Published:Updated:

அடுத்து என்ன படிக்கலாம்...

அகில இந்திய அளவில் காத்திருக்கும் 60 தேர்வுகள்!எஜுகேஷன்

அடுத்து என்ன படிக்கலாம்...

அகில இந்திய அளவில் காத்திருக்கும் 60 தேர்வுகள்!எஜுகேஷன்

Published:Updated:
##~##

து... கல்லூரி நேரம்! பன்னிரண்டாம் வகுப்பு முடித்த மாணவர்கள், அடுத்த கட்டமாக என்ன மாதிரியான கல்லூரிப் படிப்பு வாய்ப்புகள் நமக்குக் காத்திருக்கின்றன என்கிற தேடலில் இருக்கிறார்கள். இவர்களுக்கெல்லாம் வழிகாட்டுவதோடு... பத்தாம் வகுப்பு முடித்த மாணவர்களுக்கான குரூப் தேர்வு வழிகாட்டல்களையும் இங்கே தருகிறார், சென்னையைச் சேர்ந்த கல்வி ஆலோசகர் மற்றும் சமூக ஆர்வலர், நெடுஞ்செழியன்.

''பொதுவாக பெற்றோர், உறவினர், ஆசிரியர், நண்பர்கள் என்று தன்னைச் சுற்றி இருப்பவர்கள் சொல்வதையே... எதிர்கால கல்லூரிப் படிப்பை தேர்ந்தெடுப்பதற்கான வேதவாக்காக மாணவர்கள் எடுத்துக் கொள்கிறார்கள். ஆனால், இவர்களின் ஆலோசனைகளுடன், ஒரு மாணவனின் தனிப்பட்ட விருப்பம் மற்றும் இன்றுள்ள பலவகையான படிப்புகளைப் பற்றிய அவன் தெளிவு ஆகியவற்றின் அடிப்படையில்தான் தனக்கான படிப்பை அவன் தேர்ந்தெடுக்க வேண்டும்.  

அடுத்து என்ன படிக்கலாம்...

இன்றைய காலகட்டத்தில் இந்திய அளவில் உயர்கல்வியில் பலவகையான மாற்றங்கள் நடந்துகொண்டு இருக்கின்றன. மத்திய அரசாங்கம் எந்தெந்த துறைகளில் மனிதவளம் குறைவாக இருக்கிறது என கண்காணித்து, அந்தத் துறைகளின் வளர்ச்சிக்கு கவனம் கொடுத்து வருகிறது. உதாரணமாக, சோஷியல் சயின்ஸ், ஹோட்டல் மேனேஜ்மென்ட், ஹாஸ்பிட்டாலிட்டி, மேனேஜ்மென்ட், ஃபுட் புராஸஸிங் போன்ற அதிக கவனம் கிடைக்காத, எண்ணற்ற துறைகளில், போட்டியில்லாத... செழிப்பான வேலைவாய்ப்புகள் கொட்டிக்கிடக்கின்ற துறை சார்ந்த படிப்புகளைத் தேர்ந்தெடுக்கலாம்.

பள்ளித் தேர்வை முடித்ததோடு, கல்லூரியில் அட்மிஷனுக்காக காத்திருக்காமல், அகில இந்திய அளவில் பல கல்லூரிகளுக்கும் நடைபெறும் நுழைவுத்தேர்வுகளை எழுதுவது அவசியம். பன்னிரண்டாம் வகுப்புத் தேர்வுக்குப் பிறகு, கல்லூரி சேர்க்கைக்காக, அகில இந்திய அளவில் கிட்டத்தட்ட 60 தேர்வுகள் நடத்தப்படுகின்றன. மருத்துவக் கல்லூரிகள், பொறியியல் கல்லூரிகள், சட்டக் கல்லூரிகள், கலை, அறிவியல் கல்லூரிகள், ஆராய்ச்சி மற்றும் வடிவமைப்பு துறை என நாட்டில் உள்ள தலைசிறந்த அரசுக் கல்லூரிகளுக்கான தேர்வுகள் இவை. உதாரணமாக, JEE, AIEEE, BITSAT போன்ற அகில இந்திய அளவில் பொறியியல் கல்லூரி சேர்க்கைக்காக நடைபெறும் நுழைவுத்தேர்வுகளை எழுதலாம். எல்லா தேர்வுகளிலும் இல்லை என்றாலும், அதற்காக எடுத்துக் கொண்ட முயற்சியும் பயிற்சியும் ஏதாவது ஒரு தேர்விலாவது நல்ல மதிப்பெண்களை கொண்டுவந்து சேர்க்கும். அதன் அடிப்படையில் அட்மிஷன் பெறலாம்.

அகில இந்திய அளவில் நடைபெறும் நுழைவுத்தேர்வு என்றவுடன், அது சிபிஎஸ்இ, ஐசிஎஸ்இ சிலபஸில் படித்த மாணவர்களுக்குதான் சுலபமாக இருக்கும் என, மாநில பாடத்திட்டத்தில் படித்தவர்கள் தயங்கத் தேவையில்லை. தேர்வுக்குத் தேவையான விஷயங்களை மட்டும் கேள்வி - பதில் வடிவத்தில் படிக்கும் பழக்கத்தை மறந்து, பாடங்களை முழுக்கவும் படிக்கப் பழகினாலே... நுழைவுத்தேர்வு சுலபமாகிவிடும்.

அகில இந்திய அளவிலான கல்லூரிகளில் சேர்வதற்கு... நுழைவுத்தேர்வுடன், பன்னிரண்டாம் வகுப்பு பொதுத்தேர்வில் 60% மதிப்பெண்கள் பெற்றிருந்தாலே போதுமானது என்பது குறிப்பிடத்தக்கது. பன்னிரண்டாம் வகுப்பு பொதுத்தேர்வில் 850 மதிப்பெண்கள் மட்டுமே பெற்ற ஒரு மாணவி, அகில இந்திய பிரீ மெடிக்கல் தேர்வில், நுழைவுத்தேர்வு வாயிலாக 150-வது ரேங்கில் வெற்றிபெற்று, இன்று சென்னை, அரசு மருத்துவக் கல்லூரியில் படித்துக் கொண்டிருக்கிறார். அகில இந்திய அளவில் நுழைவுத்தேர்வு எழுதியதால்தான், அவருக்கு இந்த வாய்ப்புக் கிடைத்துள்ளது. எனவே, கல் எடுக்காததால்தான் மாங்காய் கிடைக்காமல் போகிறது என்பதை உணர வேண்டும்'' என்று சொன்ன நெடுஞ்செழியன்,

''14 அரசு சட்டக் கல்லூரிகள் மத்திய அரசு நிர்வாகத்தில் இயங்குகின்றன. இங்கு படிப்பு முடித்தவர்களுக்கான வாய்ப்புகள் ஏராளம். டாக்டர் அம்பேத்கர் பல்கலைக்கழகத்தில் சட்டம், அதேநேரத்தில் 'ஐசிஎஸ்ஐ'யில் கம்பெனி செக்ரெட்டரிஷிப் இரண்டையும் ஒன்றாக முடித்து வெளியில் வரும்போது, நிறுவனங்கள் போட்டி போட்டுக்கொண்டு எடுத்துக் கொள்வார்கள்.

மும்பையில் உள்ள 'டாடா இன்ஸ்டிட்யூட் ஆஃப் சோஷியல் சயின்ஸ்’-ல் படிப்பவர்களுக்கு, பொதுத்துறை நிறுவனங்களின் சமூகநலத் துறையில் காத்திருக்கின்றன வேலைவாய்ப்புகள். பி.காம், பி.பி.ஏ போன்ற படிப்புகளுக்கும் எதிர்காலம் விரிந்திருக்கிறது. ஈரோட்டைச் சேர்ந்த 30 வயதுக்குட்பட்ட ஒரு மாணவர், சி.ஏ மற்றும் கம்பெனி செக்ரெட்டரிஷிப் ஆகியவற்றை முடித்து சென்னையில் மாதம் 3 லட்சம் வரை சம்பளம் வாங்குகிறார் என்பதிலிருந்தே... அதன் எதிர்காலத்தை நீங்கள் உணரலாம்'' என்று, ஆதாரப்பூர்வமாக சொன்னார்!

- வே.கிருஷ்ணவேணி