Published:Updated:

‘விவசாயிகளே... வியாபாரிகளாகவும் மாறுங்கள்!’

ஆலோசனை சொன்ன முன்னோடிகள்..!பசுமைக்குழு, படங்கள்: தி.விஜய், க.தனசேகரன், ரமேஷ் கந்தசாமி

‘விவசாயிகளே... வியாபாரிகளாகவும் மாறுங்கள்!’

ஆலோசனை சொன்ன முன்னோடிகள்..!பசுமைக்குழு, படங்கள்: தி.விஜய், க.தனசேகரன், ரமேஷ் கந்தசாமி

Published:Updated:
‘விவசாயிகளே... வியாபாரிகளாகவும் மாறுங்கள்!’

டந்த செப்டம்பர் 25-ம் தேதி முதல் 28-ம் தேதி வரை ஈரோடு மாநகரில் ‘பசுமை விகடன்’ சார்பாக நடைபெற்ற வேளாண் கண்காட்சி குறித்து கடந்த சில இதழ்களில் தொடர்ந்து எழுதி வருகிறோம். கண்காட்சியின் ஒரு பகுதியாக, நான்கு நாட்களும் நடந்த கருத்தரங்கில்... முன்னோடி விவசாயிகள், விவசாய விஞ்ஞானிகள், பல்கலைக்கழகப் பேராசிரியர்கள், வேளாண்மைத்துறை அதிகாரிகள் எனக் கலந்துகொண்டு பல்வேறு தலைப்புகளில் பகிர்ந்தவற்றில் சில, இங்கே இடம் பிடிக்கின்றன. 

நியாயமான விலை கிடைக்கும்!

ஒட்டுமொத்த விகடனுக்கும் ஒரே ஷார்ட்கட்!

27-ம் தேதி காலை அமர்வில்  ஈரோடு உழவர் உற்பத்தியாளர் நிறுவனத்தின் தலைவர் நல்லசாமி பேசினார்.

“விவசாயிகள் தாங்கள் விளைவிக்க நினைக்கும் பொருட்களுக்கு சந்தை வாய்ப்பு எப்படி இருக்கிறது’ எனத் தெரிந்துகொண்ட பிறகுதான் விவசாயத்தை ஆரம்பிக்க வேண்டும். எந்த ஒரு காய்கறிப் பயிரும் நிலையான விலையில் விற்பனையாகாது. விவசாயிகளின் விளைபொருளுக்கு நியாயமான விலை கிடைக்க வேண்டுமென்றால், விவசாயிகள் ஒன்றிணைந்து, எங்களைப் போன்று உழவர் உற்பத்தியாளர் கம்பெனியை உருவாக்க வேண்டும். தற்போது எங்கள் அமைப்பு மூலமாக மஞ்சள் விவசாயிகளுக்கு நியாயமான விலை கிடைக்கிறது. மஞ்சளை சேமித்து வைத்து, அதன் பெயரில் கடன் பெறும் வசதியையும் உருவாக்கி இருக்கிறோம். இதேபோன்று அனைத்து பயிர்களுக்கும் உற்பத்தியாளர் அமைப்புகள் தோன்றினால், விளைபொருளுக்கு நியாயமான விலை கண்டிப்பாகக் கிடைக்கும்’’ என்றார் உறுதியான குரலில்.

‘விவசாயிகளே... வியாபாரிகளாகவும் மாறுங்கள்!’

விவசாயிகளே வியாபாரிகள்!

தொடர்ந்து பேசிய உழவன் உற்பத்தியாளர் நிறுவனத்தின் துணைத்தலைவர் வெங்கடேசன், “ஐந்து ஆண்டுகளில், இந்தியாவில் இரண்டரை லட்சம் விவசாயிகள் தற்கொலை செய்துகொண்டு மடிந்திருக்கிறார்கள். முன்பு ரப்பர் விலை 260 ரூபாய். தற்போது வெறும் 70 ரூபாய்க்குத்தான் விற்பனையாகிறது. இந்த விவரமெல்லாம் சாதாரண விவசாயிகளுக்குத் தெரிவதில்லை. இதைத் தடுக்க உற்பத்தியாளர் நிறுவனமே ஏற்றுமதியும் செய்ய வேண்டும். பொருளாதார வளர்ச்சியில் சிறிய அளவில் உள்ள நாடுகள்கூட 90 சதவிகிதம் உற்பத்தியாளர் கம்பெனி மூலமாகவே ஏற்றுமதி செய்கிறார்கள். அது மட்டுமில்லாமல் விவசாயிகள், தங்களது பொருட்களை மதிப்புக்கூட்டி விற்பனை செய்தால், அருமையான லாபத்தை அடைய முடியும். விவசாயிகளுக்கு பாதுகாப்பும், உரிய விலையும் கிடைக்க வேண்டுமென்றால்... உழவன் உற்பத்தியாளர் நிறுவனம் அவசியம். அப்போதுதான், உற்பத்தி செய்யும் பொருட்களுக்கு அவர்களே விற்பனை விலையை நிர்ணயிக்க முடியும்” என்று அடித்துச் சொன்னார், அனுபவசாலியாக.

‘விவசாயிகளே... வியாபாரிகளாகவும் மாறுங்கள்!’

சந்தை அறிந்து சாகுபடி செய்!

ஏற்றுமதிச் சந்தை வாய்ப்பு குறித்துப் பேசிய தமிழ்நாடு வேளாண்மைப் பல்கலைக்கழகத்தின் முன்னாள் பேராசிரியர் ‘முனைவர்’ ரவீந்திரன், ‘‘விவசாயம் மட்டும் பெருகினால் போதுமா? விவசாயிகளின் வாழ்க்கைத்தரம் உயர வேண்டாமா?  அதற்காக விவசாயிகள் முக்கியமாக கவனத்தில் கொள்ள வேண்டியது, ‘சந்தைப்படுத்துதல்’தான். சந்தைப்படுத்துதல் என்பது ஒரு பயிரை விதைக்கத் தொடங்கும்போதே துவங்கி விடுகிறது. எடுத்துக்காட்டாக மக்காச்சோளம், இதில், பல பயன்பாடுகள் இருந்தாலும், கோழித்தீவனத்துக்காக கொள்முதல் செய்யும்போதுதான் அதிக லாபம் கிடைக்கிறது. கோழித்தீவனமாக கொள்முதல் செய்யப்படும் மக்காச்சோளத்துக்கு ஈரப்பதம், நிறம், மணிகளின் அளவு ஆகியன சரியாக இருக்க வேண்டும். இப்படி ஒவ்வொரு பயிருக்கும் ஒவ்வொரு தரத்தில் சந்தை வாய்ப்பு உள்ளது. அதுவும் சரியான பருவத்தில் சரியாக பயிர் செய்யப்பட வேண்டும்.

‘விவசாயிகளே... வியாபாரிகளாகவும் மாறுங்கள்!’

விவசாயிகளுக்கு சரியான விற்பனை வாய்ப்பு கிடைக்க வேண்டுமெனில், நாம் விளைவிக்கப்போகும் பொருளை எந்த நிறுவனம் அதிகம் கொள்முதல் செய்ய வாய்ப்பிருக்கிறது என்பதைத் தெரிந்துகொள்ள வேண்டும். அப்போதுதான் அதற்கேற்ற பொருட்களை உற்பத்தி செய்து லாபம் பார்க்க முடியும். முக்கியமாக வெளிமாநிலங்களில் இருந்து இறக்குமதியாகாத நேரத்தில் விவசாயிகள் தங்களது பொருட்களை சந்தைப்படுத்துவது இன்னும் அதிக லாபத்தைத்  தரும்.

நேரடி ஒழுங்கு முறை விற்பனைக்கூடத்தின் மூலமாகவும் விற்பனை செய்யலாம். ஏற்றுமதிச் சந்தையில் அரிசி, தானிய வகைகள், கோதுமை, மக்காச்சோளம், பழங்கள், காய்கறிகள் போன்றவை இந்தியாவில் இருந்து ஏற்றுமதி ஆகின்றன. இதில் பெரும்பாலான பொருட்கள் தமிழகத்திலிருந்துதான் ஏற்றுமதியாகின்றன” என்று கோடிட்டுக் காட்டினார்.

மற்ற கருத்துரையாளர்களின் உரைகள் அடுத்த இதழில்...

தற்கொலைகளைத் தடுக்கலாம்!

‘விவசாயிகளே... வியாபாரிகளாகவும் மாறுங்கள்!’

