காவிரி நதிநீர்ப் பங்கீடு.... மத்திய அரசை மிரள வைத்த மறியல் போராட்டங்கள்!

கா விரி மேலாண்மை வாரியம் அமைக்க மறுக்கும் மத்திய அரசைக் கண்டித்து... தமிழகத்தில் கடந்த அக்டோபர் 17, 18 ஆகிய இரண்டு நாட்கள் ‘தொடர் ரயில் மறியல் போராட்டம்’ பெரும் எழுச்சியுடன் நடைபெற்றது. தமிழகத்தில் அ.தி.மு.க, பி.ஜே.பி கட்சிகளை தவிர அனைத்து அரசியல் கட்சிகள், விவசாய சங்கங்கள், வணிகர் சங்கங்கள் எனப் பல தரப்பினரும் இப்போராட்டத்தில் களமிறங்கியிருந்தனர்.

. குறுவை சாகுபடி இழப்பு, சம்பா சாகுபடி இழப்பு, கர்நாடகா வாழ் தமிழர்களின் மீது வன்முறை வெறியாட்டம் எனத் தொடர்ந்து விழுந்த அடிகளால், தமிழ்நாட்டு மக்கள் கொந்தளித்துக் கிடந்தனர். ‘நான்கு வாரங்களுக்குள் காவிரி மேலாண்மை வாரியம் அமைக்க வேண்டும்’ என உச்ச நீதிமன்றம் உத்தரவிட்டதால், ‘விரைவில் காவிரிப் பிரச்னைக்கு விடிவு பிறக்கப்போகிறது’ எனத் தமிழக மக்கள் நம்பிக்கையோடு காத்திருந்தார்கள். இந்நிலையில் எரியும் நெருப்பில் எண்ணெயை ஊற்றுவதுபோல், காவிரி மேலாண்மை வாரியம் அமைக்க முடியாது என உச்ச நீதிமன்றத்தில் வெளிப் படையாகவே எதிர்ப்புத் தெரிவித்தது, மத்திய அரசு. இந்த விஷயத்தில், பிரதமர் நரேந்திர மோடியின் உண்மை முகம் வெளிச்சத்துக்கு வந்ததால் ஒட்டுமொத்த தமிழ்நாட்டு மக்களும் கொதித்தெழுந்தனர். அதன் விளைவுதான், இந்தத் தொடர் ரயில் மறியல் போராட்டங்கள். சென்னையில் மட்டும் எட்டு இடங்களில் ரயில் மறியல் நடைபெற்றது. காவிரி டெல்டா மாவட்டங்களில் காலை 6 மணி முதல் மாலை 6 மணி வரை இடைவிடாது அடுத்தடுத்துத் தொடர்ச்சியாக ரயில் மறியல் நடைபெற்றுக் கொண்டே இருந்தது. தஞ்சாவூரில், விவசாயிகள் தண்டவாளத்தில் அடுப்பு வைத்து, சமையல் செய்து சாப்பிட்டனர். பாய், தலை யணையுடன் படுத்துறங்கவும் முயற்சி செய்தார்கள். நூற்றுக் கணக்கான விவசாயிகளும் அரசியல் கட்சியினரும் கூட்டம் கூட்டமாகச் சேர்ந்து ரயிலை மறிப்பதும் கைதாவதும் தொடர்ச்சியாக நடந்துகொண்டே இருந்தன. இதனால் ரயில்கள் புறப்படப் பல மணிநேரம் தாமதமாயின.

. நாகப்பட்டினத்தில் ரயில் தண்டவாளங்களில் பல கிலோமீட்டர் தூரத்துக்கு ஆயிரக்கணக்கான விவசாயிகள் நிரந்தரமாகவே தங்கிவிட்டனர். அங்கு ஒரு ரயில்கூட இயக்கப்படவில்லை. இரவு பகலாகத் தண்டவாளத்திலேயே படுத்து உறங்கினார்கள். திருச்சி அருகே உள்ள குடமுருட்டி தண்டவாளத்தில் நெல் நாற்றுகளை நட்டு விவசாயிகள் போராட்டத்தில் ஈடுபட்டார்கள். பெரிய ரயில் நிலையங்கள் மட்டுமல்லாமல் சின்னஞ்சிறு கிராமங்களிலும் ரயில்கள் மறிக்கப்பட்டன.

. திருநெல்வேலி, தூத்துக்குடி, கன்னியாகுமரி, கோயம்புத்தூர், திருப்பூர், மதுரை, விருதுநகர் எனக் காவிரி நீர் பாயாத மாவட்டங்களிலும் முழு வீச்சுடன் ரயில் மறியல் போராட்டங்கள் நடைபெற்றன. பிரதமர் நரேந்திர மோடிக்கு எதிராகவும், மத்திய அரசுக்கு எதிராகவும் எழும்பிய ஆவேச முழக்கங்கள் அதிர வைத்தன. கிட்டத்தட்ட 60 ஆயிரத்துக்கும் அதிகமானோர் கைது செய்யப்பட்டனர்.

. இந்நிலையில், காவிரி உரிமை மீட்புக்குழுவின் அவசரக் கூட்டம், கடந்த அக்டோபர் 19-ம் தேதி

. தஞ்சாவூரில் நடைபெற்றது. அதில், காவிரி மேலாண்மை வாரியம் அமைக்க மறுக்கும் மத்திய அரசுக்கு எதிராக ஒத்துழையாமை இயக்கம் நடத்த முடிவெடுக்கப்பட்டது. இக்கூட்டம் குறித்துப் பேசிய ஒருங்கிணைப்பாளர் பெ. மணியரசன் “தமிழ்நாட்டில் உள்ள நாடாளுமன்ற உறுப்பினர்கள் தங்களது பதவிகளை ராஜினாமா செய்ய வேண்டும். தமிழ்நாட்டுக்கு மத்திய அமைச்சர்கள் வந்தால், மக்கள் கறுப்புக் கொடி காட்ட வேண்டும். மத்திய அரசின் விருதுகளைப் பெற்ற திரைப்படக் கலைஞர்கள், அறிஞர்கள், ஆசிரியர்கள், இலக்கியவாதிகள் தங்களது விருதினை மத்திய அரசுக்குத் திருப்பி அனுப்ப வேண்டும். விருது பெற்றவர்களை இதுசம்பந்தமாக நேரில் சந்தித்து வலியுறுத்த உள்ளோம். விவசாயிகளையும் இதில் களம் இறங்கக் கேட்கவுள்ளோம். இது தொடர்பாகத் தொடர் பிரசாரக் கூட்டங்களையும் நடத்த இருக்கிறோம்” என்றார்.

. மக்களுக்குப் பாதிப்பு ஏற்படாதா?

. இப்போராட்டம் வெற்றிகரமாக நடைபெற்று இருப்பது தமிழ்நாட்டில் உள்ள பெரும்பான்மையான மக்களை மனநிறைவு அடையச் செய்துள்ளது. அதேசமயம் ரயிலில் பயணித்தவர்களுக்குச் சிரமங்களை ஏற்படுத்தியிருக்கிறது. இதற்கு மாற்றாக மத்திய அரசு அலுவலகங்களை முற்றுகையிடும் போராட்டங்கள் நடத்தலாமே என்ற யோசனை பரவலாக எழுந்துள்ளது.

. துகுறித்து மார்க்சிஸ்டு கம்யூனிஸ்டு கட்சியின் தமிழ்நாடு மாநிலச் செயலாளர் ஜி.ராமகிருஷ்ணனிடம் பேசியபோது ‘இப்போராட்டங்களால் மக்களுக்குச் சிரமம் ஏற்படுகிறது என்பது உண்மைதான். ஆனால் தமிழ்நாட்டின் ஒட்டுமொத்த மக்களில் ஒரு சிறுபகுதியினர்தான், தவிர்க்க முடியாத காரணங்களால் இந்நாட்களில் பயணம் மேற்கொள்கிறார்கள். நீண்டகாலக் கோரிக்கைக்காக, இதுபோன்ற கஷ்டங்களை முழு மனதுடன் ஏற்றுக்கொண்டு ஆதரவளிக்க வேண்டும். போராட்டங்களின் நோக்கமே இதுதான். மத்திய அரசு அலுவலகங்கள் முன்பு போராட்டம் நடத்தினாலும் மக்களுக்குப் பாதிப்பு ஏற்படத்தான் செய்யும்” என்றார்.

. பாதகம் செய்த ஆய்வுக்குழு!

.

மத்திய நீர்வள ஆணையத்தின் தலைவர் ஜி.எஸ்.ஜா தலைமையில் அமைக்கப்பட்ட காவிரி உயர்நிலை தொழில்நுட்பக் குழு கர்நாடகம், தமிழ்நாடு, கேரளா, புதுச்சேரி ஆகிய மாநிலங்களின் நீர் இருப்பு, நீர்த் தேவை உள்ளிட்டவற்றை நேரில் ஆய்வு செய்து, உச்சநீதிமன்றத்தில் அறிக்கை தாக்கல் செய்துள்ளது. இதில் தமிழ்நாட்டுக்குப் பாதகம் இழைத்துள்ளதாகக் குற்றச்சாட்டுகள் எழுந்துள்ளன. இதுகுறித்துப் பேசிய தமிழக உழவர் முன்னணியின் ஆலோசகர் கி.வெங்கட்ராமன், “கர்நாடக மாநிலம், மண்டியாவில் கரும்பு விவசாயிகள்தான் அதிகம். சர்க்கரை ஆலைகளின் மோசடிகளால், கடன் சுமைக்கு ஆளான விவசாயிகள் தற்கொலை செய்துகொண்டனர். ஆனால், அவர்கள் வறட்சியால் தற்கொலை செய்துகொண்டது போல் ஆய்வுக்குழு சொல்கிறது. தமிழ்நாட்டில் காவிரி டெல்டா மாவட்டங்களில் உண்மையாகவே வறட்சியினால் பயிர்கள் பாதிக்கப்பட்டு, கடன் சுமைக்கு ஆளாகி இருபத்தைந்துக்கும் மேற்பட்ட விவசாயிகள் தங்களது உயிரை மாய்த்துகொண்டனர். இதை ஆய்வுக்குழு பதிவு செய்யவே இல்லை.

கர்நாடகா, காவிரி நீர் தராததால் கடந்த 5 ஆண்டுகளாகத் தமிழ்நாட்டின் காவிரி டெல்டா மாவட்டங்களில் குறுவைச் சாகுபடி நடைபெறவில்லை. இதனால் இங்குள்ள விவசாயிகளுக்கு வாழ்வாதார இழப்பு தொடர்ந்துகொண்டே இருக்கிறது. இந்த ஆண்டு 4 லட்சம் ஏக்கர் குறுவைச் சாகுபடி இழப்பையாவது ஆய்வுக்குழு தனது அறிக்கையில் பதிவு செய்திருக்க வேண்டும். அதையும் செய்யவில்லை. தற்போது, சம்பாச் சாகுபடிக்குத் திறக்க வேண்டிய தண்ணீர் அளவையும் ஆய்வுக்குழு பரிந்துரைக்கவில்லை” என்றார்.

. கருகும் சம்பா...கவலைப்படாத காவிரிக் குழு!

.

டெல்டா மாவட்டங்களின் விவசாயச் சங்கங்களின் கூட்டமைப்பு பொதுச்செயலாளர் ஆறுபாதி கல்யாணம், “கர்நாடகாவில் 4.27 லட்சம் ஏக்கர் நிலத்தில் பயிரிடப்பட்டுள்ள பயிர்களுக்கு 36.38 டி.எம்.சி தண்ணீர் தேவைப்படுவதாக காவிரி உயர்நிலை தொழில்நுட்பக் குழு சொல்கிறது. ஆனால், தமிழ்நாட்டில் 4.25 லட்சம் ஏக்கர் நிலத்தில் நேரடி நெல் விதைப்புச் செய்யப்பட்டுக் கருகிக் கொண்டிருக்கும் சம்பாப் பயிர்கள் குறித்து இக்குழு கொஞ்சமும் கவலைப்படவில்லை.

சுமார் 5 லட்சம் ஏக்கர் சம்பாச் சாகுபடி ஆரம்ப நிலையிலேயே கைவிடப்பட்டுள்ளது. இதனால், இங்குள்ள விவசாயிகளுக்கு ஏராளமான வருவாய் இழப்பு ஏற்பட்டுள்ளது. இந்தத் தகவல்களை எல்லாம் திட்டமிட்டே உள்நோக்கத்துடன் ஆய்வுக்குழு மறைத்துவிட்டது. கோடைச் சாகுபடிக்கு காவிரி நீரைப் பயன்படுத்தக்கூடாது என நடுவர்மன்ற தீர்ப்பில் சொல்லப்பட்டுள்ளது. ஆனால், கர்நாடகா காவிரி நீரை தாராளமாகப் பயன்படுத்திக் கோடை சாகுபடி செய்கிறது. இதனால்தான் மே மாதத்துக்குப் பிறகு, கர்நாடக அணைகளில் தண்ணீர் குறைகிறது. இந்த உண்மையையும் நயவஞ்சகமாக ஆய்வுக்குழு மறைத்துவிட்டது. காவிரி ஆற்றோடு இணைக்கப்பட்டுள்ள அணைகள், நூற்றுக்கணக்கான ஏரிகளையும் மத்தியக்குழு ஆய்வு செய்திருக்க வேண்டும்.

பெங்களூரு நகரின் குடிநீருக்குக் காவிரி நீர் தேவை என கர்நாடகா சொல்கிறது. கர்நாடகாவின் கிருஷ்ணா நதியில் உள்ள அலமாட்டி அணைக்கு ஜூன் முதல் அக்டோபர் வரை 420 டி.எம்.சி தண்ணீர் வந்துள்ளது. நாராயணபுரம் அணைக்கு 305 டி.எம்.சி தண்ணீர் வந்துள்ளது. இதுபோல், கர்நாடகாவில் காவிரி உள்பட கிருஷ்ணா, கோதாவரி, பாலாறு என ஆற்று நீர் ஆதாரங்கள் ஏராளமாக உள்ளன. அவற்றில் உபரி நீர் அதிகளவில் கிடைக்கிறது. அதைப் பயன்படுத்திப் பெங்களூரின் குடிநீர்த் தேவையை எளிதாக நிறைவு செய்துகொள்ளலாம். ஆனால், இதை ஆய்வுக்குழு வலியுறுத்தவில்லை. தமிழ்நாட்டுக்குப் பெரிய அளவிலான ஆற்று நீர் ஆதாரம் காவிரி மட்டும்தான். இதை ஆய்வுக்குழு பதிவு செய்யவில்லை” என அடுக்கடுக்கான குற்றச்சாட்டுகளை முன்வைத்தார்.

காவிரி நதிநீர்ப் பங்கீடு.... மத்திய அரசை மிரள வைத்த மறியல் போராட்டங்கள்!

Vikatan Correspondent