Published:Updated:

பால் விலையேற்றம்...

ஆவினுக்கே, ‘பால்’ ஊற்றிவிடாதீர்கள்!அலசல் ஜி. பழனிச்சாமி, படங்கள்: தி. விஜய், க. தனசேகரன்

பால் விலையேற்றம்...

ஆவினுக்கே, ‘பால்’ ஊற்றிவிடாதீர்கள்!அலசல் ஜி. பழனிச்சாமி, படங்கள்: தி. விஜய், க. தனசேகரன்

Published:Updated:

பால் விலையை லிட்டருக்கு 10 ரூபாய் உயர்த்தியுள்ளது, தமிழ்நாடு அரசு. கடந்த நவம்பர் 1ம் தேதி முதல் நடைமுறைக்கு வந்துள்ள இந்த விலையேற்றத்தைக் கண்டித்து பல்வேறு அரசியல் கட்சிகள் போராட்டம் நடத்தி வருகின்றன. விலையேற்றம், நுகர்வோரை அதிருப்தியில் ஆழ்த்தினாலும்... கொள்முதல் விலையில் பசும்பால் லிட்டருக்கு 5 ரூபாய் எனவும் எருமைப்பால் 4 ரூபாய் எனவும் உயர்த்தியுள்ளது, பால் உற்பத்தி விவசாயிகளுக்கு சற்று சந்தோஷத்தை ஏற்படுத்தியிருப்பது உண்மைதான்.  

பால் விலையேற்றம்...

 இதுபற்றி தங்கள் தரப்பு நியாயங்களைப் பகிர்ந்து கொள்கிறார்கள், தமிழ்நாடு பால் உற்பத்தியாளர்கள் நலச்சங்கத்தின் நிர்வாகிகள்.

ஒட்டுமொத்த விகடனுக்கும் ஒரே ஷார்ட்கட்!

கே.பி. செங்கோட்டுவேல், தலைவர், பால் உற்பத்தியாளர் நலச்சங்கம்.

''தமிழ்நாட்டின் ஒரு நாளுக்கான மொத்த பால் உற்பத்தி ஒரு கோடியே 25 லட்சம் லிட்டர். இதில் ஆவின் என்றழைக்கப்படும் தமிழ்நாடு கூட்டுறவு பால் விநியோக இணையம், மாவட்ட வாரியாக இயங்கிவரும் 8 ஆயிரத்து 200 கிராம கூட்டுறவு பால் உற்பத்தியாளர்கள் சங்கங்களின் மூலம் தினமும் 25 லட்சம் லிட்டர் பாலை கொள்முதல் செய்து... மாவட்டங்களில் உள்ள மையங்கள் வாயிலாகப் பதப்படுத்தி பல்வேறு மாவட்டங்களுக்கு விற்பனைக்கு அனுப்பி வருகிறது. 75 லட்சம் லிட்டர் பாலை தனியார் நிறுவனங்கள், விவசாயிகளிடம் இருந்து பெற்றுக்கொள்கின்றன. 25 லட்சம் லிட்டர் பாலை, உற்பத்தியாளர்களே தங்களின் சுயதேவைக்காக வைத்துக் கொள்கிறார்கள்.

பால் விலையேற்றம்...

தனியார் பால் நிறுவனங்கள், கொள்முதல் விலையாக லிட்டர் ஒன்றுக்கு 26 ரூபாய் முதல் 32 ரூபாய் வரை உற்பத்தியாளர்களுக்கு வழங்கி வருகின்றன. அதேசமயம் அரசு சார்ந்த நிறுவனமான தமிழ்நாடு கூட்டுறவு பால் இணையம், பாலில் 4.3 என்கிற சதவிகிதத்தில் கொழுப்புச் சத்தும், 8.2 என்கிற சதவிகிதத்தில் இதர சத்துக்களும் இருக்கும்பட்சத்தில் கொள்முதல் விலையாக லிட்டருக்கு 23 ரூபாய் கொடுத்து வந்தது. 'பசுந்தீவனம் மற்றும் அடர்தீவனங்களின் விலையேற்றத்தில் உற்பத்திச் செலவு கூடிவிட்டது. பால் விலையை உயர்த்திக் கொடுக்க வேண்டும்’ என்று பல வருடங்களாக கோரிக்கை வைத்து போராடி வருகிறோம். இது நிறைவேறாத காரணத்தால், லிட்டருக்கு கிட்டத்தட்ட 9 ரூபாய் வரை அதிகம் கிடைப்பதால் தனியார் நிறுவனங்களுக்கு பால் கொடுக்க ஆரம்பித்தனர் உற்பத்தியாளர்கள். இதனால், நாள் ஒன்றுக்கு 25 லட்சம் லிட்டராக இருந்த ஆவின் கொள்முதல், 21 லட்சம் லிட்டராக குறைந்து போனது. கிராம கூட்டுறவு பால் உற்பத்தியாளர் சங்கத்தின் மொத்த உறுப்பினர்கள் 22 லட்சம் பேர். ஆனால், இப்போது கூட்டுறவுச் சங்கங்களுக்கு பால் ஊற்றுபவர்கள் வெறும் 5 லட்சம் பேர் மட்டும்தான். கட்டுப்படியாகாத விலை, வறட்சி, தீவன விலையேற்றம் போன்ற காரணங்களினால் பெரும்பாலானோர் கறவை மாடுகளை விற்று விட்டனர். கணிசமானோர் விலை அதிகம் கிடைப்பதால் தனியார் நிறுவனத்தை நோக்கிச் சென்று விட்டனர்.

தொடர்ந்து பழைய விலையையே கொடுத்தால், மீதி இருக்கும் பால் உற்பத்தியாளர்களும் வெளியே போய்விடுவார்கள். பிறகு, ஆவின் நிறுவனத்தை மூடவேண்டிய கட்டாயம் ஏற்பட்டுவிடும். இதைத் தடுத்து தக்க வைக்கவும், கூட்டுறவுச் சங்கங்களுக்கு பால் வழங்கும் கறவையாளர்களை வெளியேறாமல் தடுக்கவும்தான் விலை உயர்த்தப்பட்டுள்ளது. இது காலத்தின் கட்டாயம். வேறு வழி இல்லை. விவசாயிகளின் நலனுக்காக, இந்த பால் விலை ஏற்றத்தை பொதுமக்கள் பொறுத்துக் கொள்ளத்தான் வேண்டும்.'

எம்.ஜி.ராஜேந்திரன், பொதுச் செயலாளர், தமிழ்நாடு பால் உற்பத்தியாளர்கள் நலச்சங்கம்.  

பால் விலையேற்றம்...

''இப்போதைய நிலையில் பால் உற்பத்திக்கான செலவுக்கும் வரவுக்கும் கிட்டத்தட்ட சரியாக இருக்கிறது. ஆனாலும், பரம்பரைத்தொழில் என்பதால் பால் உற்பத்தியை பல்வேறு சிரமங்களுக்கு இடையில் செய்து வருகிறோம். வெளிநாடுகளில் மாடுகள் வளர்க்க மானியம் கொடுக்கிறார்கள். அதேபோல் அண்டை மாநிலமான கர்நாடகா, லிட்டர் ஒன்றுக்கு ஊக்கத்தொகையாக அரசு நிதியில் இருந்து 4 ரூபாய் வழங்கி வருகிறது. கேரளாவில் 2 ரூபாய் கொடுக்கிறார்கள். கட்டுப்படியாகிற விலை உற்பத்தியாளர்களுக்கும், நியாயமான விலை நுகர்வோருக்கும் கிடைக்க தீவனம், பசுந்தீவன உற்பத்தி, வட்டியில்லா கடன் உள்ளிட்ட பல சலுகைகளை பால் உற்பத்தியாளர்களுக்கு வழங்கினால் மட்டும்தான் இந்த இரண்டையும் ஓரளவு சமன்படுத்திட முடியும்.''

பெரியண்ணன், முன்னோடி பால் உற்பத்தியாளர், ஓமலூர்.

பால் விலையேற்றம்...

''பல்வேறு தொழில்களில் அதிரடியாக இறங்கி உள்ளூர் தொழில்களை காலி செய்து வரும் பன்னாட்டு கார்ப்பரேட் கம்பெனிகள், சமீபகாலமாக பால் தொழிலிலும் கால் பதித்துள்ளன. முதல்கட்டமாக ஆந்திராவின் பிரபல நிறுவனமான 'திருமலா டெய்ரி’யை 1,500 கோடி ரூபாய்க்கு ஒரு பன்னாட்டு நிறுவனம் கையகப்படுத்தியுள்ளது. தொடர்ந்து அனைத்து மாநிலங்களிலும் தனது ஆக்டோபஸ் கரங்களை விரிவுபடுத்தும் இந்த நிறுவனங்கள், ஆரம்பத்தில் பல கவர்ச்சியான சலுகைகளை பால் உற்பத்தியாளர்களுக்குக் கொடுத்து தன் பக்கம் இழுத்து, ஒப்பந்த பண்ணையம் என்கிற பெயரில் விவசாயிகளை அடிமைப்படுத்தி விடும். பிறகு, உள்ளூர் நிறுவனங்களை மெள்ள காலிசெய்துவிட்டு... 'தான் வைத்ததுதான் சட்டம்’ என்று தனிக் காட்டு ராஜாவாகச் செயல்படும். அப்புறம் அவர்கள் கொடுப்பதுதான் கொள்முதல் விலை... அவர்கள் வைத்ததுதான் விற்பனை விலை... என்றாகிவிடும். எனவே ஆவின் போன்ற அரசு நிறுவனங்கள் உயிரோடு இருப்பதுதான் விவசாயிகளுக்கும் நுகர்வோருக்கும் நல்லது. இதையும் மனதில் வைத்து இந்த விலையேற்றத்தை நுகர்வோர் ஏற்றுக் கொள்ளவேண்டும்.''

உற்பத்தியாளர்களும், நுகர்வோரும் பாதிக்காமல், எல்லோருக்கும் பால் வார்க்கும் ஆவினுக்கு ஒரேயடியாக 'பால்’ ஊற்றிவிடாமல் ஆள்வோர்தான் பார்த்துக் கொள்ளவேண்டும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism