Published:Updated:

உறவுகள் உணர்வுகள் - ரேவதி சண்முகம்

உறவுகள் உணர்வுகள் - ரேவதி சண்முகம்
பிரீமியம் ஸ்டோரி
உறவுகள் உணர்வுகள் - ரேவதி சண்முகம்

குடும்ப ஒற்றுமைக்கு ஒரு வழிகாட்டி!மனஸ்வினி

உறவுகள் உணர்வுகள் - ரேவதி சண்முகம்

குடும்ப ஒற்றுமைக்கு ஒரு வழிகாட்டி!மனஸ்வினி

Published:Updated:
உறவுகள் உணர்வுகள் - ரேவதி சண்முகம்
பிரீமியம் ஸ்டோரி
உறவுகள் உணர்வுகள் - ரேவதி சண்முகம்

வீட்டுக்குள் இருப்பவர்களிடமே வாட்ஸ்அப்பில் தகவல் பரிமாறிக்கொள்கிற, நல்ல நாள் கிழமைகளில்கூட புதுப்படங்களை நோக்கி மல்ட்டிப்ளெக்ஸுகளுக்கு ஓடுகிற தலைமுறையில் வாழ்ந்துகொண்டிருக்கிறோம்.

அம்மா, அப்பாவை மம்மி, டாடி... உறவினரோ, அந்நியரோ அனைவரையும் ஆன்ட்டி, அங்கிள்... அண்ணனையும் அக்காவையும் ப்ரோ, சிஸ்ஸி... நவீனம் என்கிற பெயரில் நமக்கு நாமே சுருக்கிக்கொண்டவை உறவுமுறைகளை மட்டுமில்லை; உறவுகளையும்தான். அடுத்த தலைமுறைகள் அச்சம் தருகிற வேளையில் உலகமே அப்படியெல்லாம் மாறிவிடாது என நம்பிக்கை

தருகிறது ஒரு குடும்பம். ‘நல்லதொரு குடும்பம்... பல்கலைக்கழகம்’ என்கிற கண்ணதாசனின் வரிகளை வாழ்ந்துகாட்டி மெய்ப்பித்துக் கொண்டிருக்கிறார்கள் அவரின் உறவுகள்.

உறவுகள் உணர்வுகள் - ரேவதி சண்முகம்

கண்ணதாசனின் மூத்த மகளும் சமையல் கலை நிபுணருமான ரேவதி சண்முகத்தின் வீடு, விக்ரமன் பட செட் போல இருக்கிறது. வீடு கொள்ளாத மனிதர்கள்... உறவினர்களிடம் மட்டுமல்ல; வேலையாட்கள், வீட்டில் வளர்கிற செல்லப் பிராணிகள், வீட்டுக்கு வந்து போகிறவர்கள் என எல்லோரிடமும் ஒரேமாதிரியான அன்பைப் பரிமாறுகிற ரேவதி சண்முகம் உறவுகளின் மேன்மை பற்றிப் பேசுகிறார்.

‘`இந்த அன்பும் அந்நியோன்யமும் அம்மாவும் அப்பாவும் எங்களுக்குக் கத்துக்கொடுத்தது. பணம், காசு, பேர், புகழ் எதை விடவும் சிறந்தது உறவுகள்னு வாழ்ந்து காட்டி எங்களுக்கு உணர்த்தினவங்க அம்மா, அப்பா. கண்ணதாசன் குடும்பத்துக்குப் பெருமை சேர்க்கிற விஷயமும் இந்த உறவுகள்தான்...’’ - அதிராத குரலில் அன்பொழுகப் பேசுகிறார் ரேவதி.

‘`காந்தி கண்ணதாசன், கமல் கண்ணதாசன், அண்ணாதுரை கண்ணதாசன்னு எனக்கு மூணு அண்ணன்கள். எனக்கடுத்த தம்பி ஸ்ரீனிவாசன் கண்ணதாசன், அவருக்கு அடுத்து தங்கச்சி கலைச்செல்வி, கடைசி தம்பி கோபி கண்ணதாசன்னு அம்மாவுக்கு நாங்க ஏழு பேர். பெரியம்மாவுக்கும் (அப்பாவின் முதல் மனைவி) ஏழு பிள்ளைங்க.

பெரியம்மா  குடும்பமும் நாங்களும் ஒண்ணாதான் இருந்தோம். வீடு எப்போதும் கல்யாணக் களையோடும் பரபரப்போடும்தான் இருக்கும். எந்த சொந்தக்காரங்க வீட்டுல எந்த நல்ல காரியம் பேசறதானாலும் எங்க வீட்டுல அப்பா முன்னிலையில்தான் நடக்கும். கொண்டாட்டங்களுக்குக் குறைவே இருந்ததில்லை.

ஒட்டுமொத்த விகடனுக்கும் ஒரே ஷார்ட்கட்!

உறவுகள் உணர்வுகள் - ரேவதி சண்முகம்

அப்பா பக்கத்து உறவுகள் இன்னிக் கும் அம்மாவைக் கொண்டாடுவாங்க. அம்மா வீட்டுச் சொந்தங்களோ, அவங்களை தேவதைனு சொல்வாங்க. அம்மா நிஜமான தேவதைதான். வசதியோ வறுமையோ எங்க வளர்ப்பை எந்த வகையிலயும் பாதிச்சதில்லை. தன் குழந்தை பட்டுப்பாவாடையும், இன்னொரு குழந்தை காட்டன் பாவாடையும் கட்டிக்கிறதை அம்மா அனுமதிச்சதில்லை. எல்லாக் குழந்தைகளையும் தன் குழந்தையா பாவிப்பாங்க. யார் வீட்டுலயும் எந்த விசேஷத்தையும் அம்மா விட்டுக்கொடுக்க மாட்டாங்க. அந்தப் பழக்கம்தான் இன்னிக்கு எங்க வீடுகளிலும் தொடருது. யார் வீட்டுல கல்யாணம், விசேஷம்னாலும் நாங்க அத்தனை பேரும் ஒண்ணா கூடுவோம்.  ‘உங்க வீட்டுல மட்டும் எப்படி சண்டையே வராம எல்லாரும் ஒண்ணா வாறீங்க’னு கேட்காத ஆளே இல்லை. கல்யாணம் முடிச்சதும் வீட்டுப் பெண்ணுக்கோ, பையனுக்கோ விருந்து கொடுக்கும்போதும் எல்லாரும் ஒண்ணா சேர்ந்து, ஆளுக்கு ரெண்டு அயிட்டம் சமைச்சு எடுத்துட்டு வந்துதான் விருந்து வைப்போம். நியூ இயர் அன்னிக்கும் தவறாம கெட் டுகெதர் நடக்கும்...’’ - இன்றுவரை தொடரும் வழக்கம் சொல்கிறவர் தன் கணவர் சண்முகம், மகன் பாலசுப்ரமணியன், மருமகள் வித்யா, ஒரே பேரன் தருண் பாலசுப்ரமணியன் ஆகியோ ருடன் ஒரே வீட்டில்தான் வசிக்கிறார்.

‘`மருமகளுக்கும் எனக்கும் கருத்து வேறுபாடுகள் இல்லாம இருந்ததில்லை.  ஆனா, அது ஒருநாளும் சண்டையா வளர்ந்ததில்லை. அதுவும் எங்கம்மா கத்துக்கொடுத்த பாடம்தான். நாலு மருமகள்கள் வரும்வரை எங்கம்மா உயிரோடு இருந்தாங்க, அம்மா எந்த மருமகள்கிட்டயும் எதைப் பத்தியும் முகத்துக்கு நேரா கேட்டுடுவாங்க. அந்த நிமிஷத்தோடு அந்தப் பிரச்னை முடிஞ்சிடும். எங்கம்மா எல்லா மருமகள்களுக்கும் ஒரு தோழியாதான் இருந்தாங்களே தவிர மாமியாரா நடந்துக்கிட்டதில்லை. அதையேதான் நானும் ஃபாலோ பண்றேன். மருமகளைப் பத்தி மகன்கிட்ட புகார் பண்ற பழக்கமே எங்க வீடுகள்ல கிடையாது. மகள் சிவகாமசுந்தரி, மாப்பிள்ளை சிவக்குமார் பொன்னம்பலம், பேத்தி சாய்தன்யா மூணு பேரும் துபாய்ல இருக்காங்க.  என் மருமகளைப் போலவே மகளுக்கும் மாமியார் மேல அன்பும் மரியாதையும் அதிகம்...’’ - ரேவதி சண்முகத்தின் வார்த்தைகள் மாமியார்களுக்கும் மருமகள் களுக்குமானவை.

உறவுகள் உணர்வுகள் - ரேவதி சண்முகம்

``சில நாள்களுக்கு முன்னாடி அம்மா வீட்டுச் சொந்தங்கள் எல்லாரையும் கூப்பிட்டு ஒருநாள் சந்திப்புக்கு ஏற்பாடு செய்தேன். யாருக்கு யார் என்ன உறவுனு தெரியாதவங்களுக்கு, உறவுகளை அறிமுகப் படுத்தி வைக்கிற வாய்ப்பா இருந்தது அந்தச் சந்திப்பு. அடுத்து அப்பா வீட்டு உறவுகளையும் கூப்பிட்டு அதேமாதிரியானதொரு சந்திப்புக்கு ஏற்பாடு செய்யற ஆசை இருக்கு.

இப்பல்லாம் பெரும்பாலும் தனிக்குடித் தனங்கள்தான். ஒற்றைக்குழந்தையா வளருதுங்க. துபாயில் வளரும் என் பேத்தியும் அப்படித்தான். அவங்க குடும்பத்தோடு இந்தியா வரும்போது முடிஞ்சளவுக்கு எல்லா சொந்தங்களையும் கூப்பிட்டு என் பேத்திக்கு அறிமுகப்படுத்துவேன். எங்களுடைய மூணாவது தலைமுறையைச் சேர்ந்தவங்க நாங்க எதிர்பார்க்காத அளவுக்கு அன்போடும் பாசத்தோடும் பழகறதைப் பார்க்கறபோது பெருமையா இருக்கு. எங்க காலத்துக்குப் பிறகும் அம்மா அப்பா பேரைச் சொல்ல இந்தக் குடும்ப விருட்சம் பெரிசா வளரும்கிற நம்பிக்கையும் இருக்கு...’’ - வழிகிற கண்ணீரைத் துடைத்தபடி வாஞ்சையோடு முடிக்கிற ரேவதி குடும்பத்தாருக்கு திருஷ்டி சுற்ற வேண்டும் கட்டாயம்.

உறவுகள் உன்னதமாகட்டும்!

உறவுகள் சிறக்க ரேவதி சண்முகம் தரும் டிப்ஸ்

சின்னக் குழந்தைகளிடம் வம்பு பேசறதைத் தவிர்க்க வேண்டும். ‘பாட்டி என்னைப் பத்தி என்ன சொன்னாங்க.... அத்தை என்ன பேசிக்கிட்டாங்க’ என்றெல்லாம் விசாரிப்பதுதான் பிரச்னையின் ஆரம்பம். ‘அம்மா... அவங்க என்ன சொன்னாங்க தெரியுமா?’ என நாங்க எதையாவது பேச ஆரம்பிச்சாலே, அம்மா, ‘முதல்ல உன் வேலையைப் பாரு. உன் வயசுக்கான விஷயத்தை மட்டும் செய்...’னு அடக்கிடுவாங்க. அதனால நாங்க எல்லாரும் குழந்தைப் பருவத்தைத் தொலைக்காம வளர்ந்தோம். யாரைப் பத்தியும் யார்கிட்டயும் கோள் மூட்ட வாய்ப்பில்லாததால எல்லோருடைய அன்பும் எங்களுக்குக் கிடைச்சது.

உறவினர் வீடுகளுக்குப் போகும் பழக்கம் இன்று அறவே இல்லை. கல்யாணமோ, காதுகுத்தலோ... இரண்டு நாள்கள் முன்னாடியே உறவினர் வீடுகளுக்கு வந்து எல்லோரும் சேர்ந்து வேலை பார்த்த பழக்கமும் காணாமப் போயிடுச்சு. முதல் நாள் ராத்திரி ரிசப்ஷனுக்கு வந்துட்டு, காலையில் கல்யாணம் முடிஞ்ச கையோடு கிளம்பிடறாங்க.

எல்லா நல்லது கெட்டதுகளிலும் சொந்தக்காரங்க ஒன்று கூடணும். அடிக்கடி பேசிக்கணும்... சந்திக்கணும்.

ஒவ்வோர் உறவையும் அந்தந்தப் பெயர் சொல்லி அழைக்கப் பழக்கணும். ஆங்கிலம் தவிர்க்கிறது இன்னும் சிறப்பு.

‘குடும்பம்னா பிரச்னைகள் இருக்கத்தான் செய்யும். செத்தாகூட சண்டை போட்டுக்கிட்டு பிணமா என் வீட்டுக்கு வந்துடாதே... வாழ்ந்தா சந்தோஷமா வாழணும்’னு  சொல்வாங்க எங்கம்மா. இன்னிக்குப் பிள்ளைங்களுக்கு மட்டுமில்லை, பெற்றோருக்கும் சகிப்புத்தன்மை இல்லாமப் போயிடுச்சு. சின்ன பிரச்னையா இருந்தாகூட ‘வாழ்ந்தது போதும். விட்டுட்டு வந்துடு’னு அட்வைஸ் பண்றாங்க. இந்த விஷயத்துல பெற்றோரும் பிள்ளைகளும் ரொம்பவே மாறணும்.