Published:Updated:

மானியங்களை அள்ளிக் கொடுக்கும் பட்டுவளர்ச்சித் துறை!

மானியங்களை அள்ளிக் கொடுக்கும் பட்டுவளர்ச்சித் துறை!
பிரீமியம் ஸ்டோரி
மானியங்களை அள்ளிக் கொடுக்கும் பட்டுவளர்ச்சித் துறை!

மனை அமைக்க ரூ.87,500... சொட்டு நீருக்கு ரூ.30,000...திட்டங்கள்கு.ராமகிருஷ்ணன் - படங்கள்: ம.அரவிந்த்

மானியங்களை அள்ளிக் கொடுக்கும் பட்டுவளர்ச்சித் துறை!

மனை அமைக்க ரூ.87,500... சொட்டு நீருக்கு ரூ.30,000...திட்டங்கள்கு.ராமகிருஷ்ணன் - படங்கள்: ம.அரவிந்த்

Published:Updated:
மானியங்களை அள்ளிக் கொடுக்கும் பட்டுவளர்ச்சித் துறை!
பிரீமியம் ஸ்டோரி
மானியங்களை அள்ளிக் கொடுக்கும் பட்டுவளர்ச்சித் துறை!

கால்நடை வளர்ப்புக்கு அடுத்தபடியாக, விவசாயிகளின் உபதொழிலாக இருப்பது பட்டுப்புழு வளர்ப்பு. பட்டு நூலுக்கான தேவை அதிகரித்துக்கொண்டே வருவதால், பட்டுப்புழு வளர்ப்பும் அதிகரிக்க வேண்டிய கட்டாயத்தில் இருக்கிறது. விவசாயிகளைப் பட்டுப்புழு வளர்ப்பில் ஈடுபட வைப்பதற்காக தமிழ்நாடு பட்டுவளர்ச்சித் துறை பல்வேறு திட்டங்களைச் செயல்படுத்திவருகிறது.

மானியங்களை அள்ளிக் கொடுக்கும் பட்டுவளர்ச்சித் துறை!

சேலத்தில் உள்ள பட்டுவளர்ச்சித் துறை இயக்குநர் அலுவலகத்தை மையமாகக் கொண்டு இயங்கிவரும் இத்துறையின் கீழ்... தமிழ்நாட்டில் 5 மண்டல அலுவலகங்களும், 19 மாவட்டங்களில் உதவி இயக்குநர் அலுவலகங்களும் இயங்கி வருகின்றன. பெரும்பாலான மாவட்டங்களில் பட்டு வளர்ப்புத் தொழில்நுட்ப சேவை மையமும் செயல்பட்டு வருகிறது. இந்த அலுவலகங்கள் மூலமாக, விவசாயிகளுக்குப் பட்டு வளர்ப்பு தொழில்நுட்ப ஆலோசனைகள் மற்றும் மானிய உதவிகள் வழங்கப்படுகின்றன.

இதுகுறித்து, தமிழ்நாடு பட்டுவளர்ச்சித் துறையின் திருச்சி மண்டல துணை இயக்குநர் மல்லிகாவிடம் பேசினோம். அவர் பகிர்ந்துகொண்ட விஷயங்கள் இங்கே...
 
“மல்பெரி சாகுபடி செய்து, பட்டு வளர்ப்பில் ஈடுபடும் விவசாயிகளுக்குக் குறுகிய காலத்தில் நிறைவான லாபம் கிடைக்கிறது. குறிப்பாக, மாத வருமானம் நிச்சயம். இத்தொழிலில் இறங்க நினைக்கும் விவசாயிகளுக்கு முழுமையான ஈடுபாடு அவசியம். அதோடு, இதற்குத் தண்ணீர் வளமும் வடிகால் வசதியும் முக்கியமானது. மல்பெரி சாகுபடி செய்யும் நிலத்தில் கார அமில நிலை 6.5 முதல் 7.5 என்ற அளவீட்டுக்குள் இருக்க வேண்டும். செம்மண், கரிசல் மண், வண்டல் கலந்த செம்மண், வண்டல் கலந்த கரிசல் மண் நிலங்கள் இதற்கு ஏற்றவை. களிமண் உகந்தது அல்ல.

பட்டுப்புழு வளர்க்க ஆசைப்படும் விவசாயிகள், முதல்கட்டமாகப் பட்டு வளர்ப்புச் சேவை மையத்துக்கோ எங்களது மற்ற அலுவலகங்களுக்கோ சென்று, இத்தொழில் தொடர்பான அடிப்படையான அம்சங்களைத் தெரிந்துகொள்வது அவசியம். தங்களுக்கு ஏற்றதாக இருந்தால், அதற்கான ஐந்து நாள் பயிற்சிக்கு விண்ணப்பிக்க வேண்டும்.

ஓசூரில் உள்ள தமிழ்நாடு பட்டு வளர்ச்சி பயிற்சி நிலையத்தில் இதற்கான பயிற்சிகள் அளிக்கப்படும். உணவு மற்றும் தங்கும் வசதி இலவசம். இப்பயிற்சியில், மல்பெரி சாகுபடி செய்யும் முறை, பட்டுக்கூடு வளர்ப்பு முறை குறித்த அனைத்து தகவல்களும் அடங்கிய கையேடு ஒன்றும் வழங்கப்படும். அதோடு, இரண்டாயிரம் ரூபாய் விலை மதிப்புக் கொண்ட கைத்தெளிப்பான், ஒட்டுண்ணி அட்டைகள், அறுவடைக் கருவிகள் உள்ளிட்ட தளவாடப் பொருள்களும் வழங்கப்படும். அரசுப் பண்ணைகள் மற்றும் தனியார் பண்ணைகளில் தரமான மல்பெரி நாற்றுகள் வாங்குவதற்கும் வழி காட்டப்படும்.

நடவு செய்த 2-3 மாதங்களில் மல்பெரி செடி வளர்ச்சி பெற்றுவிடும். பிறகு, அதன் புகைப்படங்கள், சிட்டா, அடங்கல் உள்ளிட்ட ஆவணங்களுடன் நடவு மானியத்துக்கு விவசாயிகள் விண்ணப்பிக்கலாம். ஒரு ஏக்கருக்கு 10,500 ரூபாய் வழங்கப்படும். ஒரு விவசாயி அதிகபட்சம் ஐந்து ஏக்கருக்கு நடவு மானியம் பெறலாம்.

ஒட்டுமொத்த விகடனுக்கும் ஒரே ஷார்ட்கட்!

மானியங்களை அள்ளிக் கொடுக்கும் பட்டுவளர்ச்சித் துறை!

சொட்டுநீர்ப் பாசனம் அமைக்க சிறு, குறு விவசாயிகளுக்கு ஒரு ஏக்கருக்கு 30 ஆயிரம் ரூபாய் என மானியம் வழங்கப்படும். ஐந்து ஏக்கருக்கு மேல் நிலம் வைத்திருக்கும் விவசாயியாக இருந்தால், ஏக்கருக்கு 22,500 ரூபாய் மானியம் கிடைக்கும். நடவு செய்த 4-5 மாதங்களில் மல்பெரி இலைகளை அறுவடை செய்து, பட்டுப்புழு வளர்க்கத் தொடங்கலாம். அதற்கு முன்னதாக எங்கள் வழிகாட்டுதலின்படி பட்டுப்புழு வளர்ப்பு மனை அமைக்க வேண்டும்.

இரண்டு ஏக்கரில் மல்பெரி சாகுபடி செய்பவர்கள், ஆயிரம் சதுர அடியில் (50 அடி நீளம், 20 அடி அகலம்) புழு வளர்ப்பு மனை அமைக்க வேண்டும். அஸ்திவாரம் அமைப்பதில் துவங்கி, அடுத்தடுத்த கட்டுமான நிலைகளில் ஐந்து புகைப்படங்கள் மற்றும் ஆதார் கார்டு உள்ளிட்ட ஆவணங்களுடன் புழு வளர்ப்பு மனை மானியத்துக்கு விண்ணப்பிக்கலாம். அதற்கு 87,500 ரூபாய் மானியமாக வழங்கப்படும்.

இரண்டு ஏக்கருக்கு மேல் மல்பெரி சாகுபடி செய்யும் விவசாயிகள், 1,500 சதுர அடியில் (75 அடி நீளம், 20 அடி அகலம்) புழு வளர்ப்பு மனையை அமைக்க வேண்டும். இதற்கு 82,500 ரூபாய் மானியம் வழங்கப்படும். புழு வளர்ப்புக்குத் தேவையான 52,500 ரூபாய் விலை மதிப்புக் கொண்ட தளவாடப் பொருள்கள் இலவசமாக வழங்கப்படும்.

80 சதவிகிதம் வெற்றிகரமாகப் பட்டுக்கூடு உற்பத்தி செய்யும் விவசாயிகளுக்கு ஒரு கிலோவுக்கு 10 ரூபாய் வீதம் ஊக்கத்தொகை வழங்கப்படும். உதாரணமாக, ஒரு மாதத்துக்கு 200 முட்டைத் தொகுதிகள் வளர்த்து, 160 கிலோ பட்டுக்கூடு மகசூல் எடுத்தால் 1,600 ரூபாய் ஊக்கத்தொகை வழங்கப்படும். ஒரு கிலோ பட்டுக்கூட்டுக்குச் சராசரியாக, 400 ரூபாய் வீதம் 160 கிலோவுக்கு 64 ஆயிரம் ரூபாய் வருமானம் கிடைக்கும். இதில் செலவுகள் போக, 52 ஆயிரம் ரூபாய் நிகர லாபம் கிடைக்கும். இதுபோல் ஆண்டுக்கு 8 முறை வருமானம் எடுக்க வாய்ப்புள்ளது. புதுக்கோட்டை, திருச்சி, சேலம், ஓசூர், தருமபுரி உள்ளிட்ட ஊர்களில் உள்ள பட்டுக்கூடு அங்காடிகளில் பட்டுக்கூடுகளை விற்பனை செய்யலாம்” என்று அழைப்பு விடுத்தார் மல்லிகா.

தொடர்புக்கு, மண்டல துணை இயக்குநர், தமிழ்நாடு பட்டுவளர்ச்சித் துறை, திருச்சி. தொலைபேசி: 0431 2464736

“எல்லா சலுகையும் கிடைச்சது”

மானியங்களை அள்ளிக் கொடுக்கும் பட்டுவளர்ச்சித் துறை!

ஞ்சாவூர் மாவட்டம், புனவாசல் கிராமத்தைச் சேர்ந்த விவசாயி காசிநாதன் பட்டுப்புழு வளர்த்து வருகிறார். அவரிடம் பேசியபோது, “நாலு ஏக்கர் நிலத்துல மல்பெரி வளர்த்து 1,500 சதுர அடியில் புழு வளர்ப்பு மனை அமைச்சிருக்கேன். மாசத்துக்கு, 300 கிலோ அளவுக்குப் பட்டுக்கூடு உற்பத்தி செஞ்சுக்கிட்டு இருக்கேன். இதுமூலமா மாசம் ஒரு லட்சத்து 20 ஆயிரம் ரூபாய் அளவுக்கு வருமானம் கிடைக்குது. பட்டுவளர்ச்சித் துறையில பயிற்சி எடுத்திட்டுதான் இந்தத் தொழில்ல இறங்கினேன். நடவு மானியம், புழு வளர்ப்பு மனை மானியம் உள்பட எல்லா சலுகையுமே பட்டு வளர்ச்சித் துறை மூலமா எனக்குக் கிடைச்சது” என்கிறார், காசிநாதன்.