Published:Updated:

என்ன அழகு... எத்தனை அழகு!

வில்ல வளைச்சு வெச்ச புருவமோ !

பிரீமியம் ஸ்டோரி

'அழகுக் கலை அரசி’ 
வீணா குமாரவேல்

உயிரைக் கொடுத்து மாதக் கணக்கில் சிற்பங்களைச் செதுக்கும் சிற்பிகள், அச்சிலைகளுக்கு கண்களைத் திறக்கும்போது, அதை ஒரு தவமாகக் கருதிச் செய்வார்கள். அந்தளவுக்கு ஆராதிக்கப்படுபவை கண்கள். சிலைகளுக்கு மட்டுமல்ல... பெண்களுக்கும்தான்!

என்ன அழகு... எத்தனை அழகு!

முகத்துக்கு மேக் - அப் போடும் அதே அளவு நேரத்தை... ஐ லைனர், ஐ ஷேட், ஐப்ரோ பென்சில், மஸ்காரா என 'ஐ மேக் - அப்’ போடுவதற்கும் எடுத்துக் கொள்ளும் பெண்கள், கண்களின் புற அமைப்பியலைப் புரிந்து கொண்டால்... தங்கள் கண்களுக்குத் தகுந்த அலங்காரத்தைக் கொடுப்பது சுலபமாகும். அழகுக் கலையின் பிரம்மா 'சிண்டி கிராஃபோர்ட்' சொல்வதும் இதைத்தான்!

வடிவம் (ஷேப்)

எல்லோருக்கும் கண்கள் ஒரே மாதிரி இருப்பதில்லை. பாதாம் பருப்பின் வடிவில் இருக்கும் கண்கள் ஒரு வகை, நீள்வட்ட வடிவில் இருக்கும் கண்கள் இரண்டாவது வகை, வட்டமாக இருக்கும் கண்கள் மூன்றாவது வகை.

என்ன அழகு... எத்தனை அழகு!

இருப்பிடம் (ப்ளேஸ்மென்ட்)

சிலருக்கு கண்கள் இரண்டும் நெருக்கமாக இருக்கும். இதை ஆங்கிலத்தில் 'க்ளோஸ்டு செட்’ என்பார்கள். சிலருக்கு கண்கள் இரண்டுக்கும் இடையே நிறைய இடைவெளி இருக்கும். இந்த வகை கண்களை 'வொய்டு செட்’ என்பார்கள். அதேபோல உள்ளடங்கிய கண்கள், துருத்திக் கொண்டிருக்கும் கண்கள் என்றும் கண்களை வகைப்படுத்தலாம்.

அளவு (டைமன்ஷன்)

அளவைப் பொறுத்தவரை, சிறிய கண்கள், மீடியம் கண்கள், பெரிய கண்கள் என்பவை வகைப்பாடு. ஒருவரின் கண்கள் என்ன வகையினதாக இருந்தாலும், அதற்கு தகுந்த மாதிரி புருவத்தையும் இமைகளையும் அழகுபடுத்தும்போது, அதன் அழகு கூடும். 'ஒரு பெண்ணுக்கு என்ன மாதிரி புருவங்கள் இருந்தால் அழகாக இருக்கும்?’ என்பதுதான் மில்லியன் டாலர் கேள்வி. அதற்கு இருக்கிறது ஒரு ரெடிமேட் சூத்திரம்!

நீங்கள் த்ரெட்டிங் செய்து கொள்ளும் ஒவ்வொரு முறையும், 'நமக்குப் புருவம் எங்கே ஆரம்பிக்க வேண்டும், எங்கே முடிய வேண்டும், எந்த இடத்தில் வளைவின் உச்சம் இருக்க வேண்டும்?’ என்பதை முடிவு செய்வதில் குழுப்பம் இருந்து கொண்டே இருக்கும்தானே?

என்ன அழகு... எத்தனை அழகு!

ஸ்வேதாவை மாடலாக வைத்து படத்தில் காட்டியிருப்பது மாதிரி உங்கள் புருவங்களை நீங்கள் அமைத்து கொண்டால் போதும். போட்டோவில் காட்டியிருப்பது மாதிரி... மூக்கின் வாட்டத்திலேயே ஒரு குச்சியை வைத்துப் பாருங்கள். குச்சியும் புருவமும் தொடும் இடத்திலிருந்து புருவத்தை ஆரம்பிக்கலாம். இப்போது நேராக பார்த்து, கருவிழியின் மையப் புள்ளிக்கு நேர் மேலாகக் குச்சியை வைத்துப் பாருங்கள். புருவமும் குச்சியும் தொட்டுக் கொள்ளும் இடம்தான் புருவத்தின் உச்சமான பகுதியாக இருக்கும்படி புருவத்தை அங்கே வளைக்க வேண்டும். இறுதியாக கண்கள் முடியும் இடத்தையும் மூக்கையும் அந்தக் குச்சியால் இணைத்துப் பாருங்கள்... குச்சியும் புருவமும் தொட்டுக் கொள்ளும் இடம்தான் புருவம் முடிய வேண்டிய இடம்.

மேக்-அப் பற்றி பேசும்போது புருவங்கள் பற்றி இன்னும் விலாவாரியாக பேசலாம். அதற்கு முன்பு எந்தெந்த மாதிரியான கண்கள் கொண்டவர்களின் இமைகளுக்கு, எந்தெந்த மாதிரி கவனம் செலுத்த வேண்டும் என்பதை மட்டும் சுருக்கமாக சொல்லிவிடுகிறேன்.

'க்ளோஸ்டு செட்’, அதாவது இரண்டு கண்களுக்கும் இடைவெளி குறைவாக கொண்டிருப்பவர்கள்... இரண்டு புருவங்களுக்கு இடையிலான தூரத்தை சற்று அகலப்படுத்திக் காட்டலாம். இவர்கள் கண் இமைகளில் 'லைட் ஷேட்’ கொடுப்பது நல்லது. பொட்டு வைக்கும்போது இரண்டு புருவங்களுக்கும் மத்தியில் வைக்காமல், கொஞ்சம் மேலே உயர்த்தி வைத்தால் இடைவெளி கூடுதலாக இருப்பது போன்ற தோற்றம் கிடைக்கும்.

கண்கள் இரண்டுக்கும் இடையே இடைவெளி அதிகம் கொண்ட 'வொய்டு செட்’ கண்களை உடையவர்கள், கண்களின் இமைகளுக்கு 'டார்க் ஷேட்’ கொடுக்கலாம். புருவங்களுக்கு இடையில் பொட்டு வைத்தால் அழகாக இருக்கும்.

மீண்டும் சொல்கிறேன்... நல்ல தூக்கம்தான் கண்களுக்கு பரிபூரண அழகை கொடுக்கும். சிலருக்கு கண்களை கசக்கி கொண்டே இருக்கும் வழக்கம் உண்டு. இதனால் சீக்கிரமே கண்களின் கீழ் இமைகள் உப்பலாகிவிடும். அதேபோல மாய்ஸ்ச்சரைஸர் அப்ளை செய்யும்போது கண்களின் மேல் இமைகளைவிட, கீழ் இமைகளுக்கு குறைவாகப் போடவேண்டும் என்பதையும் மறக்காதீர்கள்!

- மிளிரும்...

படங்கள்: என்.விவேக்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு