Published:Updated:

தாய்லாந்தில் ஈரோடு மஞ்சள்... கடல் கடந்து கற்றுக் கொடுக்கும் விவசாயி!

தாய்லாந்தில் ஈரோடு மஞ்சள்... கடல் கடந்து கற்றுக் கொடுக்கும் விவசாயி!
பிரீமியம் ஸ்டோரி
தாய்லாந்தில் ஈரோடு மஞ்சள்... கடல் கடந்து கற்றுக் கொடுக்கும் விவசாயி!

பயணம் ஜி.பழனிச்சாமி - படங்கள்: ரமேஷ் கந்தசாமி

தாய்லாந்தில் ஈரோடு மஞ்சள்... கடல் கடந்து கற்றுக் கொடுக்கும் விவசாயி!

பயணம் ஜி.பழனிச்சாமி - படங்கள்: ரமேஷ் கந்தசாமி

Published:Updated:
தாய்லாந்தில் ஈரோடு மஞ்சள்... கடல் கடந்து கற்றுக் கொடுக்கும் விவசாயி!
பிரீமியம் ஸ்டோரி
தாய்லாந்தில் ஈரோடு மஞ்சள்... கடல் கடந்து கற்றுக் கொடுக்கும் விவசாயி!

தாய்லாந்து நாட்டுக்குச் சென்று அந்நாட்டு விவசாயிகளுக்கு மஞ்சள் சாகுபடித் தொழில்நுட்பங்களைக் கற்றுக்கொடுத்து வந்துள்ளார், ஈரோடு மாவட்டத்தைச் சேர்ந்த விவசாயி ஒருவர். நெல், கரும்பு, மக்காச்சோளம் ஆகியவை மட்டுமே பயிர் செய்யப்பட்ட தாய்லாந்து மண்ணில் தற்போது, முதல் முறையாக மஞ்சளும் மணக்கிறது.

ஈரோடு மாவட்டம், சத்தியமங்கலம் அடுத்துள்ள வேடசின்னானுர் கிராமத்தைச் சேர்ந்த விவசாயி வி.எம்.ஆர். ராமமூர்த்திதான், தாய்லாந்தில் மஞ்சளுக்கு மரியாதை தேடித்தந்த பெருமைக்குரியவர்.

திரைகடல் ஓடி தொழில்நுட்பம் சொல்லிக் கொடுத்துவிட்டு வந்திருக்கும் ராமமூர்த்தியைச் சந்தித்துப் பேசினோம்.

தாய்லாந்தில் ஈரோடு மஞ்சள்... கடல் கடந்து கற்றுக் கொடுக்கும் விவசாயி!

“எனக்குப் பூர்விகம் இந்த ஊருதான். இங்கே 24 ஏக்கர் நஞ்சை நெலம் இருக்கு. போட்டது வெளையும் பொன்னான பூமி. 75 வருஷமா, மஞ்சள் விவசாயம் செஞ்சுட்டிருக்கிற குடும்பம். பாசனத்துக்குப் பவானி சாகர் அணைத் தண்ணீர்தான். அதுபோக, கேணியும் இருக்கு. நான் பொறந்தது வளர்ந்தது எல்லாமே மஞ்சள் காட்டுக்குள்ளதான். அதனால, மஞ்சள் விவசாயம் முழுக்க முழுக்க எனக்கு அத்துப்படி.

வேளாண்துறை மூலமா சேலம், தருமபுரி, கிருஷ்ணகிரினு வெளி மாவட்ட விவசாயிங்க நெறைய பேரு, எங்க பகுதிக்கு வந்து மஞ்சள் விவசாயத்தைப் பத்தி தெரிஞ்சிக்கிட்டு போறாங்க. அப்படி வர்ற விவசாயிங்களை நானே என்னோட வயலுக்குக் கூட்டிட்டுப்போய் ஆர்வமாகச் சொல்லிக்கொடுப்பேன். அதுலதான் மத்தவங்களுக்குக் கற்றுக்கொடுக்குற வேலை ஆரம்பமாச்சு” என்று தன்னைப் பற்றி அறிமுகம் செய்துகொண்ட ராமமூர்த்தி தொடர்ந்தார். “ஆரம்பக்காலத்துல ஒடிசா மாநில நாட்டு ரகம், ஈரோடு நாட்டு ரக மஞ்சள் சாகுபடிதான் இங்கே அதிக அளவுல இருந்துச்சு. அப்புறம் படிப்படியா அதிக விளைச்சல் கொடுக்கக்கூடிய வீரிய ரகத்தைப் பயன்படுத்த ஆரம்பிச்சாங்க. அதுல பவானி சாகர் ஆராய்ச்சி மையத்தின் கண்டுபிடிப்பான கோ-1, கோ-2 ரகங்கள் முக்கியமானது. தொடர்ந்து அதிக மகசூல் கொடுக்கிற பல புதிய ரகங்களைக் கேரளா மாநிலம், கோழிக்கோடு வேளாண் ஆராய்ச்சி மையம் வெளியிட்டுச்சு. அதுல கிருஷ்ணா, சுகந்தன், சுவர்ணா, சுகுணா, சுதர்ஸன், பிரபா, பிரதிபானு 7 ரகங்கள் பிரபலமானது. குறிப்பா, பிரதிபா ரகத்துல சராசரி மகசூலைவிட ஏக்கருக்கு 10 டன் கூடுதலா மகசூல் கொடுக்கும்.

ஒட்டுமொத்த விகடனுக்கும் ஒரே ஷார்ட்கட்!

தாய்லாந்தில் ஈரோடு மஞ்சள்... கடல் கடந்து கற்றுக் கொடுக்கும் விவசாயி!

சத்தியமங்கலம், கவுந்தப்பாடி பகுதி மஞ்சள் விவசாயிங்க பிரதிபா மஞ்சளை விரும்பி சாகுபடி செய்றாங்க. நல்ல விளைச்சலும் எடுக்கிறாங்க. நானும் அந்த ரகத்தைத்தான் சாகுபடி செய்றேன். நல்ல மகசூல் கிடைச்சிட்டு இருக்கு. தாய்லாந்து அரசாங்கம், மஞ்சள் விவசாயத் தொழில்நுட்பங்களைப் பத்தி தெரிஞ்சுக்கிறதுக்காக விவசாயிகள் குழு ஒன்றை, போன வருஷம் செப்டம்பர் மாசம் இந்தியாவுக்கு அனுப்புச்சு. அந்த நாட்டு ‘முன்னோடி விவசாயி சனான்’ங்கிறவர்தான் விவசாயிகளை அழைச்சிட்டு வந்தார். அவங்க, தங்களோட நாட்டுக்கு ஏத்த ரகம் எதுனு கோழிக்கோடு வேளாண் ஆராய்ச்சி மைய விஞ்ஞானிகள்கிட்ட கேட்டப்போ பிரதிபா ரகத்தைப் பரிந்துரை செஞ்சிருக்காங்க. அப்புறம் அந்த ரகத்தை வெற்றிகரமா சாகுபடி செய்ற என்னோட தோட்டத்துக்குத் தாய்லாந்து விவசாயிகள் வந்தாங்க.

அந்த விவசாயிகள், பாத்தி அமைப்பதுல தொடங்கி மஞ்சளைப் பாலீஷ் செய்ற வரைக்கும் எல்லா விஷயங்களையும் ஒரு நாள் முழுவதும் இருந்து நேர்ல பாத்து, கேட்டுத் தெரிஞ்சிகிட்டாங்க. அப்படியே இன்னும் சிலரோட மஞ்சள் வயல்களையும் பார்த்தாங்க. அவங்க கிளம்புறப்போ, சனான் என்கிட்ட வந்து, ‘இங்கே சுத்திப்பார்த்ததுல மஞ்சள் விவசாயத்தின் மகிமையை நல்லா புரிஞ்சிகிட்டோம். எங்க நாட்டுல மஞ்சள் சாகுபடி செய்ய முடிவு செஞ்சிருக்கோம். எங்க ஊரு மண், தண்ணீர், சீதோஷ்ண நிலை மஞ்சளுக்கு ஒத்து வருமாங்கிறதை நீங்க வந்து பார்த்து ஆலோசனை சொல்லணும்’னு கேட்டார். நானும் சரினு சொல்லிட்டேன்” என்ற ராமமூர்த்தித் தொடர்ந்தார்.

தாய்லாந்தில் ஈரோடு மஞ்சள்... கடல் கடந்து கற்றுக் கொடுக்கும் விவசாயி!

“அதுக்கப்புறம் மூணு மாசம் கழிச்சு, தாய்லாந்துக்கு வரச் சொல்லி அழைப்புக் கொடுத்தார் சனான். போக்குவரத்து, தங்கும் செலவு எல்லாத்தையும் அவங்களே பார்த்துக்கிறதா சொன்னாங்க. அதுக்கப்புறம் போன வருஷம் டிசம்பர் 1-ம் தேதி, பல மொழிகள் தெரிஞ்ச நண்பர் ஒருத்தரை அழைச்சுக்கிட்டு தாய்லாந்து போனேன். அந்த நாட்டில் மூன்று மாகாணங்கள்ல பத்துக்கும் மேற்பட்ட கிராமங்களுக்குக் கூட்டிட்டுப் போனாங்க. 15 நாள் அங்க தங்கியிருந்து அந்த விவசாயிகளுக்குப் பயிற்சி கொடுத்தேன்.

‘வருஷத்தில் 6 மாசம் இங்கே மழைபெய்யும்’னு சொன்னாங்க. அதனால வடிகால் வசதி செய்யச் சொன்னேன். மண் அதிக ஈரப்பதத்தோட இருக்கிறதால மேட்டுப்பாத்தி அமைச்சு மஞ்சள் சாகுபடி செய்யச் சொன்னேன். 100 அடி நீளம், 2 அடி உயரம், 3 அடி அகலம் கொண்ட மேட்டுப் பாத்திகளை அமைச்சும் கொடுத்தேன்.

தாய்லாந்தில் ஈரோடு மஞ்சள்... கடல் கடந்து கற்றுக் கொடுக்கும் விவசாயி!

தாய்லாந்திலும் மாடுகள் அதிகம் இருக்கு. அதனால தொழுவுரப்பயன்பாடு, பஞ்சகவ்யா தயாரிக்கிறது எல்லாத்தையும் சொல்லிக் கொடுத்தேன். அதையெல்லாம் அந்த நாட்டு வேளாண் துறை அதிகாரிகளும் குறிப்பெடுத்து வெச்சுக்கிட்டாங்க. வீடியோவாவும் பதிஞ்சுக்கிட்டாங்க. இப்போ அங்க மூன்று மாகாணங்கள்ல 400 ஏக்கர் நிலத்துல மஞ்சள் சாகுபடி செய்ய முடிவு செஞ்சுருக்காங்க. அதுக்குத் தேவையான 400 டன் விதை மஞ்சளை பஞ்சகவ்யாவில் விதைநேர்த்தி் செஞ்சு கப்பல்ல அனுப்பி வெச்சிருக்கேன்” என்ற ராமமூர்த்தி நிறைவாக,

“அந்த நாட்டிலிருந்து கிளம்பும்போது, தாய்லாந்து நாட்டின் சிங்கராய் மாகாண கவர்னர் தலைமையில் வேளாண் அதிகாரிகள், விவசாயிகள் எல்லாரும் விமான நிலையத்துக்கு வந்து எங்களை வழியனுப்பினாங்க. இது நம்ம இந்திய விவசாயத்துக்குக் கிடைச்ச பெருமை. எட்டாவது வரைக்கும்தான் நான் படிச்சிருக்கேன். எனக்கு இந்த அளவு பெருமை வாங்கிக் கொடுத்தது நான் செய்ற மஞ்சள் விவசாயம்தான்” என்றார் நெகிழ்ச்சியாக.

தொடர்புக்கு,
வி.எம்.ஆர்.ராமமூர்த்தி,
செல்போன்: 94423 52121.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism