Published:Updated:

விளையும் விலையும்! - சந்தைக்கு வழிகாட்டும் தொடர் - 4

விளையும் விலையும்! - சந்தைக்கு வழிகாட்டும் தொடர் - 4
பிரீமியம் ஸ்டோரி
விளையும் விலையும்! - சந்தைக்கு வழிகாட்டும் தொடர் - 4

வாட்ஸ்அப் வழியாக விற்பனை - சாதித்துக் காட்டிய இயற்கைச் சங்கம்! சந்தைஅனந்து - தொகுப்பு: க.சரவணன்

விளையும் விலையும்! - சந்தைக்கு வழிகாட்டும் தொடர் - 4

வாட்ஸ்அப் வழியாக விற்பனை - சாதித்துக் காட்டிய இயற்கைச் சங்கம்! சந்தைஅனந்து - தொகுப்பு: க.சரவணன்

Published:Updated:
விளையும் விலையும்! - சந்தைக்கு வழிகாட்டும் தொடர் - 4
பிரீமியம் ஸ்டோரி
விளையும் விலையும்! - சந்தைக்கு வழிகாட்டும் தொடர் - 4

வெகுஜன சந்தைக்குப் பின்னால் இருக்கும் அரசியல், வெற்றிகரமான இயற்கை விவசாயச் சந்தைகள் மற்றும் மாற்றுச் சந்தைகளுக்கான வாய்ப்புகள் குறித்து அலசும் தொடர் இது... 

விளையும் விலையும்! - சந்தைக்கு வழிகாட்டும் தொடர் - 4

பெரும்பாலான விவசாயிகள், ‘விவசாயம் செய்தோமா, அதை கமிஷன் கடைக்கு அனுப்பினோமா... அதோடு தங்கள் கடமை முடிந்துவிட்டது’ என்றுதான் நினைக்கிறார்கள். விளைபொருள்களைத் தாமே சந்தைப் படுத்துவது குறித்து அவர்கள் யோசிப்பதேயில்லை. தாம் விளைவிக்கும் பொருள்களுக்கு நல்ல விலை கொடுக்கும் ஒரு வியாபாரி கிடைத்தால் போதும் என்றுதான் நினைக்கிறார்கள். பெரும்பாலானோருக்கு அப்படிப்பட்ட வியாபாரியைத் தேடுவதிலேயே ஆயுள் முடிந்துவிடுகிறது.

ஒட்டுமொத்த விகடனுக்கும் ஒரே ஷார்ட்கட்!

விளையும் விலையும்! - சந்தைக்கு வழிகாட்டும் தொடர் - 4



விவசாயிகளே நேர்மையான வியாபாரிகளாகவும் மாறி, தங்களது விளைபொருள்களைச் சந்தைப்படுத்த வேண்டியது அவசியம். ஆனால், நடைமுறையில் அது சாத்தியப்படாது என்றுதான் விவசாயிகள் சொல்லி வருகிறார்கள். ‘இல்லையில்லை... விவசாயிகள், வியாபாரிகளாக மாறுவது சாத்தியமே’ என்று அடித்துச் சொல்கிறார்கள், கர்நாடக மாநிலத்தின் வடமேற்குப் பகுதியில் இருக்கும் பெல்காம் மாநகரைச் சுற்றியிருக்கும் ‘இயற்கை உணவுச் சங்க’ விவசாயிகள்
(Organic Food Club-OFC).
 
கர்நாடக மாநிலத்தின் முன்னோடி இயற்கை மற்றும் பயோ டைனமிக் விவசாயிகளான அபய் முத்தாலிக் தேசாய், பசவராஜ் சித்தப்ப கப்சி, சுரேஷ் தேசாய் மற்றும் அசோக் துபாச்சி ஆகியோர் தங்கள் நிலங்களை இயற்கை விவசாயத்துக்கு மாற்றியதோடு, சுற்றியிருந்த விவசாயிகளையும் இயற்கை விவசாயம் செய்யத் தூண்டினார்கள். அதோடு, விளைபொருள்களை நுகர்வோரிடம் நேரடியாக விற்பனை செய்யும் வியாபாரிகளாகவும் மாற்றினார்கள். இப்படித்தான் இயற்கை உணவுச் சங்கம் உருவானது. பெல்காம் மாநகருக்கு அருகிலிருக்கும் யமகன்மர்தி என்ற கிராமத்தை மையமாகக் கொண்டு இந்தச் சங்கம் இயங்கிவருகிறது.

விளையும் விலையும்! - சந்தைக்கு வழிகாட்டும் தொடர் - 4

பெல்காம் மாவட்டத்திலுள்ள இயற்கை விவசாயிகளிடமிருந்து காய்கறிகள், பழங்கள், பருப்பு வகைகள், கரும்பு மற்றும் பிற விளைபொருள்களை வாங்கி... நேரடியாகவோ மதிப்புக்கூட்டியோ விற்பனை செய்கிறது, இயற்கை உணவுச் சங்கம். மகாராஷ்டிரா மற்றும் கர்நாடகா மாநிலங்களின் எல்லைப் பகுதியைச் சேர்ந்த 25 விவசாயிகளைக் கொண்டு, 2002-ம் ஆண்டில் இந்த அமைப்புத் தொடங்கப்பட்டது. 2004-ம் ஆண்டில் இது, சங்கமாகப் பதிவு செய்யப்பட்டது.

விளையும் விலையும்! - சந்தைக்கு வழிகாட்டும் தொடர் - 4

‘அமைப்பில் உறுப்பினராக இருக்கும் இயற்கை விவசாயிகளுக்கு நியாயமான நல்ல விலை கிடைக்க வேண்டும்; இடைத்தரகர்கள் இல்லாமல், விளைபொருள்களை நேரடியாக நுகர்வோருக்குக் கொண்டு சேர்க்க வேண்டும்’ என்பவைதான் சங்கத்தின் குறிக்கோள்கள்.

பெல்காம் மாநகரில் ஐந்நூறு குடும்பங்களுக்கு நேரடியாக விளைபொருள்களைச் சந்தைப்படுத்தி வருகிறது, இந்தச் சங்கம். ஆனாலும், இவர்களின் மொத்த விளைபொருள்களில் 45% அளவை மட்டும்தான் இந்த ஐந்நூறு குடும்பங்கள் வாங்கி வருகின்றன. மீதி விளைபொருள்கள், மும்பை மற்றும் பெங்களூரில் உள்ள இயற்கை அங்காடிகளுக்கு அனுப்பப் படுகின்றன. விளைபொருள்கள் ஒருபோதும், வழக்கமான சந்தைக்கு அனுப்பப்படுவதில்லை.

விளையும் விலையும்! - சந்தைக்கு வழிகாட்டும் தொடர் - 4



சங்கம் தொடங்கப்பட்ட சமயத்தில், 25 விவசாயிகளும் ஆளுக்கு 10 ஆயிரம் ரூபாய் முதலீடு செய்தனர். 2003-ம் ஆண்டில், பெல்காம் மாநகரின் ரோட்டரி சங்கம், அரிமா சங்கம் போன்ற அமைப்புகளிலிருந்த 84 நபர்களின் குடும்பங்களுக்குத்தான் இயற்கை விளைபொருள்கள் நேரடியாக விற்பனைக்குக் கொண்டு செல்லப்பட்டன. அடுத்த சில ஆண்டுகளில் விவசாய உறுப்பினர்களின் பங்களிப்போடு 3 சேமிப்புக் கிடங்குகளைக் கட்டியது, சங்கம். இதேபோல், 18,60,000 ரூபாய் செலவில் வெல்ல உற்பத்தி மையமும் நிறுவப்பட்டது. சங்கத்தின் துவக்கக் காலத்தில், முதல் மூன்று ஆண்டுகளுக்கு அரசே முன்வந்து அங்ககச் சான்றிதழுக்கான தொகையைக் (குழுவுக்கானது) கட்டியது.

ஒரு பக்கம் விவசாய உறுப்பினர்கள், மறுபக்கம் நுகர்வோர் என இருதரப்புக்கும் நடுவே தொடர்ந்து உரையாடலை நிகழ்த்திக் கொண்டிருந்தது, இயற்கை உணவுச் சங்கம். மூன்று மாதங்களுக்கு ஒருமுறை இரண்டாவது ஞாயிற்றுக்கிழமை, நுகர்வோர் தங்களது குடும்பங்களுடன் யமகன்மர்தி கிராமத்தில் நடந்த கூட்டங்களுக்கு வர ஊக்குவிக்கப் பட்டனர். ஒவ்வொரு மாதமும் விவசாய உறுப்பினர்களுக்கான கூட்டங்களும் நடந்தன. 

விளையும் விலையும்! - சந்தைக்கு வழிகாட்டும் தொடர் - 4

இடைத்தரகர்களைத் தவிர்த்து, நேரடியாக விற்பனையில் இறங்கியதால் 40% வரை லாபம் அதிகரித்தது. இருப்பு வைக்க முடிந்த பொருள்களுக்குச் சந்தை விலையைவிட 25% கூடுதல் விலை கிடைத்தது. சந்தையின் விலையைக் கணக்கில் கொள்ளாமல், உற்பத்திச் செலவைப் பொறுத்து சீரான விலை நிர்ணயம் செய்யப்பட்டது. எட்டு வாரங்களுக்கான முன்பணத்தை நுகர்வோர் கட்டினர். கொள்முதல் செய்யப்பட்ட 15 நாள்களுக்குள் விவசாயிகளுக்குப் பணம் பட்டுவாடா செய்யப்பட்டது.

வெங்காயம், உருளைக்கிழங்கு, மிளகாய், பூண்டு, இஞ்சி மற்றும் கொத்தமல்லித் தவிர, 4 காய்கறிகளை உள்ளடக்கிய (2 சாலட் காய் வகைகள், 2 இலைகளுடன் கூடிய காய் வகைகள்) 12 கிலோ எடையுள்ள காய்கறிகள் கூடை, ஒவ்வொரு வாரமும் அனைத்து நுகர்வோரின் வீடுகளுக்கும் அனுப்பப்பட்டது. தவிர, கோதுமை, பருப்பு வகைகள், நாட்டுச் சோளம் போன்றவையும் முன்பதிவு அடிப்படையில் பட்டுவாடா செய்யப்பட்டன.  விவசாயிகள், தங்களுக்குள் பேசிக் கொண்டு, பதின்மூன்று வகைக் காய்கறிகளைப் பயிரிட்டனர். 12 கிலோ அளவு காய்கறிகள் கொண்ட கூடை, 200 ரூபாய் விலைக்கு விற்பனை செய்யப்பட்டது. பெல்காம் மாநகர நுகர்வோருக்கு, வாரத்தில் 30 டன் காய்கறிகள் விற்பனைச் செய்யப்பட்டன. மற்ற பொருள்கள் 4 டன் அளவு வரை விற்பனை செய்யப்பட்டன. இதற்காக ஆறு வாடகை வாகனங்கள் பயன்படுத்தப்பட்டன. ஒரு வாரத்துக்கு4,80,000 ரூபாய் அளவுக்கு வியாபாரம் நடந்தது. இயற்கைச் சீற்றங்கள் மட்டுமே இந்த விவசாயிகளின் நஷ்டத்துக்குக் காரணமாக அமைந்தன. அடுத்தடுத்த நஷ்டங்களால் தற்போது, இச்சங்கம் வேறு வகையில் வாடிக்கையாளர்களுக்கு விளைபொருள்களை விற்பனை செய்து வருகிறது. 

விளையும் விலையும்! - சந்தைக்கு வழிகாட்டும் தொடர் - 4

இச்சங்கத்தை நிறுவியவர்களில் ஒருவரான அபய் முத்தாலிக் தேசாய், சங்கத்தின் தற்போதைய செயல்பாடுகள் குறித்துப் பகிர்ந்துகொண்டவை இங்கே இடம் பெறுகின்றன...

“2005-ம் ஆண்டில், எங்கள் பகுதியில் பெருமழை. அதனால், பயிர்கள் நாசமாகின. ஒப்புக்க்கொண்டபடி காய்கறிகள் மற்றும் விளைபொருள்களை வாடிக்கை யாளர்களுக்கு எங்களால் தர இயலவில்லை. எட்டு வாரங்களுக்கு முன்பே முன்பணம் அளித்த வாடிக்கையாளர்களுக்கு அது ஏமாற்றத்தை அளித்தது. அந்த நஷ்டத்திலிருந்து மீளவே எங்களுக்குச் சில காலம் ஆனது. அதனால், எங்கள் விற்பனை முறையை மாற்றிக்கொன்டோம். தற்போது, ஒவ்வொரு வாரமும் திங்கள் மற்றும் வியாழக்கிழமைகளில், ஒரு குறிப்பிட்ட இடத்தில் விளைபொருள்களை விற்பனை செய்கிறோம். எங்கள் வாடிக்கையாளர்களுக்கு வாட்ஸ்அப் மூலம், அன்றைய விளைபொருள்கள் குறித்த தகவல்களை அனுப்பி வருகிறோம். வாட்ஸ் அப் மூலமாகவே வாடிக்கையாளர்கள் முன்பதிவும் செய்துகொள்ள முடியும்.

மதியம் 3 மணியிலிருந்து இரவு 9 மணி வரை வியாபாரம் நடக்கிறது. அதனால், முன்பதிவு செய்துகொண்டு வசதிப்பட்ட நேரத்தில், வாடிக்கையாளர்கள் வந்து வாங்கிக்கொள்கிறார்கள். வாரத்துக்கு 2 டன் அளவில் 15 முதல் 20 வகையான காய்கறிகள் விற்பனையாகின்றன. தானியங்கள், பருப்பு வகைகள் ஆகியவை வாரத்துக்கு 200 கிலோ வரை விற்பனையாகின்றன. இங்கு எந்தக் காயாக இருந்தாலும், ஒரு கிலோ 40 ரூபாய்தான். ஆண்டு முழுக்க இதே விலைதான்” என்கிறார், அபய் முத்தாலிக். 

விளையும் விலையும்! - சந்தைக்கு வழிகாட்டும் தொடர் - 4

சங்கம் மூலம், ரசாயன வேளாண்மையின் தீமை குறித்த விழிப்பு உணர்வு கூட்டங்கள் நடத்தப்பட்டு வருகின்றன. ஆயிரக் கணக்கானோருக்கு இயற்கை விவசாய பயிற்சி அளிக்கப்பட்டுள்ளது. ஆனாலும், கடுமையான தரக்கட்டுப்பாடுகள் விதிக்கப்படுவதால், இன்றும் எட்டுக் குடும்பங்களைச் சேர்ந்த 25 இயற்கை விவசாயிகள் மட்டும்தான் சங்கத்தில் உறுப்பினர்களாக இருக்கிறார்கள். உறுப்பினர்களுக்கு அங்ககச்சான்று வாங்கும் செலவைச் சங்கமே ஏற்றுக்கொள்கிறது.

சங்கம் மூலம் தயாரிக்கப்படும் இயற்கை வெல்லத்துக்கு, மும்பையில் இயங்கிவரும் ‘கன்ட்ரோல் யூனியன்’ தரச்சான்றிதழ் வழங்கியுள்ளது. தற்போது வெல்லம், தூள் வெல்லம் ஆகியவை ஐரோப்பிய நாடுகளுக்கு ஏற்றுமதி செய்யப்படுகின்றன. 

‘தரக் கட்டுப்பாட்டையோ அல்லது விளைபொருள்களின் உண்மைத் தன்மையையோ சட்டத்தின் மூலம் உறுதிசெய்ய முடியாது. அது விவசாயிகளின் தார்மிகப் பொறுப்பால் மட்டுமே சாத்தியம்’ என இச்சங்கத்தின் உறுப்பினர்கள் உணர்ந்து நுகர்வோரின் நம்பிக்கையைக் கெடுக்காதவாறு செயல்பட்டு வருகிறார்கள்.

அதனால்தான், விவசாயிகளே நியாயமான வியாபாரிகளாக மாறி, வெற்றிகரமாகத் தங்கள் பொருள்களைச் சந்தைப்படுத்த முடியும் என்பதற்கு, இந்திய அளவில் சிறந்த எடுத்துக்காட்டாகத் திகழ்கிறது, இந்த இயற்கை உணவுச் சங்கம். கிட்டத்தட்ட
15 ஆண்டுகளுக்குப் பிறகும், மாற்றுச் சந்தைக்கான நம்பிக்கை நட்சத்திரமாக ஒளிர்ந்து வருகிறது.

இப்படிப்பட்ட வித்தியாசமான, வெற்றிகரமான முயற்சிகளைத் தொடர்ந்து பார்ப்போம்.

- விரிவடையும்

தொடர்புக்கு: A.B. துபாச்சி, யமகன்மர்தி கிராமம், செல்போன்: 094481 26953 அபய் முத்தாலிக் தேசாய், சுதகத்தி (பெல்காம்) கர்நாடக மாநிலம். செல்போன்: 099007 75633

விவசாய நிபுணர்கள்!

யற்கை உணவுச் சங்கத்தின் நிறுவனர்களான சுரேஷ் தேசாய், அசோக் முத்தாலிக் தேசாய், அசோக் துபாச்சி ஆகியோர், கர்நாடக மாநிலத்தின் முக்கியமான இயற்கை விவசாய வல்லுநர்களாகவும் உள்ளார்கள். கர்நாடக மாநில அரசின்  2005-06-ம் ஆண்டுக்கான ‘க்ருஷி பண்டிட்’ (விவசாய வல்லுநர்) பட்டம் சுரேஷ் தேசாய்க்கும் அசோக் முத்தாலிக் தேசாய்க்கும் வழங்கப் பட்டுள்ளது. 2006-07-ம் ஆண்டில், துபாச்சிக்கு இப்பட்டம் வழங்கப்பட்டுள்ளது. இவர்கள், கர்நாடகா மற்றும் மகாராஷ்டிரா மாநிலங்களிலுள்ள அரசு மற்றும் அரசுச் சாரா பல்கலைக்கழகங்கள், கூட்டுறவுச் சங்கங்கள் ஆகியவற்றில் பயிற்சி அளித்துள்ளனர். தேசிய தோட்டக்கலை திட்டம் மூலமும் பயிற்சி அளித்து வருகின்றனர். கர்நாடக அரசு 2004-ம் ஆண்டில், இயற்கை வேளாண்மைக் கொள்கையைக் கொண்டு வந்தபோது இவர்கள் அதில் பங்கு வகித்துள்ளனர்.

முடிவுகளை எடுக்கும் குழு

முடிவுகள் எடுக்கும் குழுவில் சங்கத்தைத் நிறுவியவர்கள் எப்போதும் நிரந்தர உறுப்பினர்களாக இருப்பர். அவர்களில்லாமல், ஆண்டுதோறும் இக்குழுவுக்கு 7 உறுப்பினர்கள் தேர்ந்தெடுக்கப்படுகிறார்கள். இந்தக்
குழுவே முடிவுகளை எடுத்துச் செயல்படுத்தும். சங்கத்தின் நடவடிக்கைகள், கூட்டங்களில் விவாதிக்கப்பட்ட விஷயங்கள், எடுக்கப்பட்ட முடிவுகள் அத்தனையும் ஆவணப்படுத்தப்பட்டு வருகின்றன. கணக்குத் தணிக்கையும் வெளிப்படையாக நடக்கிறது.

“அரசின் உதவி வேண்டும்”

“இயற்கை விளைபொருள்களைப் பதப்படுத்த, மதிப்புக்கூட்ட இயந்திரங்கள் மற்றும் இட வசதி; விளைபொருள்களை விற்பனை செய்ய இலவச இட வசதி ஆகியவற்றை அரசே இயற்கை விவசாயிகளுக்கு ஏற்படுத்தித் தர வேண்டும். அதிக இருப்புக்காலம் கொண்ட இயற்கை விளைபொருள்களை அரசே கொள்முதல் செய்தால், இயற்கை விவசாயப் பொருள்களைச் சந்தைப்படுத்துவது எளிதாகும்” என்கிறார், இயற்கை உணவுச் சங்கத்தின் தலைவர் அசோக் துபாச்சி.

அபய் முத்தாலிக் தேசாய்

1980
-களின் இறுதியில் தொடர்ந்து மூன்று ஆண்டுகள் வறட்சி நீடித்ததால், கரும்பு விவசாயம் செய்து வந்த தேசாயின் குடும்பம் பெரும் கடனில் மூழ்கியது. அப்போது பொறியியல் துறையில் பணியாற்றி வந்தார் தேசாய். தொடர்ந்து நஷ்டம் நீடித்ததால், தன் குடும்பத்தை மீட்பதற்காக 1992-ம் ஆண்டில், வேலையை உதறிவிட்டு விவசாயத்துக்கு வந்தார். கர்நாடக மாநிலத்தின் முன்னோடி இயற்கை விவசாயியான ஆனந்த்தை தனது குருநாதராக ஏற்றுக்கொண்டு, அவரின் வழிகாட்டுதலின்படி முழு நேர இயற்கை விவசாயியாக மாறிவிட்டார், தேசாய். தொடர்ந்து, ஏராளமான விவசாயிகளை இயற்கை விவசாயத்தின் பக்கம் திருப்பியுள்ளார்.