Published:Updated:

முதல் பெண்கள்! - சென்னை உயர் நீதிமன்றத்தின் முதல் பெண் நீதிபதி; மாநில மகளிர் கமிஷனின் முதல் முழு நேரப் பெண் தலைவர்

முதல் பெண்கள்! - சென்னை உயர் நீதிமன்றத்தின் முதல் பெண் நீதிபதி; மாநில மகளிர் கமிஷனின் முதல் முழு நேரப் பெண் தலைவர்
பிரீமியம் ஸ்டோரி
முதல் பெண்கள்! - சென்னை உயர் நீதிமன்றத்தின் முதல் பெண் நீதிபதி; மாநில மகளிர் கமிஷனின் முதல் முழு நேரப் பெண் தலைவர்

நீதியரசி பத்மினி ஜேசுதுரை ஹம்சத்வனி ஓவியம்: கார்த்திகேயன் மேடி

முதல் பெண்கள்! - சென்னை உயர் நீதிமன்றத்தின் முதல் பெண் நீதிபதி; மாநில மகளிர் கமிஷனின் முதல் முழு நேரப் பெண் தலைவர்

நீதியரசி பத்மினி ஜேசுதுரை ஹம்சத்வனி ஓவியம்: கார்த்திகேயன் மேடி

Published:Updated:
முதல் பெண்கள்! - சென்னை உயர் நீதிமன்றத்தின் முதல் பெண் நீதிபதி; மாநில மகளிர் கமிஷனின் முதல் முழு நேரப் பெண் தலைவர்
பிரீமியம் ஸ்டோரி
முதல் பெண்கள்! - சென்னை உயர் நீதிமன்றத்தின் முதல் பெண் நீதிபதி; மாநில மகளிர் கமிஷனின் முதல் முழு நேரப் பெண் தலைவர்

“அம்மா சாதாரணமாக இருப்பது போலத்தான் தோன்றும். ஆனால், பிரச்னைகள் என்று வந்துவிட்டால், நாம் எதிர்பார்க்காத தீர்வுகளை வைத்திருப்பார். எவ்வளவு மோசமான சூழலையும் சமாளிக்கும் திறமை அம்மாவுக்கு உண்டு. குடும்பப் பிரச்னைகள் ஆனாலும் சரி, பொதுப் பிரச்னைகள் என்றாலும் சரி, அம்மா அவற்றைச் சமாளிக்கும் விதம் ஆச்சர்யம்கொள்ளவைக்கும்'' என்று நினைவுகூர்கிறார், ஜோ ஜேசுதுரை. சென்னை லயோலா கல்லூரியின் முன்னாள் துணை முதல்வர்; சென்னை உயர் நீதிமன்றத்தின் முதல் பெண் நீதிபதியான பத்மினி ஜேசுதுரையின் மகன்.

1931-ம் ஆண்டு, ஜூலை மாதம் 20-ம் தேதி பாளையங்கோட்டையில் விரிவுரையாளர் டேவிட்  மைக்கேலுக்கும், ரோஸ் மைக்கேலுக்கும் மகளாகப் பிறந்தார் பத்மினி. அங்குள்ள இக்னேஷியஸ் பள்ளியில் பயின்று, சாராள் தக்கர் கல்லூரியில் சேர்ந்தார். பொருளாதாரம் மற்றும் வரலாறு இரண்டிலும் பட்டங்கள் பெற்றார். சென்னை சட்டக் கல்லூரியில் சேர்ந்து சட்டம் பயின்றார். 1953-ம் ஆண்டு பட்டம் வென்றவர், அதே ஆண்டு சென்னை உயர் நீதிமன்றத்தில் வழக்கறிஞராகப் பதிவு செய்துகொண்டார். 1957, டிசம்பர் 30 அன்று கல்லூரி விரிவுரையாளரான ஜி.ஜேசுதுரையை மணந்தார். ஒரு மகன், மூன்று மகள்கள் என்று குடும்பம் விரிந்தது. 1964 முதல் 1970-ம் ஆண்டு வரை நெல்லையில் கூடுதல் அரசு பப்ளிக் பிராசிக்யூட்டர் பதவியை வகித்தவர், 1970 முதல் 1976-ம் ஆண்டு வரை பப்ளிக் பிராசிக்யூட்டராகப் பணியாற்றினார். ``அம்மா, அப்போதே கோர்ட்டுக்கு கார் ஓட்டிச்செல்வார், அவரிடம் ஒரு எலிகன்ட் ஃபியட் இருந்தது'' என்று சொல்கிறார் ஜோ.

முதல் பெண்கள்! - சென்னை உயர் நீதிமன்றத்தின் முதல் பெண் நீதிபதி; மாநில மகளிர் கமிஷனின் முதல் முழு நேரப் பெண் தலைவர்

1974-ம் ஆண்டு நடைபெற்ற ஒரு சம்பவத்தையும் தாயின் துணிச்சலுக்கு உதாரணமாக மேற்கோள் காட்டுகிறார். ``பாளையங்கோட்டை கல்லூரி மாணவர் லூர்துநாதன் கொல்லப்பட்ட நாள் அன்று. மூச்சிறைக்க ஓடிவருகிறார் காவல் துறை அதிகாரி ஒருவர். `போலீஸாரை அடிக்கிறார்கள், அவர்கள் சொத்துகளை நாசம் செய்கிறார்கள், என்னை விரட்டுகிறார்கள்... தயவுசெய்து காப்பாற்றுங்கள்' என்று அம்மாவின் சேம்பருக்கு வந்து உதவி கேட்டிருக்கிறார். அம்மா அசரவே இல்லை. அவரைத் தன்னுடன் காரில் ஏற்றிக்கொண்டு கொக்கிரகுளத்தில் இருந்து பாளையங்கோட்டைவரை முக்கிய சாலைகளை ஒதுக்கிவிட்டு, வயல்வெளிகளில் காரை ஓட்டிக்கொண்டு வந்திருக்கிறார். அதிகாரியைப் பத்திரமான இடத்தில் சேர்த்த பிறகே வீடு திரும்பியிருக்கிறார்'' என்று கூறுகிறார்.

துணிச்சலுக்குப் பெயர்பெற்றவர் என்றாலும், வீட்டில் அவர் அதிகம் அதிர்ந்து பேசியதுகூட இல்லை என்று சொல்கிறார் மகன். ``சொல்ல வேண்டியதை அன்பாகவும், அழுத்தமாகவும் புன்னகை தவழும் முகத்துடனும்தான் சொல்வார்'' என்கிறார். ``அம்மாவும் அப்பாவும் 56 ஆண்டுகள் ஒன்றாக மனமொத்த தம்பதியாக வாழ்ந்தனர். தன் பணி ஓய்வுக்குப்பின் அம்மாவின் செயலாளர் போல மாறிவிட்டார் அப்பா. இருவரும் வீட்டில் அமர்ந்து காரசாரமாக வழக்குகளைப் பற்றி விவாதிப்பார்கள்" என்று சொல்கிறார் ஜோ.

நெல்லையில் நிறைய சிவில் மற்றும் கிரிமினல் வழக்குகளில் ஆஜராகி வாதாடியிருக்கிறார். ஆனால், எந்த விவாகரத்து வழக்கையும் ஏற்றுக்கொண்டு வாதாடியதில்லை. கணவன் மனைவிக்குள் இருக்கும் பிணக்கை சமாதானமாகப் பேசி, அவர்களுக்குள் முடிவெடுத்துத் தீர்த்துக்கொள்ள அறிவுரைகள் சொல்லிவந்திருக்கிறார். வழக்குக்காக வரும் வசதியற்ற நபர்களிடம் பெரிதாகப் பணம் கேட்டதில்லை பத்மினி. அவர்கள் தருவதை வாங்கிக்கொண்டு வாதாடியிருக்கிறார்.

1983-ம் ஆண்டு, கூடுதல் பிராசிக்யூட்டராக இவரை அரசு நியமிக்க, குடும்பம் சென்னைக்கு இடம்பெயர்ந்தது. அந்த ஆண்டு முதல் 1986-ம் ஆண்டு வரை சென்னை உயர் நீதிமன்றத்தில் பிராசிக்யூட்டராகப் பணியாற்றினார். 1986-ம் ஆண்டு, ஆகஸ்ட் மாதம் இவரை உயர் நீதிமன்ற நீதிபதியாக நியமனம் செய்தார் குடியரசுத் தலைவர். சென்னை உயர் நீதிமன்றத்தின் முதல் பெண் நீதிபதியானார் பத்மினி. 1993-ம் ஆண்டு வரை அந்தப் பதவியில் திறம்பட பணியாற்றினார். அதன்பின் 1993-ம் ஆண்டு, ஜூலை மாதம் மத்திய நிர்வாகத் தீர்ப்பாயத்தின் (CAT) துணைத் தலைவராக பத்மினியை நியமனம் செய்தது மத்திய அரசு.

சென்னை மத்திய நிர்வாகத் தீர்ப்பாயத்தில் 1994-ம் ஆண்டு தொடரப்பட்ட கட் ஆஃப் மதிப்பெண் மற்றும் இட ஒதுக்கீடு சார்ந்த வழக்கில், யூ.பி.எஸ்.சி-யைக் கண்டித்த பத்மினி, இட ஒதுக்கீட்டை சரிவர செயல்படுத்தாத காரணத்தால், தேர்வை ரத்து செய்யும்படியும் ஆணை பிறப்பித்தார். இவரது ஆணையை எதிர்த்து யூ.பி.எஸ்.சி, உச்ச நீதிமன்றத்தில் மேல்முறையீடு செய்ய, தீர்ப்பாயத்தின் தீர்ப்பு சரியானதே என்று உறுதி செய்தது உச்ச நீதிமன்றம். `` `கோர்ட்டுக்கு மணிகட்டிய கேட்' (CAT belling the court) என்று அம்மாவை உச்ச நீதிமன்ற நீதிபதி பாராட்டினார். அம்மாவின் இந்தத் தீர்ப்பு நிறைய பேரைத் தொட்டிருக்கிறது; அவர்கள் வாழ்வில் மாற்றத்தை ஏற்படுத்தியிருக்கிறது என்பதை அவர்கள் இன்றும் பெருமையாகப் பேசும்போது உணர்கிறேன்" என்கிறார் ஜோ.

1993-ம் ஆண்டு நிறுவப்பட்ட தமிழ்நாடு மாநில மகளிர் கமிஷனின் தலைவராக 1997-ம் ஆண்டு நியமிக்கப்பட்டார் பத்மினி. தோற்றுவிக்கப்பட்டபோது செல்வி ரமேஷ் என்ற ஓய்வுபெற்ற பெண் ஐஏஎஸ் அதிகாரி `கேர் டேக்கர்' போல அந்தப் பதவியை வகித்ததால், அந்தப் பதவிக்கு நியமிக்கப்பட்ட முதல் பெண்ணாக பத்மினி கருதப்படுகிறார். அந்தப் பதவியில் இருந்தபோது மாநிலத்தின் தொட்டில் குழந்தைத் திட்டம், கல்லூரி விரிவுரையாளர்களுக்கான சட்டப் பயிற்சித் திட்டம் போன்றவற்றைப் பெண்களிடம் எடுத்துச் சென்றதில் பெரும் பங்கு வகித்தார் பத்மினி. அதே ஆண்டு, மாநில சட்டக் கமிஷனிலும் உறுப்பினராக நியமிக்கப்பட்டார். இது தவிர, ஐந்து தனி நபர் கமிஷன்களின் சிறப்பு பிராசிக்யூட்டராகவும் செயல்பட்டார் பத்மினி.

கிட்டத்தட்ட 40 ஆண்டுகள் நீதித்துறை பணிக்குப் பின் ஓய்வுபெற்றவர், 2014-ம் ஆண்டு, அக்டோபர் 6 அன்று இயற்கை எய்தினார்.

ஒட்டுமொத்த விகடனுக்கும் ஒரே ஷார்ட்கட்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism