Published:Updated:

மேக்கப் செய்யும் மேஜிக்!

மேக்கப் செய்யும் மேஜிக்!
பிரீமியம் ஸ்டோரி
News
மேக்கப் செய்யும் மேஜிக்!

அரிதாரம்

வெட்கம், மகிழ்ச்சி, சிரிப்பு என ஒவ்வோர் உணர்விலும் முகம் சிவக்க புதுக்கோலத்தில் நிற்கும் மணப்பெண்ணைக் காண்போர் அனைவருக்கும் பூரிப்புப் பொங்கும். மனதைக் கொள்ளைகொள்ளும் அவளின் அழகு, கேமராவில் பதிவாகிக் காலத்துக்கும் நினைவுப் பொக்கிஷமாக நிலைத்திருக்கும். அதனால் பொன்னகை, புன்னகையுடன் அலங்காரமும் அந்நாளில் முக்கிய அணிகலனாகவே மாறுகிறது.

மணமகள் மேக்கப்பில் புது வரவு என்ன?  இந்தக் கேள்வியுடன் சென்னை, `க்ரீன் ட்ரெண்ட்ஸ் யுனிசெக்ஸ்’ சலூனின், சீனியர் எக்ஸ்பர்ட் குஷ்புவைச் சந்தித்தோம்...

“கல்யாணப் பொண்ணோட முக வடிவம், சருமம், உடை எல்லாத்துக்கும் பொருந்துற மாதிரியான மேக்கப் செய்யறது முக்கியம். அதேபோல இப்ப ட்ரெண்டுல என்னென்ன மேக்கப் இருக்குன்னு கவனிக்கறதும் அவசியம். இந்தக்காலப் பொண்ணுங்களும் அதைத்தான் விரும்பறாங்க. அப்படிப்பார்த்தால், இப்ப ‘நியூட் மேக்கப்’தான் ட்ரெண்டு. அதாவது மேக்கப் போட்ட மாதிரியே தெரியாமல், ‘நேச்சுரல் பியூட்டி லுக்’ என்கிற இயற்கை அழகுத் தோற்றம்தான் இப்போதைய ட்ரெண்டு. இப்படி ஒரு மேஜிக்கை செய்யறதுதான் ஹெச்.டி ஏர்பிரஷ் மேக்கப் (HD Airbrush Makeup)’’ என்கிற குஷ்பு, இதுபற்றி செய்முறையுடன் விளக்குகிறார்...

மேக்கப் செய்யும் மேஜிக்!

மூன்று பகுதிகள்!

“பொதுவா மேக்கப் செய்யறதுக்கு பிரஷ், ஸ்பாஞ்ச் யூஸ் செய்வோம். இந்த மேக்கப்பில் ஏர்பிரஷ் மெஷின் மூலமா, ஸ்ப்ரே முறையில் மேக்கப்பை அப்ளை செய்வோம். கிட்டத்தட்ட ஸ்ப்ரே பெயின்டிங் மாதிரிதான். இந்த மெஷின்ல ட்ரிக்கர் கன், மெடிக்கல் கிரேடு குழாய் (ஹோஸ்), கம்ப்ரஸர்னு மொத்தம் மூணு பகுதிகள் இருக்கும். கம்ப்ரஸர் மூலமா சீரான காற்றழுத்தம் உண்டாக்கி, குழாய் மூலமா முகத்தில் மேக்கப்பை ஸ்ப்ரே செய்யலாம். இந்த முறையில மேக்கப் மெல்லிய லேயரா ஸ்கின்ல அப்ளை ஆகறதால, மேக்கப் போட்டதே தெரியாம, ஒரிஜினல் ஸ்கின் போலவே தோணும். இந்த மேக்கப் பேஸை தவிர, ஐ ஷேடோ, பிளஷ்ஷர், லிப்ஸ்டிக்னு அடுத்தடுத்த ஸ்டெப்ஸ் எல்லாம் வழக்கமான செய்முறைதான்.

ஐந்து சொட்டு ஃபவுண்டேஷன் போதும்!

மேக்கப் செய்யும் மேஜிக்!



முதல்ல ஸ்கின்னை க்ளென்ஸர் மூலமா சுத்தம் செய்யணும். அடுத்ததா ஏர்பிரஷ் மேக்கப் செய்யறதுக்கான ஸ்பெஷல் ஃபவுண்டேஷனை எடுத்துக்கணும்.

`ஏர்பிரஷ் கன்’னின் மேல்பகுதியில் தேவையான அளவு ஃபவுண்டேஷனைச் சேர்த்துக்கணும். அப்புறம் கன்னுடன் இணைக்கப்பட்டிருக்கும் குழாயை கம்ப்ரஸர் மெஷின்ல பொருத்தி, ‘கன்’னில் உள்ள பட்டன்ல லைட், மீடியம், ஹெவின்னு நமக்குத் தேவையான அழுத்தத்தை செலக்ட் செய்யணும். அடுத்ததா, முகத்தில் இருந்து 3 அல்லது 4 இன்ச் தொலைவில், `ஏர்பிரஷ் கன்’னைக் கையில் பிடித்தபடி ட்ரிக்கரை சீராக அழுத்தி முகத்தில், கழுத்தில், காதில் என ஃபவுண்டேஷனை பரவலா ஸ்ப்ரே செய்யணும். இடைவெளி இல்லாமல் சீராக ஸ்ப்ரே செஞ்சுமுடித்துப் பார்த்தால், ஃபவுண்டேஷன் ஸ்கின்ல திட்டுத்திட்டா இல்லாம நேச்சுரலா செட் ஆகியிருக்கும்.

பிரஷ், ஸ்பாஞ்சு மூலமா மேக்கப் போடும்போது மேக்கப் போட்டிருக்கறது அப்படியே தெரியும். அதுவும் சிலருக்கு மேக்கப் போட்டதுக்கு அப்புறம் நேர்ல பார்த்தா அழகாவும், போட்டோவுல பார்த்தா வெள்ளையடிச்ச மாதிரியும் இருப்பாங்க. ஏர்பிரஷ் மேக்கப்பில் இந்தப் பிரச்னை இருக்காது. இதுல இன்னொரு முக்கியமான விஷயம், முகத்துக்கு ஸ்பாஞ்ச் மூலமா மேக்கப் செய்யறதுக்கு அதிக அளவு ஃபவுண்டேஷன் செலவாகும். ஏர்பிரஷ் மேக்கப்புக்கு ஐந்தே சொட்டு ஃபவுண்டேஷன் லோஷன் போதும்.

மேக்கப் செய்யும் மேஜிக்!

நோ டென்ஷன் மேக்கப் இது!

கல்யாணத்துக்கு மேக்கப்னு புக் பண்ணாலே, கல்யாணத்துக்கு முன்னாடியே ஒரு ட்ரையல் மேக்கப் கட்டாயம் செஞ்சு பார்ப்பாங்க. எல்லா சலூன்லயும் இது நடைமுறையில் இருக்கு. இருந்தாலும் கல்யாண நாள்ல மேக்கப் சொதப்பிடக்கூடாதேன்னு கல்யாணப்பொண்ணு ரொம்ப டென்ஷனாவே இருப்பாங்க. ஆனா, இதுவரைக்கும் மேக்கப் போடுற முறையில, மேக்கப்பை ஸ்பாஞ்ச் மூலமா முகத்துல தேய்ச்சு தேய்ச்சு அப்ளை செய்யும்போது, சென்ஸிடிவ் ஸ்கின் இருக்கறவங்களுக்கு ஸ்கின் சிவந்து தடித்து போகறதுக்கு வாய்ப்பிருக்கு. ஆனா, ஏர்பிரஷ் மேக்கப்பில் பிரைமர் அப்ளை செய்யறதுக்கும், கரும்புள்ளிகளையும் தழும்புகளையும் மறைக்க கன்சீலர் அப்ளை செய்யறதுக்கும் மட்டுமே பிரஷ் இல்லைன்னா ஸ்பாஞ்ச்சுல அப்ளை செய்ய வேண்டியிருக்கும். மத்தபடி ஏர்பிரஷ் முறையில் ஸ்கின்னை தொடாம ஸ்ப்ரே முறையில் மேக்கப் போடுவதால் கல்யாணப் பொண்ணு எந்த டென்ஷனும் இல்லாமல் ரிலாக்ஸா மேக்கப் போட்டுக்க முடியும்.

ஹைலைட் ட்ரிக்ஸ்!

ஃபங்ஷனுக்கு வந்திருக்கும் கெஸ்ட் மட்டுமில்லாம, கேமராக்கள்கூட கல்யாணப் பொண்ணையே பார்த்துட்டு இருக்கும். ஒவ்வொரு நொடியும் பொண்ணு அழகா இருக்கணும். சிரிக்கும்போது கன்னங்களை அழகா காட்ட, மூக்கை எடுப்பா காட்டறதுக்குன்னு சில ஹைலைட் விஷயங்கள் மேக்கப்பில் இருக்கு. குறிப்பா மணப்பெண் மேக்கப்பில் இந்த ஹைலைட்டிங் ரொம்ப அவசியம். முன்னாடியெல்லாம் கன்னத்துக்கு பிளஷ்ஷரை அப்ளை செஞ்சு பளபளப்பா காட்டுவோம். இப்போ கூடுதல் பளபளப்புக்கு ஹைலைட்டர் பவுடர் யூஸ் செய்ய ஆரம்பிச்சுட்டோம். மாடலோட லெஹெங்காவுக்கு மேட்ச்சான பிங்க் கலர் பிளஷ்ஷர் அப்ளை செஞ்சுட்டு, அப்புறம் ஹைலைட்டர் பவுடர் அப்ளை செஞ்சு கன்னங்களை ஹைலைட் செஞ்சிருக்கேன். இது முடிந்ததுமே முகத்தில் ஒரு ஃப்ரெஷ் லுக் கிடைக்கும்.

மேக்கப் செய்யும் மேஜிக்!

கண்களைக் கவர்ச்சியாக்க...

முக அமைப்புக்கு ஏத்தமாதிரி புருவத்தை ஷேப் செய்வது அவசியம். மேக்கப்போடும்போது புருவத்தை அடர்த்தியாகக் காட்றதுக்கு ஐப்ரோ பென்சிலால் வரைஞ்சுக்கலாம். அப்புறம் கண்களை அகலமா காட்றதுக்கு இமை முடிகள்ல மஸ்காரா அப்ளை செய்யணும். இமை முடிகள் அடர்த்தி குறைவா இருந்தா காஸ்மெடிக் கடையில கிடைக்கும் ரெடிமேட் `ஐலேஷ்’ஷை வாங்கி ஒட்டிக்கலாம். அதுக்கும் மஸ்காரா அப்ளை செய்யணும். அடுத்ததா, மேல் மற்றும் கீழ் இமையின் ஓரங்களில் ஐலைனர் வரைஞ்சுக்கணும். கறுப்பு தவிர ஊதா, பச்சை, கிரே கலர்லயும் ஐலைனர் கிடைக்குது. நிகழ்ச்சி மற்றும் உடைக்குப் பொருத்தமான கலரைத் தேர்ந்தெடுத்துக்கலாம். மேல் இமைப்பகுதியில் கன்சீலிங் செய்து சரும நிறத்தை சரி செஞ்சதுக்கு அப்புறம்தான் ஐஷேடோ போடணும். பிங்க் மற்றும் கோல்ட் கலர், ஊதா மற்றும் கிரே கலர்... இப்படி ரெண்டு கலர் ஐஷேடோவைச் சேர்த்துப் போடுவதுதான் இப்போதைய ட்ரெண்டு.

முகூர்த்தத்துக்கான மேக்கப்னா ஐஷேடோவை டிரெஸ்ஸுக்கு பொருத்தமான கலர்லயும், ரிசப்ஷன், பார்ட்டி மாதிரியான இடங்களுக்கு டிரெஸ்ஸுக்கு கான்ட்ராஸ்ட் கலர்லயும் ஐஷேடோ யூஸ் செய்யலாம். அதேமாதிரி, இப்போதைக்கு ப்ளூ, க்ரீன் மாதிரியான நிறங்கள் மற்றும் ஸ்மோக்கி ஐ மேக்கப்தான் பொண்ணுங்களோட சாய்ஸ்.

மேக்கப் செய்யும் மேஜிக்!



லிப்ஸ்டிக் டிப்ஸ்!

கல்யாணப் பொண்ணோட புன்னகையைப் பளிச்சுனு காட்டும் மேஜிக்கை லிப்ஸ்டிக் செய்திடும். முதலில் லிப் லைனர் பென்சில் எடுத்து உதட்டை அழகா ஷேப் செய்யணும். மெல்லிய உதடுகளைத் தடிமனாகவும், தடிமனான உதடுகளை மெல்லியதாகவும் காட்டறதுன்னு உங்களோட தேவைக்கு ஏத்தமாதிரி வரைஞ்சுக்கலாம். பிறகு, லிப் பிரஷ் மூலமா லிப்ஸ்டிக்கை கொஞ்சமா எடுத்து, பென்சிலால் வரைந்த கோட்டுக்குள் அப்ளை செய்யணும். அதுக்கு அடுத்த லேயரா லிப் க்ளாஸ் அப்ளை செய்து உதடுகளைப் பளபளப்பா காட்டலாம். லிப் கிளாஸ் பயன்படுத்தி உதட்டுக்கு மினுமினுப்பு கூட்டலாம்” என்று, தான் கூறிய அனைத்து விஷயங்களுக்கும் உதாரணமாக மாடலை ரெடி செய்து நம்முன் நிறுத்தினார் குஷ்பு.

கேமராவின் கண்களை வசீகரிக்க ரெடியானார் ஸ்ரவாணி!

- யாழ் ஸ்ரீதேவி

மாடல்: ஸ்ரவாணி

படங்கள்: க.பாலாஜி