இனிப்பான லாபம் கொடுக்கும் ‘இயற்கை’ நிலக்கடலை + ஊடுபயிர்கள்...

எ ண்ணெய் வித்துப்பயிர்களில் முக்கியமான பயிர் நிலக்கடலை. இதில், அதிகளவில் புரதம் இருப்பதால், உணவு தானியங்களில் முக்கிய இடம் வகிக்கிறது. நிலக்கடலை மூலம் எண்ணெய் உற்பத்தி முதன்மையாக இருந்தாலும் உணவு மற்றும் தின்பண்டங்கள் தயாரிப்பிலும் அதிகளவு பயன்படுத்தப்படுகிறது. தவிர, அப்படியே வறுத்தும் அவித்தும் சாப்பிடவும் பயன்படுகிறது. அதனால், நிலக்கடலைக்கு எப்போதுமே நல்ல சந்தை வாய்ப்பு இருந்து வருகிறது. அதனால்தான் பெரும்பாலான மானாவாரி விவசாயிகள் நிலக்கடலைச் சாகுபடியில் ஈடுபட்டு வருகிறார்கள். இறவைப் பாசன வசதி உள்ள பல விவசாயிகள்கூட, ஒரு போகம் நிலக்கடலை சாகுபடி செய்வதை வழக்கமாக வைத்திருக்கிறார்கள். அப்படிப்பட்டவர்களில் ஒருவர்தான் விருதுநகர் மாவட்டம், சிவகாசி தாலூகா, காரிசேரி கிராமத்தைச் சேர்ந்த இயற்கை விவசாயி நாராயணன். பாதை காட்டிய பசுமை விகடன்! தோட்டத்தில் அறுவடைப் பணியில் இருந்த நாராயணனைச் சந்தித்தோம். “பாரம்பர்ய விவசாயக் குடும்பத்தைச் சேர்ந்தவன் நான். ஆறாம் வகுப்போட படிப்பை நிறுத்திட்டு அப்பாவுக்கு உதவியா விவசாயத்துல இறங்கிட்டேன். அப்போ வாழை, நெல், காய்கறிகள்தான் முக்கியமான விவசாயம். ரசாயன உரம் போட்டுதான் விவசாயம் செய்துட்டு இருந்தோம். விவசாயத்துல வருமானம் குறைவா இருந்ததால, நான் சென்னை போய் ஒரு கடையில மூணு வருஷம் வேலை பாத்தேன். அப்புறம் சென்னையிலேயே மூணு வருஷம் குளிர்பானக் கடை வெச்சிருந்தேன். அந்தக் கடையில புத்தகங்களையும் விற்பனை செய்ய ஆரம்பிச்சேன். அந்த வகையிலதான் 2009-ம் வருஷம் எனக்குப் ‘பசுமை விகடன்’ அறிமுகமாச்சு. அடிப்படையில நானும் ஒரு விவசாயிங்கிறதால பசுமை விகடனை ஆர்வமா படிக்க ஆரம்பிச்சேன்.

அதுலதான், இயற்கை விவசாயம் குறித்துத் தெரிஞ்சுகிட்டேன். அதுல வந்த தகவல்கள் ரொம்ப ஆச்சர்யமா இருந்ததால, தொடர்ந்து படிக்க ஆரம்பிச்சேன். கொஞ்ச நாள்ல குளிர்பானக் கடையும் டல்லடிக்க ஆரம்பிச்சது. அதனால, 2011-ம் வருஷம் ஊர் திரும்பிட்டேன். இங்க விவசாயத்தை விட்டா வேற பொழைப்புக் கிடையாது. அதனால அதையே கையில் எடுத்தேன். ‘அப்பாவை சடார்னு இயற்கை விவசாயத்துக்கு மாத்த முடியாதே. அவரை எப்படி வழிக்குக் கொண்டு வர்றது’னு யோசிச்சிட்டு இருந்தேன். அப்போ ஒரு சமயம், ‘உரம் வாங்க காசு இல்லை’னு அப்பா சொன்னார். கைகொடுத்த இயற்கை! உடனே இதுதான் சந்தர்ப்பம்னு, பசுமை விகடனைக் காட்டி உரமே இல்லாம விவசாயம் பண்ண முடியும்னு சொன்னேன். அவர் ஒத்துக்கவும், அந்த வருஷம் ஒரு ஏக்கர் நிலத்துல நாடன் (பேயன்) வாழையை முழு இயற்கை முறையில் சாகுபடி செஞ்சோம். காய்கள் திரட்சியாகவும், நல்ல எடையுடனும் இருந்திச்சு. பக்கத்துத் தோட்டத்து வாழைப் பழங்களைவிட எங்களோட வாழை நல்லா இருந்தது. உடனே அப்பா இயற்கை விவசாயத்தை ஒத்துக்கிட்டார். அதுல இருந்துதான் இயற்கை விவசாயத்தைச் செய்ய ஆரம்பிச்சோம்” இயற்கை விவசாயத்துக்கு வந்த கதையைச் சொன்ன நாராயணன், தொடர்ந்தார். தேவையறிந்து சாகுபடி! “அப்புறம் ‘வானகம்’ பண்ணையில நம்மாழ்வார் ஐயாகிட்ட பத்து நாள் இயற்கை விவசாயப் பயிற்சி எடுத்துக்கிட்டேன். அதுக்குப்பிறகு கத்திரி, மிதி பாகல், கீரை, நிலக்கடலைனு இயற்கை முறையில சாகுபடி செய்ய ஆரம்பிச்சேன். நிலக்கடலைக்கு எப்பவுமே நல்ல தேவை இருக்கிறதால, தொடர்ந்து நிலக்கடலை சாகுபடி செஞ்சிட்டிருக்கேன்.

மொத்தம் 3 ஏக்கர் நிலம் இருக்கு. கரிசல் கலந்த மணல் பாங்கான நிலம். அதுல ஒன்றரை ஏக்கர் நிலத்துல தூயமல்லி, அறுபதாம் குறுவை நெல் ரகங்களைப் போட்டு அறுவடை முடிஞ்சது. அரை ஏக்கர் நிலத்துல அறுவடை முடியுற நிலையில 5 வகை கீரைகள் இருக்கு. ஒரு ஏக்கர் நிலத்துல வைகாசிப் பட்டத்துல டி.எம்.வி-2 (TMV-2) என்கிற திண்டிவனம் எண்ணெய்வித்து ஆராய்ச்சி நிலைய நிலக்கடலை ரகத்தைத்தான் இப்போ அறுவடை செஞ்சிருக்கேன்” என்ற நாராயணன், விற்பனை மற்றும் வருமானம் குறித்துச் சொல்ல ஆரம்பித்தார்.

விற்பனைக்கு வில்லங்கமில்லை!

விருதுநகர் மாவட்டத்தில் சிவகாசி, ஸ்ரீவில்லிபுத்தூர், ராஜபாளையம் பகுதிகளைச் சேர்ந்த இயற்கை விவசாயிகள் சேர்ந்து... ‘தேன்கனி உழவர் சந்தை’ங்கிற பெயர்ல வாராவாரம் ஞாயித்துக்கிழமை அன்னிக்கு சிவகாசியில எங்க விளைபொருட்களைச் சந்தைப்படுத்துறோம். காலைல 6 மணியில் இருந்து சாயங்காலம் 3 மணி வரை சந்தை இயங்கும். அங்கதான் நான் நிலக்கடலையை விற்பனை செய்றேன். இயற்கை விளைபொருளுக்கு நல்ல வரவேற்பு இருக்கிறதால விற்பனைக்குப் பிரச்னையேயில்லை.

. முழுக்கடலையாக கிலோ 120 ரூபாய்னு விற்பனை செய்திட்டிருக்கேன். நிலக்கடலை வயல்ல பூச்சிகளைத் தடுக்க வரப்புப் பயிரா உளுந்து போட்டதுல 52 கிலோ கிடைச்சது. இதை விதை உளுந்தா பக்குவப்படுத்தி கிலோ 280 ரூபாய்னு விற்பனை செய்திட்டேன். ஒரு ஏக்கர் நிலத்துல 643 கிலோ நிலக்கடலை கிடைச்சது. அதை, கிலோ 120 ரூபாய்ங்கிற கணக்குல விற்பனை செஞ்சா, மொத்தம் 77 ஆயிரத்து 160 ரூபாய் வருமானம் கிடைக்கும். அதோட உளுந்து மூலமா கிடைக்கிற 14 ஆயிரத்து 560 ரூபாயையும் சேர்த்தா, மொத்த வருமானம் 91 ஆயிரத்து 720 ரூபாய். இதுல ஊடுபயிர்கள் வருமானத்தையும் சேர்த்தா 1 லட்ச ரூபாய்க்கு மேல் வருமானம் கிடைக்கும். இதுல நிலக்கடலைகான மொத்த செலவு 26 ஆயிரத்து 400 ரூபாய் போக, 65 ஆயிரத்து 320 ரூபாய் லாபமா நிக்கும்” என்ற நாராயணன் நிறைவாக,

“நூத்திப்பத்து நாட்கள்ல இந்த வருமானம் கிடைக்குது, என்னைப் பொருத்தவரை நல்ல வருமானம்தான். இயற்கை முறைச் சாகுபடி, நேரடி விற்பனை ரெண்டும்னாலதான் இந்த வருமானம் சாத்தியமாகுது. அதனாலதான், வருஷம் தவறாம நிலக்கடலை சாகுபடி செஞ்சிட்டிருக்கேன்” என்றபடி புன்னகையுடன் கை நிறைய நிலக் கடலையை அள்ளிக் காட்டினார். தொடர்புக்கு, நாராயணன், செல்போன்: 96554 37242

. சித்திரையில் உழவு... வைகாசியில் நடவு!

. ஒரு ஏக்கர் பரப்பில் நிலக்கடலை சாகுபடி செய்வது குறித்து நாராயணன் சொன்ன தகவல்கள் பாடமாக இங்கே...

நிலக்கடலைக்குச் சித்திரை, வைகாசி, ஆடி, கார்த்திகை ஆகிய பட்டங்கள் ஏற்றவை. இறவையில் வைகாசிப் பட்டத்தில் சாகுபடி செய்தால் நல்ல பலன் கிடைக்கும். சித்திரை மாதம் ஐந்து கலப்பை மூலம் உழவு செய்து, எட்டு நாட்கள் காயவிட்டு அடுத்த உழவு ஓட்ட வேண்டும். சித்திரை உழவில் மண்ணில் உள்ள புழுக்கள், பூச்சிகள் வெப்பத்தால் அழிந்துவிடும். வைகாசி தொடக்கத்தில், ஒரு ஏக்கர் நிலத்துக்கு 2 டன் என்ற கணக்கில் தொழுவுரத்தைக் கொட்டி டில்லர் மூலம் உழ வேண்டும். பிறகு 10 அடி நீளம் 8 அடி அகலத்தில் பாத்திகள் எடுக்க வேண்டும். பாத்திகளுக்கான இடைவெளி 2 அடி. ஒரு ஏக்கருக்கு 260 பாத்திகள் வரை எடுக்கலாம். பாத்திகளில் முக்கால் அடி இடைவெளியில், விதைநேர்த்தி செய்யப்பட்ட நிலக்கடலை விதைகளை... ஒவ்வொரு விதையாக ஊன்றித் தண்ணீர் பாய்ச்ச வேண்டும். ஒரு ஏக்கர் விதைப்புக்கு 40 கிலோ விதைக்கடலை தேவைப்படும். தொடர்ந்து மண்ணின் ஈரப்பதத்தைப் பொறுத்துத் தண்ணீர் பாய்ச்சி வர வேண்டும். கடலையைப் பொறுத்தவரை வாடவிட்டுத் தண்ணீர் பாய்ச்சினால்தான் மகசூல் நன்றாக இருக்கும். விதைத்த 4-ம் நாள் முளைப்பு எடுக்கும். 20 மற்றும் 35-ம் நாட்களில் களை எடுக்க வேண்டும். இரண்டாவது களை எடுப்பின்போது, 40 கிலோ கடலைப்பிண்ணாக்கை நிலம் முழுவதும் தூவ வேண்டும்.

30-ம் நாளுக்கு மேல் பூ எடுக்கும். இந்த நேரத்தில் சிவப்புக் கம்பளிப்புழு, அசுவினி ஆகிய பூச்சிகள் தாக்க வாய்ப்புண்டு. அதனால் 30-ம் நாளுக்கு மேல் வாரம் ஒருமுறை 10 லிட்டர் தண்ணீருக்கு 200 மில்லி இஞ்சி-பூண்டு கரைசலைக் கலந்து கைத்தெளிப்பானால் தெளித்து வர வேண்டும். 40-ம் நாள், செடிகளின் தூர்ப் பகுதியில் மண் அணைத்துவிட வேண்டும். அப்போதுதான் திரட்சியாக கடலைகள் கிடைக்கும். 45-ம் நாள் செடிகளின் நடுப்பகுதியைக் கால்களால் மெதுவாக மிதித்துவிட வேண்டும். அப்போதுதான் வேர்கள் பிரிந்து கடலைகள் மண்ணுக்குள் இறங்கும். 100-ம் நாளுக்கு மேல், கடலைச் செடியின் மேற்பகுதி இலைகள் மஞ்சள் நிறத்துக்கு மாறி கறும்புள்ளிகள் விழும். அந்த நேரத்தில் சில செடிகளைப் பிடுங்கி முதிர்ச்சி அடைந்திருப்பதை உறுதி செய்து, தண்ணீர் பாய்ச்சி, 3 நாட்கள் கழித்து அறுவடை செய்யலாம். 110 நாளுக்குள் அறுவடை செய்துவிட வேண்டும்.

. ஊடுபயிரிலும் உன்னத வருமானம்..!

. “நிலக்கடலையின் வயல் வரப்புகளில் 30 சென்டிமீட்டர் இடைவெளியில் உளுந்தை விதைத்துவிட்டால் அசுவினி, அந்துப்பூச்சி, சாறு உறிஞ்சும் பூச்சி ஆகியவை உளுந்துச் செடிகளில் அமர்ந்துகொள்ளும். இதனால் முதன்மைப்பயிரான நிலக்கடலையில் பூச்சித்தாக்குதல் இருக்காது. உளுந்துக்கு மாற்றாகத் தட்டைப்பயறு, பாசிப்பயறு ஆகியவற்றையும் விதைக்கலாம். இதன் மூலம் தனியாக ஒரு வருமானம் பார்த்துவிடலாம்” என்கிறார், நாராயணன். உயிர்வேலி மூலம் மாத வருமானம்..!

“நிலக்கடலை வயலைச் சுத்தி உயிர்வேலி மாதிரி 6 அடி இடைவெளியில் அதிக விளைச்சல் கொடுக்கிற சிற்றாமணக்கு வகையைச் சேர்ந்த ஆமணக்குச் செடிகளை வெச்சிருக்கேன். இத நட்டு 8 மாசம் ஆகுது. நட்ட ரெண்டாவது மாசத்துல இருந்து விதைகள் கிடைச்சிட்டு இருக்கு. 5 வருஷம் வரை விதைகள் கிடைக்கும்னாலும், 2 வருஷத்துக்கு மேல செடிகள் ரொம்ப வளர்ந்திடும். அதனால ரெண்டு வருஷத்துல செடிகளை அழிச்சிடுவேன். அதுக்குள்ள காய்ப்புக்கு வர்ற மாதிரி சுழற்சி முறையில் ஆமணக்குச் செடிகளை வெச்சுடுவேன். வரப்போரத்துல இந்தச் செடிகள் இருக்கிறதால நிலக்கடலையைத் தாக்க வர்ற பூச்சிகள், இந்தச் செடிகள்லயே தங்கிடும். அதனால நிலக்கடலைச் செடிகள் பங்கமில்லாம முளைச்சு வந்திடும்.

அதில்லாம, மாசத்துக்கு 60 கிலோ ஆமணக்கு விதை கிடைச்சிடுது. அதுல 30 கிலோ விதையை ஆட்டினா, 10 லிட்டர் விளக்கெண்ணெய் கிடைக்கும். அதை கிலோ 1,200 ரூபாய்னு விற்பனை செய்றது மூலமா, மாசம் 12 ஆயிரம் ரூபாய் கிடைக்குது. மீதி 30 கிலோ விதையை கிலோ 75 ரூபாய்னு விற்பனை செய்றேன். அது மூலமா 2 ஆயிரத்து 250 ரூபாய் கிடைக்கும். வரப்போர பயிர்ல இருந்தே மாசா மாசம் 14 ஆயிரம் ரூபாய்க்குக் குறையாம வருமானம் கிடைச்சிடுது. இதுபோக நிலக்கடலை விதைச்சதும், பாத்திகளுக்குள்ள 6 அடி இடைவெளியில் மக்காச்சோள விதைகளை விதைச்சு விட்டுடுவேன். இதுவும் பூச்சிக்கட்டுப்பாட்டுக்கு உதவியா இருக்கு. அதுல பறவைகள் சாப்பிட்டது போக மீதி கிடைக்கிற கதிர்களை வீட்டுத்தேவைக்கு வெச்சுக்குவேன்” என்கிறார், நாராயணன்.

. வளர்ச்சியைச் சீராக்கும் இடுபொருட்கள்!

விதைத்த 20-ம் நாளில் இருந்து 15 நாட்களுக்கு ஒருமுறை 10 லிட்டர் தண்ணீருக்கு 300 மில்லி பஞ்சகவ்யா என்ற கணக்கில் கலந்து கைத்தெளிப்பானால் தெளித்து வர வேண்டும். 45-ம் நாளுக்கு மேல், வேர்களில் கடலை உருவாகும். 45, 55 மற்றும் 65-ம் நாட்களில் 10 லிட்டர் தண்ணீருக்கு 50 மில்லி மீன் அமினோ அமிலம் மற்றும் சிறிது காதி சோப் கலந்து கைத் தெளிப்பானால் தெளிக்க வேண்டும். இதனால் கடலைச் செடிகளின் வளர்ச்சி சீராக இருக்கும். திரட்சியாகக் காய் பிடிக்கும்.

. விதை நேர்த்தி!

ஓலைப்பாய் அல்லது சணல் சாக்கை நிழலில் விரித்து, அதில் 40 கிலோ விதைக்கடலையைப் பரப்பிவிட வேண்டும். விதைக்கடலையின் மீது 2 லிட்டர் பஞ்சகவ்யாவைத் தெளித்து, புரட்டிவிட வேண்டும். 2 மணி நேரம் வைத்திருந்து பிறகு விதைக்க வேண்டும். விதைநேர்த்தி செய்வதால் வேர் அழுகல் உள்ளிட்ட நோய்கள் வராது.

. அதேபோல, உடைத்த பருப்பை வாங்கி விதைக்கக் கூடாது. அவற்றுக்கு முளைப்புத்திறன் குறைவாக இருக்கும். அதனால், முழுக்கடலையாக வாங்கி நாமே பக்குவமாக உடைத்து விதைக்கும்போது சேதாரத்தைத் தவிர்க்க முடியும்.

. தண்ணீர் விழும் இடத்தில் உரக்குழி!

. “தண்ணீர் திறந்துவிடும் வாய்மடைக்கு அருகில் 4 அடி நீளம், 4 அடி அகலம் மற்றும் 3 அடி ஆழத்தில் குழி எடுத்து... ஆவாரை இலை, வேப்பிலை, நெய்வேலி காட்டாமணக்கு, எருக்கிலை ஆகியவற்றில் தலா 10 கிலோ அளவு போட்டுடுவேன். அதோட 20 கிலோ பசுஞ்சாணம், 20 லிட்டர் பசு மாட்டுச் சிறுநீர் சேர்த்து 4 நாள் ஊறவிட்டு அந்தத் தண்ணியைத்தான் நிலத்துக்குப் பாய்ச்சுவேன். அதனால பயிருக்குத் தழைச்சத்து செழிம்பா கிடைச்சிடுது” என்கிறார், நாராயணன்.

இனிப்பான லாபம் கொடுக்கும் ‘இயற்கை’ நிலக்கடலை + ஊடுபயிர்கள்...

Vikatan Correspondent