கருத்தரங்கில் பேசிய உழவன் உற்பத்தியாளர் நிறுவனத்தின் அறங்காவலர் பொன்னம்பலம், “விவசாயிகளே விவசாயம் வேண்டாம் என்று ஒதுக்கிவிட்டுச் செல்லும் சூழலில், பசுமை விகடனைப் படித்துவிட்டு விவசாயத்தை நோக்கி வருபவர்களின் எண்ணிக்கை அதிகரித்துக் கொண்டே இருக்கிறது. அந்த அளவு விவசாய செய்திகளையும், எளிதான விவசாயச் வழிமுறைகளையும் மக்கள் மத்தியில் எடுத்துச் சென்றுகொண்டிருக்கிறது. விவசாயத்துக்கு மறுமலர்ச்சி காலம் என்றால், ‘பசுமைவிகடனுக்கு முன்’, ‘பசுமை விகடனுக்குப் பின்’ என இரண்டாகப் பிரிக்கலாம். எங்கள் உழவன் உற்பத்தியாளர் நிறுவனமானது, அரசு சாரா நிறுவனம். எங்கள் உற்பத்தியாளர் நிறுவனத்தில் விவசாயிகள்தான் விலையை நிர்ணயிக்கிறார்கள். தமிழ்நாட்டிலேயே சிறந்த உற்பத்தியாளர் கம்பெனிகளில் இது முக்கியத்துவம் வாய்ந்த ஒன்று. இது போல அனைத்து விவசாயிகளும் அவர்களின் மாவட்டங்களில் உற்பத்தியாளர் நிறுவனங்களைத் தொடங்கலாம். இதன் மூலமே விவசாயிகள் தற்கொலையை பெரிய அளவில் தடுக்கலாம்” என்றார்.

கூட்டம் அலைமோதிய வல்லுநர் அரங்குகள்...

கண்காட்சியில் நெல், கரும்பு, வாழை, மஞ்சள் ஆகிய பயிர்களுக்கும் இடுபொருட்களுக்கும் தனித்தனியாக அரங்குகள் அமைக்கப்பட்டிருந்தன. அந்த அரங்குகளில், சம்பந்தப்பட்ட பயிர்கள் தொடர்பான விவசாயிகளின் சந்தேகங்களுக்கு, முன்னோடி விவசாயிகள் விளக்கம் அளித்தனர். இது, விவசாயிகளிடையே பெரும் வரவேற்பைப் பெற்றது.

‘விவசாயிகளே... வியாபாரிகளாகவும் மாறுங்கள்!’

இடுபொருட்கள் தயாரிப்பு அரங்கில், விவசாயிகளுக்கு விளக்கம் அளித்த முன்னோடி விவசாயி லோகநாதன், “ஜீவாமிர்தம், பீஜாமிர்தம், அக்னி அஸ்திரம் மற்றும் பல்வேறு மூலிகைப் பூச்சிவிரட்டிகளின் தயாரிப்புக்கான மூலப்பொருட்கள், பனம்பழம், தேங்காய்த் தண்ணீர், சோற்றுக்கற்றாழை, வேப்பங்குச்சி, காட்டாமணக்கு, சீத்தாப் பழம், அவுரினு என்னோட வயல்ல இருந்து அத்தனையையும் கொண்டு வந்து மேசையில அடுக்கிட்டேன்.

அரங்குக்கு வந்தவங்க, ‘அது என்னங்க? இது என்னங்கனு?’ ஒவ்வொண்ணா கேட்டுத் தெரிஞ்சிக்கிட்டாங்க. அந்த பொருட்களோட மருத்துவ குணங்களையும் கேட்டு குறிப்பெடுத்துக்கிட்டாங்க. பூங்கார், மைசூர்மல்லி, மாப்பிள்ளைச்சம்பா, கிச்சடினு நாலு வகையான நாட்டு ரக அரிசிகளையும் பார்வைக்கு வெச்சிருந்தேன். ‘இந்த விதைகள் எங்கு கிடைக்கும்’னு ரொம்பபேரு ஆர்வமா கேட்டுத் தெரிஞ்சிக்கிட்டாங்க. இடுபொருட்கள் தயாரிப்பு வீடியோ படம், அரங்கில் ஓடிக்கிட்டே இருந்ததால, தெளிவா புரிஞ்சுக்கிட்டாங்க. காலையில தொடங்கி, கண்காட்சி முடிஞ்சு விசில் ஊதின பிறகும், என்னோட அரங்குல கூட்டம் குறையவேயில்லை” என்று சிலாகித்தார்.

புகையானுக்குத் தீர்வு!

நெல் சாகுபடிக்காக ஒன்பது விருதுகள் பெற்ற முன்னோடி இயற்கை விவசாயி ‘நசியனூர்’ மோகனசுந்தரம், நெல்லுக்கான அரங்கில் அமர்ந்து விவசாயிகளுக்கு விளக்கம் அளித்தார்.

