Published:Updated:

தமிழ்த்திரையிசை ஆளுமைகள்... இசையாசிரியரின் இனிய ஆவணம்!

ஞா.கற்பகம்
பிரீமியம் ஸ்டோரி
News
ஞா.கற்பகம்

இசையும் தமிழும்...

தென்னிந்தியாவின் முதல் பேசும் படமான காளிதாஸில் (1931) ஆரம்பித்து 2000 வரை, கிட்டத்தட்ட 70 வருடங்களாக, தமிழ்த் திரையுலகை ஆண்டுகொண்டிருந்த 201 இசை ஆளுமைகளைப் பற்றிய தொகுப்பை வெளியிட்டிருக்கிறார் ஞா.கற்பகம். `தமிழ்த்திரையிசை ஆளுமைகள்’ என்ற புத்தகத்தை எழுதியுள்ள இவர், சென்னை ராணி மேரி கல்லூரியில் இசையாசிரியர்.

‘‘சென்னை வானொலி நிலையத்தில், கூத்தபிரானுக்குப் பிறகு வானொலி அண்ணாவாக இயங்கிய சிறுவர் கதையாசிரியர் என்.சி. ஞானப்பிரகாசம்தான் என் அப்பா. அம்மா தெ.ரேவதி, தமிழாசிரியர். பழம்பெரும் பின்னணிப் பாடகி ஏ.பி.கோமளாவிடம் கர்னாடக சங்கீதம் பயின்றேன். ப்ளஸ் டூ முடித்தவுடன் பல் மருத்துவப் படிப்பில் சீட் கிடைத்தது. ஆனால், இசையின் மீதான ஆர்வத்தால், அதையே பாடமாக எடுத்தேன். பிஹெச்.டி-யில் `தமிழ்த் திரையுலகில் கர்னாடக இசைக்கலைஞர்களின் பங்கு’ என்ற ஆய்வில் டாக்டர் பட்டம் வாங்கினேன்.

ஞா.கற்பகம்
ஞா.கற்பகம்

என் ஆய்வுக் கட்டுரையைப் படித்த பலரும், தமிழ்த்திரையில் இருந்த, இருக்கிற அத்தனை ஆளுமைகள் பற்றியும் நீங்கள் ஏன் எழுதக் கூடாது என்று கேட்டார்கள், உடனே களத்தில் இறங்கினேன். என்னுடைய புத்தகத்தில் தமிழ்த்திரையுலகில் கோலோச்சிய தியாகராஜ பாகவதரில் ஆரம்பித்து அனைத்து ஆளுமைகளும் இடம்பெற வேண்டும் என்று தீர்மானித்தேன். எட்டு வருடங்கள் பல திரையிசை ஆளுமைகளின் வீடு, அலுவலகம் என்று ஏறியிறங்க ஆரம்பித்தேன். சிலர் மகிழ்ச்சியாகப் பேசினார்கள், சிலர் நேரமில்லை என்று வாசலோடு அனுப்பினார்கள். என் ஆர்வத்தைப் புரிந்துகொண்ட பிலிம் நியூஸ் ஆனந்தன் எனக்கு முழு சப்போர்ட் செய்தார். அவருக்கு என்றென்றும் கடமைப்பட்டிருக்கிறேன்’’ எனும் கற்பகம், ஏ.ஆர்.ரஹ்மான் தவிர்த்து அத்தனை இசையமைப்பாளர்களிடமும் ஹார்மோனீஸ் பாடியிருக்கிறார். நிறைய விளம்பரங்களுக்கு ஜிங்கிள்ஸும் பாடியிருக்கிறார்.

``தமிழ்த் திரையிசைக் கலைஞர்களின் வாழ்க்கைக் குறிப்பு, இசை உலகில் அவர்களின் சாதனைகள், அவர்களின் பிரபலமான பாடல்கள் உள்ளிட்ட அத்தனை வரலாற்றையும் வருடங்களுடன் பதிவு செய்திருக்கிறேன்.தமிழ்த் திரையிசையில் கருவியிசைக் கலைஞர்களின் பங்களிப்பு அபரிமிதமானது. அவர்களையும் வெளிச்சத்துக்குக் கொண்டு வரும் எண்ணத் தில் என் புத்தகத்தில் 22 கருவியிசைக் கலைஞர்கள் பற்றியும் எழுதியிருக்கிறேன்’’ என்கிற கற்பகத்தை, யுவன் சங்கர் ராஜா நேரில் அழைத்து, புத்தகம் குறித்து பாராட்டி யிருக்கிறார்.

அடுத்து 2001 முதல் 2020 வரையிலான `தமிழ்த் திரையிசை ஆளுமைகள்' பற்றிய புத்தகத்துக்கான வேலையைத் தொடங்கியிருக்கிறார் கற்பகம்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz