சிட்லிங்கி... இயற்கைக்குத் திரும்பிய 300 விவசாயிகளின் வெற்றிக் கதை! - 4

சே லம் மாவட்டம் கல்வராயன் மலைத்தொடருக்கும் சித்தேரி மலைத்தொடருக்கும் இடையில் அமைதியான சூழலில் அமைந்திருக்கும் பகுதி, சிட்லிங்கி பள்ளத்தாக்கு. தர்மபுரி மாவட்டத்தில் உள்ள இப்பள்ளத்தாக்கு விவசாயிகள், ‘சிட்லிங்கி இயற்கை விவசாயிகள் கூட்டமைப்பு’ என்ற அமைப்பின் மூலம் அறுவடை முதல் விற்பனை வரை அனைத்துப் பணிகளையும் வெற்றிகரமாக மேற்கொண்டு வருகிறார்கள். அவர்களின் வெற்றிப்பயணம் குறித்த குறுந்தொடர் இது...

. சிட்லிங்கி இயற்கை விவசாயிகள் கூட்டமைப்பில் உள்ள ஆண்கள், விவசாயப் பணிகளை மேற்கொள்கிறார்கள். அவர்கள் விளைவிக்கும் பொருட்களைப் பதப்படுத்துதல், மதிப்புக் கூட்டுதல் போன்ற வேலைகளைப் பெண்கள் குழுக்கள் செய்கின்றன. ஏ.கே தண்டாவில் உள்ள பூபதி மகளிர் விவசாயக் குழுதான் ‘மார்க்கெட்டிங்’ மையத்தைக் கவனித்து வருகிறது. இம்மையத்தில், சிறுதானியங்கள், பயறு வகைகள் உள்ளிட்ட இயற்கை விளைபொருட்கள் அனைத்தும் பதப்படுத்தப்பட்டு, சேமிக்கப்படுகின்றன. தேவைக்கு ஏற்றவாறு பொருட்களைப் பல்வேறு ஊர்களுக்கு அனுப்பி வைக்கும் வேலையையும் இக்குழுதான் செய்து வருகிறது.

பருப்பு உடைக்கும் இயந்திரம், மாவு அரைக்கும் இயந்திரம், சலிக்கும் இயந்திரம், உமி நீக்கும் இயந்திரம், பேக்கிங் இயந்திரம் போன்ற அனைத்து இயந்திரங்களையும் பெண்களே கையாள்கிறார்கள். இம்மையத்தில் விளைபொருட்களைக் காய வைப்பதற்கான களமும் உள்ளது. சுற்றியுள்ள 7 கிராமங்களின் விளைபொருட்கள், இங்கேதான் கொள்முதல் செய்யப்படுகின்றன. விவசாயிகள் கொண்டு வரும் விளைபொருட்களை விவசாயிகளே எலக்ட்ரானிக் எடை இயந்திரத்தில் எடை போட்டுக் கொள்கிறார்கள். உடனே அவர்களுக்கு ரசீது வழங்கப்படுகிறது. அந்த ரசீதை கூட்டமைப்பில் கொடுத்துப் பணத்தைப் பெற்றுக்கொள்ளலாம்.

. உறுப்பினர்களுக்குக் கடனும் உண்டு!

12 உறுப்பினர்களைக் கொண்ட பூபதி மகளிர் விவசாயக்குழுவுக்கு குப்பி என்பவர் தலைவர். குழுவின் செயல்பாடுகள் குறித்து குப்பியிடம் பேசினோம். “பொருட்களோட தரத்துல ரொம்பக் கவனமா இருப்போம். எங்க உறுப்பினர்களுக்குச் செய்ற வேலையை வெச்சுதான் சம்பளம். ஒரு நாளைக்கு 10 ரூபாய்ல இருந்து 300 ரூபாய் வரைகூட சம்பாதிக்க முடியும். எங்களுக்கு மின்சாரம்தான் பெரிய பிரச்னை. அதனால சில சமயங்கள்ல இரவுலகூட வேலை பார்க்க வேண்டியிருக்கும். நாங்க, விவசாயம் செஞ்சுகிட்டே ஆடு, மாடுகளையும் வளர்க்கிறோம். சிலர் எம்ப்ராய்டிரிங் வேலையும் செய்றாங்க. அதனால சங்கத்துல சம்பளம் குறைவா கிடைச்சாலும் சமாளிச்சுற முடியும். நாங்க இந்த வேலைகளைக் கத்துக்கிறதுக்காக, வெளியூர்களுக்குப் போய் பயிற்சி எடுத்திருக்கோம். குழு உறுப்பினர்களுக்கு நம்ம ஆஸ்பத்திரியில 4 ஆயிரம் ரூபாய் வரைக்கும் இலவச மருத்துவ உதவி கிடைக்கிது. குழுவிலேயே சீட்டுப் பணம் பிடிச்சு, குழுவுல உள்ளவங்களுக்கே 2 ரூபா வட்டிக்குக் கடன் கொடுக்கிறோம்” என்றார்.

. இதேபோல இங்கு 11 மகளிர் குழுக்கள் இயங்கி வருகின்றன. இக்குழுவிலுள்ள 166 பெண்களுக்கும் வாழ்வாதாரமும், பொருளாதாரச் சுதந்திரமும் கிடைத்திருக்கின்றன. எஸ்.தாதாப்பட்டியிலிருக்கும் ‘முத்துலட்சுமி அம்மை மகளிர் குழு’வில் 10 பெண் உறுப்பினர்கள். இவர்கள், ‘மஞ்சள் குளியல் சோப்பு’ தயாரித்து வருகிறார்கள்.

“கேரளா, புதுச்சேரினு போய் பயிற்சி எடுத்துட்டு வந்து 10 வருஷமா சோப்பு தயாரிச்சிட்டிருக்கோம். தேவையைப் பொறுத்து மாசம் ஆயிரம் சோப்புகள் வரை உற்பத்தி செய்றோம். ஒரு ஆள், 80 சோப்பு செஞ்சா, 100 ரூபா கூலி கிடைக்கும். சோப்பை சொசைட்டி மூலமா விற்பனை செய்றோம். ஒரு சோப்பை நாங்க 23 ரூபாய்னு சொசைட்டிக்குக் கொடுப்போம். அவங்க 25 ரூபாய்க்கு விற்பனை செய்வாங்க. விற்பனை மூலமா கிடைக்கிற பணத்தை வங்கியில போட்டுடுவோம். அதுல கிடைக்கிற லாபத்தை உறுப்பினர்கள் எல்லாரும் பிரிச்சுக்குவோம். குழு உறுப்பினர்களுக்குக் கடனும் கொடுப்போம்” என்றனர், இக்குழுவின் உறுப்பினர்கள்.

40 கடைகளில் இயற்கைப் பொருட்கள்!

இயற்கை விளைபொருட்களைச் சந்தைப்படுத்தும் ஒருங்கிணைப்பாளர் முனுசாமியிடம் பேசினோம். “எனக்குச் சொந்த ஊர் பக்கத்துல காளியங்கொட்டாய் கிராமம். வீட்ல விவசாயம் பாக்கறாங்க. நான் இங்க விற்பனை செய்யுற வேலைகளைப் பாத்துக்கறேன். இமெயில், தொலைபேசி மூலமா ஆர்டர் எடுப்போம். ஆர்டரைப் பொறுத்து குழுக்கள்கிட்ட பொருட்களை உற்பத்தி செய்யச் சொல்வோம். அரிசி, சிறுதானியங்கள், மாவு, பிஸ்கட், பருப்புனு பல பொருட்களுக்குத் தேவை இருக்கு. திருவனந்தபுரம், கொச்சி, கோழிக்கோடு, சென்னை, பெங்களூரு, பொள்ளாச்சி, திருப்பூர், திருநெல்வேலி, கோயம்புத்தூர், புதுச்சேரி, மதுரை, சேலம், பரமத்தி வேலூர், சத்தியமங்கலம், சீர்காழி, நாமக்கல்னு பல ஊர்கள்ல இருக்குற 40 கடைகளுக்குச் சப்ளை செய்யுறோம். மாசத்துக்கு ஒன்றரை லட்ச ரூபாய் வரை வருமானம் கிடைக்குது.

சிட்லிங்கியிலேயே ஒரு இயற்கை அங்காடியையும் நடத்திட்டு இருக்கோம். பதப்படுத்தப்பட்ட மற்றும் மதிப்புக் கூட்டப்பட்ட பொருட்களும் பயோ-உரங்களும் இங்க விற்பனை செய்றோம். கேழ்வரகு, கம்பு, தினை, சாமை மாவு வகைகள், முளைகட்டிய தானியங்கள், சாம்பார், ரசப் பொடி வகைகள், நிலக்கடலை, சிவப்பரிசி, தேங்காய் எண்ணெய், வெல்லம், மல்லி, மல்லித் தூள், மஞ்சள், மஞ்சள் தூள், மிளகாய், மிளகாய்த் தூள், மக்காச்சோளம், கடலைப் பருப்பு, உளுந்து, கொள்ளுனு எல்லாப் பொருள்களையும் விற்பனை செய்றோம்” என்றார்.

. அப்போ கெடுக்கும் வேலை... இப்போ காக்கும் வேலை!

ஆரம்பக் காலத்தில் விவசாயம் நொடிந்துபோனதால் வேலைக்காக வெளியூர் சென்ற பலரும் இப்போது ஊர் திரும்பி வருகிறார்கள். அவர்களில் துரை, சின்னத்துரை ஆகிய இருவர், சிட்லிங்கி இயற்கை விவசாயக் கூட்டமைப்பிலேயே பணிபுரிகிறார்கள்.

.

“திருப்பூர்ல பனியன் கம்பெனியில், கட்டிங் பிரிவில் 10 வருஷம் சூப்பர்வைசரா வேலை செஞ்சேன். இப்போ, கூட்டமைப்புல விவசாயிகளை ஒருங்கிணைக்கிற வேலையைச் செஞ்சுகிட்டிருக்கேன். 30 விவசாயக் குழுக்களும் மாசாமாசம் போடுற கூட்டத்துல கலந்துக்குவேன். அவங்களோட பிரச்னைகளைக் கேட்டு அதுக்கேத்த ஆலோசனைகளைச் சொல்வேன். விவசாயிகளுக்குத் தேவையான கடன்களை சொசைட்டி மூலமா ஏற்பாடு செய்றோம். விவசாயிகளை மாசாமாசம் சேமிக்கவும் வைக்கிறோம். நபார்டு மூலமா, ஐந்தரை லட்ச ரூபாய் கடன் வாங்கி, பொருட்களை எடுத்துச் செல்ல போக்குவரத்துக்கு வேன் வாங்கினோம். அதையும் விவசாயிகளுக்கு வாடகைக்கு விடுறோம். விவசாயிங்களோட பசங்களுக்குக் கல்வி உதவித் தொகையும் உண்டு. 7 பேர் கொண்ட செயற்குழுதான் விளைபொருட்களுக்கு விலை நிர்ணயம் செய்யும். எங்களோட இயற்கை மஞ்சளுக்கு இப்போ ஏக கிராக்கி இருக்கு” என்றார், துரை.

தொடர்ந்து பேசிய சின்னத்துரை, “நான் 15 வருஷம் வெளியூர்ல வேலை பார்த்துட்டு இங்க வந்திட்டேன். என் மனைவி சித்ரா மருத்துவப் பிரிவுல வேலை பாக்கிறாங்க. முன்னாடி சுற்றுச்சூழல கெடுக்கற கம்பெனியில இயந்திரங்களோட வேலை செஞ்சேன். இப்போ சூழலைப் பாதுகாக்குற அமைப்புல மனுஷங்களோட வேலை செய்றேன். இங்க, கணக்கு வழக்கு, விற்பனை சம்பந்தமான வேலைகளைச் செய்றேன். அதோட பொருட்களோட தரத்தை மேம்பாடு பண்றது, பைகளோட வடிவமைப்பு வேலைகளையும் செய்றேன்” என்றார்.

கூட்டமைப்பின் தேர்தல் நடக்கும் விதம், பொறுப்பாளர்களின் பணிகள் போன்றவை அடுத்த இதழில்...

. சிட்லிங்கி செல்வது எப்படி..?

ஏ ராளமான வாசகர்கள் ‘‘சிட்லிங்கி செல்வது எப்படி? சிட்லிங்கி பள்ளத்தாக்கு இயற்கை விவசாயிகள் கூட்டமைப்பு முகவரியை ‘பசுமை விகடன் இதழில் வெளியிடுங்கள்’’ எனக் கேட்ட வண்ணம் உள்ளனர். இதோ அதன் விவரங்கள்...

தருமபுரி மாவட்டத்திலுள்ள சிட்லிங்கிக்கு சேலம், ஆத்தூர், தருமபுரி, திருவண்ணாமலை மற்றும் கிருஷ்ணகிரி வழியாகச் செல்லலாம்.

நேரடியாக சிட்லிங்கிக்குச் செல்லும் பேருந்துகள் விவரம்:

. கார் போன்ற வாகனங்கள் மூலம் செல்வதற்கான வழிகள்:

. சேலம்-வாழப்பாடி-பேளூர்-தும்பல்-சிட்லிங்கி ஆத்தூர்-ஏத்தாப்பூர்-தும்பல்-

. சிட்லிங்கி தருமபுரி-மொரப்பூர்-அரூர்-தீர்த்தமலை-சிட்லிங்கி கிருஷ்ணகிரி-

. காரிமங்கலம்-கம்பைநல்லூர்-மொரப்பூர்-அரூர்-தீர்த்தமலை-சிட்லிங்கி திருவண்ணாமலை-தண்டராம்பட்டு-தானிப்பாடி-நரிப்பள்ளி-சிட்லிங்கி

. தொடர்புக்கு, ஒருங்கிணைப்பாளர், மஞ்சுநாதன், சிட்லிங்கி பள்ளத்தாக்கு இயற்கை விவசாயிகள் கூட்டமைப்பு சிட்லிங்கி அஞ்சல், அரூர் வட்டம்,

தருமபுரி மாவட்டம்-636906 செல்போன்: 98430 96854 அலுவலகம்: 89038 46499 மின்னஞ்சல்: svad.organic@gmail.com, இணையம்: www.svadorganic.com

. அண்ணாதுரையும், துரையும்!

. கடந்த இதழில், சிட்லிங்கி இயற்கை விவசாயக் கூட்டமைப்பின் தற்போதைய தலைவர் அண்ணாதுரை, படத்துக்கு பதிலாக, துரை என்பவரின் படம் தவறாக இடம் பெற்றுவிட்டது. ஆரம்பக் காலத்தில் விவசாயம் நொடிந்துபோனதால் வேலைக்காக வெளியூர் சென்ற பலரும் இப்போது ஊர் திரும்பிவருகிறார்கள். அவர்களில் துரையும் ஒருவர். இப்போது, சிட்லிங்கி இயற்கை விவசாயக் கூட்டமைப்பிலேயே பணிபுரிகிறார்கள்.

சிட்லிங்கி... இயற்கைக்குத் திரும்பிய 300 விவசாயிகளின் வெற்றிக் கதை! - 4

Vikatan Correspondent