Published:Updated:

வறட்சியிலும் வளமான லாபம் தரும் சின்ன வெங்காயம்...

வறட்சியிலும் வளமான லாபம் தரும் சின்ன வெங்காயம்...
பிரீமியம் ஸ்டோரி
வறட்சியிலும் வளமான லாபம் தரும் சின்ன வெங்காயம்...

ஒரு ஏக்கர்... ரூ1,79,600 லாபம்!மகசூல்கு.ராமகிருஷ்ணன் - படங்கள்: ராபர்ட்

வறட்சியிலும் வளமான லாபம் தரும் சின்ன வெங்காயம்...

ஒரு ஏக்கர்... ரூ1,79,600 லாபம்!மகசூல்கு.ராமகிருஷ்ணன் - படங்கள்: ராபர்ட்

Published:Updated:
வறட்சியிலும் வளமான லாபம் தரும் சின்ன வெங்காயம்...
பிரீமியம் ஸ்டோரி
வறட்சியிலும் வளமான லாபம் தரும் சின்ன வெங்காயம்...

சாயன விவசாயம் வளமான மண்ணை மலடாக மாற்றும். ஆனால், இயற்கை விவசாயம் மலடான மண்ணையும் வளமானதாக மாற்றும். இதை அனுபவபூர்வமாக உணர்ந்த எண்ணற்ற விவசாயிகள் தொடர்ந்து இயற்கை விவசாயத்தில் ஈடுபட்டு வருகிறார்கள். அவர்களை அவ்வப்போது அடையாளம் காட்டி வருகிறது, ‘பசுமை விகடன்’. அப்படி ஒருவர்தான் பெரம்பலூர் மாவட்டம், மேலபுலியூர் கிராமத்தைச் சேர்ந்த விவசாயி இளையராஜா. 

வறட்சியிலும் வளமான லாபம் தரும் சின்ன வெங்காயம்...

ஒரு பகல் பொழுதில், இளையராஜாவைச் சந்திக்க மேலபுலியூர் சென்றோம். அறுவடை செய்த வெங்காயத்தைப் பட்டறை கட்டிக்கொண்டிருந்த இளையராஜா நம்மை மகிழ்ச்சியோடு வரவேற்றுப் பேசினார்.

“எங்களுக்கு ரெண்டு ஏக்கர் நிலம் இருக்கு. உப்புத்தன்மை கொண்ட கருமண் நிலம். கிணற்றுப் பாசனம்தான். இயற்கை விவசாயத்துக்காக ரெண்டு மாடுகளும் இருக்கு. இந்த வருஷம் ஒரு ஏக்கர்ல சின்ன வெங்காயமும், அரை ஏக்கர்ல நெல்லும் சாகுபடி செஞ்சேன். இயற்கை முறையில் சின்ன வெங்காயத்துல நல்ல விளைச்சல் கிடைச்சிருக்கு.

நாங்க விவசாய குடும்பம்தான். நான் பத்தாவது வரை படிச்சிட்டு, எலக்ட்ரானிக் பொருள்களை விற்பனை செய்ற பிரதிநிதியா வேலை செஞ்சுட்டு இருந்தேன். அப்பப்போ விவசாயத்தையும் கவனிச்சுக்குவேன்.

அப்பெல்லாம், விவசாயத்துல வருமானம் சொல்லிக்கிற மாதிரி இல்லை. அதனால முழுசா விவசாயத்துல இறங்க பயமா இருந்துச்சு. 35 வருஷத்துக்கு முன்னாடி இந்த ரெண்டு ஏக்கர் நிலத்தை வாங்கும்போது நல்ல வளமாத்தான் இருந்துச்சு. எங்களுக்கு முன்னாடி இந்த நிலத்தை வெச்சிருந்தவங்க, இருபது மாடுகளுக்கு மேல வளர்த்தாங்க. தொடர்ச்சியா நிலத்துல சாணத்தைக் கொட்டி வளமா வெச்சிருந்தாங்க. நாங்க விவசாயம் செய்ய ஆரம்பிச்ச பிறகு, ரசாயன உரங்கள்தான் போட்டோம். எங்ககிட்ட இருந்த மாடுகளையும் நாங்க வித்துட்டதால, நிலத்துல எருவே போடலை. இயல்பாவே அதிக உப்புத்தன்மைகொண்ட கருமண்ணுங்கிறதால அதிகளவு ரசாயன உரங்கள் போடவும், நிலமே மலடாகிடுச்சு. ஒரு கட்டத்துல எவ்வளவு உரம் போட்டாலும் மகசூல் சரியா கிடைக்காத நிலைக்கு வந்துடுச்சு.

இந்தச் சூழ்நிலையிலதான் ஒரு கடையில் ‘பசுமை விகடன்’ புத்தகத்தைப் பார்த்தேன். அதுல, திண்டுக்கல்ல பசுமை விகடன் நடத்தின ‘ஜீரோ பட்ஜெட்’ பயிற்சி வகுப்புச் சம்பந்தப்பட்ட கட்டுரை வெளியாகி இருந்துச்சு. வளமில்லாத நிலத்துலகூட, இயற்கை விவசாயம் மூலமா விளைச்சலை அதிகப்படுத்த முடியும்னு எழுதியிருந்தாங்க. அப்போதான் எனக்கு நம்பிக்கை வந்துச்சு. அப்போதிருந்தே இயற்கை விவசாயத்தை ஆரம்பிச் சிட்டேன். அதிகளவுல எரு போட்டதோடு, கண்ணுல படக்கூடிய இலைதழைகளை எல்லாம் வெட்டிக்கொண்டு வந்து நிலத்துல போட ஆரம்பிச்சேன்.  

ஒட்டுமொத்த விகடனுக்கும் ஒரே ஷார்ட்கட்!

வறட்சியிலும் வளமான லாபம் தரும் சின்ன வெங்காயம்...

அதனால நிலத்துல நுண்ணுயிர்கள் பெருக ஆரம்பிச்சது. முதல் தடவையா இயற்கை விவசாயத்துல சின்ன வெங்காயத்தைதான் சாகுபடி செஞ்சேன்” என்று இயற்கை விவசாயத்துக்கு வந்த கதை சொன்ன இளையராஜா தொடர்ந்தார்.

“இயற்கை விவசாயத்துக்கு மாறின சமயத்துல ஏக்கருக்கு 800 கிலோ சின்ன வெங்காயம் கிடைச்சது. அப்புறம் படிப்படியா மகசூல் அதிகரிச்சது. போன வருஷம் ஏக்கருக்கு மூணே முக்கால் டன் சின்ன வெங்காயம் மகசூல் கிடைச்சது. இந்த முறை நாலே கால் டன் மகசூல் கிடைச்சிருக்கு. இந்த ஆண்டு கடுமையான வறட்சி. அதுலயும் இவ்வளவு மகசூல் கிடைச்சிருக்கு. மழை பெய்ஞ்சிருந்ததுனா இன்னும் கூடுதலா மகசூல் கிடைச்சிருக்கும். செலவே இல்லாம இவ்வளவு மகசூல்ங்கிறது மன நிறைவானதுதான்.

ரசாயன முறையில சாகுபடி செஞ்ச வெங்காயத்தை ரெண்டு மாசத்துக்குள்ள விற்பனை செஞ்சாகணும். இல்லாட்டி வெங்காயத்துக்குள் வெப்பம் அதிகமாகி அழுகிடும். ஆனால் இயற்கை விவசாயத்துல விளைவிச்ச சின்ன வெங்காயத்தை அஞ்சு மாசத்துக்கு மேல இருப்பு வெக்க முடியும். அப்படியே இருக்கும். அதில்லாம வெங்காயத்தோட நிறமும் நல்லா இருக்கும். நீர்ச்சத்து அதிகமா இருக்கும். விலையும் கூடுதலாகக் கிடைக்கும்” என்ற இளையராஜா, மகசூல் மற்றும் வருமானம் குறித்துக் கூறினார்.

வறட்சியிலும் வளமான லாபம் தரும் சின்ன வெங்காயம்...

“ஒரு ஏக்கர் நிலத்துல சின்ன வெங்காயம் சாகுபடி செஞ்சதுல, 4,250 கிலோ மகசூல் கிடைச்சது. இதுல, 2,500 கிலோவை விற்பனை செஞ்சுட்டேன். ஆயிரம் கிலோ வெங்காயத்தைக் கிலோ 35 ரூபாய்னு விற்பனை செஞ்சேன். 1,500 கிலோ வெங்காயத்தைக் கிலோ 45 ரூபாய்னு விற்பனை செஞ்சேன். அந்தவகையில மொத்தம் 1,02,500 ரூபாய் வருமானம் கிடைச்சது. விதைப்புல இருந்து விற்பனை வரை 45,400 ரூபாய் செலவு பண்ணியிருக்கேன். அதைக் கழிச்சா இப்போவே 57,100 ரூபாய் லாபம் கிடைச்சுடுச்சு.

இன்னும் கையில் 1,750 கிலோ வெங்காயம் இருக்கு. அதை, பட்டறைப் போட்டு பத்திரப்படுத்தி வெச்சிருக்கேன். வறட்சியால வெங்காய வரத்து குறைஞ்சுபோச்சு. இப்போ, சின்ன வெங்காயத்துக்கு விலை அதிகரிச்சுட்டே இருக்கு. அதனால இருப்பு வெச்சிருக்கிற நிறைய விவசாயிகள் விற்பனை செஞ்சுட்டு இருக்கிறாங்க. அடுத்த வர்ற வைகாசிப்பட்டத்துல விதை வெங்காயத்துக்கு நல்ல கிராக்கி இருக்கும். அப்போ விற்பனை செஞ்சா நல்ல விலை கிடைக்கும். கிலோ 100 ரூபாய் அளவு கூட விற்பனையாகலாம். குறைந்தபட்சம் 70 ரூபாய்னு விற்பனையானாக்கூட 1,750 கிலோவுக்கு 1,22,500 ரூபாய் விலை கிடைக்கும்னு எதிர்பார்க்கிறேன். மொத்தமா கணக்குப் பார்த்தா ஒண்ணே முக்கால் லட்ச ரூபாய்க்கு மேல லாபம் கிடைச்சுடும்” என்றார், சந்தோஷமாக.

தொடர்புக்கு:  இளையராஜா, செல்போன்: 95975 65787

இப்படித்தான் சாகுபடி செய்யணும்

ரு ஏக்கர் நிலத்தில் சின்ன வெங்காயம் சாகுபடி செய்யும் முறை குறித்து இளையராஜா சொன்ன விஷயங்கள் இங்கே...

சின்ன வெங்காயம் எல்லா வகையான மண்ணிலும் விளையும். வைகாசிப் பட்டத்தில் சாகுபடி செய்தால் 70-75 நாளில் அறுவடைக்கு வரும். புரட்டாசி, ஐப்பசியில் பயிர் செய்தால் 80-85 நாளில் அறுவடைக்கு வரும். ஆனால், வைகாசிப் பட்டத்தைவிட கூடுதல் மகசூல் கிடைக்கும். ஒரு ஏக்கர் நிலத்தில் விதைக்க 700 கிலோ விதை வெங்காயம் தேவை.

தேர்வு செய்த 1 ஏக்கர் நிலத்தில் 3 டன் எரு கொட்டி, 3 சால் உழவு ஓட்ட வேண்டும். பிறகு, முக்கால் அடி அகலம், அரையடி உயரத்தில் பார் அமைக்க வேண்டும். பார்களுக்கு இடையில் அரையடி இடைவெளி இருக்க வேண்டும். மண்ணை ஈரப்படுத்தி பாரின் இரு ஓரங்கள் மற்றும் பாரின் நடுவிலும் விதைக்கு விதை அரை அடி இடைவெளி இருக்குமாறு வெங்காயத்தை விதைக்க வேண்டும். விதை வெங்காயத்தின் வேர்ப்பகுதி மண்ணுக்குள் இருக்க வேண்டும். 4-ம் நாள் தண்ணீர் பாய்ச்ச வேண்டும். தொடர்ந்து மண்ணின் ஈரத்தன்மைக்கு ஏற்ப தண்ணீர் பாய்த்து வர வேண்டும்.

20 நாள்களுக்கு ஒரு முறை 200 லிட்டர் ஜீவாமிர்தத்தில், 10 கிலோ கடலைப்பிண்ணாக்கு கலந்து பாசன நீரில் விட வேண்டும். இதனால், வளர்ச்சி வேகம் அதிகரிப்பதோடு, வெங்காயம் திரட்சியாக இருக்கும். வாரம் ஒரு முறை 2 லிட்டர் மீன் அமினோ அமிலம், 2 லிட்டர் பஞ்சகவ்யா ஆகியவற்றை 100 லிட்டர் தண்ணீரில் கலந்து பயிர்கள் மேல் தெளிக்க வேண்டும்.

வெங்காயப் பேன் உள்ளிட்ட பூச்சித்தாக்குதல் தென்பட்டால் இஞ்சி, பூண்டு, பச்சைமிளகாய் கரைசல் தெளிக்க வேண்டும். 75-ம் நாளுக்கு மேல் வெங்காயம் அறுவடைக்கு வரும். அறுவடை செய்த வெங்காயத்தை நிலத்திலேயே ஒரு வாரம் வெயிலில் காய வைக்க வேண்டும். பிறகு, பட்டறை அமைத்துச் சேமித்து வைக்க வேண்டும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism