தேவையற்ற துணியைச் சாதாரணக் கத்தரிக்கோலை வைத்து வெட்டி நீக்குவதுபோல பிரச்னைக்குரிய மரபணுத் தகவல்களை மட்டும் துண்டிக்க உதவும் ‘CRISPR/Cas9’ என்னும் மரபணுக் கத்தரியை உருவாக்கியதற்காக இவர்கள் இருவருக்கும் இந்த ஆண்டு பரிசு அறிவிக்கப்பட்டுள்ளது. இவர்களின் ஆய்வின் உதவியுடன் மரபணுக்களில் திருத்தம் செய்வது என்பது எப்போதையும்விட எளிதானதாகவும் துல்லியமானதாகவும் மாறியிருக்கிறது.

பிரான்ஸில் பிறந்த இம்மானுவேல் சார்பென்டிர் மேற்கொண்ட ஆய்வில் ‘tracrRNA’ என்ற பாக்டீரியாவின் நோய் எதிர்ப்பு மண்டலத்தின் முக்கிய மூலக்கூறு ஒன்றைக் கண்டறிந்தார். RNA மூலக்கூறு ஆய்வில் திறன் வாய்ந்த ஜெனிஃபர் ஏ.டூட்னா உடன் இணைந்து இவர் மேற்கொண்ட ஆய்வில் பாக்டீரியாக்களின் மரபணுக் கத்தரியை சோதனைக்கூடத்தில் செயற்கையான முறையில் உருவாக்கினார்கள். புற்றுநோய்க்கு எதிரான மருத்துவச் சிகிச்சை முறைகளை மேற்கொள்வதிலும், மரபு ரீதியான குறைபாடுகளைக் கண்டறிந்து அவற்றைக் களைய உதவும் சிகிச்சை முறைகளுக்கும் இவர்களுடைய ஆய்வு அடித்தளம் அமைத்துத் தந்திருக்கிறது.

இம்முறை அமைதிக்கான நோபல் பரிசு குறிப்பிட்ட மனிதர் ஒருவருக்கு வழங்கப்படவில்லை. மாறாக, ‘உலக உணவுத் திட்டம் (World Food Programme-WFP)’ என்ற அமைப்புக்கு வழங்கப்படுவதாக அறிவிக்கப்பட்டுள்ளது.

1962-ல் ஈரானில் ஏற்பட்ட பூகம்பம் மற்றும் அதைத் தொடர்ந்து அக்டோபரில் தாய்லாந்தில் ஏற்பட்ட புயல், அல்ஜீரியாவில் 50 லட்சத்திற்கும் மேற்பட்ட அகதிகள் சிக்கித்தவித்தது எனப் பல உலகப் பிரச்னைகளைக் கருத்தில் கொண்டு 1963-ம் ஆண்டு ஐக்கிய நாடுகள் (UN) அமைப்பால் இந்த உலக உணவுத்திட்டமானது நிறுவப்பட்டது. இத்தாலியின் ரோம் நகரைத் தலைமையகமாகக் கொண்டு செயல்பட்டுவரும் இந்த அமைப்பு நிலநடுக்கம், சுனாமி போன்ற இக்கட்டான காலகட்டங்களில் பாதிக்கப்பட்ட கோடிக்கணக்கான மக்களுக்கு உணவளித்துவருகிறது.

ஆண்டுதோறும் பட்டினியால் வாடி வதங்கும் 83 நாடுகளில் உள்ள 9.1 கோடி மக்களுக்கு உணவளித்துவரும் இந்த அமைப்பு இப்போது கொரோனாவிலும் மக்கள் பசி ஆற்றுவதில் மிக முக்கியப் பங்காற்றிவருகிறது.

இந்த ஆண்டின்‌ இலக்கியத்திற்கான நோபல் பரிசைப் பெறப்போகிறவர் லூயி க்ளூக் என்னும் ஆங்கிலக் கவிஞர். 77 வயதான லூயி க்ளூக் தற்போது அமெரிக்காவில் இருக்கும் மிக முக்கிய கவிஞர்களுள் ஒருவர். 1968-ல் வந்த First born என்ற முதல் கவிதைத் தொகுப்பில் தொடங்கி ஐந்து தசாப்தங்களாக இயங்கிக்கொண்டிருக்கிறார். இதுவரை 12 கவிதைத் தொகுப்புகளை வெளியிட்டுள்ளார். Pulitzer Prize உட்பட பல்வேறு பெரிய விருதுகளையும் பெற்றுள்ளார்.

காதல், இழப்பு, உறவு, துரோகம், மரணம் போன்ற தனிமனித வாழ்வின் முக்கிய நிகழ்வுகளைப் பற்றியதாகத்தான் இவரது பெரும்பாலான கவிதைகள் அமைந்திருக்கின்றன. ஆழமான உணர்வுகளை மக்களுக்கு எளிதில் கடத்திவிடுவது இவரது எழுத்தின் ஜாலம்.

“for her unmistakable poetic voice that with austere beauty makes individual existence universal” என்று பாராட்டி அவருக்கு இந்த விருதை அறிவித்திருக்கிறது நோபல் கமிட்டி. சிறு வயதிலிருந்தே அனோரெக்ஸியா என்ற, உணவு உண்பதில் குறைபாட்டை ஏற்படுத்தும் மன நோயால் பாதிக்கப்பட்டிருந்தவர் லூயி க்ளூக். அதற்காகத் தொடர்ந்து ஏழு வருடங்கள் உளவியல் சிகிச்சை எடுத்துக்கொண்டார். இதனால் பட்டம் பெறுவதற்கு முன்பே இடைநின்றார். தனக்கு எழுத்து என்பது தனது சூழலையும் துரதிர்ஷ்டத்தையும் வலியையும் பழிவாங்கும் வாய்ப்பு என்று லூயி க்ளூக் சொல்வார்.

பொருளாதாரப் பிரிவில் இந்த ஆண்டுக்கான நோபல் பரிசு பால் மில்குரோம் மற்றும் ராபர்ட் வில்சன் ஆகிய இருவருக்கு அறிவிக்கப்பட்டிருக்கிறது. ஏலக் கோட்பாட்டில் கொண்டுவந்த முன்னேற்றத்திற்காகவும் புதிய ஏல முறைகளை வடிவமைத்ததற்காகவும் இந்தப் பரிசு அவர்களுக்கு வழங்கப்படவிருக்கிறது. ஏல முறையின் வெற்றிக்குக் காரணம் என்ன, ஏலம் கேட்பவரின் குணநலன்கள் எப்படியானது என ஆராய்ந்து மேம்பட்ட ஏலக் கோட்பாட்டை இவர்கள் நிறுவினர்.

இவர்களால் உருவாக்கப்பட்ட ஏல முறைகள் பரவலாகப் பயன்படுத்தப்பட்டுவருகின்றன. 1994-ல் இவர்கள் வடிவமைத்த முறையில் அமெரிக்காவின் மத்திய தொலைத்தொடர்பு ஆணையம்(FCC) நடத்திய ஸ்பெக்ட்ரம் ஏலம்தான் வரலாற்றிலேயே மிகச்சிறந்த ஏலம் எனப் பலரும் எடுத்துக்காட்டுவார்கள்.

விருது கொடுக்கப்படும் தகவலைச் சொல்லப் பால் மில்குரோம்மைத் தொடர்புகொள்ள முடியாமல் தவித்தது நோபல் கமிட்டி. இந்த விருதை அவருடன் பகிர்ந்துகொள்ளும் ராபர்ட் வில்சன் அருகில் வசிப்பவர்தான் என்பதால் நேராக நடு இரவில் பாலின் வீட்டுக்கே சென்று தகவலைச் சொல்லியிருக்கிறார். இந்த நிகழ்வு முழுவதும் டோர் கேமராவில் பதிவாகியிருக்கிறது. இந்த வீடியோ செம வைரல்.

இம்முறை கொரோனா காரணத்தால் வீடுகளிலிருந்தபடியே விருதுகளை ஏற்கவுள்ளனர் விருதாளர்கள்.