“பயிருக்குத் தேவையான தழைச்சத்துக்களை அள்ளிக்கொடுக்கிற பசுந்தாள் உரம், நெல் விவசாயத்துல அவசியமான ஒண்ணு. சணப்பு, தக்கைப்பூண்டுனு வளர்த்து மடக்கி உழவு செய்து வருவது இன்றைய நடைமுறை. ஆனா, 20 வருஷத்துக்கு முன்னெல்லாம் காடு, மேடு, மந்தைவெளிகள்ல சுயம்பா வெளைஞ்சு கிடக்கும் கொழுஞ்சி, எருக்கு இலை மாதிரியான செடிகளை வெட்டி, வண்டி வண்டியா ஏத்தி வந்து வயல்ல கொட்டி, ஏர் மாட்டை விட்டு மடக்கி உழவு செய்வோம். அது நல்ல இயற்கை உரமா இருந்து மகசூலை அள்ளிக் கொடுத்திச்சு. அதற்கான சூழலும் கிராமங்களில் இருந்திச்சு. இன்னிக்கு அதெல்லாம் அழிஞ்சு போச்சு. அது வெளைஞ்சு கிடந்த இடங்கள் எல்லாம் வீடுகளாயிடுச்சு. ஒடைக்கரைகள் எல்லாம் ஒடுங்கிப்போச்சு. என்ன செய்ய... எங்களை மாதிரியான இயற்கை விவசாயிகள் சணப்பு, தக்கைப்பூண்டுனு காசு கொடுத்து விதை வாங்கி விதைச்சு, வளர்த்து பசுந்தாள் உரமா கொடுத்து வர்றோம்.

‘விவசாயிகளே... வியாபாரிகளாகவும் மாறுங்கள்!’

சிலர் அடியுரத்தில் ஆரம்பிச்சு, அறுவடை வரைக்கும் ரசாயன உரமா வயல்ல கொட்டுறாங்க அதுதான் கவலையா இருக்கு. ரசாயன உரத்தோட தீமைகளை எடுத்துச் சொல்ல ‘பசுமை விகடன்’ களம் அமைச்சு கொடுத்தது.  நான்கு நாள்ல ஆயிரக்கணக்கான பேருக்கு, ‘ஒற்றை நாற்று சாகுபடி’, ‘இயற்கை இடுபொருட்கள் தயாரிப்பு’னு விளக்கம் கொடுத்திருக்கேன். பசுந்தாளையும் ஆமணக்குப் பிண்ணாக்கையும் உரமாகக் கொடுக்கிற நெல் வயல்ல புகையான் தாக்குதல் கட்டுப்படுது.  பஞ்சகவ்யா 300 மில்லி, சூடோமோனாஸ் 100 கிராம் ரெண்டையும் 10 லிட்டர் தண்ணீர்ல கலந்து தெளிச்சாலும் புகையான் தாக்காது. இந்த நுட்பத்தை நிறைய பேருக்குச் சொல்லிக் கொடுத்தேன்” என்றார், மோகனசுந்தரம்.

அசத்திய பசுமை விகடன் அக்ரி எக்ஸ்போ-2015!

பார்வையாளராக வந்திருந்த திருச்செங்கோட்டைச் சேர்ந்த ஜெயபாரதியிடம் பேசியபோது, “நான் மூணு

‘விவசாயிகளே... வியாபாரிகளாகவும் மாறுங்கள்!’

வருஷமா பசுமைவிகடன் படிச்சிக்கிட்டு இருக்கேன். வீட்டுத்தோட்டம் சம்பந்தமா வர்ற தொடரைப் படிச்சதுமே, எங்க வீட்டுலயும் வீட்டுத்தோட்டம் போடணும்னு முடிவு செஞ்சு அதற்கான ஆலோசனையில இருந்த நேரத்துலதான் ’ஈரோட்டில் நடைபெற்ற பசுமை விகடன் அக்ரி எக்ஸ்போ-2015’ விளம்பரத்தைப் பார்த்தேன். நான் நினைச்சதை விடவும் வித்தியாசமான வடிவத்துல எப்படியெல்லாம் வீட்டுத்தோட்டம் அமைக்கலாம், செடிகள் வளர்க்க எந்தமாதிரியான தொட்டிகளைப் பயன்படுத்தலாம், ஒரே தொட்டியில் எப்படி பல செடிகளை வளர்க்கலாம்னு தெரிஞ்சுக்கிட்டேன். பைகள்லேயே ஆரஞ்சு, செடிமுருங்கை, மாதுளை... எல்லாம் காய் காய்ச்சு நிற்கிறதைப் பார்த்ததும் எனக்கு தெம்பு வந்துடுச்சு. வீட்டுத்தோட்டம் போட்டா நிச்சயம் வீட்டுக்குத் தேவையான எல்லா காய்கறிகளையும் நாமளே சாகுபடி செஞ்சிடலாம்னு முடிவெடுத்திருக்கேன். சீக்கிரமே வீட்டுத் தோட்டத்துக்கான வேலைகளை ஆரம்பிக்கப் போறேன். வீட்டுக்குத் தேவையான காய்கறிகளோட விதைகளையும் வாங்கி வெச்சுக்கிட்டேன்” என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism