Published:Updated:

சேமிப்புல நாங்கதான் கில்லி !

தொகுப்பு: எம்.மரிய பெல்சின் ஓவியங்கள், கமென்ட்ஸ்: ஹரன்

பிரீமியம் ஸ்டோரி

தகவல்: லதானந்த்

##~##

சேமிப்பில்லாத வீடு... கூரையில்லாத வீடு என்பார்கள். ஆறறிவுடைய மனிதனுக்கு இது தெரிகிறதோ இல்லையோ... ஐந்தறிவுள்ள சில விலங்குகளின் சேமிப்புப் பண்பைப் பார்த்தால்... ஆச்சர்யமாக இருக்கிறது! சூழல், தட்பவெப்பம், இணை, சேய் என பல கூறுகளையும் உத்தேசித்துச் சேமிக்கும் இந்த விலங்குகளின் வியக்க வைக்கும் சேமிப்பு முறைகளுக்கு வைக்கலாம் ஒரு சல்யூட்! பின்னே... சேமிப்பில் இவர்கள்தானே நமக்கு முன்னோடிகள்!

அண்டர் கிரவுண்ட் கில்லி!

சேமிப்புல நாங்கதான் கில்லி !

பிளாடிபஸ், எலி... போன்ற வளை தோண்டி வசிக்கும் பிராணிகள், வளைகளைத் தோண்டுவது தாங்கள் வசிப்பதற்காக மட்டும் அல்ல; உணவை சேமித்து வைக்கவும்தான். அதாவது, மழைக் காலத்திலும் கடும் கோடைக் காலத்திலும் ஏற்படும் உணவுப் பற்றாக்குறையை சமாளிப்பதற்காக, எப்போது தாராளமாக உணவு கிடைக்கிறதோ... அப்போது சேமித்து வைக்கக்கூடிய கிடங்குகளாகவும் வளைகளைப் பயன்படுத்துகின்றன. பெருச்சாளி போன்றவை தரைமட்டத்துக்கும் கீழே ஒரு மீட்டர் வரை ஆழமாகக் குழி தோண்டி சேமிப்புக் கிடங்குகளை விஸ்தாரமாக அமைத்துக் கொள்கின்றன. இதுதவிர, சேமிப்பை விரைவுபடுத்த, கிடங்கிலிருந்து உணவுப் பொருட்கள் கிடைக்கும் இடங்களுக்கு குறுக்கு வழிகள் அமைத்துக்கொள்வதும் உண்டு!

சுறுசுறு சேமிப்பு!

சேமிப்புல நாங்கதான் கில்லி !

சேமிப்பு என்றதுமே உதாரணமாக பலரும் சொல்வது தேனீக்களைத்தான். அதிகாலையில் இருந்து நாள் முழுக்க சுறுசுறுப்பாக பல கிலோமீட்டர் தூரம் அலைந்து திரிந்து, பூக்களில் இருந்து மகரந்தத்தையும், தேனையும் சேகரிக்கின்றன தேனீக்கள். ஆனால், அவை அனைத்தையும் இவை தாமே தின்று தீர்ப்பதில்லை. சேகரிக்கும் பொருட்களில் பெரும்பகுதியை தேன் வடிவத்தில் சேமிக்கின்றன.

அணில் போன்ற பிராணிகள் வருங்காலத்தை உத்தேசித்து கொட்டைகள், விதைகள் போன்றவற்றைச் சேமிப்பதை வழக்கமாகக் கொண்டிருக்கின்றன. இதேபோல எறும்புகளும் தங்களுக்குத் தேவையான உணவுகளை சேமித்து வைப்பதன் மூலம், சரிவர உணவு கிடைக்காத மழைக் காலங்களையும் சந்தோஷமாக எதிர்கொள்கின்றன.

தாய்மை... இங்கேயும்!

சேமிப்புல நாங்கதான் கில்லி !

வேட்டையாடும் சில விலங்குகள் என்னதான் ருசியான ஆகாரம் கிடைத்தாலும், கொஞ்ச நேரமாவது பசியைப் பொறுத்துக்கொண்டு தனது குட்டிகளுக்காக சேமித்து வைத்து, அவற்றை பசியாற வைப்பதைப் பார்க்கலாம். அந்த வரிசையில், பெண் சிங்கம் வேட்டையாடிப் பாதுகாக்கும் இரையை, முதலில் ஆண் சிங்கம் சாவகாசமாக சாப்பிடும். அதன் பிறகு சிங்கக்குட்டிகள் சாப்பிடும். கடைசியாகத்தான் பெண் சிங்கத்துக்கு. தான் சிரமப்பட்டு வேட்டையாடி பாதுகாத்து சேமித்து வைத்த உணவை இவை கடைசியாகவே சாப்பிடும்!

வாட்டர் டேங்க்!

சேமிப்புல நாங்கதான் கில்லி !

ஒட்டகத்துக்கு அதனுடைய திமில்தான் கொழுப்புச் சேமிக்கும் வங்கி. நல்ல ஆகாரம் அகப்படும்போது ஒட்டகம் திருப்தியாகச் சாப்பிட்டுக் கொண்டே இருக்கும். அந்த ஆகாரம் கொழுப்பாக மாற்றப்பட்டு அதன் திமிலில் சிறு குன்றைப் போன்று சேமித்து வைக்கப்படும். வறண்ட பாலைவனங்களில் உணவு சரிவர கிடைக்காத சூழலில், திமிலில் சேமித்து வைக்கப்பட்டிருக்கும் கொழுப்புதான் ஒட்டகத்தை சாவின் விளிம்பிலிருந்து காக்கிறது.

அதேபோல தண்ணீர் கிடைக்கும்போது லிட்டர் கணக்கில் மடமடவெனக் குடிக்கும். அதிகபட்சமாக 25 லிட்டர் வரை தண்ணீரை அருந்தி சேமித்து வைத்துக்கொள்ளும். அதன் பிறகு ஒரு மாதம் வரை தண்ணீர் கிடைக்காவிட்டாலும்கூட உடம்பின் திசுக்களில் சேமித்து வைத்திருக்கும் தண்ணீரைக் கொண்டு சமாளித்துக் கொள்ளும் ஒட்டகம்.

இதயத் துடிப்பிலும் சேமிப்பு!

சேமிப்புல நாங்கதான் கில்லி !

முதலை போன்ற பெரிய பிராணிகள், தங்கள் சக்தியைச் சேமிக்கும் திறன் நம்மை ஆச்சர்யப்பட வைக்கும். இவை தண்ணீருக்குள் மூழ்கியிருக்கும்போது, இதயத் துடிப்பையே குறைத்து, அதன் மூலம் சக்தியினைச் சேமித்து வைக்கும். அப்போது அவற்றின் இதயம், மூன்று நிமிடங்களுக்கு ஒருமுறைதான் துடிக்கும். ஆச்சர்யமாக இருக்கிறதல்லவா? தங்களுக்குத் தேவையான இரையைப் பிடிக்கும்போது நிகழும் ஓட்டத்தில் இதயத் துடிப்பு பலமடங்கு அதிகரிக்கும் என்பதால், அதற்காகத்தான் இந்தத் துடிப்புச் சேமிப்பு!

காதல் சேவிங்ஸ்!

சேமிப்புல நாங்கதான் கில்லி !

இருவாட்சி என்று ஒரு பறவை இருக்கிறது. 'ஹார்ன்பில்' என்று ஆங்கிலத்தில் அழைக்கப்படும் பறவைதான். வெளிநாட்டுப் பறவையான இது, தமிழ்நாட்டின் டாப் ஸ்லிப் காடுகளில் காணப்படுகிறது. இனப்பெருக்க காலத்தில் மரப்பொந்துகளில் முட்டையிட்டு அடைகாக்கக் கூடிய இப்பறவைகள், முட்டையிடுவதற்கு சில வாரங்களுக்கு முன்பிருந்தே சிறகுகள் அனைத்தையும் உதிர்த்து, அவற்றை கவனமாகச் சேமித்து, சூப்பராக ஒரு மெத்தை தயாரித்துவிடும். தனக்காக அல்ல, வரப்போகும் ஜூனியர்களுக்காக!

ஆண் இருவாட்சியும் சேமிப்பில் கில்லாடிதான். அடை காத்துக்கொண்டிருக்கும் தனது இணைக்காக, அது விரும்பிச் சாப்பிடும் அத்திப் பழங்களை எங்கெங்கோ பறந்து கண்டுபிடித்து, எவ்வளவு முடியுமோ அவ்வளவு பழங்களை வாய்க்குள் அதக்கிக் கொள்ளும். எவ்வளவு பசி இருந்தாலும் தான் சாப்பிடாமல் சேமித்து வைத்து, தனது ஜோடிக்குக் கொண்டு வந்து ஊட்டிவிடும்.

வலசைச் சேமிப்பு!

சேமிப்புல நாங்கதான் கில்லி !

ஒரு கண்டத்திலிருந்து இன்னொரு கண்டம் வரை நான்-ஸ்டாப்பாகப் பறக்கும் பறவைகளைப் பற்றி கேள்விப்பட்டிருப்பீர்கள். இவற்றை வலசை போகும் பறவைகள் என்பார்கள். பெரிக்ரின் ஃபால்கன் எனும் பறவை, வடமேற்கு கனடாவில் இருந்து அர்ஜென்டினா வரைக்குமான 15 ஆயிரம் கிலோ மீட்டர் தூரத்தை 174 நாட்கள் பறந்து கடக்கும். தொடர்ச்சியாக மாதக்கணக்கில் பறக்கும் அளவுக்கு வலசை போகும் பறவைகளுக்கு எப்படி சக்தி கிடைக்கிறது? எல்லாம் சேமிப்பின் மகிமைதான். இனப்பெருக்க காலத்தின்போதுதான் இவை வலசை போகும். எனவே, அதற்கு முன்பிருந்தே சில மாதங்களாக தாங்கள் சாப்பிடும் உணவைக் கொழுப்பாக மாற்றி, உடம்பிலேயே சேமித்து வைத்துக்கொள்ளும். நெடுந்தூரம் பறப்பதற்கு வேண்டிய சக்தியை இந்தக் கொழுப்பு அவற்றுக்குக் கொடுக்கும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு