Published:Updated:

சிட்டுக்குருவி - கொசுக்களை அழிக்கும்... பூச்சிகளை கட்டுப்படுத்தும்!

சிட்டுக்குருவி - கொசுக்களை அழிக்கும்... பூச்சிகளை கட்டுப்படுத்தும்!
பிரீமியம் ஸ்டோரி
சிட்டுக்குருவி - கொசுக்களை அழிக்கும்... பூச்சிகளை கட்டுப்படுத்தும்!

சூழல்ஆர்.குமரேசன் - படங்கள்: வீ.சக்திஅருணகிரி

சிட்டுக்குருவி - கொசுக்களை அழிக்கும்... பூச்சிகளை கட்டுப்படுத்தும்!

சூழல்ஆர்.குமரேசன் - படங்கள்: வீ.சக்திஅருணகிரி

Published:Updated:
சிட்டுக்குருவி - கொசுக்களை அழிக்கும்... பூச்சிகளை கட்டுப்படுத்தும்!
பிரீமியம் ஸ்டோரி
சிட்டுக்குருவி - கொசுக்களை அழிக்கும்... பூச்சிகளை கட்டுப்படுத்தும்!

‘‘சின்னஞ்சிறிய வண்ணப்பறவை எண்ணத்தைச் சொல்லுதம்மா.. அது இன்னிசையோடு தன்னை மறந்து சொன்னதைச் சொல்லுதம்மா...’’ என்ற பாடலைக் கேட்கும் போதெல்லாம் நினைவின் இடுக்கிலிருந்து பட்டெனப் பறக்கும் ஒரு சிட்டுக்குருவி. மனிதர்களோடு மனிதர்களாகக் கலந்து வாழ்ந்த இந்தச் சின்னஞ்சிறிய உயிர், அழிவின் விளிம்பில்  இருக்கிறது. உயிர்பன்மயத்தை உயிர்ப்போடு வைத்திருக்க உயிர்ச்சங்கிலி எத்தனை முக்கியமானது என்பது நமக்குத் தெரியும். ஆனால், மனிதனின் ஒவ்வொரு செயலும் அந்தச் சங்கிலியின் கண்ணிகளைக் காவு வாங்கிக்கொண்டே இருக்கிறது. விளைவு புவிவெப்பம், நோய்களின் பெருக்கம், சூழல்கேடு, ஆரோக்கியக்கேடு என நமது செயலுக்கான பலன் பலவழிகளில் திரும்பத் திரும்ப வந்து துவைத்தெடுக்கிறது. 

சிட்டுக்குருவி - கொசுக்களை அழிக்கும்... பூச்சிகளை கட்டுப்படுத்தும்!

கூரைகள், வீடுகளின் முற்றங்கள், இடுக்குகளில் தனக்கான கூடுகளைத் தானே வடிவமைத்துக்கொண்டு காலையில், ‘க்வீச்...க்வீச்...’ எனக் குட்டிக் குயிலாகத் துயிலெழுப்பும் சிட்டுக் குருவிகளின் சத்தம் இன்றைக்குக் கேட்பது அரிதாகிவிட்டது.கிராமங்களிலேயே இந்தச் சத்தம் அரிதானபோது நகரங்களில் கேட்கவே வேண்டாம். உயிர்பன்மயத்தில் உடைந்து போன கண்ணிகளை ஒட்ட வைக்கும் முயற்சியில் உலகம் ஈடுபட்டுக் கொண்டிருக்கிறது. அதன் ஒரு பகுதியாகச் சிட்டுக் குருவிகளின் எண்ணிக்கையை அதிகரிப்பதற்காகப் பல்வேறு முயற்சிகள் எடுக்கப்படுகின்றன.

சிட்டுக்குருவிகளைப் பற்றிய விழிப்பு உணர்வு ஏற்படுத்துவதற்காக மார்ச் 20-ம் தேதி உலகச் சிட்டுக்குருவிகள் தினமாகக் கொண்டாடப்படுகிறது. 2010-ம் ஆண்டு முதல் இது கொண்டாடப்பட்டு வருகிறது. இதன் முக்கியத்துவத்தை உணர்த்தும் விதமாக டெல்லி அரசு இதை மாநிலப் பறவையாக அறிவித்துள்ளது.

தென்னை ஓலையின் நார் கிழித்து, சின்னஞ்சிறிய அலகால் கூடுகளைப் பின்னும் அழகே அலாதியானது. சிட்டுக்குருவியில் ஒருவகையான தேன்சிட்டு சோளம், கம்பு ஆகிய தானியப் பயிர்களின் ஒற்றைத் தட்டையில் கூடுகட்டி வசிக்கும். தானியங்கள், சிறிய பூச்சியினங்கள், சில தாவரங்களின் பூக்கள்தான் சிட்டுக்குருவிகளின் உணவு. சிட்டுகளின் அழிவால், பயிர்களில் மகரந்தச்சேர்க்கை பாதிக்கப்பட்டு, மகசூலும் குறைந்து வருகிறது என்கிறார்கள் அறிவியலாளர்கள்.

அடைக்கலக்குருவி, ஊர்க்குருவி எனப் பல பெயர்களில் அழைக்கப்படும் சிட்டுக்குருவிகள், காகத்துக்கு அடுத்து மனிதர்களுடன் நெருக்கமாக வாழும் பறவை. செல்போன் அலைக்கற்றை கோபுரங்களிலிருந்து வரும் கதிர்வீச்சு, குருவிகளின் கருவைச் சிதைக்கிறது எனச் சொல்லப்பட்டாலும், அது இன்னமும் அறிவியல்ரீதியாக நிரூபிக்கப்படவில்லை. ஆனால், செல்போன் கோபுரங்கள் வருவதற்கு முன்பாகவே குருவிகளை விரட்டிவிட்டன நம்முடைய செயல்கள்.

மரங்கள் இல்லாத குடியிருப்புகள், வெளிக்காற்று உள்ளே வராமல் கட்டப்பட்ட வீடுகள், முற்றம் இல்லாத மூடிய வீடுகள் போன்ற காரணங்களால் சிட்டுகள் நகரங்களில் இருந்து நகர்ந்துவிட்டன. எரிவாயுக்களில் இருந்து வெளியேறும் ‘மெத்தைல் நைட்ரேட்’ காற்றில் கலந்து வளிமண்டலங்களை மாசுபடுத்துகின்றன. இதனால், சிட்டுக்குருவிகளுக்கு உணவாகும் சில பூச்சியினங்கள் அழிந்துபோகின்றன. உணவுப்பற்றாக்குறை சிட்டுக்குருவியை நகரங்களை விட்டே விரட்டிவிட்டது.

சிட்டுக் குருவிகள், பலசரக்குக் கடைகளில் சிந்திச்சிதறும் தானியங்களை உண்டுவந்தன. பல்பொருள் அங்காடிகள் வந்த பிறகு, அதற்கும் வாய்ப்பில்லாமல் போய்விட்டது. நகரங்களில் இருப்பதைப் போலவே கிராமப்பகுதிகளிலும் வாழ வழியில்லை. பயிர்களில் தெளிக்கும் ரசாயனங்கள், குறைந்துபோன சிறுதானிய சாகுபடி ஆகியவை இந்த இனம் அழியக் காரணங்களாகிவிட்டன. வேறு என்னதான் செய்யும் அந்தச் சின்னஞ்சிறிய உயிரினம்? வாழ்தலுக்காக உணவு கிடைக்கும் பகுதியை நோக்கி நகர்ந்துவிட்டன.

கொசுக்களின் முட்டை சிட்டுக்குருவிகளின் விருப்ப உணவு. குருவிகள் இல்லாததால், கொசுக்கள் கொட்டமடிக்கின்றன. நோய்கள் நம்மை வட்டமடிக்கின்றன. விவசாய நிலங்களில், சிட்டுக்குருவிகளின் நடமாட்டம் இருந்தால், பூச்சிகளின் எண்ணிக்கை கட்டுப்படும். இதனால், பூச்சிக்கொல்லி தெளிக்கும் செலவும் மிச்சமாகும்.

‘எவ்வளவு அடிச்சாலும் தாங்குறாண்டா’ என்னும் வடிவேல் காமெடிபோல, இத்தனை இன்னல்களுக்கும் இடையில் இன்னமும் வாழ்ந்துகொண்டுதான் இருக்கின்றன சிட்டுக்குருவிகள். அவற்றைக் காக்க வேண்டியது நம் சமூகக் கடமை.
முதலில், நம் குழந்தைகளுக்குக் குருவிகளை அறிமுகம் செய்து வையுங்கள். கடிகாரத்திலேயே குருவியின் ஓசையை மணிக்கொரு முறை கேட்டுக்கொண்டிருந்தது நம்மோடு போகட்டும். நம் குழந்தைகளாவது, சிட்டுகளின் சிம்பொனியைக் கேட்கட்டும். இதற்காக நாம் அதிகம் மெனக்கெட வேண்டாம். வாய்ப்பிருப்பவர்கள், வீடுகளில் சிட்டுக்குருவி தங்குவதற்கான வசதியை ஏற்படுத்திக் கொடுங்கள், வீட்டு மொட்டைமாடி, பால்கனி போன்ற இடங்களில் ஒரு கிண்ணத்தில் தண்ணீரும் கொஞ்சம் சிறுதானியங்களையும் வைத்தால் போதும் ஓடோடி வந்து உட்கார்ந்துவிடும் சிட்டுக்குருவி.

பழைய பானைகள், அட்டைப்பெட்டிகள் என ஏதாவது ஒன்றில் சிறிது வைக்கோல் நிரப்பி ஒரு மூலையில் வைத்துவிட்டால், குருவிகள் அதில் குடியேறிவிடும். தற்போது கடைகளில் சிட்டுக்குருவிகளுக்கான கூடுகள் கிடைக்கின்றன. நாம் மனது வைத்தால் நகரங்களிலும்கூட சிட்டுக்குருவிகளின் எண்ணிக்கையை அதிகமாக்கலாம். அதற்குத் தேவை கொஞ்சம் தானியமும் தண்ணீரும் அதைவிட நமக்குப் பெரிய மனதும் தேவை. இவையனைத்தும் நம்மிடம் இருக்கிறதுதானே?

ஒட்டுமொத்த விகடனுக்கும் ஒரே ஷார்ட்கட்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism