"நாங்க 2012 பேட்ஜ் மாணவர்கள். கல்லூரி கடைசி ஆண்டுல ஓர் ஆதரவற்றோர் இல்லத்துக்காக போகவேண்டிய சூழல் இருந்தது. அப்போ 97 - 98 பேட்ஜ் மாணவர்களுடைய சந்திப்பு நடந்துச்சு. அதுல அவுங்க சொன்னது இன்னும் என் மனசுல இருக்குது. எப்படியும் நாம எல்லாம் காலேஜ் முடிச்சு திரும்ப வருஷத்துக்கு ஒரு தடவ சந்திக்கத்தான் போறோம். அது பெரிய பெரிய ஹோட்டல்கள், தேவையில்லாத செலவுகள்னு இல்லாம ஆதரவற்றா இல்லங்கள்ல நேரத்தைச் செலவு பண்ணலாம்னு பேசிக்கிட்டாங்க. அந்தச் சம்பவம்தான் எங்களுக்கான உந்துதல். அதை அப்படியே என்னோட நண்பர்கள் கிட்ட கலந்து பேசினோம். எல்லாரும் சரின்னு ஒத்துக்கிட்டாங்க."

"ஹாஹா ஆமா, அப்போ நாங்க எல்லாம் படிச்சுட்டு இருந்த பசங்க. எங்களுக்கு எங்க செலவுக்கே காசு பணம் எதுவும் இருக்காது. அதனால பணம் இல்லாத வேலைகளா தேர்ந்தெடுத்தோம். பார்வை திறன் இல்லாத மாணவர்களுக்குத் தேர்வு எழுதிக்கொடுப்பது, படிக்கிற சூழல் அமையாத மாணவர்களுக்குச் சிறப்பு கவனம் எடுத்து சொல்லிக்குடுப்பது என எங்களை அவுங்க கூட இணைச்சுக்கிட்டோம். அப்படி ஆரம்பிச்ச பயணத்துக்குச் சின்ன சின்ன பொருளுதவிகள் தேவைப்பட்டுச்சு. அதுக்காக நண்பர்கள் கிட்ட சொன்னப்ப அவுங்களால் முடிஞ்சத குடுத்தாங்க. அப்போதான் இதை முறைப்படுத்தி செய்ய அமைப்பாக மாறணும் சொன்னாங்க. அதுதான் படிக்கட்டுகளாக உருமாறுச்சு.

இன்னனும் சொல்லணும்னா என்னோட காலேஜ்ல எனக்கு பாடம் எடுத்த பேராசிரியர் மலைச்சாமி சார் கிட்ட இந்த விஷயத்த சொன்னப்போ ரொம்ப ஆர்வமா தன்னை இணைச்சுக்கிட்டார். கூடவே அவரோட வீட்டுல உள்ள ஒரு பகுதியை படிக்கட்டுகளுக்கு அலுவலகமாகவும் மாத்திக்க அனுமதி குடுத்தார். ஒரு ஆசிரியர், மாணவர் என்கிற உணர்வு தாண்டி, இப்போ மலைச்சாமி சார்தான் இந்த அமைப்போட முக்கியமான பொறுப்பில் இருக்கிறவர்."

"மதுரைல இருக்கற எல்லா காலேஜ்ல இருந்தும் 2012 பேட்ஜ் மாணவர்கள் சிலர், அவர்களின் நண்பர்கள், நண்பனோட நண்பர்கள்னு 45 பேரோட ஆரம்பிச்சோம். இப்போ 200 தன்னார்வலர்கள் இருக்காங்க. மதுரை, சென்னைனு இரண்டு பகுதிகளா வேலை பார்த்துக்கிட்டு இருக்கோம்.

அதுபோக படிக்கட்டுகள் மூலமா பயனடைஞ்ச மாணவர்களே திரும்பவும் தன்னார்வலர்களா தங்களை இணைச்சு வேலை பார்க்கிறாங்க. இதெல்லாத்துக்கும் காரணம், நாங்க எதுவுமே எந்தப் பிரதிபலனுமே எதிர்பார்க்காம வேலை பார்த்ததுதான். மனசுக்கு ஒரு நிறைவா இருக்கு, பயனடைறவங்களோட வாழ்த்துலயும் ஒரு மனநிறைவும் சந்தோசமும் நிறைஞ்சு இருக்கு. அதுதான் எங்களை இன்னும் இன்னும் இயங்க வச்சுக்கிட்டு இருக்கு."