Published:Updated:

மார்பகப் புற்றுநோய் - அவசியம் அறிய வேண்டிய தகவல்கள்!

மார்பகப் புற்றுநோய்
பிரீமியம் ஸ்டோரி
மார்பகப் புற்றுநோய்

விழிப்புணர்வு

மார்பகப் புற்றுநோய் - அவசியம் அறிய வேண்டிய தகவல்கள்!

விழிப்புணர்வு

Published:Updated:
மார்பகப் புற்றுநோய்
பிரீமியம் ஸ்டோரி
மார்பகப் புற்றுநோய்
உலக சுகாதார நிறுவனத்தின் அறிவுறுத்தலின் பேரில் உலகமெங்கும் அக்டோபர் மாதம் மார்பகப் புற்றுநோய் விழிப்புணர்வு மாதமாகக் கடைப்பிடிக்கப்படுகிறது. பரிசோதனை முதல் சிகிச்சை வரை, மார்பகப் புற்றுநோய் பற்றிய விழிப்புணர்வுத் தகவல்களை வழங்குகிறார் மதுரையைச் சேர்ந்த புற்றுநோய் அறுவை சிகிச்சை நிபுணர் டாக்டர் எஸ். அழகு கணேஷ்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

சுய பரிசோதனை

‘`புற்றுநோய்களில், சுய பரிசோதனை மூலம் ஆரம்பநிலையிலேயே கண்டுபிடிக்கக்கூடியது மார்பகப்புற்று. சுய பரிசோதனைக்கு மாதம் ஒரு நாள், 15 நிமிடங்கள் ஒதுக்கினால் போதும். 20 வயதுக்கு மேற்பட்ட பெண்கள் அனைவரும் மாதவிடாய் முடிந்தவுடன் செய்யலாம். கர்ப்பப்பை அகற்றியவர்கள், மாதவிடாய் முற்றுப்பெற்றவர்கள், மாதத்தில் ஏதாவது ஒரு குறிப்பிட்ட நாளில் செய்யலாம். பாலூட்டும் தாய்மார்கள் மாதம் ஒருமுறை, பாலூட்டிய பின் செய்யலாம்.

முதல் நிலை - பார்த்து அறிதல்

ஆடைகளைக் களைந்து, கண்ணாடியின் முன் நிற்கவும். கைகள் உடம்பை ஒட்டி இருக்க வேண்டும். ஒரு மார்பகத்தைவிட மற்றொன்று பெரியதாக இருப்பது இயல்பே. மார்பக வடிவம் தட்டையாகவோ வேறு மாற்றங்களோ உள்ளதா எனக் காணவும். மார்பகத்தில் மாற்றம், தோலில் அரிப்பு, எரிச்சல், காம்புப்பகுதி உள்வாங்கியிருப்பது, காம்புப் பகுதியிலிருந்து திரவம், ரத்தம், சீழ் வடிதல் என ஏதாவது இருக்கிறதா எனப் பார்க்கவும். இரண்டு கைகளையும் மேலே உயர்த்தி நேராகவும் பக்கவாட்டிலும் கண்ணாடியில் காணவும். பின்பு கைகளை இடுப்பில் வைத்துக்கொண்டு மேலே குறிப்பிட்ட அனைத்தையும் மீண்டும் சரிபார்க்கவும்.

மார்பகப் புற்றுநோய் - அவசியம் அறிய வேண்டிய தகவல்கள்!

அடுத்த நிலை - உணர்ந்து அறிதல்

இந்தப் பரிசோதனையை படுத்த நிலையிலும், பின்பு நின்ற நிலையிலும் செய்யவும். ஒரு பக்கமாகச் சாய்ந்து படுத்துக்கொண்டு தோள்பட்டையின் கீழ் தலையணையை வைத்துக்கொண்டு ஒரு கையால் தலையைத் தாங்கிப் பிடிக்கவும். பெருவிரல் தவிர்த்து மற்ற நான்கு விரல் நுனிகளையும் சேர்த்து மார்பகத்தையும், அக்குள் பகுதியையும் சோதித்துவிட்டு, காம்பை அழுத்திப் (Squeeze) பார்க்கவும்.

விரல்கள் சோதனை... மூன்று வகை

விரல்களை வைத்து மூன்று வகைகளில் பரிசோதிக்கலாம். உங்களுக்குத் தோதான முறையைப் பின்பற்றவும். இவற்றை, குளிக்கும்போது சோப்பு நுரையுள்ள கையுடன் செய்தால் எளிதாக இருக்கும். கண்டிப்பாகப் பெருவிரலுக்கும் மற்ற நான்கு விரலுக்கும் இடையே மார்பகத்தை அழுத்திப்பார்க்கக் கூடாது. அவ்வாறு பார்த்தால் கட்டி இருப்பதுபோல்தான் தோன்றும். விரல்களின் நுனிகளை மட்டுமே பயன்படுத்தி, அழுத்தமாகவும் மென்மையாகவும் செய்ய வேண்டும் .

மார்பகப் புற்றுநோய் - அவசியம் அறிய வேண்டிய தகவல்கள்!

1. வட்ட முறை (Circular method): காம்புப் பகுதியில் ஆரம்பித்து அக்குள்வரை, விரல்களை வைத்து வட்ட வடிவில் அழுத்தம் கொடுக்க வேண்டும்.

2. கோடு முறை (Line method): அக்குள் பகுதியிலிருந்து கீழ்நோக்கி மார்பகத்தின் கீழ்ப்பகுதி வரை நேர்கோட்டிலும், பின் அதேபோல் கீழிருந்து மேலாகவும், இவ்வாறு முழு மார்பகத்தையும் நெஞ்சக எலும்புவரை பரிசோதிக்க வேண்டும்.

3. ஆப்பு முறை (Wedge method): நின்றபடி, மார்பக வெளிவட்டத்தின் ஒரு புள்ளியிலிருந்து ஆரம்பித்து, காம்பை நோக்கி அழுத்த வேண்டும், பின்னர் ‘v’ வடிவில் மார்பக வெளிவட்டப் புள்ளியை நோக்கி நகர வேண்டும். அங்கிருந்து மீண்டும் ‘v’ வடிவில் காம்பை நோக்கி அழுத்த வேண்டும். இவ்வாறு மார்பகம் முழுமைக்கும் செய்ய வேண்டும்.

Source: Globocan 2018, BreastCancerIndia.net
Source: Globocan 2018, BreastCancerIndia.net

கட்டியா, இல்லையா?

சுயபரிசோதனையின்போது கட்டிபோல ஏதேனும் தென்பட்டால் மருத்துவ ஆலோசனை பெற வேண்டும். அனைத்து கட்டிகளும் புற்று அல்ல. குறிப்பாக, கட்டி மிருதுவாகவும் நகர்வதாகவும் இருந்தால் அது புற்று அல்ல. 80 சதவிகிதம் கட்டிகள் புற்றுநோய்க் கட்டிகள் அல்ல என்பது குறிப்பிடத்தக்கது. கட்டி கடினமாகவும், நகர முடியாமலும் இருந்தால் புற்றாக இருக்க வாய்ப்பு அதிகம். ஆரம்ப நிலையில் புற்று கட்டியில் வலி இருக்காது என்பதால் அஜாக்கிரதையாக இருக்க வேண்டாம்.

பரிசோதனைகள், சிகிச்சைகள்

புற்றுநோயைக் கண்டறிய, 40 வயதுக்கு உட்பட்டவர்கள் அல்ட்ராசவுண்ட் பரிசோதனை செய்யலாம். 40 வயதுக்கு மேற்பட்டவர்கள் வருடம் ஒருமுறை மேமோ கிராம் பரிசோதனை மேற்கொள்ள வேண்டும். சுய பரிசோதனையில் கட்டி தட்டுப்படுவதற்கு இரண்டு ஆண்டு களுக்கு முன்பே மேமோகிராமில் கண்டு பிடித்துவிடலாம் என்பது குறிப்பிடத்தக்கது. நோய் உறுதி செய்யப்பட்டால், அது எந்த நிலையில் உள்ளது என்பதை அறிவதற்கான பரிசோதனைகளைச் செய்ய வேண்டும்.

குடும்பத்தில் யாரேனும் மார்பகப் புற்றுநோயால் பாதிக்கப்பட்டிருந்தால், அவர் எந்த வயதில் பாதிப்படைந்தாரோ, அதற்கு 10 வருடங்களுக்கு முன்னதாக அந்த நபரின் குடும்பத்துப் பெண்கள் பரிசோதனைகளை மேற்கொள்ள வேண்டியது அவசியம்.

 எஸ்.அழகு கணேஷ்
எஸ்.அழகு கணேஷ்

மார்பகப் புற்றுநோய்க்கான சிகிச்சை அறுவைசிகிச்சை, ரேடியோதெரபி, மருந்துகள் (கீமோ தெரபி) என்று மூன்று வகையாக வழங்கப்படுகிறது. முதல் இரண்டு நிலைகளில் கண்டுபிடித்துவிட்டால், மார்பகத்தை நீக்கத் தேவையிருக்காது, கட்டியை மட்டும் அகற்றினால் போதும். மூன்றாம் நிலையில் கண்டுபிடித்தால், முதலில் புற்றுநோய்க் கட்டியின் அளவை மருந்துகள் மூலம் குறைத்துவிட்டு, பின்பு அறுவைசிகிச்சை மற்றும் ரேடியோதெரபி கொடுக்க வேண்டும்.

கடைசி நிலையில், அறிகுறிகளைக் குறைக்க மட்டுமே சிகிச்சை அளிக்க முடியும். எனவே தான், மார்கப்புற்றை பொறுத்தவரை விழிப்புணர்வுடன் இருப்பதும் விரைந்து மருத்துவ ஆலோசனை பெறுவதும் வலியுறுத்தப்படுகிறது.’’

நலம் பேணுவோம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

புற்றுநோயைத் தவிர்க்க!

புகை, மதுப் பழக்கத்தை தவிர்ப்பது, ஹார்மோன் சிகிச்சையின் கால அளவு மற்றும் மருந்தின் அளவைக் குறைத்துக்கொள்வது, ஊடு கதிர்வீச்சிலிருந்து பாதுகாப்புக்கொள்வது, தவறாது பாலூட்டுவது, சுறுசுறுப்பாக இருப்பதுடன் அதிகம் கொழுப்புள்ள உணவுப் பொருள்களைத் தவிர்ப்பது போன்றவை மார்பகப் புற்றைத் தவிர்க்க உதவும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism